Ичӧтдырся

by Елькин Василий Иванович

Ӧшинь сайын ветлӧ дед-мороз.
Ӧшинь стеклӧ вылын — йи узоръяс.
Быттьӧ кодкӧ мича лапъя коз
Рисуйтӧма сэтчӧ, стеклӧторъяс.

Рисуйтӧма ёлка... Но и мед!
Мыйла сійӧ? Оз ков талун чача.
Ворсӧм вылӧ гаж миян оз пет —
Челядь котыр дзоргам пусьысь рачӧ.

Кынӧм миян сюммӧма нин вель.
Кымын вой нин нянь крӧшкитӧг узим!
Талун кутам сёйны картупель.
Со тай сійӧ кыдзи булькйӧ-пусьӧ!

Ньӧжйӧ чинӧ пачысь мелі би,
Торйӧдчыны миянкӧд оз кӧсйы.
Мед и сідзи. Куткырвидзам ми,
Чужӧмъясным доналӧма, ӧзйӧ.

Пусис сёян. Эновтім ми пач,
Зарни рӧмӧн дзувъяліс кӧн ӧгыр.
Пызан вылын руалӧ пӧсь рач.
Челядь котыр кӧлім пызан гӧгӧр.

Кутшӧм чӧскыд! Сёям шы ни тӧв.
Эськӧ быд лун татшӧмыс кӧ лоӧ!
Миян вылӧ батьӧ дзоргӧ зэв.
Мӧвпъяснымӧс сійӧ гӧгӧрвоӧ.

— Сёйӧй, челядь, перйӧй кынӧм нур,
Татшӧм кадӧ зэв нин сёян тайӧ.
Регыд лоас нянь и мукӧд бур,
Виччысьлӧй вот, — зырам татысь найӧс. —

«Зырам найӧс»! Гӧгӧрвотӧм дзик.
— Кодӧс, батьӧ, зырны кӧсъяд, кодыр? —
Картупельлысь корсӧ весаліг,
Юасям ми сылысь челядь котыр.

Батьлӧн висьтыс гажтӧм, чужтӧ шог,
Война йылысь сёрни сійӧ нуӧ:
Белӧй банда локтӧма пӧ лёк,
Нартитчыны миян чужан муӧ.

— Белӧй банда! Сідзкӧ, сійӧ скӧр?
Кӧнкӧ-й сійӧ пушкаясӧн ветлӧ?..
— Сыысь лёкыс оз нин сэсся тӧр,
Сӧмын нинӧм, регыд дзикӧдз вӧтлам.

Сылы паныд сувтіс тіян вок,
Миян йӧзлӧн петісны збой пиян.
Регыд бырӧ судзсьытӧм и шог,
Регыд, челядь, ставыс лоӧ миян.

Пӧттӧдз сёйны быд лун кутад ті,
Лоӧ паськӧм, кутшӧм сӧмын колӧ...
— Тшӧтш и велӧдчыны кутам ми...
Сідз ӧд, батьӧ, воссяс тані школа?

— Воссяс школа, посниджыклы — сад,
Велӧдчигсор гажӧдчыны кутад.
Шензьӧдана сійӧ лоӧ кад,
Тіян олӧм бур лоӧ и шуда.

Батьлысь висьтсӧ кывзам сёйигтыр,
Мӧвпӧн аддзам серпасъяс нин выльӧс:
Шоныд школа, югыд класслӧн жыр...
Парта сайын велӧдчам ми зіля.

Гортын миян баситӧма коз.
Рытнас кутам ёлка вылын ворсны.
...Ӧшинь сайын ветлӧ дед-мороз,
Но пырны миян керка пытшкӧ сорсьӧ.