Иван Котовщик

Иван Котовщик Калык выжыкыл

Поттэмын: 1880. Источник: Удмурт выжы кылъёс: Вотские сказки / собрал И. Яковлев. — Казань: Изд. Казан. вотск. изд. подотдела, 1920. — С. 5—7.

Валлян вылэм нюлэс возьмась коӵыш Иван Котовщик нимо. Со нюлэс возьмаса ветлон дыръя огпол солы ӟичы учырам. Коӵыш ӟичылы тон кин шуыса вазем. Ӟичы верам солы: «Иван Котовщиклэн сиён-юон дасясез», — шуэм.

Иван Котовщик солэсь патер курем. Ӟичы сое бадӟым беризь гырке нуэм.

Собере Иван Котовщик сӥль вайыны косэм. Ӟичы, сӥль утчаны мыныса, кион кутэм ыж шедьтэм. Ӟичы кионлэсь сӥльзэ куре, пе. Кион уг сётӥськы, пе, шуэ. Ӟичы: «Чаль сёты, Иван Котовщик нимо тӧро куре», — пе, шуэ. Собере кион одӥг макессэ сётыса лэзем.

Ӟичы Иван Котовщик доры ваем но солы вера, пе: «Ме, ме, Иван Котовщик, одӥг макес тыныд сӥль ваи», — шуыса.

— Ой тау, ой тау, мын нош ик ӟинэ (ӧтчаськеме) люка, — пе, шуэ коӵыш.

Собере ӟичы, ваньзэ ӧтчаса, ваем: гондырез, кионэз, лудкечез, кырпарсез, коньыез люкам. Ваньзы беризь котырын, пе, бергало, коӵыш доры пырыны курдало. Коньыез, пе, косо азьло пырыны. Коньы, пе, шуэ: «Мынам быжы кузь, быжтӥм кутоз». Собере лудкечез косӥллям пырыны.

Лудкеч, пе, шуэ: «Мынам кужмы ӧвӧл, мон уг пыриськы».

Берлояз гондырез пырыны косӥллям: «Тон батыр, бабай, тон пыры», — шуиллям. Гондыр, пе, вера: «Ойдо ачиз но потоз али», — шуыса.

Собере Иван Котовщик: «Малы али но уг лыкто ини таос», — шуыса, потэ вылэм но нырыныз парсьлэн ныраз йӧтэм. Парсь курдаса, «пик!» шуыса, чиректэм.

Соку Иван Котовщик дуласа тубем бадӟым кыз йылэ, со кыз улэ парсь пырем.

Кема улэм бере, Иван Котовщик кыз йылысьтыз кӧтыз сюмаса шыраны васькем. Соку парсь быжзэ выртэм.

Сое Иван Котовщик шыр шуыса тэтчем. Парсь «пик!» шуыса, курдаса, чиректэм. Коӵыш нош кыз йылаз кошкем. Соку кыз йылэ азьвыл пегӟыса тубем гондыр, тае адӟыса: «Монэ сиыны тубе, дыр», — шуыса малпам но кыз йылысен тэтчем но кулэм.

Иван Котовщик со нюлэскын али но, пе, улэ.