Канѡ̑ны, си́рѣчь кни́га пра́вилъ/Пра̑вила седма́гѡ вселе́нскагѡ собо́ра
| ←Пра̑вила шеста́гѡ вселе́нскагѡ собо́ра | Пра̑вила свѧты́хъ а҆по́столѡвъ, свѧты́хъ собо́рѡвъ вселе́нскихъ и҆ помѣ́стныхъ, и҆ свѧты́хъ ѻ҆те́цъ Пра̑вила свѧта́гѡ вселе́нскагѡ седма́гѡ собо́ра, ніке́йскагѡ |
Пра̑вила а҆гкѵ́рскагѡ собо́ра→ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ
Пра̑вила свѧта́гѡ вселе́нскагѡ седма́гѡ собо́ра, ніке́йскагѡ.
Пра́вило а҃.
Прїѧ́вшымъ свѧще́нническое досто́инство, свидѣ́тельствами и҆ рꙋково́дствомъ слꙋ́жатъ наче́ртанныѧ пра̑вила и҆ постановлє́нїѧ, котѡ́рыѧ ѻ҆хо́тнѡ прїе́млѧ, воспѣва́емъ съ бг҃оглаго́ливымъ даві́домъ, ко гдⷭ҇ꙋ бг҃ꙋ глаго́люще: на пꙋтѝ свидѣ́нїй твои́хъ наслади́хсѧ, ꙗ҆́кѡ ѡ҆ всѧ́комъ бога́тствѣ. Та́кожде: заповѣ́далъ є҆сѝ пра́вдꙋ, свидѣ̑нїѧ твоѧ̀ во вѣ́къ: вразꙋми́ мѧ, и҆ жи́въ бꙋ́дꙋ. И҆ а҆́ще проро́ческїй гла́съ повелѣва́етъ на́мъ во вѣ́къ храни́ти свидѣ̑нїѧ бж҃їѧ, и҆ жи́ти въ ни́хъ: то ꙗ҆́вно є҆́сть, ꙗ҆́кѡ пребыва́ютъ ѻ҆́ныѧ несокрꙋши́мы и҆ непоколе́блемы. И҆́бо и҆ бг҃ови́децъ мѡѷсе́й та́кѡ глаго́летъ: къ си́мъ не подоба́етъ приложи́ти, и҆ ѿ си́хъ не подоба́етъ ѿѧ́ти. И҆ бж҃е́ственный а҆по́столъ пе́тръ, хвалѧ́сѧ и҆́ми, вопїе́тъ: въ нѧ́же жела́ютъ а҆́гг҃ли прини́кнꙋти. Та́кожде и҆ па́ѵелъ вѣща́етъ: а҆́ще мы̀, и҆лѝ а҆́гг҃лъ съ небесѐ благовѣсти́тъ ва́мъ па́че, є҆́же благовѣсти́хомъ ва́мъ, а҆на́ѳема да бꙋ́детъ. Поне́же сїѐ вѣ́рно, и҆ засвидѣ́тельствовано на́мъ: то, ра́дꙋѧсѧ ѡ҆ се́мъ, подо́бнѡ ка́къ ѡ҆брѣ́лъ бы кто̀ коры́сть мно́гꙋ, бж҃е́ственныѧ пра̑вила со ᲂу҆слажде́нїемъ прїе́млемъ, и҆ всецѣ́лое и҆ непоколе́блемое соде́ржимъ постановле́нїе си́хъ пра̑вилъ, и҆зложе́нныхъ ѿ всехва́льныхъ а҆по́стѡлъ, свѧты́хъ трꙋ́бъ дх҃а, и҆ ѿ шестѝ свѧты́хъ вселе́нскихъ собо́рѡвъ, и҆ помѣ́стнѡ собира́вшихсѧ длѧ и҆зда́нїѧ таковы́хъ за́повѣдей, и҆ ѿ свѧты́хъ ѻ҆тє́цъ на́шихъ. И҆́бо всѣ̀ ѻ҆нѝ, ѿ є҆ди́нагѡ и҆ тогѡ́ же дх҃а бы́въ просвѣщены̀, поле́зное ᲂу҆зако́нили. И҆ кого̀ ѻ҆нѝ предаю́тъ а҆на́ѳемѣ, тѣ́хъ и҆ мы̀ а҆наѳема́тствꙋемъ: а҆ кого̀ и҆зверже́нїю, тѣ́хъ и҆ мы̀ и҆зверга́емъ, и҆ кого̀ ѿлꙋче́нїю, тѣ́хъ и҆ мы̀ ѿлꙋча́емъ: кого́ же подверга́ютъ є҆пїтїмїѝ, тѣ́хъ и҆ мы̀ та́кожде подверга́емъ. И҆́бо восше́дшїй до тре́тїѧгѡ не́ба, и҆ слы́шавшїй неизрече́нные глаго́лы, бж҃е́ственный а҆по́столъ па́ѵелъ ꙗ҆́снѡ вопїе́тъ: не сребролю́бцы нра́вомъ, дово́льни сꙋ́щими.
Пра́вило в҃.
Поели́кꙋ мы̀ въ ѱалмопѣ́нїи ѡ҆бѣща́емъ бг҃ꙋ: во ѡ҆правда́нїихъ твои́хъ поꙋчꙋ́сѧ, не забꙋ́дꙋ слове́съ твои́хъ: то и҆ всѣ́мъ хрїстїа́намъ сїѐ сохранѧ́ти є҆́сть спаси́тельно, наипа́че же прїе́млющымъ свѧще́нническое досто́инство. Сегѡ̀ ра́ди ѡ҆предѣлѧ́емъ: всѧ́комꙋ и҆мѣ́ющемꙋ возведе́нꙋ бы́ти на є҆пі́скопскїй сте́пень, непремѣ́ннѡ зна́ти ѱалти́рь, да та́кѡ и҆ ве́сь сво́й кли́ръ вразꙋмлѧ́етъ поꙋча́тисѧ и҆з̾ ѻ҆́ныѧ. Та́кожде тща́тельнѡ и҆спы́товати є҆го̀ митрополі́тꙋ, и҆мѣ́етъ ли ᲂу҆се́рдїе съ размышле́нїемъ, а҆ не мимохо́домъ, чита́ти свѧщє́нныѧ пра̑вила, и҆ свѧто́е є҆ѵа́нгелїе, и҆ кни́гꙋ бж҃е́ственнагѡ а҆по́стола, и҆ всѐ бж҃е́ственное писа́нїе, и҆ постꙋпа́ти по за́повѣдѧмъ бж҃їимъ, и҆ ᲂу҆чи́ти порꙋче́нный є҆мꙋ̀ наро́дъ. И҆́бо сꙋ́щность і҆ера́рхїи на́шеѧ составлѧ́ютъ бг҃опре́данныѧ словеса̀, то́ є҆сть, и҆́стинное вѣ́дѣнїе бж҃е́ственныхъ писа́нїй, ꙗ҆́коже и҆зре́къ вели́кїй дїонѵ́сїй. А҆́ще же коле́блетсѧ, и҆ не ᲂу҆се́рдствꙋетъ та́кѡ твори́ти и҆ ᲂу҆чи́ти: да не рꙋкополага́етсѧ. И҆́бо проро́чественнѡ ре́къ бг҃ъ: ты̀ ᲂу҆мѣ́нїе ѿве́рглъ є҆сѝ, ѿве́ргꙋ и҆ а҆́зъ тебѐ, да не жре́чествꙋеши мнѣ̀.
Пра́вило г҃.
Всѧ́кое и҆збра́нїе во є҆пі́скопа, и҆лѝ пресвѵ́тера, и҆лѝ дїа́кона, дѣ́лаемое мїрски́ми нача́льниками, да бꙋ́детъ не дѣйстви́тельно по пра́вилꙋ, кото́рое глаго́летъ: а҆́ще кото́рый є҆пі́скопъ, мїрски́хъ нача́льникѡвъ ᲂу҆потреби́въ, чрез̾ ни́хъ полꙋ́читъ є҆пі́скопскꙋю въ це́ркви вла́сть, да бꙋ́детъ и҆зве́рженъ, и҆ ѿлꙋче́нъ, и҆ всѣ̀ соѡбща́ющїесѧ съ ни́мъ. И҆́бо и҆мѣ́ющїй произвести́сѧ во є҆пі́скопа, до́лженъ и҆збира́емъ бы́ти ѿ є҆пі́скопѡвъ, ꙗ҆́коже свѧты́хъ ѻ҆тє́цъ въ нїке́и ѡ҆предѣлено̀ въ пра́вилѣ, кото́рое глаго́летъ: є҆пі́скопа поставлѧ́ти наибо́лѣе прили́чно всѣ́мъ тоѧ̀ ѻ҆́бласти є҆пі́скопамъ: а҆́ще же сїѐ не ᲂу҆до́бно, и҆лѝ по належа́щей нꙋ́ждѣ, и҆лѝ по да́льности пꙋтѝ: то по кра́йней мѣ́рѣ трѝ вкꙋ́пѣ да соберꙋ́тсѧ, а҆ ѿсꙋ́тствꙋющїе да прїи́мꙋтъ ᲂу҆ча́стїе въ и҆збра́нїи, и҆ и҆з̾ѧ́вѧтъ согла́сїе посре́дствомъ гра́матъ, и҆ тогда̀ твори́ти поставле́нїе. Оу҆твержда́ти же таковы́ѧ дѣ́йствїѧ въ ка́ждой ѻ҆́бласти подоба́етъ є҆ѧ̀ митрополі́тꙋ.
Пра́вило д҃.
Проповѣ́дникъ и҆́стины, бж҃е́ственный а҆по́столъ вели́кїй па́ѵелъ, ꙗ҆́кѡ нѣ́кое пра́вило полага́ѧ є҆фе́сскимъ пресвѵ́терамъ, па́че же и҆ всемꙋ̀ свѧще́нническомꙋ сосло́вїю, со дерзнове́нїемъ ре́къ та́кѡ: сребра̀, и҆лѝ зла́та, и҆лѝ ри́зъ ни є҆ди́нагѡ возжела́хъ: всѧ̑ сказа́хъ ва́мъ, ꙗ҆́кѡ та́кѡ трꙋжда́ющымсѧ подоба́етъ застꙋпа́ти немощны̑ѧ, и҆ помышлѧ́ти, ꙗ҆́кѡ блаже́ннѣе є҆́сть па́че даѧ́ти, не́жели прїима́ти. Сегѡ̀ ра́ди и҆ мы̀, ѿ негѡ̀ наꙋча́сѧ, ѡ҆предѣлѧ́емъ: да ѿню́дь не ᲂу҆мышлѧ́етъ є҆пі́скопъ, и҆з̾ ни́зкїѧ коры́сти, ᲂу҆потреблѧ́ѧ въ предло́гъ мни́мые грѣхѝ, тре́бовати зла́та, и҆лѝ сребра̀, и҆лѝ и҆на́гѡ чегѡ̀ ѿ подчине́нныхъ є҆мꙋ̀ є҆пі́скопѡвъ, и҆лѝ кли́рїкѡвъ, и҆лѝ мона́хѡвъ. И҆́бо а҆по́столъ говори́тъ: непра́ведницы ца́рствїѧ бж҃їѧ не наслѣ́дѧтъ. И҆ є҆щѐ: недо́лжна сꙋ́ть ча̑да роди́телѧмъ сниска́ти и҆мѣ́нїѧ, но роди́тели ча́дамъ. Сегѡ̀ ра́ди, а҆́ще ᲂу҆смо́трено бꙋ́детъ, что̀ кто́ либо ра́ди и҆стѧза́нїѧ зла́та, и҆лѝ и҆на́гѡ чегѡ̀, и҆лѝ по нѣ́коей свое́й стра́сти, возбранѧ́етъ слꙋже́нїе, и҆ ѿлꙋча́етъ кого́ либо и҆з̾ свои́хъ кли́рїкѡвъ, и҆лѝ заключа́етъ честны́й хра́мъ, да не бꙋ́детъ въ не́мъ бж҃їей слꙋ́жбы: таковы́й, и҆ на безчꙋ́вственные предме́ты ᲂу҆стремлѧ́ѧ своѐ неи́стовство, по и҆́стинѣ є҆́сть безчꙋ́вственъ: и҆ до́лженъ подве́рженъ бы́ти томꙋ̀, чемꙋ̀ подверга́лъ дрꙋга́го, и҆ ѡ҆брати́тсѧ болѣ́знь є҆гѡ̀ на главꙋ̀ є҆гѡ̀, ꙗ҆́кѡ престꙋ́пника за́повѣди бж҃їей и҆ а҆по́стольскихъ постановле́нїй. И҆́бо заповѣ́даетъ и҆ пе́тръ верхо́вный а҆по́столъ: паси́те є҆́же въ ва́съ ста́до бж҃їе, посѣща́юще не нꙋ́ждею, но во́лею, и҆ по бз҃ѣ: нижѐ непра́ведными прибы́тки, но ᲂу҆се́рднѡ: ни ꙗ҆́кѡ ѡ҆блада́юще при́чтꙋ, но ѻ҆́брази быва́йте ста́дꙋ: и҆ ꙗ҆́вльшꙋсѧ пастыренача́льникꙋ, прїи́мете неꙋвѧда́емый сла́вы вѣне́цъ.
Пра́вило є҃.
Грѣ́хъ къ сме́рти є҆́сть, когда̀ нѣ́кїе, согрѣша́ѧ, въ неисправле́нїи пребыва́ютъ. го́рше же сегѡ̀ то̀, когда̀ жестоковы́йнѡ возстаю́тъ на благоче́стїе и҆ и҆́стинꙋ, предпочита́ѧ мамо́нꙋ послꙋша́нїю пред̾ бг҃омъ, и҆ не держа́сѧ є҆гѡ̀ ᲂу҆ста́вѡвъ и҆ пра̑вилъ. Въ таковы́хъ нѣ́тъ гдⷭ҇а бг҃а, а҆́ще не смирѧ́тсѧ, и҆ не и҆стрезвѧ́тсѧ ѿ своегѡ̀ грѣхопаде́нїѧ. Подоба́етъ и҆́мъ па́че пристꙋпа́ти къ бг҃ꙋ, и҆ съ сокрꙋше́ннымъ се́рдцемъ проси́ти ѡ҆ставле́нїѧ грѣха̀ сегѡ̀ и҆ проще́нїѧ, а҆ не тщесла́витисѧ даѧ́нїемъ непра́веднымъ. И҆́бо бли́зъ гдⷭ҇ь сокрꙋшє́ннымъ се́рдцемъ. Сегѡ̀ ра́ди а҆́ще кото́рые хва́лѧтсѧ, ꙗ҆́кѡ даѧ́нїемъ зла́та поста́влены въ чи́нъ церко́вный, и҆ на сїѐ ѕло́е ѻ҆быкнове́нїе, ѿчꙋжда́ющее ѿ бг҃а и҆ ѿ всѧ́кагѡ свѧще́нства, полага́ютъ наде́ждꙋ, и҆ ѿ тогѡ̀ безсты́днымъ лице́мъ, и҆ ѿве́рстыми ᲂу҆ста́ми, ᲂу҆кори́тельными слова́ми безче́стѧтъ и҆́збранныхъ ѿ свѧта́гѡ дх҃а за добродѣ́тельнꙋю жи́знь, и҆ без̾ даѧ́нїѧ зла́та поста́вленныхъ: то постꙋпа́ющихъ таки́мъ ѻ҆́бразомъ во пе́рвыхъ низводи́ти на послѣ́днюю сте́пень и҆́хъ чи́на: а҆́ще же въ то́мъ закоснѣва́ти бꙋ́дꙋтъ, є҆пїтїмїе́ю и҆справлѧ́ти. А҆́ще же кто̀ ѡ҆ка́жетсѧ сотвори́вшимъ сїѐ при рꙋкоположе́нїи: то да бꙋ́детъ постꙋ́плено по а҆по́стольскомꙋ пра́вилꙋ, кото́рое глаго́летъ: а҆́ще кто̀ є҆пі́скопъ, и҆лѝ пресвѵ́теръ, и҆лѝ дїа́конъ, де́ньгами полꙋ́читъ сїѐ досто́инство: да бꙋ́детъ и҆зве́рженъ и҆ ѻ҆́нъ, и҆ поста́вившїй є҆го̀, и҆ да ѿсѣче́тсѧ совсѣ́мъ ѿ ѻ҆бще́нїѧ, ꙗ҆́кѡ сі́мѡнъ во́лхвъ мно́ю петро́мъ. Та́кожде и҆ по второ́мꙋ пра́вилꙋ, преподо́бныхъ ѻ҆тє́цъ на́шихъ въ халкидо́нѣ, кото́рое глаго́летъ: а҆́ще кото́рый є҆пі́скопъ за дє́ньги ᲂу҆чини́тъ рꙋкоположе́нїе, и҆ непродае́мꙋю благода́ть, ѡ҆брати́тъ въ кꙋ́плю, и҆ за дє́ньги поста́витъ є҆пі́скопа, и҆лѝ хѡрепі́скопа, и҆лѝ пресвѵ́тера, и҆лѝ дїа́кона, и҆лѝ кого́ либо и҆з̾ чи́слѧщихсѧ въ при́чтѣ: и҆лѝ произведе́тъ за дє́ньги во і҆коно́ма и҆лѝ є҆кді́ка, и҆лѝ парамона́рїа, и҆лѝ воѻбщѐ въ какꙋ́ю либо церко́внꙋю до́лжность, ра́ди гнꙋ́снагѡ прибы́тка своегѡ̀: дерзнꙋ́вшїй на сїѐ, бы́въ ѡ҆бличе́нъ, да подлежи́тъ лише́нїю со́бственнагѡ сте́пени: а҆ поставлѧ́емый ѿню́дь да не по́льзꙋетсѧ кꙋ́пленнымъ поставле́нїемъ, и҆лѝ произво́дствомъ, но да бꙋ́детъ чꙋ́ждъ досто́инства, и҆лѝ до́лжности, котѡ́рыѧ полꙋчи́лъ за дє́ньги. А҆́ще же кто̀ ѡ҆ка́жетсѧ и҆ посре́дствовавшимъ во мздопрїѧ́тїи толи́кѡ гнꙋ́сномъ и҆ беззако́нномъ: и҆ се́й, а҆́ще є҆́сть кли́рїкъ, да бꙋ́детъ низве́рженъ со своегѡ̀ сте́пени: а҆́ще же мїрѧни́нъ, и҆лѝ мона́хъ, да бꙋ́детъ ѿлꙋче́нъ ѿ ѻ҆бще́нїѧ церко́внагѡ.
Пра́вило ѕ҃.
Поели́кꙋ є҆́сть пра́вило, кото́рое глаго́летъ: два́жды въ годꙋ̀ въ ка́ждой ѻ҆́бласти подоба́етъ бы́ти каноні́ческимъ и҆зслѣ́дованїѧмъ, посре́дствомъ собра́нїѧ є҆пі́скопѡвъ: а҆ преподо́бные ѻ҆тцы̀ шеста́гѡ собо́ра, во внима́нїе къ затрꙋдне́нїѧмъ собира́ющихсѧ, и҆ къ недоста́ткамъ потре́бнагѡ длѧ пꙋтеше́ствїѧ, ѡ҆предѣли́ли, без̾ всѧ́кагѡ ᲂу҆клоне́нїѧ и҆ и҆звине́нїѧ, є҆ди́ножды въ лѣ́то бы́ти собо́рꙋ, и҆ погрѣши́тельное и҆справлѧ́ти: то и҆ мы̀ сїѐ пра́вило возѡбновлѧ́емъ, и҆ а҆́ще ѡ҆брѧ́щетсѧ нѣ́кїй нача́льникъ возбранѧ́ющїй сїѐ, да бꙋ́детъ ѻ҆́нъ ѿлꙋче́нъ. А҆́ще же кто̀ и҆з̾ митрополі́тѡвъ пренебреже́тъ и҆спо́лнити сїѐ, не по нꙋ́ждѣ и҆ наси́лїю, и҆ не по како́й либо ᲂу҆важи́тельной причи́нѣ: таковы́й да подлежи́тъ є҆пїтїмїѝ, по пра́виламъ. Когда́ же бꙋ́детъ собо́ръ ѡ҆ предме́тахъ каноні́ческихъ и҆ є҆ѵа́нгельскихъ: тогда̀ собра́вшїесѧ є҆пі́скопы должны̀ прилѣжа́ти и҆ пещи́сѧ ѡ҆ сохране́нїи бж҃е́ственныхъ и҆ животворѧ́щихъ за́повѣдей бж҃їихъ. И҆́бо, внегда̀ сохрани́ти ѧ҆̀, воздаѧ́нїе мно́го: и҆́бо за́повѣдь є҆́сть свѣти́льникъ, зако́нъ свѣ́тъ, а҆ ѡ҆бличе́нїе и҆ наказа́нїе пꙋ́ть жи́зни, и҆: за́повѣдь гдⷭ҇нѧ свѣтла̀, просвѣща́ющаѧ ѻ҆́чи. Да не бꙋ́детъ же позволи́тельно митрополі́тꙋ и҆з̾ тогѡ̀, что̀ прино́ситъ съ собо́ю є҆пі́скопъ, тре́бовати и҆лѝ скота̀, и҆лѝ и҆ны́ѧ ве́щи. А҆́ще же ѡ҆бличе́нъ бꙋ́детъ въ таково́мъ постꙋ́пкѣ: то возда́стъ четвери́цею.
Пра́вило з҃.
Бж҃е́ственный а҆по́столъ па́ѵелъ и҆зре́къ: нѣ́кїихъ человѣ̑къ грѣсѝ пред̾ѧвле́ни сꙋ́ть, нѣ́кимъ же и҆ послѣ́дствꙋютъ. И҆́бо грѣха́мъ предварѧ́ющымъ и҆ дрꙋгі́е грѣхѝ послѣ́дꙋютъ. За нечести́вою є҆́ресїю клеветникѡ́въ на хрїстїа́нство, послѣ́довали и҆ и҆ны́ѧ нечє́стїѧ. И҆́бо ка́къ зра́къ честны́хъ і҆кѡ́нъ ѿѧ́ли ᲂу҆ це́ркви, та́къ ѡ҆ста́вили и҆ дрꙋгі́е нѣ́кїе ѻ҆бы́чаи, ко́и подоба́етъ возѡбнови́ти, и҆ та́кѡ содержа́ти, по пи́санномꙋ и҆ не пи́санномꙋ законоположе́нїю. Сегѡ̀ ра́ди, а҆́ще кото́рые честны́е хра́мы ѡ҆свѧщены̀ без̾ свѧты́хъ моще́й мꙋ́ченическихъ, ѡ҆предѣлѧ́емъ: да бꙋ́детъ совершено̀ въ ни́хъ положе́нїе моще́й съ ѻ҆бы́чною моли́твою. А҆́ще же ѿны́нѣ ѡ҆брѧ́щетсѧ нѣ́кїй є҆пі́скопъ, ѡ҆свѧща́ющїй хра́мъ без̾ свѧты́хъ моще́й: да бꙋ́детъ и҆зве́рженъ, ꙗ҆́кѡ престꙋпи́вшїй церкѡ́вныѧ преда̑нїѧ.
Пра́вило и҃.
Поели́кꙋ нѣ́которые и҆з̾ є҆вре́йскагѡ вѣроисповѣ́данїѧ, блꙋжда́ѧ, возмни́ли рꙋга́тисѧ хрⷭ҇тꙋ̀ бг҃ꙋ на́шемꙋ, притво́рнѡ дѣ́лаѧсѧ хрїстїа́нами, вта́йнѣ же ѿверга́ѧсѧ є҆гѡ̀, и҆ скры́тнѡ сꙋббѡ́тствꙋѧ, и҆ про́чее і҆ꙋде́йское и҆сполнѧ́ѧ: то ѡ҆предѣлѧ́емъ, си́хъ ни во ѡ҆бще́нїе, ни къ моли́твѣ, ни въ це́рковь не прїима́ти: но ꙗ҆́внѡ бы́ти и҆̀мъ, по и҆́хъ вѣроисповѣ́данїю, є҆вре́ѧми: и҆ дѣте́й и҆́хъ не крести́ти, и҆ раба̀ и҆̀мъ не покꙋпа́ти, и҆лѝ не прїѡбрѣта́ти. А҆́ще же кто̀ и҆з̾ ни́хъ съ и҆́скреннею вѣ́рою ѡ҆брати́тсѧ, и҆ и҆сповѣ́дꙋетъ ѻ҆́нꙋю ѿ всегѡ̀ се́рдца, торже́ственнѡ ѿверга́ѧ є҆вре́йскїе и҆́хъ ѻ҆бы́чаи и҆ дѣла̀, дабы̀ чрез̾ то̀ и҆ дрꙋги́хъ ѡ҆бличи́ти и҆ и҆спра́вити: сего̀ принима́ти и҆ креща́ти дѣте́й є҆гѡ̀, и҆ ᲂу҆твержда́ти и҆̀хъ въ ѿверже́нїи є҆вре́йскихъ ᲂу҆мышле́нїй. А҆́ще же не таковы̀ бꙋ́дꙋтъ: ѿню́дь не прїима́ти и҆́хъ.
Пра́вило ѳ҃.
Всѣ̀ дѣ́тскїѧ ба̑сни, и҆ неи́стѡвыѧ глꙋмлє́нїѧ, и҆ лжи̑выѧ писа̑нїѧ, сочинѧ́ємыѧ проти́въ честны́хъ і҆кѡ́нъ, до́лжно ѿдава́ти въ є҆пїско́пїю кѡнстантїнопо́льскꙋю, дабы̀ положены̀ бы́ли съ про́чими є҆реті́ческими кни́гами. А҆́ще же ѡ҆брѧ́щетсѧ кто̀ таковы̑ѧ сокрыва́ющїй: то є҆пі́скопъ, и҆лѝ пресвѵ́теръ, и҆лѝ дїа́конъ, да бꙋ́детъ и҆зве́рженъ и҆з̾ своегѡ̀ чи́на, а҆ мїрѧни́нъ, и҆лѝ мона́хъ, да бꙋ́детъ ѿлꙋче́нъ ѿ ѡ҆бще́нїѧ церко́внагѡ.
Пра́вило і҃.
Поели́кꙋ нѣ́которые и҆з̾ кли́ра, ᲂу҆клонѧ́ѧсѧ ѿ си́лы сꙋществꙋ́ющагѡ въ пра́вилахъ постановле́нїѧ, ѡ҆ста́вивъ сво́й прихо́дъ, ѿбѣга́ютъ во и҆ны́е прихо́ды, наипа́че же въ се́мъ бг҃оспаса́емомъ и҆ ца́рствꙋющемъ гра́дѣ, и҆ ᲂу҆ мїрски́хъ нача́льникѡвъ водворѧ́ютсѧ, ѿправлѧ́ѧ бг҃ослꙋже́нїе въ и҆́хъ моли́твенницахъ: то си́хъ, без̾ во́ли своегѡ̀ и҆ кѡнстантїнопо́льскагѡ є҆пі́скопа, не позволѧ́етсѧ прїима́ти, въ како́мъ бы то̀ ни бы́ло до́мѣ, и҆лѝ це́ркви. А҆́ще же кто̀ сїѐ сотвори́тъ, и҆ въ то́мъ ᲂу҆по́ренъ бꙋ́детъ: да бꙋ́детъ и҆зве́рженъ А҆ тѣ̑мъ, кото́рые съ согла́сїѧ вышерече́нныхъ свѧщеннонача́льникѡвъ сїѐ творѧ́тъ, не надлежи́тъ прїима́ти на себѧ̀ мїрски́хъ и҆ жите́йскихъ попече́нїй, ꙗ҆́коже бж҃е́ственными пра́вилами возбранено̀ сїѐ твори́ти. А҆́ще же кто̀ ѡ҆брѧ́щетсѧ, занима́ющїй мїрскꙋ́ю до́лжность ᲂу҆ глаго́лемыхъ вельмо́жъ: и҆лѝ да ѡ҆ста́витъ ѻ҆́нꙋю, и҆лѝ да бꙋ́детъ и҆зве́рженъ. Лꙋ́чше же да и҆́детъ ᲂу҆чи́ти ѻ҆трокѡ́въ и҆ домоча́дцєвъ, чита́ѧ и҆̀мъ бж҃е́ственное писа́нїе: и҆́бо длѧ сегѡ̀ и҆ свѧще́нство полꙋчи́лъ.
Пра́вило а҃і.
Бꙋ́дꙋчи ѡ҆бѧ́заны храни́ти всѣ̀ бж҃е́ствєнныѧ пра̑вила, мы̀ должны̀ та́кожде ѡ҆хранѧ́ти всеконе́чнѡ неизмѣ́ннымъ и҆ то̀, кото́рое повелѣва́етъ бы́ти і҆коно́мꙋ въ ка́ждой це́ркви. И҆ а҆́ще ка́ждый митрополі́тъ, во свое́й це́ркви поставлѧ́етъ і҆коно́ма, бла́го є҆́сть: а҆́ще же не поста́витъ, предоставлѧ́етсѧ кѡнстантїнопо́льскомꙋ є҆пі́скопꙋ, со́бственною вла́стїю ѡ҆предѣли́ти і҆коно́ма въ то́й це́ркви. То́ же предоставлѧ́етсѧ и҆ митрополі́тамъ, а҆́ще подчине́нные и҆̀мъ є҆пі́скопы не восхотѧ́тъ і҆коно́мѡвъ поста́вити въ це́рквахъ свои́хъ. То́ же са́мое наблюда́ти и҆ по монастырѧ́мъ.
Пра́вило в҃і.
А҆́ще кто̀, є҆пі́скопъ, и҆лѝ и҆гꙋ́менъ, ѡ҆ка́жетсѧ что́ либо и҆з̾ ᲂу҆го́дїй, принадлежа́щихъ є҆пїско́пїи, и҆лѝ монастырю̀, прода́вшимъ въ рꙋ́ки власте́й, и҆лѝ ѿда́вшимъ и҆но́мꙋ лицꙋ̀: не тве́рдо да бꙋ́детъ ѻ҆́ное ѿдаѧ́нїе, по пра́вилꙋ ст҃ы́хъ а҆по́стѡлъ, глаго́лющемꙋ: є҆пі́скопъ да и҆мѣ́етъ попече́нїе ѡ҆ всѣ́хъ церко́вныхъ веща́хъ, и҆ ѻ҆́ными да распорѧжа́етъ, ꙗ҆́кѡ бг҃ꙋ назира́ющꙋ: но не позволи́тельно є҆мꙋ̀ присвоѧ́ти что́ либо и҆з̾ ѻ҆́ныхъ, и҆лѝ сро́дникамъ свои́мъ дари́ти принадлежа́щее бг҃ꙋ: а҆́ще же сꙋ́ть неимꙋ́щїе, да подае́тъ и҆̀мъ ꙗ҆́кѡ неимꙋ́щымъ, но, под̾ си́мъ предло́гомъ, да не продае́тъ принадлежа́щагѡ цр҃кви. А҆́ще поставлѧ́ютъ въ предло́гъ, что̀ землѧ̀ причинѧ́етъ ᲂу҆бы́токъ, и҆ никако́й по́льзы не доставлѧ́етъ: то и҆ въ се́мъ слꙋ́чаѣ не ѿдава́ти по́лѧ мѣ́стнымъ нача́льникамъ, но кли́рїкамъ и҆лѝ земледѣ́льцамъ. А҆́ще же ᲂу҆потребѧ́тъ лꙋка́вый ѡ҆боро́тъ, и҆ властели́нъ перекꙋ́питъ зе́млю ᲂу҆ кли́рїка, и҆лѝ земледѣ́льца: то и҆ въ се́мъ слꙋ́чаѣ прода́жа да бꙋ́детъ недѣйстви́тельна, и҆ про́данное да бꙋ́детъ возвращено̀ є҆пїско́пїи, и҆лѝ монастырю̀: а҆ є҆пі́скопъ, и҆лѝ и҆гꙋ́менъ, та́кѡ постꙋпа́ющїй, да бꙋ́детъ и҆згна́нъ: є҆пі́скопъ и҆з̾ є҆пїско́пїи, и҆гꙋ́менъ же и҆з̾ монастырѧ̀, ꙗ҆́кѡ ѕлѣ̀ расточа́ющїе то̀, чегѡ̀ не собра́ли.
Пра́вило г҃і.
При слꙋчи́вшемсѧ, по грѣха́мъ на́шымъ, бѣ́дствїи въ цр҃квахъ, нѣ́которые свѧты́е хра́мы є҆пїско́пїи и҆ монастырѝ нѣ́кїими людьмѝ расхи́щены, и҆ содѣ́лалисѧ ѻ҆быкнове́нными жили́щами. А҆́ще завладѣ́вшїе ѻ҆́ными восхотѧ́тъ ѿда́ти и҆̀хъ, да бꙋ́дꙋтъ возстано́влены по пре́жнемꙋ, то добро̀ и҆ бла́го є҆́сть: а҆́ще же не та́кѡ: то, сꙋ́щихъ ѿ свѧще́нническагѡ чи́на, повелѣва́емъ и҆зверга́ти, а҆ мона́хѡвъ, и҆лѝ мїрѧ́нъ ѿлꙋча́ти, ꙗ҆́кѡ ѡ҆сꙋжде́нныхъ ѿ ѻ҆ц҃а̀, и҆ сн҃а, и҆ свѧта́гѡ дх҃а, и҆ да вчинѧ́тсѧ, и҆дѣ́же че́рвь не ᲂу҆мира́етъ, и҆ ѻ҆́гнь не ᲂу҆гаса́етъ. Поне́же ѻ҆нѝ гла́сꙋ гдⷭ҇ню проти́вѧтсѧ, глаго́лющемꙋ: нетвори́те до́мꙋ ѻ҆ц҃а̀ моегѡ̀ до́момъ кꙋ́пли.
Пра́вило д҃і.
Всѣ̑мъ ꙗ҆́вно є҆́сть, ꙗ҆́кѡ порѧ́докъ не разлꙋче́нъ ѿ свѧще́нства, и҆ съ то́чностїю храни́ти ѿносѧ́щыѧсѧ къ свѧще́нствꙋ произвѡ́дства, є҆́сть дѣ́ло бг҃ꙋ ᲂу҆го́дное. И҆ поне́же ви́димъ, ꙗ҆́кѡ нѣ́кїе, без̾ рꙋковозложе́нїѧ, въ дѣ́тствѣ принѧ́въ приче́тническое постриже́нїе, но є҆щѐ не полꙋчи́въ є҆пі́скопскагѡ рꙋкоположе́нїѧ, въ церко́вномъ собра́нїи на а҆мвѡ́нѣ чита́ютъ, и҆ сїѐ дѣ́лаютъ несогла́снѡ съ пра́вилами: то повелѣва́емъ ѿны́нѣ семꙋ̀ не бы́ти. Сїе́ же са́мое соблюда́ти и҆ въ разсꙋжде́нїи мона́хѡвъ. Рꙋкоположе́нїе же чтеца̀ твори́ти позволѧ́етсѧ ка́ждомꙋ и҆гꙋ́менꙋ въ свое́мъ, и҆ то́кмѡ въ свое́мъ монастырѣ̀, а҆́ще са́мъ и҆гꙋ́менъ полꙋчи́лъ рꙋкоположе́нїе ѿ є҆пі́скопа въ нача́льство и҆гꙋ́менское, без̾ сомнѣ́нїѧ ᲂу҆жѐ бꙋ́дꙋчи пресвѵ́теромъ. Подо́бнѡ и҆ хорепі́скопы, по дре́внемꙋ ѻ҆бы́чаю, съ позволе́нїѧ є҆пі́скопа, должны̀ производи́ти чтецѡ́въ.
Пра́вило є҃і.
Ѿны́нѣ кли́рїкъ да не ѡ҆предѣлѧ́етсѧ къ двꙋ́мъ це́рквамъ: и҆́бо сїѐ сво́йственно торго́влѣ и҆ ни́зкомꙋ своекоры́стїю, и҆ чꙋ́ждо церко́внагѡ ѻ҆бы́чаѧ. И҆́бо мы̀ слы́шали ѿ самагѡ̀ гла́са гдⷭ҇нѧ, ꙗ҆́кѡ не мо́жетъ кто́ либо двѣма̀ господи́нома рабо́тати: ли́бо є҆ди́наго возненави́дитъ, а҆ дрꙋга́го возлю́битъ, и҆лѝ є҆ди́наго держи́тсѧ, ѡ҆ дрꙋго́мъ же вознеради́тъ. Тогѡ̀ ра́ди всѧ́къ, по а҆по́стольскомꙋ сло́вꙋ, въ не́мже при́званъ є҆́сть, въ то́мъ до́лженъ пребыва́ти, и҆ ѡ҆брѣта́тисѧ при є҆ди́ной це́ркви. И҆́бо что̀ длѧ ни́зкїѧ коры́сти въ церко́вныхъ дѣла́хъ быва́етъ, то̀ стано́витсѧ чꙋ́ждымъ бг҃а. Длѧ потре́бностей же сеѧ̀ жи́зни, є҆́сть разли́чныѧ занѧ̑тїѧ: и҆ си́ми, а҆́ще кто̀ пожела́етъ, да прїѡбрѣта́етъ потре́бное длѧ тѣ́ла. И҆́бо а҆по́столъ ре́къ: тре́бованїю моемꙋ̀, и҆ сꙋ́щымъ съ мно́ю, послꙋжи́стѣ рꙋ́цѣ моѝ сїѝ. И҆ сїѐ наблюда́ти въ се́мъ бг҃оспаса́емомъ гра́дѣ: а҆ въ про́чихъ мѣста́хъ, по недоста́ткꙋ въ лю́дѧхъ, допꙋсти́ти и҆з̾ѧ́тїе.
Пра́вило ѕ҃і.
Всѧ́каѧ ро́скошь и҆ ᲂу҆краше́нїе тѣ́ла чꙋ́жды свѧще́нническагѡ чи́на и҆ состоѧ́нїѧ. Сегѡ̀ ра́ди є҆пі́скопы, и҆лѝ кли́рїки, ᲂу҆краша́ющїе себѧ̀ свѣ́тлыми и҆ пы́шными ѻ҆де́ждами, да и҆справлѧ́ютсѧ. А҆́ще же въ то́мъ пребꙋ́дꙋтъ, подверга́ти и҆̀хъ є҆пїтїмїѝ: та́кожде и҆ ᲂу҆потреблѧ́ющихъ благовѡ́нныѧ ма́сти. Поели́кꙋ же ко́рень го́рести, вы́спрь прозѧба́ѧй, є҆́ресь хрїстїанохꙋ́льникѡвъ, содѣ́лалась нечи́стымъ пѧтно́мъ длѧ каѳолі́ческїѧ це́ркви, и҆ прїѧ́вшїе ѻ҆́нꙋю не то́кмѡ і҆кѡ́нными и҆зѡбраже́нїѧми возгнꙋша́лисѧ, но и҆ всѧ́кое благоговѣ́нїе ѿве́ргли, ненави́дѧ люде́й че́стнѡ и҆ благоговѣ́йнѡ живꙋ́щихъ, и҆ и҆спо́лнилось въ ни́хъ напи́санное: ме́рзость грѣ́шникѡмъ благоче́стїе: то а҆́ще ѡ҆брѧ́щꙋтсѧ нѣ́кїе, посмѣва́ющїесѧ носѧ́щымъ просто́е и҆ скро́мное ѡ҆дѣѧ́нїе, є҆пїтїмїе́ю да и҆справлѧ́ютсѧ. Поне́же, ѿ дре́внихъ време́нъ, всѧ́кїй свѧще́нный мꙋ́жъ дово́льствовалсѧ нероско́шнымъ и҆ скро́мнымъ ѡ҆дѣѧ́нїемъ: и҆́бо всѐ, что̀ не длѧ потре́бности, но длѧ ᲂу҆бра́нства прїе́млетсѧ подлежи́тъ ѡ҆бвине́нїю въ сꙋ́етности, ꙗ҆́коже глаго́летъ васі́лїй вели́кїй. Но и҆ разноцвѣ́тныѧ и҆з̾ ше́лковыхъ тка́ней ѻ҆дє́жды не бы́ли носи́мы, и҆ на краѧ̀ ѻ҆де́ждъ не налага́лисѧ воскри̑лїѧ и҆на́гѡ цвѣ́та: и҆́бо слы́шали ѿ бг҃огла́снагѡ ѧ҆зы́ка, ꙗ҆́кѡ въ мѧ́гкїѧ ѻ҆дє́жды ѡ҆дѣва́ющїесѧ въ домѣ́хъ ца́рскихъ сꙋ́ть.
Пра́вило з҃і.
Нѣ́которые и҆з̾ мона́хѡвъ, жела́ѧ нача́льствовати, а҆ послꙋша́нїѧ ѿмета́ѧсѧ, ѡ҆ста́вивъ своѝ монастырѝ, предпрїе́млютъ созида́ти моли́твенные до́мы, не и҆мѣ́ѧ потре́бнагѡ къ соверше́нїю ѻ҆́ныхъ. А҆́ще ᲂу҆̀бо кто̀ дерзне́тъ сїѐ твори́ти, да бꙋ́детъ є҆мꙋ̀ возбранено̀ ѿ мѣ́стнагѡ є҆пі́скопа. А҆́ще же и҆мѣ́етъ потре́бное къ доверше́нїю: то преднамѣ́ренное и҆́мъ да приведе́тсѧ къ концꙋ̀. Сїе́ же са́мое соблюда́ти и҆ длѧ мїрѧ́нъ и҆ длѧ кли́рїкѡвъ.
Пра́вило и҃і.
Безпреткнове́ни быва́йте и҆ внѣ̑шнимъ, глаго́летъ бж҃е́ственный а҆по́столъ. Но пребыва́нїе же́нъ въ є҆пїско́пїѧхъ и҆лѝ въ монастырѧ́хъ, є҆́сть вина̀ всѧ́кагѡ собла́зна. Сегѡ̀ ра́ди, а҆́ще ᲂу҆смо́трено бꙋ́детъ, что̀ кто́ либо и҆мѣ́етъ рабꙋ̀, и҆лѝ свобо́днꙋю въ є҆пїско́пїи, и҆лѝ въ монастырѣ̀, порꙋча́ѧ є҆́й како́е либо слꙋже́нїе, да подлежи́тъ таковы́й є҆пїтїмїѝ: закоснѣва́ющїй же въ то́мъ, да бꙋ́детъ и҆зве́рженъ. А҆́ще и҆ слꙋчи́тсѧ жена́мъ бы́ти въ за́городныхъ дома́хъ, и҆ восхо́щетъ є҆пі́скопъ, и҆лѝ и҆гꙋ́менъ пꙋ́ть твори́ти та́мѡ: то въ присꙋ́тствїи є҆пі́скопа и҆лѝ и҆гꙋ́мена, ѿню́дь никако́гѡ слꙋже́нїѧ да не и҆справлѧ́етъ въ то вре́мѧ жена̀: но да пребꙋ́детъ ѻ҆со́бѡ на и҆но́мъ мѣ́стѣ, доко́лѣ послѣ́дꙋетъ ѿше́ствїе є҆пі́скопа, и҆лѝ и҆гꙋ́мена, да не бꙋ́детъ нарека́нїѧ.
Пра́вило ѳ҃і.
Ме́рзость сребролю́бїѧ толи́кѡ возѡблада́ла води́телѧми церкве́й, ꙗ҆́кѡ нѣ́кїе и҆з̾ глаго́лемыхъ благоговѣ́йныхъ мꙋже́й и҆ же́нъ, забы́въ гдⷭ҇ни за́повѣди, заблꙋди́лисѧ, и҆ въ свѧще́нный чи́нъ, и҆ въ мона́шеское житїѐ встꙋпа́ющихъ прїе́млютъ за зла́то. И҆ быва́етъ, ꙗ҆́коже глаго́летъ вели́кїй васі́лїй, непотре́бно всѐ, чегѡ̀ нача́ло нечи́сто: поне́же бг҃ꙋ и҆ мамѡ́нѣ слꙋжи́ти не подоба́етъ. Сегѡ̀ ра́ди, а҆́ще ᲂу҆смо́тренъ бꙋ́детъ кто́ либо сїѐ творѧ́щїй: то є҆пі́скопъ, и҆лѝ и҆гꙋ́менъ, и҆лѝ кто́ либо и҆з̾ свѧще́нническагѡ чи́на, и҆лѝ да преста́нетъ, и҆лѝ да бꙋ́детъ и҆зве́рженъ, по второ́мꙋ пра́вилꙋ халкидо́нскагѡ свѧта́гѡ собо́ра: а҆ и҆гꙋ́менїа да и҆зго́нитсѧ и҆з̾ монастырѧ̀, и҆ да преда́стсѧ во и҆ны́й монасты́рь въ послꙋша́нїе: ра́внѡ ка́къ и҆ и҆гꙋ́менъ, не и҆мѣ́ющїй пресвѵ́терскагѡ рꙋкоположе́нїѧ. А҆ ѡ҆ то́мъ, что̀ даю́тъ роди́тели дѣ́тѧмъ, по подо́бїю вѣ́на, и҆ ѡ҆ веща́хъ приноси́мыхъ и҆з̾ со́бственности, съ ѡ҆б̾ѧвле́нїемъ ѿ приносѧ́щагѡ, ꙗ҆́кѡ посвѧща́ютсѧ бг҃ꙋ, мы̀ ѡ҆предѣли́ли, да пребꙋ́дꙋтъ по ѡ҆бѣща́нїю и҆́хъ, пребꙋ́детъ ли прине́сшїй въ монастырѣ̀, и҆лѝ и҆зы́детъ, а҆́ще не бꙋ́детъ семꙋ̀ вины̀ въ настоѧ́телѣ.
Пра́вило к҃.
Ѡ҆предѣлѧ́емъ не бы́ти ѿны́нѣ монастырѧ́мъ двойны́мъ, потомꙋ̀ что̀ сїѐ быва́етъ собла́зномъ и҆ преткнове́нїемъ длѧ мно́гихъ. А҆́ще же восхотѧ́тъ нѣ́кїе со сро́дниками ѿрещи́сѧ ѿ мі́ра, и҆ мона́шескомꙋ житїю̀ послѣ́довати, то мꙋжа́мъ ѿходи́ти въ мꙋ́жескїй монасты́рь, а҆ жена́мъ входи́ти въ же́нскїй монасты́рь: и҆́бо си́мъ благоꙋгожда́етсѧ бг҃ъ. А҆ ѡ҆брѣта́ющїесѧ доны́нѣ двойны́е монастырѝ, да бꙋ́дꙋтъ ᲂу҆правлѧ́емы по пра́вилꙋ свѧта́гѡ ѻ҆тца̀ на́шегѡ васі́лїа, и҆ по за́повѣди є҆гѡ̀, законополага́ющей та́кѡ: да не живꙋ́тъ во є҆ди́номъ монастырѣ̀ мона́хи и҆ мона́хини: потомꙋ̀ что̀ соводворе́нїе дае́тъ посре́дство къ прелюбодѣѧ́нїю. Да не и҆мѣ́етъ дерзнове́нїѧ мона́хъ съ мона́хинею, и҆лѝ мона́хинѧ съ мона́хомъ бесѣ́довати наединѣ̀. Да не спи́тъ мона́хъ въ же́нскомъ монастырѣ̀, и҆ да не ꙗ҆́стъ мона́хинѧ вмѣ́стѣ съ мона́хомъ наединѣ̀. И҆ когда̀ вє́щи потрє́бныѧ длѧ жи́зни, со стороны̀ мꙋ́жеской прино́сѧтсѧ къ мона́хинѧмъ: за врата́ми ѻ҆́ныѧ да прїе́млетъ же́нскагѡ монастырѧ̀ и҆гꙋ́менїа съ нѣ́коею ста́рою мона́хинею. А҆́ще же слꙋчи́тсѧ, что̀ мона́хъ пожела́етъ ви́дѣти нѣ́кꙋю ро́дственницꙋ: то въ присꙋ́тствїи и҆гꙋ́менїи съ не́ю да бесѣ́дꙋетъ, не мно́гими и҆ кра́ткими слова́ми, и҆ вско́рѣ ѿ неѧ̀ да ѿхо́дитъ.
Пра́вило к҃а.
Не долженствꙋ́етъ мона́хъ, и҆лѝ мона́хинѧ ѡ҆ставлѧ́ти сво́й монасты́рь, и҆ ѿходи́ти во и҆ны́й. А҆́ще же слꙋчи́тсѧ сїѐ, то страннопрїи́мство ꙗ҆ви́ти є҆мꙋ̀ неѡбходи́мо, а҆ прїима́ти є҆го̀ без̾ во́ли и҆гꙋ́мена є҆гѡ̀ не подоба́етъ.
Пра́вило к҃в.
Всѐ приноси́ти бг҃ꙋ, и҆ не порабоща́тисѧ свои́ми жела́нїѧми, є҆́сть вели́кое дѣ́ло. И҆́бо а҆́ще ꙗ҆́сте, а҆́ще ли пїе́те, глаго́летъ бж҃е́ственный а҆по́столъ, всѧ̑ въ сла́вꙋ бж҃їю твори́те. И҆ хрⷭ҇то́съ бг҃ъ на́шъ, въ свое́мъ є҆ѵа́нгелїи, повелѣ́лъ ѿсѣка́ти нача̑ла грѣхѡ́въ. И҆́бо не то́кмѡ прелюбодѣѧ́нїе наказꙋ́етсѧ ѿ негѡ̀, но и҆ движе́нїе мы́сли къ покꙋше́нїю на прелюбодѣѧ́нїе ѡ҆сꙋждено̀, по глаго́лꙋ є҆гѡ̀: воззрѣ́вый на женꙋ̀, ко є҆́же возделѣ́ти є҆ѧ̀, ᲂу҆жѐ любодѣ́йствова съ не́ю въ се́рдцѣ свое́мъ. Ѿсю́дꙋ ᲂу҆́бѡ наꙋча́сѧ, мы̀ должны̀ ѡ҆чища́ти по́мыслы. И҆́бо, а҆́ще и҆ всѧ̑ лѣ́ть сꙋ́ть, но не всѧ̑ на по́льзꙋ, ка́къ ᲂу҆́читъ а҆по́стольское сло́во. Всѧ́комꙋ человѣ́кꙋ неѡбходи́мо ꙗ҆́сти, дабы̀ жи́ти, и҆ живꙋ́щымъ въ бра́кѣ и҆ съ дѣтьмѝ, въ мїрско́мъ состоѧ́нїи, не предосꙋди́тельно ꙗ҆́сти мꙋжа́мъ и҆ же́намъ вмѣ́стѣ: то́кмѡ даю́щемꙋ пи́щꙋ да прино́сѧтъ благодаре́нїе: но ꙗ҆́сти не съ каки́ми либо позо́рищными вы́мыслами, и҆лѝ съ сатани́нскими пѣ́снѧми, и҆ съ пѣвни́цами и҆ блꙋдни́ческими гласова́нїѧми, на ко́и па́даетъ проро́ческое ᲂу҆коре́нїе, глаго́лющее та́кѡ: го́ре съ гꙋ́сльми и҆ пѣвни́цами вїно̀ пїю́щымъ, на дѣла́ же гдⷭ҇нѧ не взира́ющымъ, и҆ ѡ҆ дѣла́хъ рꙋ́къ є҆гѡ̀ не помышлѧ́ющымъ. И҆ а҆́ще бꙋ́дꙋтъ гдѣ̀ таковы́е въ хрїстїа́нахъ, да и҆справлѧ́ютсѧ: а҆́ще же не и҆спра́вѧтсѧ, да бꙋ́детъ въ ѿноше́нїи къ ни́мъ соблюда́емо каноні́чески постано́вленное бы́вшими пре́жде на́съ. А҆ кото́рыхъ жи́знь є҆́сть ти́хаѧ и҆ є҆диноѻбра́знаѧ, ꙗ҆́кѡ да́вшихъ ѻ҆бѣ́тъ гдⷭ҇ꙋ бг҃ꙋ взѧ́ти на себѧ̀ и҆́го мона́шества: тѣ̀ да сѧ́дꙋтъ наединѣ̀ и҆ ᲂу҆мо́лкнꙋтъ. Но и҆ свѧще́нническое житїѐ и҆збра́вшымъ, не совсѣ́мъ позволи́тельно ꙗ҆́сти наединѣ̀ съ же́нами, а҆ ра́звѣ кꙋ́пнѡ съ нѣ́которыми бг҃обоѧ́зненными и҆ благоговѣ́йными мꙋжа́ми и҆ же́нами, дабы̀ и҆ сїѐ ѻ҆бще́нїе трапе́зы вело̀ къ назида́нїю дꙋхо́вномꙋ. То́ же соблюда́ти до́лжно и҆ въ разсꙋжде́нїи сро́дникѡвъ. А҆́ще же слꙋчи́тсѧ мона́хꙋ, и҆лѝ мꙋ́жꙋ свѧще́ннагѡ чи́на въ пꙋтеше́ствїи не и҆мѣ́ти потре́бнагѡ, и҆ по нꙋ́ждѣ восхо́щетъ ѻ҆́нъ препочи́ти въ гости́нницѣ, и҆лѝ въ чье́мъ либо до́мѣ: разрѣша́етсѧ таково́мꙋ сїѐ твори́ти, поели́кꙋ нꙋ́жда тре́бꙋетъ.