Житїѧ̑ ст҃ы́хъ ѿ ст҃а́гѡ дими́трїа росто́вскагѡ/Деке́мврїй/ѕ҃

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Деке́мврїа є҃

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а деке́мврїа въ ѕ҃ де́нь

Деке́мврїа з҃→

Мцⷭ҇а деке́мврїа въ ѕ҃ де́нь,
житїѐ и҆́же во ст҃ы́хъ ѻ҆ц҃а̀ на́шегѡ
нїкола́а а҆рхїепⷭ҇кпа мѷрлѷкі́йскихъ чꙋдотво́рца.

Чꙋдотво́рца вели́каго, помо́щника ско́раго, и҆ хода́таѧ къ бг҃ꙋ и҆зрѧ́днаго, ст҃лѧ хрⷭ҇то́ва нїкола́а возрастѝ лѷкі́йскаѧ страна̀ в̾ гра́дѣ нарица́емомъ пата́ра, ѿ чⷭ҇тны́хъ, бл҃горо́дныхъ, правовѣ́рныхъ, и҆ бога́тыхъ роди́телей. ѻ҆те́цъ є҆гѡ̀ бѣ̀ и҆́менемъ ѳеофа́нъ, ма́терь же но́на: та̀ бл҃гослове́ннаѧ дво́ица въ зако́нномъ сꙋпрꙋ́жествѣ бл҃гоче́стнѡ пребыва́юща, всѧ́кимъ же ѹ҆краша́юща себѐ добронра́вїемъ, бг҃оꙋго́днагѡ ра́ди житїѧ̀ своегѡ̀, мно́гихъ же млⷭ҇тынь и҆ вели́кихъ добродѣ́телей сподо́вишасѧ произвитѝ ст҃ꙋ́ю вѣ́твь, са́ми сꙋ́ще ко́рень ст҃ъ, и҆ ꙗ҆́кѡ дре́во насажде́нное при и҆схо́дищихъ вѡ́дъ да́ша пло́дъ сво́й во вре́мѧ своѐ. Роди́вше же бж҃е́ственнаго сего̀ ѻ҆́трока, нареко́ша и҆́мѧ є҆мꙋ̀ нїкола́й, є҆́же сказꙋ́етсѧ побѣжда́ѧй лю́ди, впра́вдꙋ бо то́й ѕло́бы побѣди́тель ꙗ҆ви́сѧ, бг҃ꙋ та́кѡ бл҃говоли́вшꙋ на ѻ҆́бщꙋю мі́ра по́лзꙋ. По рожде́нїи же а҆́бїе ма́терь є҆гѡ̀ но́на ѿ болѣ́зни свободи́сѧ, и҆ ѿ тогѡ̀ вре́мене пребы́сть непло́ды да́же до разрѣше́нїѧ ѿ плотска́гѡ сою́за, самомꙋ̀ є҆стествꙋ̀ и҆сповѣ́дꙋющꙋ, ꙗ҆́кѡ невозмо́жно дрꙋга́го такова́го роди́ти сы́на, но є҆ди́наго сего̀ и҆мѣ́ти пе́рваго и҆ послѣ́днѧго, и҆́же ѿ ѹ҆тро́бы ма́терни бг҃одх҃нове́нною ѡ҆ст҃и́всѧ блгⷣтїю, не пе́рвѣе нача̀ сосцы̀ сса́ти, не́же чꙋдодѣ́йствовати, ни ꙗ҆́сти пе́рвѣе навы́че, не́же пости́тисѧ: и҆́бо по рожде́нїи свое́мъ в̾ кꙋпѣ́ли сы́й трѝ часа̀ стоѧ́ше на нога́хъ свои́хъ са́мъ ѡ҆ себѣ̀, никомꙋ́же є҆го̀ поддержа́щꙋ, че́сть воздаѧ̀ стоѧ́нїемъ тѣ́мъ ст҃ѣ́й трⷪ҇цѣ, є҆́йже по́слѣжде и҆мѣ̀ бы́ти вели́кїй слꙋжи́тель и҆ предста́тель. Є҆гда́ же прилага́шесѧ къ пе́рсемъ ма́тере своеѧ̀, ѿ сосе́цъ ма́тернихъ познава́шесѧ чꙋдотво́рецъ, пита́ѧсѧ не по ѻ҆бы́чаю про́чїихъ млⷣнцєвъ, десна́гѡ бо то́чїю сосца̀ млеко̀ сса́ше, десно́е со блгⷭ҇ве́нными и҆мы́й полꙋчи́ти стоѧ́нїе. но и҆ по́стникъ и҆зрѧ́денъ бы́ти начина́ше, в̾ сре́дꙋ бо и҆ пѧто́къ є҆ди́ною вкꙋша́ше ѿ сосца̀ млека̀, и҆ то̀ во вре́мѧ вече́рнее по соверше́нїи ѻ҆бы́чнагѡ хрⷭ҇тїа́нѡмъ пра́вила. ѡ҆ чесо́мъ роди́тели є҆гѡ̀ ѕѣлѡ̀ чꙋдѧ́хꙋсѧ, и҆ како́въ по́слѣжде по́стникъ бы́ти и҆мѣ̀, проразꙋмѣва́хꙋ. По́стническомꙋ бо томꙋ̀ ѻ҆бы́чаю бл҃же́нный ѿ пеле́нъ навы́кши, во всѐ житїѐ своѐ да́же до бл҃же́нныѧ кончи́ны соблюдѐ сре́дꙋ и҆ пѧто́къ препровожда́ѧ въ постѣ̀. Растꙋ́щи же ѻ҆́трокъ лѣ́ты, растѧ́ше вкꙋ́пѣ и҆ ра́зꙋмомъ и҆ нра́вы бл҃ги́ми, и҆̀мже ѿ до́брыхъ роди́телей быва́ше ѹ҆чи́мый. и҆ бѣ̀ ꙗ҆́кѡ ни́ва плодови́та до́брое поꙋче́нїѧ сѣ́мѧ въ себѐ прїе́млющаѧ и҆ прозѧба́ющаѧ, но́выѧ же по всѧ̀ днѝ бл҃гонра́вїѧ плоды̀ приносѧ́щаѧ. та́же вре́мени приспѣ́вшꙋ, вда́нъ бы́сть въ наꙋче́нїе бжⷭ҇твеннагѡ писа́нїѧ. ѻ҆́нъ же є҆сте́ственнагѡ ѹ҆ма̀ быстрото́ю, и҆ дх҃а ст҃а́гѡ наставле́нїемъ, въ ма́лѣмъ вре́мени мно́гꙋю пости́же премꙋ́дрость. и҆ толи́кѡ въ кни́жномъ ѹ҆че́нїи ѹ҆спѣ̀, є҆ли́кѡ до́бромꙋ хрⷭ҇то́ва кораблѧ̀ ко́рмчїю, и҆ и҆скꙋ́сномꙋ слове́сныхъ ѻ҆ве́цъ па́стырю потре́бно бѧ́ше. соверше́нъ ѹ҆́бѡ бы́въ въ сло́вѣ ѹ҆че́нїѧ, соверше́нъ и҆ въ дѣ́лѣ житїѧ̀ показа́сѧ: ѿ дрꙋгѡ́въ сꙋ́етныхъ и҆ бесѣ́дъ тще́тныхъ ѹ҆клонѧ́шесѧ всѧ́кѡ, съ жена́ми глаго́лати, и҆лѝ ѻ҆́комъ на лицѐ же́нско воⷥзрѣ́ти соблюда́шесѧ весма̀, и҆ бѣ́гаѧ тогѡ̀ ѿ сопребыва́нїѧ таковы́хъ ли́цъ ѹ҆далѧ́шесѧ. хранѧ́ше же и҆́стинное цѣломꙋ́дрїе, чи́стымъ ѹ҆мо́мъ прⷭ҇нѡ бг҃а зрѧ́щи, и҆ во ст҃ѣ́й цр҃кви всегда̀ ѹ҆пражнѧ́ющисѧ, по гл҃ющемꙋ: И҆зво́лихъ примета́тисѧ въ домꙋ̀ бг҃а моегѡ̀ (Ѱал. п҃г : а҃і). и҆дѣ́же мно́жицею цѣ́лыѧ днѝ и҆ нѡ́щи на бг҃омы́сленной мл҃твѣ и҆ бжⷭ҇твенныхъ кни́гъ чте́нїи препровожда́ющи, ра́зꙋмꙋ дх҃о́вномꙋ ѹ҆ча́шесѧ, и҆ ѿтꙋ́дꙋ бжⷭ҇твенными ѡ҆богаща́шесѧ блгⷣтми ст҃а́гѡ дх҃а, є҆мꙋ́же ѹ҆строѧ́ше себѐ до́мъ досто́инъ, ꙗ҆́коже є҆́сть пи́сано: Вы̀ хра́мъ бж҃їй є҆стѐ, и҆ дх҃ъ бж҃їй живе́тъ въ ва́съ (а҃ Кор. г҃ : ѕ҃і). и҆мѣ́ѧ же добродѣ́телный и҆ чи́стый ю҆́ноша живꙋ́щаго въ себѣ̀ дх҃а бж҃їѧ, пока́зовашесѧ ве́сь дх҃о́венъ, дх҃омъ горѧ́щи, гдⷭ҇ꙋ рабо́тающи, и҆ не бѣ̀ въ не́мъ ви́дѣти нима́лѡ ю҆́ностныхъ нра́вѡвъ, но ста́рагѡ мꙋ́жа ѻ҆бы́чаи, чесѡ̀ ра́ди всѣ̑мъ бы́сть ди́венъ и҆ чⷭ҇тенъ. ꙗ҆́коже бо ста́рый чл҃вѣ́къ, а҆́ще и҆́мать ѻ҆бы́чай ю҆́ныхъ, ѿ всѣ́хъ посмѣва́етсѧ, си́це а҆́ще ю҆́ный и҆́мать нра́вы мꙋ́жа ста́рагѡ, ѿ всѣ́хъ со ѹ҆дивле́нїемъ почита́етсѧ. безмѣ́стна є҆́сть въ ста́рости ю҆́ность, чⷭ҇тна́ же и҆ красна̀ въ ю҆́ности ста́рость.

Бѣ́ же бл҃же́нномꙋ дѧ́дѧ є҆пⷭ҇кпъ гра́да тогѡ̀ тезоимени́тъ є҆мꙋ̀, нїкола́й бо нарица́шесѧ, и҆ ѿ тогѡ̀ семꙋ̀ ю҆нѣ́йшемꙋ нїкола́ю и҆́мѧ даде́сѧ. то́й ѹ҆́бѡ дѧ́дѧ ви́дѧ племѧ́нника своего̀ въ добродѣ́телномъ житїѝ ѹ҆спѣва́юща, и҆ мі́ра всѧ́чески ѹ҆странѧ́ющасѧ, совѣ́това роди́телемъ є҆гѡ̀, да вдадꙋ́тъ є҆го̀ на слꙋ́жбꙋ бг҃ꙋ. ѻ҆ни́ же не ѿреко́шасѧ дарова́ти гдⷭ҇ꙋ ча́до своѐ, є҆́же са́ми ꙗ҆́кѡ да́ръ ѿ негѡ̀ прїѧ́ша. и҆́бо пи́шетсѧ въ дре́внихъ кни́гахъ ѡ҆ ни́хъ, ꙗ҆́кѡ непло́ды бы́вше, и҆ ѹ҆жѐ чадоро́дїѧ ѿча́ѧвшесѧ, мно́гими мл҃твами и҆ слеза́ми и҆ млⷭ҇тынѧми ѿ бг҃а себѣ̀ сего̀ сы́на и҆спроси́ша, и҆ дарова́вшемꙋ є҆го̀ въ да́ръ привестѝ не жалѣ́ша. Прїе́мъ же є҆пⷭ҇кпъ ю҆́наго ста́рца и҆мꙋ́щаго сѣди́нꙋ мꙋ́дрость, и҆ во́зрастъ ста́рости житїѐ нескве́рно, возведѐ є҆го̀ по сщ҃е́ннымъ степе́нємъ на пресвѵ́терство, є҆го́же є҆гда̀ хїротониса́ше, ѡ҆бра́щсѧ къ наро́дꙋ въ цр҃кви бы́вшемꙋ, са́мъ и҆спо́лнивсѧ дх҃а ст҃а́гѡ, прⷪ҇ро́чествова гл҃ющи: сѐ бра́тїе но́вое ви́ждꙋ сл҃нце концє́мъ земны́мъ восходѧ́щее, и҆ печа̑лнымъ млⷭ҇тивное ѹ҆тѣше́нїе ꙗ҆влѧ́ющеесѧ: ѽ бл҃же́нное ста́до, є҆́же сего̀ и҆мѣ́ти себѣ̀ па́стырѧ сподо́битсѧ! се́й бо до́брѣ ѹ҆пасе́тъ заблꙋ́ждшихъ дш҃ы, и҆ на па́жити бл҃гоче́стїѧ препита́етъ и҆̀хъ, и҆ помо́щникъ те́плъ сꙋ́щымъ въ бѣда́хъ ꙗ҆ви́тисѧ и҆́мать. сїе́ же прорече́нїе послѣдѝ и҆ дѣ́ломъ сбы́стьсѧ, ꙗ҆́коже предлежа́щаѧ ꙗ҆ви́тъ по́вѣсть. Пресвѵ́терскїй ѹ҆́бѡ са́нъ ст҃ы́й нїкола́й на сѧ̀ прїе́мъ, трꙋды̀ къ трꙋдѡ́мъ прилага́ше, во бдѣ́нїи и҆ постѣ̀ и҆ непреста́нной мл҃твѣ пребыва́ющи, и҆ безплѡ́тнымъ въ ме́ртвенномъ свое́мъ тѣ́лѣ подража́ти тща́щисѧ. Та́кѡ равноа́гг҃лнѣ живꙋ́щи, де́нь ѿ днѐ дꙋше́вною добро́тою бо́лѣе процвѣта́ше, и҆ цр҃ко́внагѡ правле́нїѧ досто́инъ пока́зовашесѧ. Въ то̀ вре́мѧ дѧ́дѧ є҆гѡ̀ є҆пⷭ҇кпъ нїкола́й восхотѣ́въ и҆тѝ въ палесті́нꙋ, да та́мѡ мѣста́мъ ст҃ы́мъ покло́нитсѧ, врꙋчѝ всѐ строе́нїе цр҃ко́вное племѧ́нникꙋ своемꙋ̀ семꙋ̀ і҆ере́ю бж҃їю ст҃о́мꙋ нїкола́ю: то́й ѹ҆́бѡ ѻ҆́нагѡ мѣ́сто и҆сполнѧ́ѧ, ѡ҆ цр҃ко́вномъ строе́нїи всѧ́кое попече́нїе творѧ́ше, ꙗ҆́коже и҆ са́мъ є҆пⷭ҇къ дѧ́дѧ є҆гѡ̀. тогда̀ роди́тели є҆гѡ̀ житїѐ вре́менное ѡ҆ста́вивше, на вѣ́чнꙋю жи́знь пресели́шасѧ: ст҃ы́й же нїкола́й наслѣ́дникъ и҆мѣ́нїй и҆́хъ бы́въ, раздаѧ́ше та̑ тре́бꙋющымъ. Не взира́ше бо на мимотекꙋ́щее бога́тство, ни ѡ҆ ѹ҆множе́нїи є҆гѡ̀ печа́шесѧ: но всѣ́хъ мїрски́хъ жела́нїй ѿре́ксѧ, тща́шесѧ є҆ди́номꙋ всеꙋсе́рднѡ присво́итисѧ бг҃ꙋ, къ немꙋ́же и҆ гл҃аше: Къ тебѣ̀ гдⷭ҇и воздвиго́хъ дꙋ́шꙋ мою̀ (Ѱал. к҃д : а҃). Наꙋчи́ мѧ твори́ти во́лю твою̀, ꙗ҆́кѡ ты̀ є҆сѝ бг҃ъ мо́й (Ѱал. рм҃в : і҃). Къ тебѣ̀ приве́рженъ є҆́смь ѿ ложе́снъ, ѿ чре́ва ма́тере моеѧ̀, бг҃ъ мо́й є҆сѝ ты̀ (Ѱал. к҃а : а҃і). и҆ бѣ̀ рꙋка̀ є҆гѡ̀ просте́рта къ тре́бꙋющымъ, ꙗ҆́кѡ рѣка̀ многово́дна, текꙋ́щаѧ преизоби́лнѡ стрꙋѧ́ми, є҆гѡ́же пребѡга́тыѧ млⷭ҇тыни ѹ҆до́бнѣе да позна́ютсѧ, є҆ди́но ѿ мно́гихъ млⷭ҇рдное є҆гѡ̀ дѣ́ло ꙗ҆влѧ́етъ сїѐ:

Бѣ̀ нѣ́кїй мꙋ́жъ въ гра́дѣ то́мъ ѿ сла́вныхъ и҆ бога́тыхъ, и҆́же послѣдѝ ѕѣлѡ̀ ѡ҆бнища́въ, несла́венъ и҆ ѹ҆бо́гъ сотвори́сѧ, и҆́бо вѣ́ка сегѡ̀ жи́знь не постоѧ́нна є҆́сть: и҆мѣ́ѧше же мꙋ́жъ то́й тре́хъ дще́рей лице́мъ ѕѣлѡ̀ кра́сныхъ, и҆ ѹ҆жѐ всѣ́мъ потре́бнымъ ѡ҆скꙋдѣ́шымъ є҆мꙋ̀, ꙗ҆́кѡ ѿню́дъ не и҆мѣ́ти ни пи́щи ни ѻ҆де́жды, мы́слѧше дще́рей свои́хъ на бра́къ скве́рный вда́ти, и҆ до́мъ сво́й блꙋди́лище сотвори́ти вели́кїѧ ра́ди своеѧ̀ нищеты̀: да бы̀ ѿтꙋ́дꙋ приѡбрѣ́тенїе возмо́глъ и҆мѣ́ти, себѣ́ же и҆ ѻ҆трокови́цамъ стѧжа́ти ѻ҆дѣѧ́нїе и҆ пи́щꙋ. Ѽ лю́тѣ, въ какова́ѧ неподо́бнаѧ помышле́нїѧ вмета́етъ нищета̀ послѣ́днѧѧ! Та́кѡ ѹ҆́бѡ мꙋ́жꙋ томꙋ̀ въ лꙋка́вомъ помышле́нїи поꙋча́ющꙋсѧ, и҆ въ дѣ́ло ѹ҆жѐ намѣ́ренїе своѐ ѕло́е ѻ҆каѧ́ннѣ произвестѝ хотѧ́щꙋ, бл҃гі́й є҆стество́мъ бг҃ъ, не хотѧ́й въ поги́бели є҆стества̀ чл҃вѣ́ческагѡ зрѣ́ти, но къ бѣда́мъ на́шымъ чл҃вѣ́колю́бнѡ прекланѧ́ѧйсѧ, вложѝ бл҃гость въ се́рдце ѹ҆го́дникꙋ своемꙋ̀ ст҃о́мꙋ і҆ере́ю нїкола́ю, и҆ къ погиба́ющемꙋ дꙋше́ю мꙋ́жꙋ, на по́мощь та́йнымъ вдохнове́нїемъ є҆го̀ посла̀, въ нищетѣ̀ сꙋ́щаго ѹ҆тѣша́ѧ, и҆ ѿ паде́нїѧ грѣхо́внагѡ пред̾избавлѧ́ѧ. и҆́бо послѣ́днее мꙋ́жа тогѡ̀ ѡ҆скꙋдѣ́нїе ст҃ы́й нїкола́й слы́шавъ, и҆ ѕло́е є҆гѡ̀ помышле́нїе бж҃їимъ ѿкрове́нїемъ ѹ҆вѣ́давъ, сожалѣ̀ ѡ҆ не́мъ ѕѣлѡ̀, и҆ бл҃годѣ́телною свое́ю рꙋко́ю ѿ нищеты̀ и҆ грѣха̀ со дще́рми того̀ а҆́ки ѿ ѻ҆гнѧ̀ и҆схи́тити ѹ҆мы́сли: ѻ҆ба́че не восхотѣ̀ ꙗ҆́вѣ прїитѝ къ мꙋ́жꙋ, и҆ ѡ҆ бл҃годѣѧ́нїи свое́мъ томꙋ̀ сказа́ти, но та́йнѡ ще́дрꙋю є҆мꙋ̀ млⷭ҇тыню пода́ти мы́слѧше. Сїе́ же двꙋ́хъ ра́ди ви́нъ: да и҆ са́мъ тще́тныѧ человѣ́ческїѧ ѹ҆бѣжи́тъ сла́вы, внима́ше бо рече́нномꙋ въ є҆ѵⷢ҇лїи: Внемли́те млⷭ҇тыни ва́шеѧ не твори́ти пред̾ чл҃вѣ́ки (Мт. ѕ҃ : а҃): и҆ да ѻ҆́нагѡ мꙋ́жа, бы́вшагѡ и҆ногда̀ бога́та, въ нищетꙋ́ же ве́лїю прише́дша не посрами́тъ. вѣ́дѧше бо, ꙗ҆кѡ тѧжка̀ сꙋ́ть такѡва́ѧ, ѿ бога́тства и҆ сла́вы во ѹ҆бо́жество впа́дающымъ: и҆́бо срамлѧ́ютъ тѣ́хъ дꙋ́шы, въ па́мѧть пре́жнее бл҃годе́нствїе приводѧ́ще. сегѡ̀ ра́ди и҆зрѧ́днѣе сотвори́ти ѹ҆мы́сли по словесѝ хрⷭ҇то́вꙋ: Да не ѹ҆вѣ́сть шꙋ́йца твоѧ̀, что̀ твори́тъ десни́ца твоѧ̀ (Мт. ѕ҃ : г҃). толи́кѡ бо бѣ́гаше чл҃вѣ́ческїѧ сла́вы, ꙗ҆́кѡ и҆ ѿ тогѡ̀ самагѡ̀, є҆мꙋ́же бл҃годѣ́телствоваше, тща́шесѧ себѐ ѹ҆таи́ти. Вели́къ ѹ҆́бѡ ѹ҆́золъ зла́та взе́мъ, въ полꙋ́нощи къ до́мꙋ мꙋ́жа тогѡ̀ прїи́де, и҆ нѣ́кїимъ ѻ҆ко́нцемъ внꙋ́трь хра́мины ѻ҆́ный вве́ргъ, са́мъ вско́рѣ въ сво́й до́мъ возврати́сѧ: заꙋ́тра же мꙋ́жъ воста́въ, и҆ ѹ҆́золъ ѡ҆брѣ́тъ разрѣшѝ: и҆ зла́то ви́дѣвъ ѹ҆жасе́сѧ, и҆ мечта́нїе себѣ̀ бы́ти вмѣнѧ́ше, боѧ́сѧ, да не ка́кѡ зла́то ви́димое пре́лесть бꙋ́детъ: поне́же такова́гѡ благодѣ́телѧ ниѿкꙋ́дꙋ не ча́ѧше. тѣ́мже концы̀ пе́рстѡвъ превраща́ѧ зла́то, и҆спы́тнѡ зрѧ́ше, и҆ позна́въ и҆́стинꙋ бы́ти, веселѧ́шесѧ, и҆ ѹ҆дивлѧ́шесѧ и҆ те́плыѧ ѿ ра́дости и҆спꙋща́ше сле́зы. мно́гѡ же размышлѧ́ше въ себѣ̀, кто́ бы сїѐ є҆мꙋ̀ благодѣѧ́нїе сотвори́лъ, и҆ не доꙋмѣва́шесѧ: бж҃їю ѹ҆́бѡ про́мыслꙋ то̀ причита́въ, непреста́ннѡ того̀ бл҃годарѧ́ше, хвалꙋ̀ воздаѧ̀ пекꙋ́щемꙋсѧ ѡ҆ всѣ́хъ гдⷭ҇ꙋ. и҆ та́кѡ є҆ди́нꙋ ѿ дще́рей свои́хъ старѣ́йшꙋю а҆́бїе мꙋ́жꙋ сочета̀, вда́нное же зла́то дово́лно сꙋ́що на прида́ное є҆ѧ̀ и҆здадѐ. ѡ҆ чесо́мъ ѹ҆вѣ́давъ чꙋ́дный нїкола́й, ꙗ҆́кѡ по во́ли є҆гѡ̀ сотворѝ мꙋ́жъ то́й, возлюбѝ є҆го̀, и҆ па́ки гото́въ ꙗ҆влѧ́шесѧ и҆ второ́й дще́ри є҆гѡ̀ таковꙋ́юже сотвори́ти млⷭ҇ть, тща́щисѧ дѣви́цꙋ зако́ннымъ бра́комъ соблюстѝ ѿ грѣха̀ беⷥзако́ннагѡ: дрꙋгі́й ѹ҆́бѡ ра́венъ томꙋ̀ ѹ҆́золъ зла́та ѹ҆гото́вавъ, и҆ но́щїю всѣ́хъ ѹ҆таи́всѧ, въ до́мъ ста́рцевъ тѣ́мже вве́рже ѻ҆ко́нцемъ. Заꙋ́тра же ѹ҆бо́гїй чл҃вѣ́къ воста́въ, ѡ҆брѣ́те па́ки зла́то подо́бно пе́рвомꙋ, та́коже нача̀ и҆ томꙋ̀ диви́тисѧ, и҆ на землѝ ни́цъ па́дъ, те́плыми слеза́ми ѡ҆блива́шесѧ, гл҃ѧ: Бж҃е и҆ воли́телю млⷭ҇ти, и҆ строи́телю на́шегѡ спасе́нїѧ, и҆́же пе́рвѣе и҆скꙋпи́лъ мѧ̀ є҆сѝ кро́вїю твое́ю, ны́нѣ же до́мъ мо́й съ ча́ды ѿ сѣ́ти чꙋжда́гѡ и҆скꙋпꙋ́ѧй зла́томъ, са́мъ покажѝ мѝ слꙋжа́щаго милосе́рдномꙋ твоемꙋ̀ хотѣ́нїю, и҆ чл҃вѣколю́бной твое́й бл҃гости: покажѝ мѝ земна́го того̀ а҆́гг҃ла сохранѧ́ющаго на́съ ѿ грѣхо́вныѧ поги́бели, да ѹ҆вѣ́мъ, кто̀ є҆́сть та́ковы́й, и҆́же ѿ ѡ҆скорблѧ́ющїѧ на́съ нищеты̀ и҆зима́етъ, и҆ ѿ ѕлы́хъ намѣ́ренныхъ ѹ҆мышле́нїй и҆збавлѧ́етъ. се́ бо по млⷭ҇ти твое́й гдⷭ҇и, та́йнѡ ще́дрою нѣ́коегѡ ѹ҆го́дника твоегѡ̀ рꙋко́ю мнѣ̀ твори́мой, и҆ вторꙋ́ю дще́рь мꙋ́жꙋ по зако́нꙋ ѿда́мъ, и҆ та́кѡ ѹ҆бѣгꙋ̀ ловле́нїѧ дїа́волѧ, и҆́же хотѧ́ше скве́рнымъ прибы́ткомъ ѹ҆мно́жити вели́кꙋю, ѹ҆вы̀ мнѣ̀, па́гꙋбꙋ. та́же мꙋ́жъ ѻ҆́ный молѧ́сѧ гдⷭ҇ꙋ, и҆ бл҃годарѧ̀ є҆гѡ̀ бл҃госты́ню, сотворѝ бра́къ и҆ второ́й свое́й дще́ри, и҆мы́й ктомꙋ̀ ѹ҆пова́нїе на бг҃а, и҆ несꙋмнѣ́ннꙋю на него̀ наде́ждꙋ возложѝ, ꙗ҆́кѡ и҆ ѡ҆ тре́тїей дще́ри є҆гѡ̀ промы́слитъ, и҆ сожи́телника є҆́й зако́номъ возлю́блена и҆мѣ́ти пода́стъ, посла́вши є҆мꙋ̀ па́ки дово́лное на тꙋ̀ потре́бꙋ зла́то рꙋко́ю та́йнѡ бл҃годѣ́телствꙋющею. є҆ще́ же ктомꙋ̀ и҆ не спа́ше но́щїю, стрегі́й, ка́кѡ бы бл҃годѣ́телѧ своего̀ ѡ҆щꙋти́ти возмо́глъ, и҆ ви́дѣти є҆го̀ сподо́билсѧ, да бы̀ ѹ҆вѣ́далъ, кто̀ и҆ ѿкꙋ́дꙋ приноси́тъ є҆мꙋ̀ зла́то. и҆ сѐ не по мно́зѣмъ вре́мени ча́емый грѧде́тъ: прїи́де бо и҆ тре́тїе хрⷭ҇то́въ ѹ҆го́дникъ нїкола́й ти́хими стопа́ми, и҆ на ѻ҆бы́чномъ мѣ́стѣ бы́въ, толи́кїй же ѹ҆́золъ зла́та па́ки тѣ́мже ѻ҆ко́нцемъ вве́рже, и҆ вско́рѣ къ до́мꙋ ѡ҆браща́шесѧ. ѻ҆те́цъ же ѻ҆трокови́цъ вве́рженное ѻ҆ко́нцемъ зла́то ѡ҆щꙋти́въ, є҆ли́кѡ мо́гъ въ слѣ́дъ грѧдꙋ́щагѡ гна́ше: пости́гнꙋвъ же, и҆ позна́въ кто̀ є҆́сть, не незна́емь бо бѧ́ше ст҃ы́й добродѣ́тели ра́ди своеѧ̀ и҆ свѣ́тлости ро́да, падѐ на но́ги є҆гѡ̀, лобыза́ѧ ты́ѧ, и҆ и҆зба́вителѧ того̀ нарица́ѧ, и҆ помо́щника, и҆ сп҃си́телѧ дꙋша́мъ въ послѣ́днюю ѹ҆жѐ поги́бель соше́дшымъ. А҆́ще бы речѐ не твои́хъ ра́ди щедро́тъ возста́вилъ мѧ̀ вели́кїй въ ми́лости гдⷭ҇ь, ѿда́вна поги́блъ бы а҆́зъ ѻ҆каѧ́нный ѻ҆те́цъ со дще́рми ѡ҆дожде́нїемъ ѻ҆гнѧ̀ содо́мскагѡ, ѹ҆вы̀ мнѣ̀. и҆ сѐ ны́нѣ тобо́ю спасе́ни, и҆ ѿ го́ркагѡ паде́нїѧ грѣхо́внагѡ и҆зба́влени є҆смы̀. та̑ и҆ мнѡ́жайшаѧ со слеза́ми гл҃аше къ ст҃о́мꙋ. ѻ҆́нъ же є҆два̀ возста́вилъ є҆го̀ на но́ги. и҆ клѧ́твами тогѡ̀ дꙋ́шꙋ заклѧ́лъ, да во все́мъ животѣ̀ є҆гѡ̀ никомꙋ́же повѣ́даетъ бы́вшагѡ. є҆ще́ же мнѡ́га на по́лзꙋ ст҃ы́й чл҃вѣ́кꙋ томꙋ̀ и҆зре́къ, ѿпꙋстѝ є҆го̀ въ до́мъ сво́й. Сїѐ ѿ мно́гихъ є҆гѡ̀ дѣ́лъ милосе́рдныхъ є҆ди́но сказа́сѧ, да ѿсю́дꙋ ѹ҆вѣ́стсѧ, коли́кѡ бѣ̀ къ ни́щымъ ми́лостивъ. и҆ а҆́ще бы милосе́рдїе є҆гѡ̀ по є҆ди́номꙋ повѣствова́лосѧ, коли́кїѧ щедрѡ́ты тре́бꙋющымъ ꙗ҆ви́лъ, коли́кихъ а҆́лчꙋщихъ напита́лъ, и҆ наги́хъ ѡ҆дѣ́ѧлъ, и҆ коли́кихъ ѿ заимода́вцѡвъ и҆скꙋпи́лъ, то̀ не доста́ло бы вре́мене повѣствꙋ́ющꙋ.

По се́мъ прпⷣбный ѻ҆ц҃ъ нїкола́й и҆зво́лилъ и҆тѝ въ палесті́нꙋ, и҆ та́мѡ ст҃а́ѧ мѣста̀ ви́дѣти, и҆ поклони́тисѧ тѣ̑мъ, и҆дѣ́же гдⷭ҇ь бг҃ъ на́шъ і҆и҃съ хрⷭ҇то́съ пречⷭ҇тыми свои́ми плотски́ми хожда́ше нога́ми. Є҆гда̀ ѹ҆́бѡ кора́бленицы пловѧ́хꙋ прѧ́мѡ є҆гѵ́пта, ничто́же вѣ́дꙋще ѡ҆ хотѧ́щихъ и҆̀мъ бы́ти, ст҃ы́й нїкола́й пловы́й съ ни́ми прозрѧ́ше, ꙗ҆́кѡ и҆́мать бы́ти волне́нїе и҆ бꙋ́рѧ, и҆ вѣ́трѡвъ лю́тыхъ прираже́нїе. и҆ ѡ҆ то́мъ провозвѣща́ше и҆̀мъ, сказꙋ́ющи, ꙗ҆́кѡ самаго̀ ви́дѣ лꙋка́ваго врага̀ влѣ́зша въ кора́бль, и҆ съ чл҃вѣ́ки ѻ҆́ный во глꙋбинꙋ̀ погрꙋзи́ти хотѧ́ща. и҆ а҆́бїе въ то́й ча́съ неча́ѧнное нѣ́кое на́йде возмꙋще́нїе, помрачи́вшꙋсѧ ѻ҆́блакꙋ, и҆ бы́сть бꙋ́рѧ ѕѣ́лна и҆ волне́нїе въ мо́ри вели́ко. пловꙋ́щїи же ѕѣлѡ̀ ѹ҆боѧ́шасѧ преще́нїѧ сме́рти, и҆ молѧ́хꙋ ст҃а́го ѻ҆ц҃а̀ нїкола́а, є҆́же помощѝ и҆́мъ го́рькѡ въ пꙋчи́нѣ стра́ждꙋщымъ, и҆ ѿ належа́щїѧ бѣды̀ и҆збавле́нїѧ не ча́ющымъ, и҆ глаго́лахꙋ: А҆́ще не ты̀ ст҃че бж҃їй помо́жеши на́мъ моле́нїемъ твои́мъ къ бг҃ꙋ, то̀ а҆́бїе погрѧ́знемъ въ пꙋчи́нѣ се́й, и҆ поги́бнемъ. ѻ҆́нъ же дерза́ти и҆́мъ, на бг҃а же наде́ждꙋ возложи́ти, и҆ ско́рагѡ и҆збавле́нїѧ несꙋмѣ́ннѡ ча́ѧти повелѣ́въ, са́мъ нача̀ прилѣ́жнѡ моли́тисѧ ко гдⷭ҇ꙋ. и҆ а҆́бїе ѹ҆кроти́сѧ мо́ре, и҆ въ тишинꙋ̀ ве́лїю преложи́сѧ, и҆ всѧ̀ печа́лнаѧ въ ра́дость претвори́шасѧ, ті́и же печа́ли забы́вше на бл҃годꙋ́шное премѣни́шасѧ весе́лїе, бг҃ꙋ же и҆ є҆гѡ̀ ѹ҆го́дникꙋ ст҃о́мꙋ ѻ҆ц҃ꙋ̀ нїкола́ю бл҃годаре́нїе воздава́хꙋ, и҆ сꙋгꙋ́бѡ ѹ҆дивлѧ́хꙋсѧ ѡ҆ прорече́нїи волне́нїѧ, и҆ ѡ҆ разрѣше́нїи сѣ́тованїѧ. Семꙋ̀ та́кѡ бы́вшꙋ, сѐ нѣ́кто ѿ кора́бленикѡвъ на ве́рхъ кора́бленнагѡ дре́ва взлѣ́зе, ꙗ҆́коже є҆́сть ѻ҆бы́чай ѹ҆строѧ́ющымъ до́брѣ кора́бленныѧ потрє́бы, и҆ є҆гда̀ ѹ҆жѐ ѿтꙋ́дꙋ слѣ́сти хотѧ́ше, поползнꙋ́всѧ свы́ше падѐ посредѣ̀ кораблѧ̀, и҆ ѹ҆би́всѧ до сме́рти, бездꙋ́шенъ лежа́ше. Ст҃ы́й же нїкола́й пре́жде зва́нїѧ на по́мощь гото́въ сы́й моли́твою воскресѝ є҆го̀, и҆ не ꙗ҆́кѡ ме́ртва, но ꙗ҆́кѡ сно́мъ ѡ҆держи́ма возста́ви, и҆ жи́ва того̀ пловцє́мъ дадѐ. по се́мъ вѣ́трила всѧ̀ воздви́гше, и҆ ѹ҆до́бный вѣ́тръ и҆мꙋ́ще, до́брѣ плы́ша, и҆ ти́хѡ къ бре́гꙋ а҆леѯандрі́йскомꙋ приста́ша, и҆дѣ́же ѹ҆го́дникъ бж҃їй ст҃ы́й нїкола́й мнѡ́гїѧ болѧ́щыѧ и҆сцѣли́въ, и҆ бѣ́сы ѿ человѣ́къ прогна́въ, и҆ скѡ́рбныѧ ѹ҆тѣ́шивъ, па́ки пꙋтѝ въ палесті́нꙋ намѣ́реннагѡ ꙗ҆́тсѧ, и҆ дости́гъ ст҃а́гѡ гра́да і҆ерⷭ҇ли́ма, взы́де на голго́ѳꙋ, и҆дѣ́же хрⷭ҇то́съ бг҃ъ спасе́нїе содѣ́ла чл҃вѣ́ческомꙋ ро́дꙋ на крⷭ҇тѣ̀ пречⷭ҇тѣи своѝ просте́рши рꙋ́цѣ, та́мѡ ѽ ко́ль те́плыѧ и҆злїѧ̀ молбы̑ ѿ горѧ́щагѡ любо́вїю срⷣца, бл҃годаре́нїе возсыла́ѧ сп҃си́телю на́шемꙋ: ѻ҆бы́де же и҆ всѧ̀ ст҃а́ѧ мѣста̀ всю́дꙋ дово́лное творѧ̀ полоне́нїе: и҆ є҆гда̀ но́щїю хотѧ́ше вни́ти во ст҃ꙋ́ю цр҃ковь на моли́твꙋ, две́ри цр҃ко́вныѧ заключе́нныѧ са́ми ѿверзо́шасѧ даю́ще вхо́дъ невозбра́нный томꙋ̀, є҆мꙋ́же и҆ нбⷭ҇наѧ врата̀ бѧ́хꙋ ѿве́рста. ѹ҆ме́дливъ же во і҆ерⷭ҇ли́мѣ вре́мѧ дово́лно, гото́вѧшесѧ и҆тѝ въ пꙋсты́ню, но нѣ́кїимъ бжⷭ҇твеннымъ свы́ше гла́сомъ ѹ҆вѣща́нъ бы́сть, да во ѻ҆те́чество своѐ возврати́тсѧ. всѧ̑ бо на по́льзꙋ на́шꙋ стро́ѧй бг҃ъ не хотѧ́ше томꙋ̀ свѣти́лникꙋ под̾ спꙋ́домъ бы́ти пꙋсты́ннымъ, є҆го́же ѹ҆гото́ва на свѣ́щникъ лѷкі́йскїѧ митропо́лїи. ѡ҆брѣ́тъ ѹ҆́бѡ кора́бль, совѣща̀ съ кора́бленики є҆́же во ѻ҆те́чество є҆мꙋ̀ плы́ти: ѻ҆ни́ же лꙋка́вое дѣ́ло сотвори́ти ѹ҆мы́слиша, є҆́же въ и҆нꙋ́ю странꙋ̀ ѹ҆пра́вити пла́ванїе, а҆ не въ лѷкі́йскꙋю. Є҆гда́ же всѣ́дше въ кора́бль ѿ приста́нища пꙋсти́шасѧ, ви́дѣвъ ст҃ы́й нїкола́й, ꙗ҆́кѡ не во ѻ҆те́чество є҆гѡ̀ кора́бль плове́тъ, ско́рѡ къ нога́мъ кора́бленикѡвъ припа́дъ, молѧ́ше и҆̀хъ, да и҆спра́вѧтъ въ лѷкі́ю пꙋ́ть. ті́и же ѡ҆ не́мъ не бре́гше, въ намѣ́реннꙋю себѣ̀ странꙋ̀ пловѧ́хꙋ, не вѣ́дꙋще, ꙗ҆́кѡ бг҃ъ своего̀ ѹ҆го́дника въ печа́ли бы́ти не ѡ҆ста́витъ. и҆ а҆́бїе нѣ́каѧ бꙋ́рѧ дхнꙋ́вши сопроти́внѡ, кора́бль на дрꙋгꙋ́ю странꙋ̀ ѡ҆братѝ, и҆ въ лѷкі́ю ско́рѡ погна̀, ѻ҆́нымъ же ѕлы́мъ кора́бленикѡмъ коне́чною преща́ше бѣдо́ю. и҆ та́кѡ нїкола́й ст҃ы́й бж҃їею си́лою по мо́рю носи́мый к̾ ѻ҆те́чествꙋ своемꙋ̀ приста̀. неѕло́бивъ же сы́й ничто́же ѕло̀ тѣ́мъ ѕлоко́зненнымъ врагѡ́мъ сотворѝ, ни гнѣ́ва воздви́же, нижѐ ко́егѡ ненави́стна сло́ва и҆зречѐ, но съ блгⷭ҇ве́нїемъ въ свою̀ и҆̀хъ странꙋ̀ ѿпꙋстѝ. са́мъ же прїи́де въ мнⷭ҇ты́рь, є҆го́же дѧ́дѧ є҆гѡ̀ є҆пⷭ҇кпъ пата́рскїй созда̀, и҆ ст҃ы́й сїѡ́нъ наречѐ, и҆дѣ́же ст҃ы́й нїкола́й всѣ́мъ бра́тїѧмъ ѕѣлѡ̀ вожделѣ́нъ ꙗ҆ви́сѧ, съ любо́вїю бо ве́лїею є҆го̀ ꙗ҆́кѡ а҆́гг҃ла бж҃їѧ прїе́мше, наслажда́хꙋсѧ бг҃одꙋхнове́нныхъ слове́съ є҆гѡ̀, и҆ по́льзовахꙋсѧ равноа́гг҃лнымъ тогѡ̀ житїе́мъ, и҆ подража́хꙋ до́брымъ нра́вѡмъ, и҆́миже ѹ҆красѝ бг҃ъ вѣ́рнаго раба̀ своего̀. Въ то́мъ ѹ҆́бѡ монастырѣ̀ ст҃ы́й нїкола́й безмо́лвное себѣ̀ житїѐ и҆ ѹ҆до́бнѣйшее къ бг҃омы́слїю мѣ́сто ꙗ҆́кѡ приста́нище ти́хое ѡ҆брѣ́тъ, про́чее житїѧ̀ своегѡ̀ вре́мѧ неисхо́днѡ провожда́ти надѣ́ѧшесѧ. Бг҃ъ же и҆на́мѡ пꙋ́ть є҆мꙋ̀ пока́зоваше, не бл҃говолѧ̀ да бога́тое то̀ всѣ́хъ добродѣ́телей сокро́вище, и҆́мже мі́ръ ѡ҆бога́ща́тисѧ и҆мѣ́ѧше, сокрове́но бꙋ́детъ, а҆́ки на селѣ̀ въ зе́млю вко́панное, в̾ ѻ҆со́бномъ монастырѣ̀ въ ма́лѣй клѣ́ти затворе́нное, но да всѣ̑мъ въ ꙗ҆вле́нїе прїи́детъ, и҆ тѣ́мъ дх҃о́внымъ сокро́вищемъ да дѣ́етсѧ дх҃о́внаѧ кꙋ́плѧ, мно́гїѧ дꙋ́шы приѡбрѣта́ющаѧ. Є҆ди́ною бо ст҃ы́й стоѧ̀ на моли́твѣ ѹ҆слы́ша гла́съ свы́ше: Нїкола́е, въ наро́дный по́двигъ да вни́деши, а҆́ще вѣнча́нъ ѿ менѐ бы́ти жела́еши. се́й гла́съ нїкола́й слы́шавъ, ѹ҆жасе́сѧ, и҆ мы́слѧше, что̀ хо́щетъ гла́съ то́й, чесѡ̀ ѿ негѡ̀ и҆́щетъ; и҆ па́ки слы́ша гла́съ глаго́лющь: Нїкола́е, не та̀ сѐ ни́ва є҆́сть, на не́йже и҆́маши мѝ принестѝ ѡ҆жида́емый мно́ю пло́дъ: но къ человѣ́кѡмъ ѡ҆брати́сѧ, да просла́витсѧ въ тебѣ̀ и҆́мѧ моѐ. тогда̀ нїкола́й ст҃ы́й разꙋмѣ̀ бж҃їе и҆зволе́нїе, да ѡ҆ста́вивъ безмо́лвїе, по́йдетъ послꙋжи́ти человѣ́чꙋ спасе́нїю. мы́слѧше ѹ҆́бѡ ка́мѡ и҆́мать ѡ҆брати́тисѧ, во ѻ҆ч҃ество ли своѐ гра́дъ пата́рꙋ къ зна́емымъ, и҆лѝ и҆на́мѡ. и҆ ѹ҆мы́сли, тще́тныѧ междꙋ̀ зна́емыми человѣ́ческїѧ боѧ́сѧ и҆ бѣ́гаѧ сла́вы, въ и҆ны́й гра́дъ пойтѝ, и҆дѣ́же бы не бы́лъ зна́емый никомꙋ́же. Въ то́йже лѷкі́йстѣй странѣ̀ є҆́сть гра́дъ пресла́вный нарица́емый мѵ́ра, всеѧ̀ лѷкі́и митропо́лїа, въ то́й ѹ҆́бѡ гра́дъ ст҃ы́й нїкола́й бж҃їимъ про́мысломъ води́мый прїи́де, и҆ никто́же є҆го̀ зна́ѧше та́мѡ. бѧ́ше же ꙗ҆́кѡ є҆ди́нъ ѿ ни́щихъ не и҆мы́й гдѣ̀ главы̀ приклони́ти, то́кмѡ примета́шесѧ въ домꙋ̀ гдⷭ҇ни, є҆ди́но и҆мы́й приста́нище бг҃а. Въ то̀ вре́мѧ преста́висѧ а҆рхїере́й гра́да тогѡ̀ і҆ѡа́ннъ всеѧ̀ страны̀ лѷкі́йскїѧ а҆рхїепⷭ҇кпъ и҆ первопресто́лникъ, и҆ собра́шасѧ всѝ є҆пⷭ҇кпи тоѧ̀ страны̀ въ мѵ́ры, ꙗ҆́кѡ да и҆зберꙋ́тъ на то́й прⷭ҇то́лъ досто́йнаго мꙋ́жа. разли́чнымъ ѹ҆́бѡ мꙋже́мъ честны́мъ и҆ благоразꙋ́мнымъ на то̀ и҆менꙋ́емымъ и҆ и҆збира́емымъ и҆ несогла́сїю мно́гомꙋ быва́ющꙋ, нѣ́цыи ре́вностїю бжⷭ҇твенною подвиза́емїи рѣ́ша: ꙗ҆́кѡ дѣ́ло то̀ нѣ́сть человѣ́ческагѡ и҆збра́нїѧ но бж҃їѧ строе́нїѧ, и҆ подоба́етъ моли́твѣ ѡ҆ то́мъ соверша́тисѧ: да са́мъ гдⷭ҇ь ꙗ҆ви́тъ, кто̀ досто́инъ таковы́й са́нъ прїѧ́ти, и҆ па́стырь все́й лѷкі́и бы́ти. всѝ ѹ҆́бѡ до́брагѡ тогѡ̀ совѣ́та послꙋ́шавше, вда́шасѧ прилѣ́жной моли́твѣ и҆ постꙋ̀. Гдⷭ҇ь же во́лю боѧ́щихсѧ є҆гѡ̀ творѧ̀, и҆ моли́твꙋ и҆́хъ слꙋ́шаѧ, є҆ди́номꙋ ѿ ни́хъ є҆пⷭ҇кпꙋ старѣ́йшемꙋ своѐ благоволе́нїе ѿкры̀ си́це: стоѧ́щꙋ томꙋ̀ на моли́твѣ, ꙗ҆ви́сѧ мꙋ́жъ свѣ́телъ повелѣва́ѧй є҆мꙋ̀, да при две́рехъ цр҃ко́вныхъ но́щїю прише́дъ ста́нетъ, и҆ внима́етъ до́ндеже а҆́ще кто̀ пре́жде всѣ́хъ въ це́рковь вни́детъ: то́й є҆́сть, речѐ, мои́мъ подвиза́емый дх҃омъ, и҆ прїе́мше того̀ че́стнѡ а҆рхїепⷭ҇кпомъ поста́вите, и҆́мѧ же мꙋ́жꙋ томꙋ̀ нїкола́й. таково́е бжⷭ҇твенное видѣ́нїе є҆пⷭ҇кпъ ви́дѣвъ, и҆ повелѣва́емое въ видѣ́нїи слы́шавъ, про́чымъ є҆пⷭ҇кпѡмъ сїѐ возвѣстѝ: ті́и же слы́шавше то̀, подви́гнꙋшасѧ па́че на моли́твꙋ трꙋдолюбе́знѣ. Ви́дѣвый же ѿкрове́нїе є҆пⷭ҇кпъ ста̀ на мѣ́стѣ, и҆дѣ́же въ видѣ́нїи є҆мꙋ̀ бы́сть повелѣ́но, и҆ ѡ҆жида́ше прише́ствїѧ жела́емагѡ мꙋ́жа. є҆гда́ же бы́сть вре́мѧ ѹ҆́трени, ст҃ы́й нїкола́й дꙋ́хомъ подви́гсѧ, пе́рвѣе всѣ́хъ къ цр҃кви дости́же, ѻ҆бы́чай бо є҆мꙋ̀ бѣ̀ въ полꙋ́нощи на моли́твꙋ востава́ти, и҆ на нача́ло предварѧ́ѧ всѣ́хъ къ цр҃кви на ѹ҆́треннее приходи́ти пѣ́нїе. Вше́дшꙋ же є҆мꙋ̀ въ притво́ръ, поѧ̀ є҆го̀ є҆пⷭ҇кпъ видѣ́нїѧ ѻ҆́нагѡ сподо́бивыйсѧ, и҆ речѐ є҆мꙋ̀: ка́кѡ ѽ ча́до нарица́ешисѧ; ѻ҆́нъ же молча́ше. се́й же прилѣ́жнѡ вопроша́ше є҆го̀, ст҃ы́й же кро́ткѡ и҆ ти́хѡ є҆мꙋ̀ ѿвѣща̀: Нїкола́й нарица́юсѧ влⷣко, ра́бъ ст҃ы́ни твоеѧ̀. Бжⷭ҇твенный же ѻ҆́нъ мꙋ́жъ, є҆гда̀ кро́ткїѧ сїѧ̀ и҆ смире́нныѧ глаго́лы ѹ҆слы́ша, разꙋмѣ̀ ѻ҆́во ѿ и҆́мени предсказа́нномъ є҆мꙋ̀ въ видѣ́нїи, ꙗ҆́кѡ нїкола́й нарица́етсѧ, ѻ҆́во же ѿ смире́нїѧ, ꙗ҆́кѡ ти́хѡ и҆ кро́ткѡ ѿвѣща̀: и҆ позна̀, ꙗ҆́кѡ то́й є҆́сть, є҆мꙋ́же бл҃говоли́тъ бг҃ъ бы́ти первопресто́лникомъ мѵ́рскїѧ цр҃кве. не не вѣ́дѧше бо, на кого̀ призира́етъ гдⷭ҇ь, писа́нїе глаго́летъ: на кро́ткаго и҆ молчали́ваго, и҆ на трепе́щꙋщаго слове́съ мои́хъ (Иса. ѯ҃ѕ : в҃). и҆ возра́довасѧ ѕѣлѡ̀, ꙗ҆́коже нѣ́кое та́йное полꙋчи́въ сокро́вище. и҆ а҆́бїе поѧ́тъ є҆го̀ за рꙋ́кꙋ глаго́лѧ, послѣ́дꙋй ми ча́до: и҆ приведѐ че́стнѡ къ є҆пⷭ҇кпѡмъ. ѻ҆ни́ же и҆спо́лнившесѧ бжⷭ҇твенныѧ сла́дости и҆ дх҃о́вныѧ ѹ҆тѣ́хи ѡ҆ ѡ҆брѣ́тенїи бг҃омъ пока́заннагѡ мꙋ́жа, на средꙋ̀ цр҃кве є҆го̀ приведо́ша. сла́вѣ же ѡ҆ се́мъ всю́дꙋ проше́дшей, стеко́шасѧ скорѣ́е крила́тыхъ мно́жество наро́да безчи́сленное. Є҆пⷭ҇кпъ же ви́дѣвый видѣ́нїе, велегла́снѡ ко всѣ́мъ глаго́ла: Прїими́те бра́тїе своего̀ па́стырѧ, є҆го́же ва́мъ пома́за дх҃ъ ст҃ы́й, и҆ є҆мꙋ́же ѡ҆ дꙋша́хъ ва́шихъ правле́нїе соверше́ннѣ порꙋчѝ, є҆го́же не человѣ́ческое собра́нїе, но бж҃їй сꙋ́дъ поста́ви. сѐ ны́нѣ и҆́мамы, є҆гѡ́же жела́хомъ, и҆ є҆гѡ́же и҆ска́хомъ, ны́нѣ ѡ҆брѣто́хомъ и҆ прїѧ́хомъ: си́мъ до́брѣ пасо́ми и҆ наставлѧ́еми не ѿпа́демъ наде́жды, є҆́же и҆зрѧ́днѡ предста́ти бг҃ꙋ въ де́нь ꙗ҆вле́нїѧ є҆гѡ̀ и҆ ѿкрове́нїѧ. наро́дное же мно́жество воздава́ше бл҃годаре́нїе бг҃ꙋ, и҆ неизрече́ннѡ веселѧ́шесѧ, а҆ ст҃ы́й нїкола́й ѿрица́шесѧ ѻ҆́ный са́нъ прїѧ́ти, не терпѧ̀ похвалы̀ человѣ́ческїѧ: ѻ҆ба́че ѿ всегѡ̀ ѡ҆сщ҃е́ннагѡ и҆ мїрска́гѡ собо́ра ѹ҆моле́нъ бы́въ, и҆ не хотѧ̀ на а҆рхїере́йскїй прⷭ҇то́лъ взы́де, и҆́бо и҆ видѣ́нїемъ бжⷭ҇твеннымъ на сїѐ ѹ҆вѣща́нъ бы́сть, є҆́же ви́дѣ пре́жде ѹ҆ме́ртвїѧ а҆рхїепⷭ҇кпскагѡ, ѡ҆ чесо́мъ ст҃ы́й меѳо́дїй патрїа́рхъ цр҃гра́дскїй пи́шетъ си́це: въ нѣ́кꙋю но́щь ст҃ы́й нїкола́й ви́дѣ сп҃си́телѧ на́шего въ сла́вѣ бли́зъ себѐ стоѧ́ща, и҆ кни́гꙋ є҆мꙋ̀ є҆ѵⷢ҇лскꙋю зла́томъ и҆ маргарі́тами ѹ҆кра́шенꙋю подаю́ща, ѿ дрꙋгі́ѧ же страны̀ ст҃ꙋ́ю ѹ҆зрѣ̀ бцⷣꙋ, ѻ҆мофо́ръ ст҃лскїй на ра́мена є҆гѡ̀ возлага́ющꙋю: и҆ по видѣ́нїи то́мъ преше́дшымъ ма́лымъ дне̑мъ и҆ преста́влшꙋсѧ і҆ѡа́ннꙋ мѵ́рскомꙋ а҆рхїепⷭ҇кпꙋ, нїкола́й тогѡ̀ гра́да а҆рхїепⷭ҇кпомъ поста́вленъ бы́сть. до здѣ̀ ст҃ы́й меѳо́дїй То̀ видѣ́нїе ст҃ы́й нїкола́й по́мнѧ, и҆ бл҃говоле́нїе бж҃їе ꙗ҆́вѣ ви́дѧ, є҆ще́ же и҆ собо́рнагѡ моле́нїѧ не презира́ѧ, прїѧ̀ па́ствꙋ. Сщ҃е́нный же собо́ръ є҆пⷭ҇кпы съ кли́рїки всѧ̑ ѡ҆сщ҃е́нїю подѡба́ющаѧ над̾ ни́мъ соверши́вше, пра́здникъ ра́достный творѧ́хꙋ, веселѧ́щесѧ ѡ҆ бг҃ода́нномъ свое́мъ па́стырѣ ст҃лѣ хрⷭ҇то́вомъ нїкола́и. Та́кѡ бж҃їѧ цр҃ковь прїѧ̀ себѣ̀ свѣти́лника, не во ѹ҆́глѣ поставлѧ́ема, нижѐ под̾ спꙋ́домъ скрыва́ема, но на подо́бномъ є҆мꙋ̀ мѣ́стѣ стоѧ́ща на свѣ́щницѣ а҆рхїере́йства и҆ па́стырства, на не́мже свѣ́тлѡ сїѧ́ше, пра́вѡ и҆правлѧ́ющи сло́во и҆́стины, и҆ всѧ̀ правовѣ́рнаѧ повєлѣ́нїѧ здра́вѡ мꙋ́дрствꙋющи и҆ ѹ҆ча́щи.

Въ нача́лѣ па́стырства своегѡ̀ глаго́лаше са́мъ къ себѣ̀ ѹ҆го́дникъ бж҃їй си́це: ѽ нїкола́е, се́й са́нъ и҆ сїѐ мѣ́сто тре́бꙋетъ и҆ны́хъ ѻ҆бы́чаевъ, да ѹ҆жѐ не себѣ̀ но и҆ны́мъ живе́ши. Хотѧ́ же ѻ҆́вцы своѧ̀ наꙋчи́ти добродѣ́тели, своегѡ̀ добродѣ́телнагѡ житїѧ̀ не кры́ѧше ѹ҆жѐ ꙗ҆́коже пре́жде. и҆́бо пе́рвѣе є҆ди́номꙋ то́кмѡ свѣ́дꙋщꙋ бг҃ꙋ ѹ҆правлѧ́ше жи́знь свою̀, рабо́таѧ є҆мꙋ̀ въ та́йнѣ: на а҆рхїере́йствѣ же всѣ̑мъ бы́сть ꙗ҆́вѣ пребыва́нїе є҆гѡ̀, не тщесла́вїѧ ра́ди пред̾ человѣ́ки несокрыва́емое, но по́лзы ра́ди и҆ ѹ҆множе́нїѧ бж҃їѧ сла́вы, ꙗ҆́кѡ и҆сполнѧ́тисѧ рече́нномꙋ въ є҆ѵⷢ҇лїи: Та́кѡ да просвѣти́тсѧ свѣ́тъ ва́шъ пред̾ человѣ́ки, ꙗ҆́кѡ да ви́дѧтъ ва́ша дѡ́браѧ дѣла̀, и҆ просла́вѧтъ ѻ҆ц҃а̀ ва́шего, и҆́же на нб҃сѣ́хъ (Мт. є҃ : ѕ҃і). Всѣ́хъ до́брыхъ дѣ́лъ бѣ̀ зерца́ло ста́дꙋ своемꙋ̀, и҆ ѻ҆́бразъ вѣ́рнымъ слово́мъ, житїе́мъ, любо́вїю, дх҃омъ, вѣ́рою, и҆ чистото́ю (а҃. Тїм. д҃ : в҃і). нра́вомъ бѣ̀ кро́токъ и҆ неѕло́бивъ, дꙋ́хомъ смире́нъ всѧ́кагѡ киче́нїѧ ѿгреба́ѧйсѧ. ѻ҆де́жды є҆гѡ̀ бѧ́хꙋ про́сты, пи́ща же по́стническа, є҆ѧ́же всегда̀ є҆ди́ною то́чїю въ де́нъ вкꙋша́ше, и҆ то̀ въ ве́черъ. ве́сь бо де́нь ѹ҆пражнѧ́шесѧ въ подоба́ющихъ са́нꙋ є҆гѡ̀ дѣ́лѣхъ, послꙋ́шаѧ потре́бы къ немꙋ̀ приходѧ́щихъ, и҆ две́ри до́мꙋ є҆гѡ̀ всѣ̑мъ бѧ́хꙋ ѿве́рсты, и҆́бо бл҃гъ бѣ̀ ко всѣ́мъ и҆ бл҃гопристꙋ́пенъ, сирота́мъ ѻ҆ц҃ъ, ни́щымъ ми́лостивый пода́тель, ѹ҆тѣ́шитель пла́чꙋщымъ, помо́щникъ ѡ҆би́димымъ, и҆ всѣ̑мъ вели́кїй бл҃годѣ́тель. Въ по́мощь же па́стырскимъ трꙋдѡ́мъ свои́мъ къ цр҃ко́вномꙋ ѹ҆правле́нїю стѧжа̀ два̀ совѣ́тника, добродѣ́телныѧ и҆ бл҃горазꙋ́мныѧ, пресвѵ́терскимъ са́номъ почте́нныѧ, па́ѵла роді́йскаго, и҆ ѳео́дѡра а҆скалѡні́та, мꙋ́жи всѣ́мъ гре́кѡмъ зна́емыѧ: и҆ та́кѡ пасѧ́ше до́брѣ ввѣ́реное себѣ̀ слове́сныхъ ѻ҆ве́цъ хрⷭ҇то́выхъ ста́до. зави́стное же ѻ҆́ко лꙋка́вагѡ ѕмі́ѧ никогда́же престаю́щагѡ воздвиза́ти бра́нь на бж҃їѧ рабы̀, не терпѧ̀ ви́дѣти цвѣтꙋ́щагѡ въ человѣ́цѣхъ бл҃гоче́стїѧ, воздви́же гоне́нїе на цр҃ковь хрⷭ҇то́вꙋ чрез̾ нечести́выхъ царе́й ри́мскихъ дїоклитїа́на и҆ маѯїмїа́на. ѿ ни́хже и҆зы́де тогда̀ повелѣ́нїе во вселе́ннꙋю, да всѝ вѣ́рнїи ѿверга́ютсѧ хрⷭ҇та̀, и҆ покланѧ́ютсѧ і҆́дѡлѡмъ, не повинꙋ́ющїисѧ же да принꙋжда́ютсѧ ѹ҆́зами и҆ темни́цами, и҆ тѧ́жкими мꙋ́ками, на коне́цъ нꙋ́жною сме́ртїю да казни́ми бꙋ́дꙋтъ. такова́ѧ ѕлодыха́телнаѧ бꙋ́рѧ и҆ до мѵ́рскагѡ гра́да дости́же вско́рѣ, донесе́ннаѧ рачи́телми те́мнагѡ нече́стїѧ. Бл҃же́нный же нїкола́й въ гра́дѣ то́мъ старѣ́йшина сы́й всѣ́мъ хрⷭ҇тїа́нѡмъ, свобо́днымъ ѧ҆зы́комъ проповѣ́даше хрⷭ҇то́во бл҃гоче́стїе, и҆ за хрⷭ҇та̀ пострада́ти гото́въ пока́зовашесѧ. тогѡ̀ ра́ди ꙗ҆́тъ бы́сть нечести́выми мꙋчи́телми, и҆ въ темни́цꙋ всажде́нъ со мно́гими хрⷭ҇тїа́ны, въ не́йже вре́мѧ нема́ло пребы́въ, мно́гаѧ ѕла̑ пострада̀, гла́дъ и҆ жа́ждꙋ и҆ тѣснотꙋ̀ терпѧ̀ темни́чнꙋю, соꙋ́зникѡвъ же свои́хъ пита́ше сло́вомъ бж҃їимъ, и҆ напаѧ́ше сла́дкими бл҃гоче́стїѧ вода́ми, возраща́ѧ въ ни́хъ вѣ́рꙋ во хрⷭ҇та̀ бг҃а, и҆ на неразрꙋши́момъ ѡ҆снова́нїи тѣ́хъ но́ги поставлѧ́ѧ, и҆ ѹ҆твержда́ѧ во и҆сповѣ́данїи хрⷭ҇то́вомъ крѣ́пкимъ бы́ти, и҆ ѹ҆се́рднѡ по и҆́стинѣ страда́ти. Та́же па́ки свобо́да хрⷭ҇тїа́нѡмъ дарова́сѧ, и҆ а҆́ки сл҃нце по те́мныхъ ѻ҆́блацѣхъ бл҃гоче́стїе возсїѧ̀, и҆лѝ нѣ́кїй ти́хїй хла́дъ по бꙋ́ри прїи́де: человѣколю́бнѡ бо хрⷭ҇то́съ на своѐ достоѧ́нїе призрѣ́въ, потребѝ нечести́выхъ вла́сть, и҆зри́нꙋвъ ѿ ца́рства дїоклитїа́на и҆ маѯїмїа́на, и҆ съ тѣ́ми є҆́ллинствꙋ слꙋжа́щихъ и҆з̾е́мъ ѿ среды̀, и҆ возста́ви лю́демъ свои́мъ ро́гъ спасе́нїѧ, ꙗ҆вле́нїемъ креста̀ вели́комꙋ царю̀ кѡнстанті́нꙋ, є҆мꙋ́же ри́мскꙋю врꙋчѝ держа́вꙋ. ѻ҆́нъ же є҆ди́наго бг҃а позна́въ, и҆ наде́ждꙋ на него̀ возложи́въ, побѣдѝ проти́вныѧ всѧ̑ си́лою креста̀ ст҃а́гѡ. и҆ пре́жде ца́рствовавшихъ сꙋ́етнꙋю наде́ждꙋ погꙋбѝ, разори́ти повелѣ́въ і҆́дѡлскїѧ хра́мы хрⷭ҇тїа́нскїѧ же цр҃кви воздви́гнꙋти: заключє́нныѧ же въ темни́цахъ хрⷭ҇та̀ ра́ди на свобо́дꙋ и҆спꙋстѝ, и҆ вели́кими и҆̀хъ похвала́ми ꙗ҆́кѡ хра́брыѧ во́ины почтѐ, и҆ возвраща́хꙋсѧ и҆сповѣ́дницы хрⷭ҇то́вы кі́йждо въ своѐ ѻ҆те́чество. Тогда̀ и҆ мѵ́рскїй гра́дъ па́ки прїѧ̀ па́стырѧ своего̀ вели́каго а҆рхїере́а нїкола́а, мꙋ́ченика и҆зволе́нїемъ, и҆ без̾ кро́ве вѣне́чника. ѻ҆́нъ же бл҃года́ть бж҃їю въ себѣ̀ и҆мѣ́ѧ, по ѻ҆бы́чаю своемꙋ̀ и҆сцѣлѧ́ше стра̑сти и҆ недꙋ́ги человѣ́кѡвъ, не то́кмѡ вѣ́рныхъ є҆ди́ныхъ но и҆ невѣ́рныхъ. Вели́кїѧ же ра́ди бж҃їѧ бл҃года́ти въ не́мъ пребыва́ющїѧ, мнѡ́гимъ сла́венъ бы́сть и҆ ди́венъ, и҆ ѕѣлѡ̀ всѣ̑мъ любе́зенъ. Свѣтѧ́шесѧ бо срⷣчною чистото́ю, и҆ всѣ́ми дарова́нїи бж҃їими ѹ҆добре́нъ бѧ́ше, рабо́таѧ гдⷭ҇ꙋ своемꙋ̀ въ преподо́бїи и҆ пра́вдѣ. бѧ́хꙋ же тогда̀ є҆щѐ і҆́дѡлскаѧ трє́бища мно́га, къ ни́мже лю́дїе нечести́вїи бѣсо́вскою прилѣжа́хꙋ любо́вїю, и҆ нема́лѡ наро́да погиба́ше и҆ ѿ мѵ́рскагѡ гра́да. Бж҃е́ственный же а҆рхїере́й ре́вностїю по бз҃ѣ разже́гсѧ, всѧ̀ та̀ мѣста̀ про́йде, трє́бища і҆́дѡлскаѧ разорѧ́ѧ и҆ въ пра́хъ ѡ҆браща́ѧ, ста́до же своѐ ѡ҆чища́ѧ ѿ скве́рнъ бѣсо́вскихъ. Та́кѡ ст҃ы́й нїкола́й на дꙋ́хи лꙋка́выѧ во́инствꙋѧ, прїи́де и҆ на а҆ртемі́динꙋ кꙋми́рницꙋ, ꙗ҆́же бѣ̀ ѹ҆кра́шена ѕѣлѡ̀ и҆ превели́ка, сꙋ́щи сла́дкое жили́ще бѣсѡ́мъ, на ни́хже па́че ст҃о́мꙋ бѣ̀ ѹ҆стремле́нїе, не́же на скве́рный хра́мъ то́й, є҆го́же и҆ разорѝ до ѡ҆снова́нїѧ, стоѧ́щее высо́кое зда́нїе съ земле́ю соравни́въ, а҆ є҆́же въ землѝ бы́вшее ѡ҆снова́нїе, размета́въ на воздꙋ́хъ. лꙋка́вїи же дꙋ́си ника́коже могꙋ́ще стерпѣ́ти прише́ствїѧ ст҃а́гѡ, плаче́вныѧ и҆спꙋща́хꙋ гла́сы ѕѣлѡ̀ вопїю́ще, и҆ бѣжа́ша побѣжда́еми, и҆ ѿ свои́хъ мѣ́стъ прогони́ми ѻ҆рꙋ́жїемъ моли́твъ непобѣди́магѡ во́ина хрⷭ҇то́ва ст҃лѧ нїкола́а.

По се́мъ бл҃говѣ́рный ца́рь кѡнстанті́нъ хотѧ̀ ѹ҆тверди́ти вѣ́рꙋ во хрⷭ҇та̀ бг҃а, повелѣ̀ собо́рꙋ вселе́нскомꙋ бы́ти во гра́дѣ нїке́и. и҆дѣ́же ст҃і́и ѻ҆ц҃ы̀ собра́вшесѧ, бл҃гоче́стїе ꙗ҆́снѡ проповѣ́даша, а҆́рїевꙋ же є҆́ресь и҆ самаго̀ съ не́ю ѕломꙋ́дреннаго и҆ плевелосѣ́ѧтелнаго є҆ретїка̀ проклѧ́тїю преда́ша: равноче́стна же и҆ соприсносꙋ́щна ѻ҆ц҃ꙋ̀ сн҃а проповѣ́давше, ми́ръ ст҃ѣ́й бж҃е́ственнѣй а҆пⷭ҇лстѣй цр҃кви да́ша. тогда̀ и҆ се́й чꙋ́дный нїкола́й на то́мже собо́рѣ є҆ди́нъ ѿ тре́хъ со́тъ и҆ ѻ҆смна́десѧти ст҃ы́хъ ѻ҆ц҃ъ бы́въ, до́блественнѣ ста̀ проти́вꙋ а҆́рїева блѧдосло́вїѧ, и҆ вкꙋ́пѣ со ст҃ы́ми ѻ҆ц҃ы̀ догма́ты правосла́вныѧ вѣ́ры ѹ҆твердѝ, и҆ всѣ̑мъ и҆звѣ́стнѡ предадѐ. Повѣствꙋ́етъ же ѡ҆ не́мъ і҆ѡа́ннъ мона́хъ стꙋді́йскїй, ꙗ҆́кѡ бж҃е́ственною ре́вностїю а҆́ки вторы́й и҆лїа̀ разже́гсѧ, посредѣ̀ собо́ра дерзнꙋ̀ а҆́рїа не то́чїю сло́вомъ но и҆ дѣ́ломъ посрами́ти, ѹ҆да́ривъ того̀ въ лани́тꙋ. чесѡ̀ ра́ди ст҃і́и ѻ҆ц҃ы̀ вознегодова́ша, и҆ за дерзнꙋ́тое то̀ дѣ́ло ѿѧ́ша ѹ҆ негѡ̀ а҆рхїере́йскаѧ зна̑менїѧ. Гдⷭ҇ь же на́шъ і҆и҃съ хрⷭ҇то́съ и҆ пребл҃гослове́ннаѧ є҆гѡ̀ мт҃рь свы́ше на по́двигъ ст҃а́гѡ нїкола́а смотрѧ́ще, ѡ҆ дерзнꙋ́томъ є҆гѡ̀ дѣ́лѣ бл҃говоли́ша, и҆ ре́вность є҆гѡ̀ бж҃е́ственнꙋю похвали́ша. и҆́бо таково́ же видѣ́нїе, ꙗ҆́коже и҆ ѻ҆́нъ са́мъ пре́жде поставле́нїѧ своегѡ̀ на а҆рхїере́йство ви́дѣ, ѿ досто́йнѣйшихъ ст҃ы́хъ ѻ҆ц҃ъ нѣ́цыи ви́дѣша ѿ є҆ди́ныѧ страны̀ є҆гѡ̀ хрⷭ҇та̀ гдⷭ҇а съ є҆ѵⷢ҇лїемъ, ѿ дрꙋгі́ѧ же со ѻ҆мофо́ромъ пречⷭ҇тꙋю дв҃ꙋ бцⷣꙋ, ѿѧ́тое є҆мꙋ̀ возвраща́ющихъ, и҆ подаю́щихъ. и҆ позна́вше ꙗ҆́кѡ ѹ҆го́дно бы́сть бг҃ꙋ то̀ є҆гѡ̀ дерзнове́нїе, ѹ҆молко́ша, и҆ ꙗ҆́кѡ вели́каго бж҃їѧ ѹ҆го́дника ѕѣлѡ̀ почти́ша. Возврати́всѧ же ѿ собо́ра ст҃ы́й нїкола́й къ своемꙋ̀ ста́дꙋ, прїи́де носѧ̀ ми́ръ и҆ бл҃гослове́нїе, и҆ здра́вое ѹ҆че́нїе медото́чными ѹ҆сты̀ всенаро́дномꙋ подадѐ мно́жествꙋ, нездра́вое и҆ чꙋжде́е ѿ самагѡ̀ ко́рене посѣчѐ, ѡ҆жесточе́нныѧ же и҆ нечꙋ́вственныѧ ѕло́бою состарѣ́вшыѧсѧ є҆ретїкѝ ѡ҆бличи́въ, ѿ хрⷭ҇то́ва ста́да ѿгна̀. ꙗ҆́коже мꙋ́дрый земледѣ́лецъ на гꙋмнѣ̀ и҆ точи́лѣ всѧ̑ сꙋ́щаѧ ѡ҆чища́ѧй, и҆ лꙋ́чшаѧ собира́ѧй, пле́велы же ѿтрѧса́ѧй: та́кѡ бл҃горазꙋ́мный гꙋмна̀ хрⷭ҇то́ва дѣ́латель ст҃ы́й нїкола́й до́брыми плоды̀ наполнѧ́ше дх҃о́внꙋю жи́тницꙋ, пле́велы же мечта́телныѧ ле́сти є҆реті́ческїѧ развѣва́ше, и҆ ѿ пшени́цы гдⷭ҇ни дале́че ѿмета́ше: чесѡ̀ ра́ди и҆ цр҃ковь ст҃а́ѧ нарица́етъ є҆го̀ лопа́тою развѣва́ющею а҆́рїева пле́велнаѧ ѹ҆чє́нїѧ. и҆ бѣ̀ вои́стиннꙋ свѣ́тъ мі́рꙋ и҆ со́ль землѝ, поне́же и҆ житїѐ є҆гѡ̀ бѣ̀ свѣ́тло, и҆ сло́во є҆гѡ̀ со́лїю премꙋ́дрости растворе́но. И҆мѣ́ѧше же до́брый се́й па́стырь ве́лїе попече́нїе ѡ҆ ста́дѣ свое́мъ въ приключа́ющихсѧ нꙋ́ждахъ, не то́чїю дх҃о́вною па́житїю є҆̀ пита́ѧ, но и҆ тѣле́снꙋю промышлѧ́ѧ пи́щꙋ: є҆ди́ною бо лѷкі́йскꙋю странꙋ̀ гла́дꙋ нема́лꙋ ѡ҆бдержа́щꙋ, и҆ мѵ́рскомꙋ гра́дꙋ всѧ́кою пи́щею ѡ҆скꙋдѣ́вшꙋ, и҆ лю́демъ ве́лїимъ недоста́ткомъ ѹ҆тѣснѧ́емымъ, а҆рхїере́й бж҃їй ѡ҆ лю́дехъ ѹ҆бо́гихъ гла́домъ ги́блющихъ милосе́рдовавъ, нѣ́коемꙋ кꙋпцꙋ̀ во і҆та́лїи сꙋ́щꙋ, кора́бль жи́та напо́лнившꙋ, и҆ хотѣ́вшꙋ во и҆́нꙋ странꙋ̀ плы́ти, ꙗ҆ви́сѧ но́щїю во снѣ̀, и҆ да́въ є҆мꙋ̀ трѝ златникѝ въ зало́гъ, въ мѵ́рскїй гра́дъ плы́ти, и҆ та́мѡ жи́то на цѣнѣ̀ ѿда́ти повелѣ̀. возбꙋди́всѧ же ѿ сна̀ кꙋпе́цъ, и҆ трѝ златника̀ въ рꙋцѣ̀ ѡ҆брѣ́тъ, ѹ҆жасе́сѧ, ѹ҆дивлѧ́ѧсѧ таково́мꙋ снꙋ̀, и҆́же чꙋде́снѣ са́мꙋю ве́щь показа̀ ꙗ҆́вѣ. такова́гѡ ѹ҆́бѡ ра́ди чꙋдесѐ кꙋпе́цъ не ѡ҆слꙋ́шасѧ повелѣ́нное сотвори́ти, но сни́де въ мѵ́рскїй гра́дъ, и҆ жи́то сꙋ́щымъ въ не́мъ распродадѐ, не таѧ̀ и҆ бы́вшагѡ є҆мꙋ̀ во снѣ̀ нїкола́ева ꙗ҆вле́нїѧ. Гра́ждане же таково́е ѹ҆тѣше́нїе ѿ гла́да ѡ҆брѣ́тше, и҆ повѣствꙋ́емое слы́шаще сла́вꙋ и҆ бл҃годаре́нїе бг҃ꙋ воздава́хꙋ, и҆ вели́каго а҆рхїере́а нїкола́а чꙋ́днаго пита́телѧ своего̀ ѹ҆блажа́хꙋ.

Въ то̀ вре́мѧ мѧте́жъ воста̀ въ вели́цѣй фрѷгі́и, ѡ҆ чесо́мъ слы́шавъ ца́рь кѡнстанті́нъ посла̀ тре́хъ воевѡ́дъ съ сꙋ́щими под̾ ни́ми во́ины ѹ҆толи́ти мѧте́жъ то́й и҆ тишинꙋ̀ сотвори́ти. и҆мена́ же воево́дамъ, непотїа́нъ, ѹ҆́рсъ, и҆ є҆рпилїо́нъ. ѻ҆ни́ же со мно́гимъ тща́нїемъ ѿплы́вше ѿ кѡнстанті́на гра́да, прїидо́ша въ нѣ́кое приста́нище лѷкі́йскїѧ є҆па́рхїи, є҆́же а҆дрїа́тскїй бре́гъ нарица́етсѧ, и҆дѣ́же бѣ̀ гра́дъ. а҆ поне́же пла́ванїѧ и҆̀мъ не даѧ́ше волнꙋ́ющеесѧ мо́ре, тишины̀ ѹ҆́бѡ въ приста́нищи то́мъ ѡ҆жида́хꙋ. тогда̀ нѣ́цыи ѿ сꙋ́щихъ под̾ ни́ми во́и и҆з̾ корабле́й и҆сходѧ́ще кꙋ́пли ра́ди потре́бныхъ, восхища́хꙋ чꙋжда̑ѧ нꙋ́ждею, ꙗ҆́коже ѻ҆бы́чай є҆́сть во́инѡмъ. ча́стѡ же то̀ творѧ́ще, ѡ҆ѕлоблѧ́хꙋ та́мѡ живꙋ́щихъ, чесѡ̀ ра́ди бы́ша сва́ры и҆ молва̀, и҆ бра́нь ѿ ѻ҆бои́хъ стра́нъ бы́ти надходѧ́ше на мѣ́стѣ нарица́емѣмъ плакома́та. Ѹ҆вѣ́давъ же ѡ҆ то́мъ ст҃ы́й нїкола́й, не ѡ҆блѣни́сѧ са́мъ доитѝ къ бре́гꙋ томꙋ̀ и҆ гра́дꙋ, ꙗ҆́кѡ да ѹ҆мири́тъ бра́нь междоꙋсо́бнꙋю: и҆ а҆́бїе ве́сь гра́дъ и҆ съ воево́дами ѡ҆ прише́ствїи є҆гѡ̀ ѹ҆слы́шавъ и҆зы́де въ срѣ́тенїе, и҆ поклони́сѧ є҆мꙋ̀. Вопроси́ же ст҃ы́й воевѡ́дъ, ка́мѡ и҆ ѡкꙋ́дꙋ и҆́дꙋтъ; ѻ҆нѝ реко́ша, ꙗ҆́кѡ ѿ царѧ̀ по́слани сꙋ́ть во фрѷгі́ю ѹ҆толи́ти сꙋ́щїй та́мѡ мѧте́жъ. Ст҃ы́й же ѹ҆вѣщава́ше и҆̀хъ въ наказа́нїи и҆мѣ́ти своѝ вѡ́и, да бы̀ не твори́ли лю́демъ па́кости. та́же пое́мши во гра́дъ воевѡ́дъ любоче́стнѡ ѹ҆гостѝ и҆̀хъ. ѻ҆ни́ же во́инѡвъ наказа́вше, мѧте́жъ ѹ҆толи́ша, и҆ благослове́нїѧ ѿ ст҃а́гѡ сподо́бишасѧ. семꙋ̀ та́кѡ дѣ́ющꙋсѧ, прїидо́ша ѿ мѵ́ръ нѣ́цыи гра́ждане сѣ́тꙋющїи и҆ пла́чꙋщїи, и҆ припа́дше къ нога́мъ ст҃а́гѡ по́мощи ѡ҆би́димымъ проша́хꙋ, сказꙋ́юще со слеза́ми, ꙗ҆́кѡ без̾ негѡ̀ и҆ге́мѡнъ є҆ѵста́ѳїй, ѿ зави́стливыхъ ѕлы́хъ чл҃вѣ́кѡвъ мздо́ю рꙋ́цѣ своѝ и҆спо́лнивъ, тре́хъ мꙋже́й ѿ гра́да и҆́хъ ѿню́дъ ничто́же согрѣши́вшихъ на сме́рть ѡ҆сꙋдѝ, ѡ҆ чесо́мъ ве́сь гра́дъ сѣ́тꙋетъ и҆ пла́четъ, и҆ твоегѡ̀, гл҃ахꙋ, ѡ҆жида́етъ возвраще́нїѧ влⷣко: а҆́ще бо ты̀ въ домꙋ̀ бы́лъ бы, то̀ не бы̀ таковы́й непра́ведный сꙋ́дъ и҆ге́мѡнъ дерзнꙋ́лъ сотвори́ти. сицева̑ѧ бж҃їй а҆рхїере́й слы́шавъ, поскорбѣ̀ дꙋше́ю, и҆ пое́мь съ собо́ю воевѡ́ды, а҆́бїе пꙋтѝ ꙗ҆́сѧ. Бы́въ же на мѣ́стѣ нарица́емомъ ле́въ, срѣ́те нѣ́кїихъ чл҃вѣ́кѡвъ грѧдꙋ́щихъ, и҆ вопросѝ и҆̀хъ: вѣ́дѧтъ ли что̀ ѡ҆ тре́хъ мꙋже́хъ ѻ҆́ныхъ на сме́рть ѡ҆сꙋжде́нных; ѻ҆ни́ же рѣ́ша є҆мꙋ̀: ѡ҆ста́вихомъ и҆̀хъ на по́ли ка́сторовомъ и҆ по́ллюѯовомъ на ѹ҆бїе́нїе влеко́мыхъ. тогда̀ ст҃ы́й нїкола́й скорѣ́е по́йде на то̀ мѣ́сто, тща́щисѧ непови́ннꙋю тѣ́хъ сме́рть предпости́гнꙋти. и҆ дости́гъ мѣ́ста, ви́дѣ мно́гъ наро́дъ предстоѧ́щъ, и҆ тре́хъ ѡ҆сꙋжде́нныхъ мꙋже́й ѻ҆́пакѡ рꙋ́ки свѧ́заны и҆мꙋ́щихъ, и҆ ли́ца закры́ты ѹ҆жѐ къ землѝ прикло́ншихсѧ, и҆ нагі́ѧ вы̑и протѧгнꙋ́вшихъ, и҆ коне́чнагѡ посѣче́нїѧ ѡ҆жида́ющихъ, спекꙋла́тора же ви́дѣ ѹ҆жѐ и҆звле́кша на то̀ ме́чь, неи́стовѡ же и҆ нелѣ́пымъ ѻ҆́бразомъ сꙋровство̀ ꙗ҆влѧ́юща: и҆ бѣ̀ всѣ̑мъ ѹ҆жа́сное и҆ плаче́вное позо́рище. Тогда̀ ст҃ль хрⷭ҇то́въ съ кро́тостїю ꙗ҆́рость смѣси́въ, свобо́днѡ въ наро́дъ вни́де, и҆ ме́чь ѿ рꙋкѝ спекꙋла́тора и҆сто́ргъ, ве́рже на зе́млю, ничесѡ́же ѹ҆жаснꙋ́всѧ и҆лѝ ѹ҆боѧ́всѧ, и҆ мꙋже́й ѿ ѹ҆́зъ разрѣшѝ: всѧ̑ та̑ со мно́гимъ дерзнове́нїемъ творѧ́ше, и҆ никто́же бѧ́ше возбранѧ́ѧй є҆мꙋ̀, зане́же сло́во є҆гѡ̀ бѧ́ше со вла́стїю, и҆ дѣ́ло є҆гѡ̀ съ бжⷭ҇твенною си́лою, бѣ́ бо вели́къ пред̾ бг҃омъ и҆ всѣ́ми людмѝ. и҆зба́вленнїи же ѿ посѣче́нїѧ трѝ мꙋ́жи ви́дѣвше себѐ неча́ѧннѡ ѿ вра́тъ сме́ртныхъ къ животꙋ̀ возвраще́нныхъ, те́плыми ѿ ра́дости слеза́ми ѡ҆блива́хꙋсѧ, и҆ бл҃годꙋ́шнѡ вопїѧ́хꙋ, и҆ всѝ та́мѡ собра́вшїисѧ бл҃года́рственнѡ взыва́хꙋ. прїи́де же та́мѡ и҆ и҆ге́мѡнъ є҆ѵста́ѳїй, но ѹ҆го́дникъ бж҃їй презрѣ̀ є҆го̀, и҆ ѿ приближа́ющагѡсѧ къ немꙋ̀ ѿвраща́шесѧ, и҆ къ нога́мъ є҆гѡ̀ припа́дающа ѿрѣва́ше, глаго́лати же на него̀ къ цр҃ю̀, и҆ бг҃а во ѿмще́нїе призва́ти ѡ҆бѣщава́шесѧ, и҆ весма̀ коне́чными мꙋ́ками є҆мꙋ̀ преща́ше, ꙗ҆́кѡ непра́веднѡ вла́сть пра́вѧщꙋ. ѻ҆́нъ же со́вѣстїю ѡ҆блича́емый, и҆ преще́нїемъ ст҃а́гѡ ѹ҆страша́емый, со слеза́ми ми́лости проша́ше, и҆ ѿ всеѧ̀ дꙋшѝ молѧ́шесѧ, ка́ѧсѧ ѡ҆ непра́вдѣ свое́й, и҆ и҆ща̀ примири́тисѧ вели́комꙋ ѻ҆ц҃ꙋ̀ нїкола́ю, винꙋ́ же на сїмони́да и҆ є҆ѵдоѯі́а старѣ́йшинъ гра́дскихъ полага́ше: но лжа̀ не можа́ше ѹ҆таи́тисѧ, ст҃ы́й бо и҆звѣ́стнѡ вѣ́дѧше ѡ҆ то́мъ, ꙗ҆́кѡ зла́томъ ѡ҆даре́нъ сы́й, на сме́рть ѡ҆сꙋдѝ непови̑нныѧ. ве́сь же наро́дъ ст҃о́мꙋ ѻ҆ц҃ꙋ̀ нїкола́ю ве́лїе благодаре́нїе воздава́ше. та́же є҆два̀ хрⷭ҇то́въ ѹ҆го́дникъ ѹ҆моле́нъ бы́въ простѝ и҆ге́мѡна, поне́же и҆ са́мъ ѹ҆жѐ со смире́нїемъ и҆ слеза́ми мно́гими и҆сповѣ́даше своѐ то̀ бы́ти согрѣше́нїе а҆ не и҆но́гѡ когѡ̀ дѣ́ло.

Преждепомѧнꙋ́тїи же воево́ды съ ни́мъ прише́дшїи, ви́дѣвше всѧ̑ бы́вшаѧ, чꙋди́шасѧ ре́вности и҆ бл҃гости вели́кагѡ бж҃їѧ а҆рхїере́а. та́же ст҃ы́хъ є҆гѡ̀ моли́твъ сподо́блшесѧ, и҆ тогѡ̀ блгⷭ҇ве́нїе ꙗ҆́кѡ до́браго спꙋ́тника взе́мше во фрѷгі́ю ѿидо́ша, є҆́же и҆спо́лнити и҆̀мъ царе́во повелѣ́нїе. и҆ та́мѡ бы́вше сꙋ́щїй мѧте́жь до́брѣ ѹ҆мири́ша, и҆ всѧ̑ повелѣ́наѧ и҆̀мъ ѿ цр҃ѧ̀ соверши́вше, съ ра́достїю въ вѷзанті́ю возврати́шасѧ, многохва́лнѡ же ѿ цр҃ѧ̀ и҆ ѿ всѣ́хъ болѧ́ръ по́честь прїѧ́ша. и҆ та́кѡ про́чее до́брыѧ ра́ди сла́вы своеѧ̀ въ пала́тѣ пребыва́хꙋ, и҆ ца́рскомꙋ совѣ́тꙋ сподо́блени бы́ша. зави́стныѧ же ѻ҆́чи лꙋка́вагѡ се́рдца ѕлы́хъ человѣ̑къ не могꙋ́ще си́хъ въ таково́й сла́вѣ зрѣ́ти, на ѕло́бꙋ и҆ враждꙋ̀ подви́гнꙋшасѧ: тѣ́мже ѕо́лъ совѣ́тъ ѕлі́и спле́тше, пристꙋпи́ша къ гра́дскомꙋ є҆па́рхꙋ є҆ѵла́вїю, лю́тѣ на мꙋже́й тѣ́хъ сплета́юще клевєты̀, и҆ гл҃юще: не до́брѣ совѣща́ша воевѡ́ды, нижѐ на бл҃го ѡ҆брати́тсѧ коне́цъ тѣ́хъ совѣ́та: но́выѧ бо начина́ютъ вє́щи, ꙗ҆̀же на́мъ въ слꙋ́хъ внидо́ша, и҆ лꙋка̑внаѧ кꙋю́тъ на цр҃ѧ̀. та́кѡ на ни́хъ ре́кше, зла́то мно́го є҆па́рхꙋ да́ша. ѻ҆́нъ же и҆ царю̀ во ѹ҆́ши внесѐ клеветꙋ̀ ѻ҆́нꙋю: и҆ а҆́бїе ца́рь слы́шавъ, повелѣ̀ и҆ без̾ и҆спыта́нїѧ трѝ воево́ды ты́ѧ всади́ти въ темни́цꙋ: да не вта́йнѣ речѐ и҆збѣ́гше, соверша́тъ ѕлы́й совѣ́тъ сво́й. и҆ бѧ́хꙋ во ѹ҆́захъ воевѡ́ды, не вѣ́дꙋще чесѡ̀ ра́ди темни́цѣ пре́дани сꙋ́ть, зна́ѧхꙋ бо ни въ чесо́мже себѐ пови́нныхъ бы́ти. Вре́мени же ма́лꙋ минꙋ́вшꙋ ѹ҆боѧ́шасѧ клеветницы̀, да не ка́кѡ ѡ҆бличи́тсѧ ло́жнаѧ клевета̀ и҆́хъ, и҆ въ ꙗ҆вле́нїе прїи́детъ ѕло́ба и҆́хъ, и҆ на сами́хъ бѣда̀ ѡ҆брати́тсѧ: тогѡ̀ ра́ди съ мно́жайшими молба́ми пристꙋпи́ша къ є҆па́рхꙋ, да не ѡ҆ста́витъ жи́ти на до́лзѣ мꙋже́й тѣ́хъ, но сꙋ́дъ на ни́хъ сме́ртный по начина́нїю пе́рвагѡ совѣ́та вско́рѣ да сотвори́тъ. Є҆па́рхъ же златолю́бїемъ ѹ҆дави́выйсѧ сїѧ̑ слы́шавъ, ѡ҆бѣ́тꙋ коне́цъ положѝ. а҆́бїе ѹ҆̀бо ѹ҆ны́лымъ лице́мъ и҆ сѣ́тованнымъ взо́ромъ къ цр҃ю̀ прїи́де, а҆́ки ѕо́лъ вѣ́стникъ ꙗ҆влѧ́ѧсѧ, кꙋ́пнѡ же и҆ показа́тисѧ хотѧ̀, ꙗ҆́кѡ велмѝ ѡ҆ царе́вѣ животѣ̀ пече́тсѧ, и҆ вѣ́рнѡ ѡ҆ не́мъ прилежи́тъ. и҆ нача̀ разли́чнѡ того̀ лсти́ти лꙋка́вными и҆ ѹ҆хищре́нными глаго́лы, на гнѣ́въ проти́вꙋ непови́нныхъ гнѣ́ва подви́жꙋщи и҆ глаго́лющи: ни є҆ди́нъ ѿ сѣдѧ́шихъ въ темни́цѣ пока́ѧтисѧ хо́щетъ, ѽ цр҃ю̀, но въ пе́рвомъ ѕло́мъ намѣ́ренїи пребыва́ютъ, не престаю́тъ мы́слѧще ко́въ, и҆ сшива́юще на тѧ̀ ѕло́бꙋ, повелѝ ѹ҆̀бо не ме́даѧ ѹ҆мꙋ́чити и҆̀хъ, да не ка́кѡ ѻ҆нѝ предвари́вше соверша́тъ ѕло́бꙋ, ю҆́же на тѧ̀ совѣща́ша, и҆ произведꙋ́тъ въ коне́цъ ѕло́е своѐ начина́нїе. таковы́ми глаго́лы возмꙋще́нъ цр҃ь, на сме́рть непови́нныхъ ѡ҆сꙋдѝ, бѣ̀ же ве́черъ и҆ на ѹ҆́трїе ѹ҆бїе́нїе тѣ́хъ ѿложи́сѧ. Ѹ҆вѣ́давъ же ѡ҆ то́мъ темни́чный стра́жъ, и҆ пе́рвѣе въ себѣ̀ мно́гѡ ѡ҆ таково́й напа́сти на непови́нныхъ пла́кавъ, прїи́де къ воево́дамъ ѻ҆́нымъ си́це глаго́лющи: лꙋ́чше мѝ бы́ло бы, дабы̀ не позна́лсѧ съ ва́ми, ни любе́зныѧ вкꙋ́пѣ наслажда́лсѧ бесѣ́ды и҆ трапе́зы: ѹ҆до́бь бо претерпѣ́лъ бы разлꙋче́нїе ва́ше, и҆ ма́лѡ бы поболѣ́лъ ѡ҆ наше́дшей на вы̀ напа́сти, и҆ не бы̀ такова̀ ско́рбь пришла̀ на дꙋ́шꙋ мою̀: ѹ҆́трѣ бо дрꙋ́гъ ѿ дрꙋ́га разлꙋчи́мсѧ, ѹ҆вы̀ мнѣ̀, коне́чнымъ и҆ го́рькимъ разлꙋче́нїемъ, и҆ ѹ҆жѐ ѿсе́лѣ возлю́бленнагѡ лица̀ ва́шегѡ не ѹ҆зрю̀, ни гл҃ющихъ ва́съ ѹ҆слы́шꙋ, ѹ҆би́ти бо ва́съ повелѣ́но є҆́сть: завѣща́йте ѹ҆̀бо, а҆́ще что̀ хо́щете ѡ҆ и҆мѣ́нїи ва́шемъ, ны́нѣ бо є҆́сть вре́мѧ, да не предвари́тъ во́ли ва́шеѧ сме́рть. Сицева̑ѧ томꙋ̀ съ рыда́нїемъ и҆зре́кшꙋ, ѻ҆нѝ ничто́же себѐ цр҃ю̀ согрѣши́вшихъ, ни сме́рти досто́йныхъ вѣ́дꙋще, раздра́ша ри̑зы своѧ̀, и҆ власы̀ лю́тѣ терза́хꙋ глаго́люще: кото́рый вра́гъ позави́дѣ на́шемꙋ животꙋ̀, почто́же и҆ мы̀ ꙗ҆́кѡ ѕлодѣ́и прїе́млемъ сме́рть, что̀ сотвори́хомъ досто́йнѡ сме́рти; и҆ призыва́хꙋ свои́хъ по и҆́мени сро́дникѡвъ же и҆ зна́емыхъ, и҆ свидѣ́телѧ представлѧ́хꙋ бг҃а, ꙗ҆́кѡ ничто́же ѕло̀ сотвори́ша, и҆ пла́кахꙋсѧ го́рькѡ. Є҆ди́нъ же ѿ ни́хъ и҆́менемъ непотїа́нъ воспомѧнꙋ̀ ст҃а́го нїкола́а ка́кѡ въ мѵ́рѣхъ тре́мъ мꙋже́мъ ѻ҆́нымъ предста́въ, помо́щникъ вско́рѣ пресла́венъ бы́сть и҆ бл҃гъ застꙋ́пникъ, и҆зба́вивъ тѣ́хъ ѿ сме́рти: ѡ҆ то́мъ бесѣ́дꙋюще дрꙋ́гъ ко дрꙋ́гꙋ, молѧ́хꙋсѧ глаго́люще си́це: Бж҃е нїкола́евъ, и҆зба́вивый пе́рвѣе тре́хъ мꙋже́й ѿ непра́ведныѧ сме́рти, при́зри ны́нѣ и҆ на на́съ, ꙗ҆́кѡ нѣ́сть на́мъ въ человѣ́цѣхъ помо́щника: се́ бо ѡ҆бдержи́тъ на́съ вели́каѧ бѣда̀, и҆ нѣ́сть и҆зима́ющагѡ ѿ напа́сти. сѐ и҆ гла́съ пре́жде и҆зше́ствїѧ дꙋ́шъ на́шихъ и҆змолчѐ, и҆ ѧ҆зы́къ ѻ҆гне́мъ серде́чнымъ сгара́ѧ присыха́етъ, ѹ҆жѐ и҆ мл҃твы не мо́жемъ принестѝ тебѣ̀. ско́рѡ да предварѧ́тъ ны щедрѡ́ты твоѧ̀ гдⷭ҇и, и҆ и҆змѝ на́съ и҆з̾ рꙋкѝ и҆́щꙋщихъ дꙋ́шы на́шѧ: во ѹ҆́трешнїй бо дн҃ь ѹ҆мертви́ти хотѧ́тъ на́съ, потщи́сѧ на по́мощь на́шꙋ, и҆ и҆зба́ви на́съ непови́нныхъ сме́рти. Бг҃ъ же слꙋ́шаѧй моли́твы молѧ́щихсѧ є҆мꙋ̀ и҆ боѧ́щихсѧ є҆гѡ̀, и҆ ꙗ҆́кѡ ѻ҆ц҃ъ ча̑да ѹ҆щедрѧ́ѧй, посла̀ и҆̀мъ на по́мощь ст҃а́го своего̀ ѹ҆го́дника вели́каго а҆рхїере́а нїкола́а, и҆ въ тꙋ̀ но́щь, спѧ́щꙋ цр҃ю̀, предста̀ ст҃ль хрⷭ҇то́въ си́це гл҃ѧ: вско́рѣ воста́въ, держи́мыхъ въ темни́цѣ тре́хъ воевѡ́дъ ѿпꙋстѝ, без̾ вины́ бо ѡ҆клевета́ни, сꙋ́ть, и҆ непра́веднѡ ѕлѣ̀ стра́ждꙋтъ. и҆сповѣ́да же є҆мꙋ̀ и҆ всю̀ ве́щь и҆звѣ́стнѡ, и҆ речѐ: а҆́ще не послꙋ́шаеши менѐ, нижѐ ѿпꙋ́стиши и҆̀хъ, бра́нь воздви́гнꙋ на тѧ̀, ꙗ҆́коже бѣ̀ во фрѷгі́и, и҆ ѕлѣ̀ поги́бнеши. Ѹ҆диви́всѧ же цр҃ь мꙋ́жа дерзнове́нїю, помышлѧ́ше, ка́кѡ но́щїю беⷥвре́меннѡ внꙋ́трь пала́ты вни́ти смѣ́ѧше, и҆ речѐ: кто̀ є҆сѝ ты̀, и҆́же такѡва́ѧ на на́съ и҆ на мою̀ держа́вꙋ прещє́нїѧ наноси́ти смѣ́еши; ѻ҆́нъ же речѐ: Нїкола́й и҆́мѧ мѝ є҆́сть, мѵ́рскїѧ митропо́лїи а҆рхїере́й є҆́смь. Цр҃ь же ѿ видѣ́нїѧ смꙋти́сѧ, и҆ воста́въ помышлѧ́ше, что̀ є҆́сть сїѐ. Та́кожде и҆ є҆ѵла́вїю є҆па́рхꙋ въ тꙋ́юже но́щь спѧ́щꙋ ст҃ы́й во снѣ̀ ꙗ҆ви́сѧ, и҆ такѡва́ѧ же ѡ҆ мꙋже́хъ тѣ́хъ и҆звѣ́ствова. Воспрѧнꙋ́въ же є҆ѵла́вїй ѹ҆боѧ́сѧ, и҆ размышлѧ́ше во ѹ҆мѣ̀ ѡ҆ видѣ́нїи. къ немꙋ́же нѣ́кто ѿ цр҃ѧ̀ а҆́бїе прїи́де, возвѣща́ѧ є҆́же цр҃ь во снѣ̀ ви́дѣ. ѻ҆́нъ же ско́рѡ ше́дъ къ цр҃ю̀, своѐ видѣ́нїе возвѣстѝ, и҆ ꙗ҆́влшаѧсѧ є҆мꙋ̀ всѧ̑ побѣ́да, и҆ ѹ҆дивлѧ́хꙋсѧ ѻ҆́ба ѡ҆ пресла́вномъ видѣ́нїи, є҆́же ѻ҆бои́мъ є҆дина́кѡ бы́сть. Повелѣ̀ же цр҃ь а҆́бїе воевѡ́ды предста́вити и҆з̾ темни́цы, и҆ речѐ и҆̀мъ: кото́раѧ волхова̑нїѧ сотво́рше, посла́сте на на́съ такѡва́ѧ со́нїѧ, велми́ бо ꙗ҆́влшїйсѧ мꙋ́жъ ꙗ҆рѧ́шесѧ и҆ претѧ́ше, вско́рѣ навестѝ бра́нь хвалѧ́сѧ. ѻ҆ни́ же ничто́же вѣ́дꙋще, ма́нїемъ дрꙋ́гъ дрꙋ́га вопроша́хꙋ, а҆́ще ѿ ни́хъ кто̀ что̀ вѣ́сть: но ни є҆ди́нъ что̀ зна́ѧше, то́чїю ѹ҆миле́ными ѻ҆чесы̀ дрꙋ́гъ къ дрꙋ́гꙋ взира́хꙋ. Цр҃ь сїѧ̑ ви́дѣвъ на кро́тость преложи́сѧ, и҆ речѐ къ ни́мъ: ничто́же ѕла̀ боѧ́щесѧ рцы́те и҆́стинꙋ. ѻ҆ни́ же сле́зъ ѻ҆́чи напо́лнивше, и҆ велмѝ рыда́юще, реко́ша: мы̀ ѽ цр҃ю̀ волхова́нїѧ не вѣ́мы, нижѐ на твою̀ держа́вꙋ что̀ ѕло̀ совѣща́хомъ, ни помы́слихомъ, свидѣ́тель є҆́сть на́мъ всеви́дѧщее ѻ҆́ко. а҆́ще ли же не та́кѡ є҆́сть, но нѣ́что лꙋка́вно ѡ҆ на́съ и҆зы́щеши, ни є҆ди́ныѧ сотворѝ на́мъ ми́лости, не то́кмѡ на́съ тре́хъ, но и҆ всегѡ̀ ро́да на́шегѡ не пощадѝ. мы̀ ѿ ѻ҆те́цъ на́шихъ наꙋчи́хомсѧ цр҃ѧ̀ чти́ти, и҆ є҆́же къ немꙋ̀ вѣ́рность па́че всегѡ̀ и҆мѣ́ти: тѣ́мже и҆ ны́нѣ вѣ́рнѡ твоѐ здра́вїе блюдо́хомъ, и҆ порꙋчє́ннаѧ на́мъ, ꙗ҆́коже подоба́ше са́нꙋ на́шемꙋ, тве́рдѡ храни́момъ, велѣ́нїю твоемꙋ̀ со ѹ҆се́рдїемъ слꙋжа́ще, во фрѷгі́и мѧте́жъ смири́хомъ, и҆ є҆́же ко врагѡ́мъ бра́нь разори́хомъ, и҆ свою̀ хра́брость дѣ́лы дово́лнѡ тебѣ̀ предста́вихомъ, ꙗ҆́коже до́брѣ вѣ́дꙋщїи рекꙋ́тъ. Твоѧ́ же держа́ва пре́жде по́чести на́мъ дарова̀, ны́нѣ же ꙗ҆́ростїю на на́съ воѡрꙋжи́лсѧ є҆сѝ, и҆ сꙋди́ми є҆смы̀ лю́тѣ, и҆ коне́чнѡ страда́ти ѡ҆жида́емъ: та́кѡ ꙗ҆́коже мни́тсѧ на́мъ ѽ цр҃ю̀, є҆́же къ тебѣ̀ на́ше ѹ҆се́рдїе, бо́лшїѧ на́мъ мꙋ́ки вино́вно є҆́сть, и҆ вмѣ́стѡ сла́вы и҆ по́честей, и҆́хже надѣ́ѧхомсѧ, сме́ртный стра́хъ и҆ ѡ҆сꙋжде́нїе ѡ҆бдержи́тъ на́съ. таковы́ми глаго́лы цр҃ь ѹ҆мили́сѧ, и҆ ка́ѧшесѧ ѡ҆ порꙋга́нїи мꙋже́й тѣ́хъ: трепета́ше бо сꙋда̀ бж҃їѧ, и҆ багрѧни́цы ца́рскїѧ стыдѧ́шесѧ, ꙗ҆́кѡ да не и҆ны́мъ зако́нъ полага́ѧ, са́мъ беⷥзако́нныѧ сꙋды̀ твори́ти ви́дитсѧ: и҆ въ то́й ча́съ ми́лостивнѡ зрѧ́ше на ни́хъ, и҆ кро́ткѡ къ ни́мъ вѣща́ше. ѻ҆ни́ же ѹ҆миле́ннѡ взира́юще къ царю̀, внеза́пꙋ ѹ҆зрѣ́ша подо́бїе ст҃а́гѡ нїкола́а съ царе́мъ сѣдѧ́ща, ма́нїемъ же проще́нїе и҆ милосе́рдїе и҆̀мъ ѡ҆бѣщава́юща. сегѡ́ же и҆́нъ никто́же ви́дѧше, то́чїю трѝ воево́ды ті́и. тогда̀ ѻ҆нѝ дерзнове́нїе прїе́мше, велегла́снѡ глаго́лахꙋ: Бж҃е нїкола́евъ, и҆зба́вивый трѝ мꙋ́жы въ мѵ́рѣхъ нѣ́когда ѿ непра́ведныѧ сме́рти, и҆змѝ и҆ на́съ рабѡ́въ твои́хъ ѿ настоѧ́щїѧ бѣды̀ сеѧ̀. Восхи́ти же ца́рь сло́во и҆ речѐ: кто̀ є҆́сть нїкола́й, и҆ кото́рыѧ мꙋ́жы спасѐ; рцы́те мѝ сїѐ и҆звѣ́стнѡ. Непотїа́нъ же всѧ̑ порѧ́дꙋ и҆сповѣ́да є҆мꙋ̀. Тогда̀ ца́рь ст҃а́го нїкола́а вели́ка бы́ти ѹ҆го́дника бж҃їѧ позна́въ, дерзнове́нїю же є҆гѡ̀ и҆ за ѡ҆би́димыѧ вели́цѣй ре́вности ѹ҆диви́всѧ, свободѝ воевѡ́дъ тѣ́хъ, глаго́лѧ: не а҆́зъ ва́мъ да́рꙋю живо́тъ, но нїкола́й вели́кїй гдⷭ҇нь слꙋжи́тель, є҆го́же вы̀ на по́мощь призыва́сте: и҆ди́те ѹ҆́бѡ къ немꙋ̀, и҆ бл҃годаре́нїе воздади́те. рцы́те же и҆ ѿ менѐ є҆мꙋ̀: сѐ повелѣ́ное тобо́ю сотвори́хъ, не гнѣ́вайсѧ ѹ҆̀бо на мѧ̀ хрⷭ҇то́въ ѹ҆го́дниче. сїѐ ре́къ, є҆ѵⷢ҇лїе злато́е и҆ кади́лницꙋ златꙋ́ю съ чи́стымъ ка́менїемъ ѹ҆стро́енꙋю и҆ два̀ свѣти́лника врꙋчѝ и҆̀мъ, повелѣ́въ та вда́ти мѵ́рстѣй цр҃кви. и҆ та́кѡ ті́и трѝ воево́ды, пресла́вное полꙋчи́вше спасе́нїе, а҆́бїе пꙋтѝ ꙗ҆́шасѧ, и҆ ра́достнѡ къ ст҃о́мꙋ прїидо́ша, и҆ ве́селѡ того̀ ви́дѣша, и҆ ве́лїе бл҃годаре́нїе возда́ша сотво́ршемꙋ и҆̀мъ таково́е добродѣѧ́нїе, и҆ воспѣва́хꙋ гл҃юще: Гдⷭ҇и гдⷭ҇и, кто̀ подо́бенъ тебѣ̀; и҆збавлѧ́ѧй ни́ща и҆з рꙋкѝ крѣ́плшихъ є҆гѡ̀ (Ѱал. л҃д : і҃). Ни ѹ҆бо́гихъ же ѡ҆ста́виша без̾ млⷭ҇тыни, но и҆ тѣ́хъ ѿ и҆мѣ́нїй свои́хъ ѹ҆дово́лствоваша, и҆ въ своѧ̀ бл҃гопоспѣ́шнѡ возврати́шасѧ. Такова̀ сꙋ́ть дѣла̀ бж҃їѧ велича́ющаѧ своего̀ ѹ҆го́дника: тѣ́мъ ꙗ҆́кѡ крила́та ѡ҆ не́мъ сла́ва взе́мшисѧ всю́дꙋ протечѐ и҆ всѧ̑ ѡ҆б̾ѧ̀, пꙋчи́нꙋ про́йде, и҆ по вселе́ннѣй ноша́шесѧ, и҆ ни є҆ди́нагѡ же мѣ́ста ѡ҆ста́ви, и҆дѣ́же бы не слы́шана бы́ша вели́каѧ и҆ ди́внаѧ чꙋдеса̀ вели́кагѡ а҆рхїере́а нїкола́а по дарова́ннѣй є҆мꙋ̀ блгⷣти ѿ всеси́лнагѡ бг҃а.

Нѣ́когда кора́бленицы ѿ є҆гѵ́пта пловꙋ́ще въ страны̀ лѷкі́йскїѧ бы́ша въ вели́цѣмъ волне́нїи и҆ бꙋ́ри, ꙗ҆́кѡ и҆ вѣ́трилѡмъ низве́рженымъ бы́ти, и҆ всемꙋ̀ кораблю̀ ѿ нꙋ́жды вели́кихъ вѡ́лнъ сокрꙋша́тисѧ, и҆ ѹ҆же всѝ ѿча́ѧшасѧ живота̀ своегѡ̀. є҆гда́ же воспомѧнꙋ́ша вели́каго а҆рхїере́а нїкола́а, є҆гѡ́же не ви́дѣша никогда́же, то́чїю ѡ҆ не́мъ слы́шаша, ꙗ҆́кѡ ско́рый є҆́сть всѣ̑мъ призыва́ющымъ є҆го̀ в̾ бѣда́хъ помо́щникъ: на мл҃твꙋ к̾ немꙋ̀ ѡ҆брати́шасѧ, и҆ в̾ по́мощь того̀ призыва́хꙋ. Ст҃ы́й же а҆́бїе и҆̀мъ ꙗ҆ви́сѧ, и҆ в̾ кора́бль вни́де, гл҃ѧ: сѐ призва́сте мѧ̀, и҆ прїидо́хъ помощѝ ва́мъ, не ѹ҆бо́йтесѧ ѹ҆́бѡ: и҆ прїе́мъ весло̀, кора́бль ѹ҆правлѧ́ти зрѧ́шесѧ. та́же запретѝ вѣ́трѡмъ и҆ мо́рю, ꙗ҆́коже и҆ гдⷭ҇ь на́шъ и҆ногда̀, и҆́же речѐ: Вѣ́рꙋѧй въ мѧ̀, дѣла̀ ꙗ҆̀же а҆́зъ творю̀, и҆ то́й сотвори́тъ (Ін. д҃і : в҃і). та́кѡ вѣ́рный ра́бъ гдⷭ҇нь мо́рю и҆ вѣ́трѡмъ повелѣва́ше, и҆ послꙋшли́ви є҆мꙋ̀ быва́хꙋ. Кора́бленицы же по то́мъ ти́химъ вѣ́тромъ носи́ми къ мѵ́рскомꙋ гра́дꙋ приста́ша, и҆ и҆зше́дше и҆з̾ кораблѧ̀ во гра́дъ и҆до́ша ви́дѣти хотѧ́ще спа́сшаго и҆̀хъ ѿ бѣды̀. ѹ҆зрѣ́вше же є҆го̀ грѧдꙋ́ща въ цр҃ковь, позна́ша бл҃годѣ́телѧ своего̀, и҆ те́кше къ нога́мъ є҆гѡ̀ припадо́ша, воздаю́ще є҆мꙋ̀ бл҃годаре́нїе. Ди́вный же нїкола́й не то́чїю ѿ тѣле́сныѧ бѣды̀ и҆ сме́рти тѣ́хъ и҆зба́ви, но и҆ ѡ҆ дꙋше́вномъ и҆́хъ спасе́нїи попече́нїе сотворѝ: прозорли́въ бо сы́й, дх҃о́вными ѻ҆чесы̀ ѹ҆смотрѣ̀ въ ни́хъ скве́рнꙋ любодѣѧ́нїѧ, є҆́же чл҃вѣ́ка дале́че ѿ бг҃а ѿрѣва́етъ, и҆ ѿ за́повѣдей є҆гѡ̀ ѿво́дитъ, и҆ глаго́ла къ ни́мъ: поразꙋмѣ́йте себѐ, молю̀ ва́съ, ѽ ча́да, поразꙋмѣ́йте, и҆ сердца̀ ва́ша и҆ помышлє́нїѧ на бл҃гоꙋго́дїе бг҃ꙋ и҆спра́вите: а҆́ще бо и҆ мно́гихъ человѣ̑къ ѹ҆таи́мсѧ, и҆ мни́мсѧ бы́ти бла́зи, но бг҃а ничто́же ѹ҆таи́тисѧ возмо́жетъ, сегѡ̀ ра́ди потщи́тесѧ дꙋше́внꙋю ст҃ы́ню и҆ тѣле́снꙋю чистотꙋ̀ со всѧ́кимъ ѹ҆се́рдїемъ храни́ти, хра́мъ бж҃їй є҆стѐ, ꙗ҆́коже глаго́летъ па́ѵелъ бж҃е́ственный а҆пⷭ҇лъ: а҆́ще кто̀ бж҃їй хра́мъ растли́тъ, растли́тъ сего̀ бг҃ъ (а҃. Кор. г҃ : ѕ҃і, з҃і). си́це мꙋже́й ѻ҆́ныхъ дꙋшеполе́зными наказа́въ словесы̀ ѿпꙋстѝ и҆̀хъ съ ми́ромъ. бѣ́ бо бл҃же́ннагѡ нра́въ ꙗ҆́кѡ чадолюби́ва ѻ҆ц҃а̀, зра́къ же ꙗ҆́кѡ а҆́гг҃ла бж҃їѧ, бл҃года́тїю бжⷭ҇твенною сїѧ́ющь. и҆ и҆схожда́ше нѣ́каѧ ѿ лица̀ є҆гѡ̀ а҆́ки ѿ мѡѷсе́ова пресвѣ́тлаѧ лꙋча̀, ѿ видѣ́нїѧ же є҆гѡ̀ мно́гаѧ по́льза быва́ше на него̀ зрѧ́щымъ: а҆́ще бо кто̀ ко́ею стра́стїю и҆лѝ печа́лїю дш҃е́вною ѡ҆тѧгча́емь быва́ше, и҆ то́кмѡ воⷥзрѣ̀ на ст҃а́го, а҆́бїе дово́лное ѡ҆брѣта́ше печа́ли своеѧ̀ ѹ҆тѣше́нїе. и҆лѝ а҆́ще кто̀ побесѣ́дова къ немꙋ̀, мно́гѡ ѹ҆спѣва́ше на до́брое. не то́кмѡ же ѿ вѣ́рныхъ, но и҆ ѿ невѣ́рныхъ а҆́ще приключа́шесѧ комꙋ̀ ѿ сла́дкагѡ ѻ҆́нагѡ и҆ медото́чнагѡ ѧ҆зы́ка что̀ слы́шати, ѹ҆милѧ́шесѧ, и҆ на спаси́телнꙋю наставлѧ́шесѧ стезю̀, возра́стшꙋю и҆змла́да, невѣ́рїѧ ѕло́бꙋ ѿме́щꙋщи, прїе́млющи же в̾ срⷣце пра́вое и҆́стины сло́во.

Поживе́ же вели́кїй ѹ҆го́дникъ бж҃їй лѣ́та довѡ́лна посредѣ̀ мѷрскагѡ гра́да бж҃е́ственными добро́тами сїѧ́ѧ по бж҃е́ственномꙋ писа́нїю: ꙗ҆́кѡ ѕвѣзда̀ ѹ҆́треннѧѧ посредѣ̀ ѻ҆блакѡ́въ, а҆́ки лꙋна̀ полна̀ во дне́хъ свои́хъ, ꙗ҆́кѡ сл҃нце сїѧ́ющее на цр҃ковь бг҃а вы́шнѧгѡ, и҆ ꙗ҆́кѡ крі́нъ при и҆схо́дищахъ воды̀, и҆ ꙗ҆́кѡ многоцѣ́нное мѵ́ро всѣ́хъ ѡ҆бл҃гоꙋха́ѧ. и҆ въ глꙋбо́цѣй ста́рости, и҆спо́лненъ дне́й мно́гихъ до́лгъ ѻ҆́бщагѡ є҆стества̀ чл҃вѣ́ческагѡ ѿдадѐ, ма́лѡ пе́рвѣе тѣ́ломъ поболѣ́въ, до́брѣ вре́менный сконча̀ живо́тъ, и҆ на нестарѣ́ющꙋюсѧ и҆ бл҃же́ннꙋю жи́знь съ ра́достїю и҆ ѱалмопѣ́нїемъ пре́йде, провожда́ющымъ є҆го̀ ст҃ы́мъ а҆́гг҃лѡмъ, и҆ ст҃ы́хъ ли́кѡмъ срѣта́ющымъ ст҃а́го. Тѣ́ло же є҆гѡ̀ чⷭ҇тно́е, собра́вшесѧ ѿ всеѧ̀ тоѧ̀ лѷкі́йскїѧ страны̀ є҆пⷭ҇кпи съ кли́рїки, и҆ и҆́ночествꙋющїи, и҆ наро́да ѿ всѣ́хъ градѡ́въ безчи́сленное мно́жество, положи́ша че́стнѡ въ собо́рнѣй мѵ́рскїѧ митропо́лїи цр҃кви, деке́мврїа мѣ́сѧца въ ѕ҃ де́нь. И҆ соверша́хꙋсѧ мнѡ́гаѧ чꙋдеса̀ ѿ ст҃ы́хъ ѹ҆го́дника бж҃їѧ моще́й. Мѵ́ро бо бл҃гово́нное и҆ цѣле́бное мо́щи є҆гѡ̀ и҆сточи́ша, и҆́мже помазꙋ́ющесѧ болѧ́щїи здра́вїе полꙋча́хꙋ. Чесѡ̀ ра́ди ѿ коне́цъ землѝ притека́хꙋ лю́дїе ко гро́бꙋ є҆гѡ̀, болѣ́знемъ свои́мъ и҆сцѣлє́нїѧ и҆́щꙋще, и҆ не лиша́хꙋсѧ и҆ско́магѡ, всѧ́кїѧ бо недꙋ́ги ст҃ы́мъ тѣ́мъ мѵ́ромъ и҆сцѣлѣва́хꙋсѧ не то́чїю тѣлє́сныѧ, но и҆ дꙋшє́вныѧ, и҆ дꙋ́хи лꙋка́выѧ прогони́ми быва́хꙋ: на ты́ѧ бо не то́чїю въ животѣ̀ свое́мъ, но и҆ по преставле́нїи воѡрꙋжа́шесѧ, и҆ побѣжда́ше, и҆ ны́нѣ побѣжда́етъ.

И҆ногда̀ бг҃обоѧ́знивїи мꙋ́жи ѿ ѹ҆́стїѧ рѣкѝ тана́їсъ нарица́емыѧ, слы́шавше ѡ҆ мѷроточи́выхъ и҆ цѣле́бнихъ моще́хъ ст҃лѧ хрⷭ҇то́ва нїкола́а въ мѵ́рѣ гра́дѣ лѷкі́йстѣмъ сꙋ́щихъ, совѣща́шасѧ пойтѝ мо́ремъ та́мѡ поклоне́нїѧ ра́ди: и҆ напо́лнивше кора́бль пшени́цею, ѿплы́ти хотѧ́хꙋ. лꙋка́вый же бѣ́съ, и҆́же въ тре́бищи пре́жде а҆ртемі́динѣ живѧ́ше, є҆го́же ст҃ы́й нїкола́й ѿтꙋ́дꙋ и҆згна̀, тре́бище разори́вши, ѡ҆щꙋти́въ кора́бль то́й хотѧ́щъ плы́ти к̾ вели́комꙋ ѻ҆ц҃ꙋ̀, гнѣ́ваѧсѧ же на ст҃а́го за разоре́нїе тре́бища, и҆ за своѐ ѿтꙋ́дꙋ и҆згна́нїе, и҆ все́ю си́лою свое́ю ме́сть возда́ти тща́щисѧ, ѹ҆мы́сли мꙋже́й тѣ́хъ воспѧти́ти ѿ намѣ́реннагѡ пꙋтѝ, и҆ лиши́ти и҆̀хъ ст҃ы́ни, па́кость и҆ препѧ́тїе сотвори́вши жела́нїю и҆́хъ. претви́сѧ ѹ҆́бо въ женꙋ̀, и҆ сосꙋ́дъ нѣ́кїй по́лнъ є҆ле́а носѧ̀ мечта́шесѧ, и҆ гл҃аше к̾ мꙋже́мъ тѣ́мъ: сїе́ бы хотѣ́ла нестѝ ко гро́бꙋ ст҃а́гѡ, бою́сѧ же пла́ванїѧ ѕѣлѡ̀, не возмо́жно бо є҆́сть немощнѣ́й и҆ стома́хомъ болѧ́щей женѣ̀ на толи́кꙋю пꙋчи́нꙋ дерзнꙋ́ти: тогѡ̀ ра́ди молю́сѧ ва́мъ, сосꙋ́дъ се́й взе́мше, донеси́те ко гро́бꙋ, и҆ и҆злі́йте є҆ле́й в̾ свѣти́лникъ ст҃а́гѡ. Такова́ѧ лꙋка́вый гл҃ющи, сосꙋ́дъ бг҃олю́бцємъ въ рꙋ́ки дадѐ, невѣ́домо же съ каковы́ми бѣсо́вскими чарова́нми смѣ́шенъ бѣ̀ є҆ле́й то́й, то́чїю да вреди́тъ и҆ погꙋби́тъ пловꙋ́щихъ. ті́и же не вѣ́дꙋще лꙋка́вагѡ дѣ́йства, послꙋ́шаша проше́нїѧ, и҆ сосꙋ́дъ то́й съ бѣсо́вскимъ є҆ле́емъ взѧ́ша. и҆ ѿпꙋсти́вшесѧ ѿ бре́га, плы́ша де́нь то́й до́брѣ. во ѹ҆́трїе же возвѣ́ѧ вѣ́тръ полꙋ́нощный, и҆ нача̀ бѣ́дно пла́ванїе и҆́хъ быва́ти дне́мъ и҆ но́щїю. мнѡ́гїѧ же днѝ въ неꙋдо́бномъ пла́ванїи бѣ́дствꙋюще стꙋжи́ша долговре́меннымъ волне́нїемъ, и҆ мы́слѧхꙋ вспѧ́ть возврати́тисѧ, и҆ ѹ҆жѐ кора́бль въ свою̀ странꙋ̀ ѡ҆браща́ющымъ, ꙗ҆ви́сѧ ст҃ы́й нїкола́й проти́вꙋ и҆́хъ въ ма́лой ладїѝ пловы́й и҆ глаго́лѧ: Ка́мѡ грѧде́те ѽ мꙋ́жїе; чесѡ̀ ра́ди предлежа́щїй пꙋ́ть ѡ҆ста́влще вспѧ́ть ѡ҆браща́етесѧ; въ ва́шихъ рꙋка́хъ є҆́сть ѹ҆кроти́ти бꙋ́рю, и҆ сотвори́ти кораблю̀ пꙋ́ть ѹ҆до́бенъ: и҆́бо дїа́волское то̀ є҆́сть ѕлоко́знство, и҆́мже ва́съ воспѧща́етъ ѿ тече́нїѧ, ꙗ҆́кѡ не жена̀ но бѣ́съ дадѐ ва́мъ сосꙋ́дъ, вве́ржите ѹ҆́бѡ є҆го̀ въ мо́ре, и҆ а҆́бїе бл҃гополꙋ́ченъ пꙋ́ть и҆мѣ́ти бꙋ́дете. То̀ слы́шавше мꙋ́жи ті́и, взе́мше бѣсо́вскїй сосꙋ́дъ, верго́ша є҆го̀ въ пꙋчи́нꙋ морскꙋ́ю. семꙋ́ же бы́вшꙋ, внеза́пꙋ ѿтꙋ́дꙋ ды́мъ че́рнъ и҆ пла́мень и҆зы́де, и҆ смра́дъ вели́къ и҆спо́лни воздꙋ́хъ, мо́ре же разсѣда́шесѧ, и҆ кипѧ́щи вода̀ и҆з̾ дна̀ клокота́нїе творѧ́ше, и҆ ка̑пли бѧ́хꙋ а҆́ки и҆́скры ѻ҆́гнєнныѧ, ꙗ҆́кѡ ѹ҆боѧ́тисѧ ѕѣлѡ̀ въ кораблѝ сꙋ́щымъ, и҆ ѿ стра́ха крича́ти. ꙗ҆вле́йсѧ же и҆̀мъ помо́щникъ, дерза́ти и҆ не боѧ́тисѧ повелѣ́въ, ѹ҆кротѝ мо́ре, и҆ пловꙋ́щихъ ѿ стра́ха и҆зба́вивъ, плы́ти и҆̀мъ въ лѷкі́ю безбѣ́днѡ ѹ҆стро́и, и҆́бо а҆́бїе хла́дъ нѣ́кїй бл҃гоꙋха́ненъ дхнꙋ́въ, повѣва́ше на ни́хъ, и҆ доплы́ша бл҃гополꙋ́чнѡ жела́емагѡ гра́да веселѧ́щесѧ, и҆ покло́ншесѧ мѷроточи́вымъ моща́мъ ско́рагѡ помо́щника и҆ застꙋ́пника своегѡ̀, бл҃годарѧ́хꙋ всеси́лнаго бг҃а. Вели́комꙋ же ѻ҆ц҃ꙋ̀ молє́бнаѧ соверши́вше возврати́шасѧ въ странꙋ̀ свою̀, повѣ́дающе всѣ̑мъ повсю́дꙋ, ꙗ҆̀же слꙋчи́шасѧ и҆̀мъ на пꙋтѝ.

Мнѡ́га же вели́каѧ и҆ пресла́внаѧ чꙋдеса̀ вели́кїй се́й ѹ҆го́дникъ бж҃їй сотворѝ по землѝ и҆ по мо́рю, въ бѣда́хъ сꙋ́щымъ помога́ѧ, ѿ потопле́нїѧ спаса́ѧ, и҆ и҆з̾ глꙋбины̀ морскі́ѧ на сꙋ́хо и҆зносѧ̀, ѿ плѣне́нїѧ восхища́ѧ и҆ преносѧ̀ въ до́мъ, ѿ ѹ҆́зъ и҆ темни́цы и҆збавлѧ́ѧ, ѿ ме́чнагѡ посѣче́нїѧ застꙋпа́ѧ, и҆ ѿ сме́рти свобожда́ѧ, мнѡ́гимъ мнѡ́гаѧ подадѐ и҆сцѣле́нїѧ: слѣпы́мъ зрѣ́нїе, хромы́мъ хожде́нїе, глꙋхи̑мъ слы́шанїе, нѣмы́мъ глаго́ланїе. Мно́гихъ въ ѹ҆бо́жествѣ и҆ нищетѣ̀ послѣ́дней стра́ждꙋщихъ ѡ҆богатѝ, гла́днымъ пи́щꙋ подадѐ, и҆ всѧ́комꙋ во всѧ́кой потре́бѣ гото́въ помо́щникъ, те́плый застꙋ́пникъ, и҆ ско́рый предста́тель и҆ защи́тникъ показа́сѧ, и҆ ны́нѣ та́кожде призыва́ющымъ є҆го̀ помога́етъ, и҆ ѿ бѣ́дъ и҆збавлѧ́етъ. Є҆гѡ́же чꙋде́съ ꙗ҆́коже нѣ́сть мо́щно и҆зчестѝ, си́це нижѐ ѹ҆до́бно всѧ̑ подро́бнꙋ преда́ти писа́нїю. Вѣ́сть вели́каго чꙋдотво́рца сего̀ восто́къ и҆ за́падъ, вѣ́дѧтъ и҆ всѝ коцы̀ земні́и чꙋдотворє́нїѧ є҆гѡ̀. Да сла́витсѧ ѹ҆́бѡ ѡ҆ не́мъ бг҃ъ в̾ трⷪ҇цѣ є҆ди́ный, ѻ҆ц҃ъ, и҆ сн҃ъ, и҆ ст҃ы́й дх҃ъ: и҆ є҆гѡ̀ ст҃о́е и҆́мѧ ѹ҆стна́ми всѣ́хъ да почита́етсѧ въ хвале́нїи во вѣ́ки, а҆ми́нь.

І҆кѡ́на ст҃а́гѡ нїкола́а мѷрлѷкі́йскагѡ, ꙗ҆́же въ монастырѝ ст҃ы́ѧ трⷪ҇цы на ха́лцѣхъ.

Тропа́рь, гла́съ д҃:

Пра́вило вѣ́ры и҆ ѻ҆́бразъ кро́тости, воздержа́нїѧ оу҆чи́телѧ ꙗ҆ви́ тѧ ста́дꙋ твоемꙋ̀ ꙗ҆́же веще́й и҆́стина. сегѡ̀ ра́ди стѧжа́лъ є҆сѝ смире́нїемъ высѡ́каѧ, нището́ю бога̑таѧ: ѻ҆́ч҃е свѧщеннонача́льниче нїко́лае, молѝ хрⷭ҇та̀ бг҃а, спасти́сѧ дꙋша́мъ на́шымъ.

Конда́къ, гла́съ г҃:

Въ мѵ́рѣхъ, свѧ́те, свѧщеннодѣ́йствитель показа́лсѧ є҆сѝ, хрⷭ҇то́во бо, прпⷣбне, є҆ѵⷢ҇лїе и҆спо́лнивъ, положи́лъ є҆сѝ дꙋ́шꙋ твою̀ ѡ҆ лю́дехъ твои́хъ, и҆ спа́слъ є҆сѝ непови̑нныѧ ѿ сме́рти. сегѡ̀ ра́ди ѡ҆свѧти́лсѧ є҆сѝ, ꙗ҆́кѡ вели́кїй таи́нникъ бж҃їѧ бл҃года́ти.

---

Хотѧ́й нѣ̑каѧ ѿ превели́кихъ и҆ пресла́вныхъ чꙋде́съ сегѡ̀ ст҃лѧ хрⷭ҇то́ва нїкола́а ѹ҆вѣ́дати, ꙗ҆́коже ѡ҆ васі́лїи сы́нѣ а҆́грїковомъ, ка́кѡ є҆го̀ пренесѐ во є҆ди́нъ ча́съ ѿ сарацы́нъ: ѡ҆ хрїстофо́рѣ і҆ере́и, ка́кѡ є҆го̀ ѿ ме́чнагѡ посѣче́нїѧ и҆зба́ви: ѡ҆ стефа́нѣ царѣ̀ се́рбскомъ, ка́кѡ дарова̀ є҆мꙋ̀ прозрѣ́нїе и҆ ѡ҆ и҆ны́хъ мно́гихъ чꙋдесѣ́хъ є҆гѡ̀: да зри́тъ ѡ҆ ни́хъ въ про́логѣ сегѡ́ же мцⷭ҇а и҆ числа̀, и҆ па́ки мцⷭ҇а ма́їа въ ѳ҃ де́нь на пренесе́нїе чⷭ҇тны́хъ є҆гѡ̀ моще́й, и҆ въ кни́жицѣ ѡ҆ чꙋдесѣ́хъ є҆гѡ̀ въ пече́рской ѻ҆би́тели въ лѣ́то ѿ ржⷭ҇тва̀ хрⷭ҇то́ва ҂ах҃п и҆зда́нной.