Йомак - Мераҥ
Манси калык йомак
Илен улмаш ик мераҥ. Тудо ер серыште кушшо омыж коклаште модаш йӧратен. Икана, омыжым пурлшыжла, тӱрвыжым пӱчкын колта. Мераҥ сыра да тул деке вуйым шияш кая.
- Тул, тый ер серысе омыжым йӱлате! - манеш.
- Омыж тылат могай осалым ыштен? - ӧрын йодеш тул.
- Тӱрвемым пӱчкын, - вашешта мераҥ.
- Тый шкак титакан улат: опкынланен, омыжым кочкаш пижынат да тӱрветым пӱчкынат, - манеш тул.
Мераҥ эше чотрак сыра да вӱдлан вуйым шияш кая.
- Вӱд, тулым йӧртӧ! - манеш тудлан.
- Тул тылат могай осалым ыштен?
- Тул ер серысе омыжым ынеж йӱлате!
- Омыж тылат могай осалым ыштен?
- Тӱрвемым пӱчкын.
- Тый шке титакан улат: опкынланен, омыжым коч¬каш тӱҥалынат да тӱрветым пӱчкынат, - манеш вӱд мераҥлан.
Мераҥ эше чотрак шыдешка, пикшым да йоҥежым кучен шогышо кок рвезе деке мия да нунылан ойла:
- Рвезе-влак, вӱдышкӧ лӱйыза!
- Тылат вӱд могай осалым ыштен?
- Вӱд тулым ынеж йӧртӧ!
- Тул тылат могай осалам ыштен?
- Тул ер серысе омыжым ынеж йӱлате.
- А омыж тылат могай осалым ыштен?
- Тӱрвемым пӱчкын!
- Тый шке титакан улат: опкынланен, омыжым кочкаш тӱҥалынат да тӱрветым пӱчкынат.
Мераҥ йӧршынак шыдешталтеш да коля дек кая, тудлан ойла:
- Коля, коля, полшо мылам. Йоча-влакын кидысе йоҥеж вӱчыштым пурын кӱрл, лӱен ынышт керт.
Коля мераҥым чамана да йоча-влакын вӱчыштым пурын кӱрлаш кудал колта, но миен ок шу. Йоча-влак йоҥежыштым шупшылыт да вӱдыш лӱен колтат. Вӱд нолталалтеш да тулым йӧрташ кая. Тул лӱдмыж дене омыж дек нушкын мия. Омыж йӱлаш тӱҥалеш, а омыж лоҥгаште мераҥ тӧрштылеш. Тудо мом ышташат ӧрын. Тул гыч кудал лектеш, пылышыжым когарта. Пыкше илыше кодеш.
Тыге мераҥын пылыш мучашыже эрелан шеме лийын кодеш.