Йомак - Шонет - курыкымат савырет
Китай калык йомак
Ик тулык вате йӱд-кече пашам ыштен. Тудын ик эргыже улмаш. Йочам школышто тунемже да шанчыеҥ лийже манын, тулык вате шонен. Тудыжо гын изи улмыж годым сайын тунемын, книгам лудаш йӧратен.
Мыйын эргым пашам йӧратыше, ойым колыштшо кушкеш манын, ава йывыртен шонен коштын.
Рвезе, кушкын шумекше, моктанаш, шкенжым кугуэш ужаш туҥалын. «Ынде мый чыла палем, мыланем тетла тунемаш ок кӱл», - манын тудо. Йогыланен, школыш коштмыжым чарнен. Туш кайыме олмеш модын веле коштын. Тидын нерген аваже пален огыл.
Икана, тыге перныл коштшыжла, рвезе корно воктене кугу кӱм ужын. Кӱ ӱмбалне шоҥго ӱдырамаш шинчен да кӱжгӧ кӱртньӧ тоям кӱэш йыген. Йочалан тиде воштылтышла чучынат, шоҥго кува деч йодын:
- Кувай, тиде тояжым молан кӱэш йыгеда?
- Тиде тоя дене вичкыж имым ыштынем, - каласен кува.
- Тыгай кугу тоя гыч имым ыштынеда? - йоча ӧрын пелешта да воштыл колта. - Тышеч имым ыштен кертыда мо? Ынде вет шоҥго улыда.
- Тояже кугу, но мыйын кумылем тоя дечат кугу,- каласа шоҥго кува. - Мый тиде тоям тачат шумем, эрлат йыгем да кунам-гынат имым ыштен шуктем. Шонет гын, курыкымат савырет манын, арамак огыл ойлат. А вот тыйым палем: його улат, тунемаш от шоно, кужу илышетым изи ушет дене илен эртарынет. Да эше аватым ондалет. А аватше тыйым туныктен лукшаш верч лым лийде пашам ышта. Йолагай, кӱштӧ тыйын намысетше? Йоча вожылмыж дене тарай гай йошкаргыш. Вара шоҥго кувалан вуйжым савалтыш, тудын поро мутшылан тауштыш, школыш пӧртыльӧ да кыртмен тунемаш туҥале.
Тиде икшыве, кушкын шумекше, палыме шанчыҥет лийын.