Колхозонь эряф/1941/05/Иван Франко - великай украинскяй писатель
| Иван Франко |
| Иван Франко — великай украинскяй писатель |
| (Шачема шистонза сявомок 85-це кизонц и куломдонза меле 25-це кизонц топодемаснонды). |
Украинскяй народсь казсь человечествати аф кржа гениальнай, оцю писатель: Шевченконь, Франконь, Леся Украинкань, Мих. Коцюбинскяйнь и лиятнень.
Иван Франко, кода и Шевченко, лиссь трудовой народть ёткста. Аляц сонь ульсь кузнец Галициянь Дрогобычскяй уездонь Нагуевичи велеса. Украинскяй модась, конац касфтозе великай писательть, эста ульсь Австро-Венгерскяй империять кядьса.
Кодамоль Иван Франко шабакс пингста, минь лац няйсаськ писательть „Йомла Мирон“ рассказстонза. Цёранясь ульсь отькорь, ёню, любознательнай.
Тонафнесь сон начальнай школаса соседняй велесост. Тонафнемс ульсь стака. Шабатнень родной кяльснон вастс тонафнезь немецкяй и польскяй кяльти, ламоц учительхне ученикнень пикссекшнезь: линейкаса, тростикса (байдеконяса).
Сельскяй школать аделамда меле Франконь максозе аляц „нормальнай“ школав, Дрогобычскяй монастырть шири. Хотя тяса ученикнень кой-кона духовнай отецне проста истязандакшнезь, а крестьянскяй, „хлопскяй“ иттнень эзда безярдсть и учительхневок и издевандакшнесть синь лангсост баяронь цёранятневок, — кизоть аделамста хлопскяй цёрась Иван Франко лиссь васенце вастти. Экзаметтнень кулхцондома якась школав сонь аляцка. Мзярда цёранц лихтезь отвечама сембода инголи и макссть казненди книга, аляц сонь тя радостть эзда мянь аварьгодсь.
Курок кулось сонь аляц. Тядяц илядсь ёмла шаба мархта, сяс савсь тейнза тумс рьвакс. Аф родной аляц Гриця Гаврилик ломанць ульсь добрай, ёню. Сонь вельденза Франко мольфтезе сяда тов образованиянц и ётась нльне Дрогобычскяй гимназияв. Тяса хлопскяй иттненди тонафнемась нинге сядонга стакаль, но велень кузнецень цёранять ульсть недюжиннай способностенза, и тонафнемста сон мольсь фалу инголе. А незауряднай литературнай способностенза и живой фантазияц няфтсь пря нинге эста, мзярда ульсь сон 5—6-це класса.
[ 10 ]Франко пяк лама морафнесь. Сон ульсь знакомай украинскяй и мировой литературань сембе выдающай произведениятнень мархта, а Шевченконь „Кобзаренц“, кода сонць корхнесь, сон мяляфтольхце пцтай сембонь наизусть. А мялямоц сонь ульсь превосходнай. Кулхцондомок историянь урокть, сон мог сяльде азондомс сонь эсь ялганзонды пцтай валда валс. Книгань морафнемада башка, Франко пяк интересовандась народнай творчествать мархта. Сонь ульсть специальнай тетраденза, коза сёрмачнесь 800 лама народнай мор.
Литературнай деятельностенц Франко ушедозе гимназияса мекольдень класснень эса тонафнемста. Васенда сон ётафнесь украинскяй кяльс произведеният античнай литератураста, сяльде сонць ушедсь стихонь сёрмадома. Ня литературнай опытонза ульсть печатлафт львовскяй студенческяй, „Друг“ лемса лисенди журналса.
Гимназиять аделамда меле 1875 кизоня сон ступиндась Львовскяй университетть философскяй факультетозонза. Тяса примкнул сон литературно-общественнай „Академическяй кружоку“, конац нолязе „Друг“ журналть. Тя журналса сон мольфтезе станяк эсь произведениянзон печатлакшнемаснон.
„Друг“ журналсь тянемс нолявсь русскяй кяльть мархта шоряф украинскяй, исковерканнай кяльса.
Политическяй эмигрантсь, Киевскяй университетонь бывшай профессорсь, виднай ученайсь Михаил Драгоманов кучсь редакцияв русскяй кяльса сёрматф лама сёрма, конатнень эса тернезень од ломаттнень лацкас тонафнемс русскяй литературать, тяда башка мярьгондсь аердомда тя исковерканнай кяльть эзда и сёрмадомс живой народнай украинскяй кяльть коряс.
Курокста журналть направленияц полафневи, сонь эсонза печатлакшневи Франконь „Наймит“ стихотворенияц, конац ульсь крхка идейнай содержания мархта. Тянь мархта поэтть шумордавсь творчестванц подготовительнай периодоц и ушедовсь од основной этапоц. Франко арси литератураса во главе од революционно-демократическяй и реалистическяй направленияти. Сон печатлакшни „Друг“ журналса расскаст рабочайхнень эряфснон колга. Расскасне украинскяй литератураса ульсть ёфси од исключительнай явлениякс. Синь шарфнезь общественностть мяленц сянь лангс, што эряфса кепочни своеобразнай социальнай величина. Тяка жа пингть писательсь ушедсь Марксонь „Капиталонц“ тонафнема.
Революционно-демократическяй взглядонзон инкса Франконь мельге кармась ванондома полициясь, и мзяра пинге ётазь ульсь тиф лангозонза судебнай процесс. 1877 кизонь июнть 11-це шистонза сонь арестовандазь и кирдезь пцтай вейхкса кофт тюрьмаса. Хотя тоса тейнза савсь ащемс аф [ 11 ]кирдемшка стака условияса, но сон ашезе кадонда эсь литературнай работанц.
Тюрьмаста лисемдонза меле сон вяти оцю работа рабочайхнень кружоксост синь политическяй воспитанияснон инкса. Тяса сон преподавал политическяй экономиять, использовандакшнемок Марксонь и Чернышевскяйнь трудснон. Франко васенцесь ушедсь ётафнема марксизмань классикнень трудснон украинскяй кяльс.
1880 кизоня сонь тага арестовандазь и озафтозь тюрьмав, коста колма ковда меле ульсь нолдаф. Тяка жа кизоня сон сёрмады фкя инь цебярь стихотворениянц „Гимн“ („Вечний революционер“) — политическяй лирикань прекраснай образецть, тюремнай эряфть колга замечательнай рассказ „На дни“ и лия произведеният.
Састь поэтти стака кизот. Львовса эрямс тейнза ашельхть кодамовок возможностть. Сон тусь шачема вастозонза, тоса работакшнесь, кода сембе крестьяттне, и сяка жа пингть сёрмадсь замечательнай произведеният, кепотьксонди, „Борислав смеется“ сембода цебярь повестенц, коса няфтезе сознательнай, организованнай рабочай движениять шачеманц.
1889 кизоня Франконь тага арестовандакшнезь, но ашезь суденда, нолдазь меки.
Тяда меле сон сёрмады од произведеният, ноляй стихонь и рассказонь сборникт.
1877 кизоня арестовандаманц сюнеда Франконь университетса тонафнемац лячнесь апак шумордак. Сяс сон вейхксогемонце кизотнень ушетксстост тушенды Венав и тоса сембе мирти содаф филологть Ватронав Ягичть (национальностьс коре — чех) руководстванц ала аделазе университетть и защитил докторскяй диссертация древняй украинскяй литературать историянц коряс. Франконди ульсь присужденай философскяй наукань докторонь ученай степень.
Тернезь Франконь Львовскяй университету преподавандама. Сон эста ульсь содаф ни, кода выдающай ученай и критик. Тоса оцю успех мархта тись пробнай лекция Шевченконь „Наймичканц“ колга, но сяда ламс работамс ашезь сав. Франконь колга тага фкя-фкя мельге лийсть доносне. Польскяй и украинскяй буржуазиять, австрийскяй бюрократиять усилияснон сюнеда сон университетса преподавандамать эзда ульсь аерфтф.
Сембода стака ульсь Франконди 1897 кизось. Гениальнай польскяй поэтть Мицкевичть колга статьянц инкса польскяй националисттне панезь Франконь эсь прессастост, всякайкс преследовандазь, травондазь. Польскяй кяльса нолдаф рассказонь сборниконцты („Галицкие образки“) вступительнай статьять инкса врьгятсть сонь лангозонза украинскяй националисттне. Сон повсь кафта толонь ёткс.
Австрийскяй парламенту и галицкяй сеймав кочкаматнень [ 12 ]пингста Франконь кандидатуранц выдвигандакшнезь колмоксть. Но эрь мезть польскяй шляхтать и австрийскяй бюрократиять марстонь усилияснон сюнеда сонь кандидатурац ашезь ётне, хотя народнай массатне ульсть Франконь инкса.
1898 кизоня Львовса ульсь праздноваф Франконь 25 кизо-кувалмонь литературнай деятельностенц юбилейц, конанцты ульсть нолдафт специальна сонь лемозонза казьф книгат. Книгатнень эса примасть участия ламоц ся пингонь содаф писательхне и ученайхне.
Тяда меле станяк поэтсь выступандакшни стихонь и рассказонь од сборник мархта.
Но Франконь колоссальнай плодотворнай и научнай деятельностец курокстонь пингть ульсь сязьф серьезнай урмаса (прогрессивнай параличса). Сон сонць афоль сёрмадов, но диктовандакшнесь эсь цёранцты коль од и од произведеният.
1916 кизонь майть 28 шистонза писательсь кулось. Калмайдонза сонь ульсь аф азовомшка мзяра народ.
Васенце шитнень пингстокиге, мзярда Львовть занязь советскяй войскатне, трудящайхне колоннань-колоннань и якстерь знамя мархта тусть Франконь калмонц лангс, коса ульсь тиф торжественнай митинг. А тяда меле трудящайхнень колоннасна мольсть омбоце гениальнай писательть Адам Мицкевичть памятниконцты. Тяста тяфта жа няевсь кафта возрожденнай нароттнень, — конат макссть тяфтама великай ломатть, кода Мицкевич и Франко, — дружбаснон интернациональнай значенияц.