Йомак - Рывыж ден каза
Руш калык йомак
Икана рывыж, коракым ончен кудалшыжла, тавышке пурен каен. Тавыште вӱдшӧ келгак огыл улмаш: вӱд йымак волен каяшыжак ок сите, да тӧрштен лекташат ок лий. Рывыж шинча да ойгыра.
Каза - ушан вуй - толеш, пондашыжым лӱҥгыктен, тӱкыжым кышкылт ошкылеш. Нимом ышташ укеат, нӧрепыш ончалеш. Тушто рывыжым ужеш да йодеш:
- Рывыж, тый тыште мом ыштылат?
- Канем, каза тос, - рывыж вашешта, - кӱшнӧ пеш шокшо, садлан мый тышке пуренам. Тыште пеш сай, юалге! Йӱштӧ вӱд мыняр кӱлеш, уло.
А казан шаҥгысек йӱмыжӧ шуэш.
- Вӱдшӧ вара сай мо? - йодеш каза.
- Пеш сай! - рывыж вашмутым пуа. - Яндар, йӱштӧ. Шонет гын, тӧрштӧ, вер тыште когыляннат сита.
Орадылыкше дене каза тӧрштен да рывыжымат изиш лаштыртен огыл. А рывыжше тудлан ойла:
- Эх, пондашан ораде! Тӧрштенжат шыч мошто, чыла шыжыктыл пытарышыч.
Рывыж каза тупыш кузен, тушеч - тӱкышкыжо, вара таве гычшат тӧрштен лектын.
Каза тавыште изиш шужен колен огыл. Вара озашт кычал муынытат, тӱко гычше пыкше шупшын луктыныт.