д҃
Сло́во ст҃аго а҆пⷭ҇тола па́ѵла,
и҆столко́вано і҆ѡа́нномъ златоꙋ́стымъ и҆ васі́лїемъ вели́кимъ.
Прїи́демъ, бра́тїе, да слы́шимъ сло́во по́льзы дх҃о́вныѧ и҆спо́лнено: мно́гѡ бо вы̀ гл҃ю, да бы́сте дш҃ы сп҃слѝ. Бг҃ъ да вразꙋми́тъ вы къ послꙋша́нїю слове́съ є҆гѡ̀. И҆ ѡ҆ се́мъ молю́ вы, да слы́шавше и҆̀ твори́те речє́наѧ: и҆ въ домꙋ̀ сꙋ̑щаѧ нака́зайте на стра́хъ бж҃їй, а҆ не гл҃и ꙗ҆́кѡ женꙋ̀ и҆́мамъ, и҆лѝ дѣ́ти, и҆лѝ до́мъ стро́ю и҆ вла́сть держꙋ̀, и҆лѝ ремество̀ и҆мѣ́ю, сѐ на́ше є҆́сть дѣ́ло, но черне́чское є҆́же кни́гъ честѝ. Ѽ чл҃че, что̀ гл҃еши, въ толи́цѣ бꙋдѧ̀ мѧтежѝ и҆ вла̑сти мі́ра сегѡ̀; почто̀ не ѿжене́ши печа̑ли почита́нїемъ кни́жнымъ; чернцѝ бо, ᲂу҆бѣжа́вши мїрски́хъ мѧтеже́й и҆ въ зати́шїи сѣдѧ́ще, мнѡ́га ᲂу҆тверждє́нїѧ прїе́млютъ. Мы́ же въ вели́цѣ мѧтежѝ, и҆ въ бꙋ́ри мі́ра сегѡ̀ живꙋ́щи, и҆ мно́ги творѧ́ще грѣхѝ, достои́тъ ны, ча́стѡ почита́юще ст҃ы̑ѧ кни̑ги, ѿгонѧ́ти печа̑ли, и҆ тѣ́ми и҆ска́ти спⷭ҇нїѧ: воды́ бо ча́стѡ ка́плѧ ка́плющаѧ и҆ ка́мень ᲂу҆доли́тъ, та́кѡ и҆ кни̑ги что́мы ча́стѡ наведꙋ́тъ на и҆́стинный пꙋть, разрѣша́тъ грѣхѡ́вныѧ соꙋ́зы. До́брѣ же ѡ҆ се́мъ пррⷪ҇къ речѐ: ꙗ҆́кѡ въ гнѣвли́ва и҆ ѕлоби́ва чл҃вѣка не вни́детъ стра́хъ бж҃їй, и҆ не мо́жетъ всели́тисѧ въ срⷣци ѡ҆скверне́ни пїѧ́нствомъ, сира́хъ речѐ: гдⷭ҇ь созда̀ мꙋ́дрость, и҆ пода́стъ ю҆̀ лю́бѧщымъ є҆го̀: а҆ мы́ же всѝ ны́нѣ прїи́мемъ спⷭ҇нїе, ѿ почита́нїѧ кни́жнагѡ дѣ́ломъ сотво́рше речє́наѧ, а҆ не то́кмѡ послꙋша́юще. пррⷪ҇къ речѐ: да бꙋ́дꙋтъ всѝ наꙋче́ни бг҃ꙋ, ѿ ма́ла и҆ до вели́ка. па́ѵелъ речѐ: а҆́зъ, бра́тїе, не прїидо́хъ чл҃вѣ́ческою мрⷣстїю, но ꙗ҆вле́нїемъ ст҃агѡ дх҃а, всѧ̑ бо сѝ, возлю́бленїи, на́шегѡ спⷭ҇нїѧ дѣлѧ̀, пи́сана бы́ша наказа́нїемъ на́мъ. Вели́ка бо на́мъ по́льза слы́шати ᲂу҆че́нїѧ, и҆ вели́ко ᲂу҆твержде́нїе согрѣша́ющымъ почита́нїе кни́жное: вельмѝ ѿню́дь ѕло̀ и҆ про́пасть глꙋбо́каѧ, є҆́же не слы́шати писа́нїѧ тогда̀ дш҃и є҆́сть: мно́зи бо невѣ́гласи вели́кꙋ прїѧ́ша по́льзꙋ ѿ почита́нїѧ кни́жнагѡ, и҆ црⷭ҇тва нбⷭ҇нагѡ доидо́ша: да и҆ мы̀ съ любо́вїю ᲂу҆че́нїе слы́шимъ и҆ сотвори́мъ: є҆мꙋ́же сла́ва.
This is a translation and has a separate copyright status from the original text. The license for the translation applies to this edition only.
