Канѡ̑ны, си́рѣчь кни́га пра́вилъ/Пра̑вила четве́ртагѡ вселе́нскагѡ собо́ра
| ←Пра̑вила тре́тїѧгѡ вселе́нскагѡ собо́ра | Пра̑вила свѧты́хъ а҆по́столѡвъ, свѧты́хъ собо́рѡвъ вселе́нскихъ и҆ помѣ́стныхъ, и҆ свѧты́хъ ѻ҆те́цъ Пра̑вила свѧта́гѡ вселе́нскагѡ четве́ртагѡ собо́ра, халкидо́нскагѡ |
Пра̑вила шеста́гѡ вселе́нскагѡ собо́ра→ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ
Пра̑вила
свѧта́гѡ вселе́нскагѡ четве́ртагѡ собо́ра, халкидо́нскагѡ.
свѧта́гѡ вселе́нскагѡ четве́ртагѡ собо́ра, халкидо́нскагѡ.
Пра́вило а҃.
Ѿ свѧты́хъ ѻ҆тє́цъ, на ка́ждомъ собо́рѣ, доны́нѣ и҆зло́женныѧ пра̑вила соблюда́ти призна́ли мы̀ справедли́вымъ.
Пра́вило в҃.
А҆́ще кото́рый є҆пі́скопъ за де́ньги рꙋкоположе́нїе ᲂу҆чини́тъ, и҆ непродае́мꙋю благода́ть ѡ҆брати́тъ въ прода́жꙋ, и҆ за де́ньги поста́витъ є҆пі́скопа, и҆лѝ хѡрепі́скопа, и҆лѝ пресвѵ́тера, и҆лѝ дїа́кона, и҆лѝ и҆на́го ко́его ѿ чи́слѧщихсѧ въ кли́рѣ, и҆лѝ произведе́тъ за де́ньги во і҆коно́ма, и҆лѝ є҆кді́ка и҆лѝ парамона́рїа, и҆лѝ воѻбщѐ въ какꙋ́ю либо церко́внꙋю до́лжность, ра́ди гнꙋ́снагѡ прибы́тка своегѡ̀: таковы́й бы́въ ѡ҆бличе́нъ, ꙗ҆́кѡ на сїѐ покꙋси́лсѧ, да бꙋ́детъ подве́рженъ лише́нїю со́бственнагѡ сте́пени: и҆ поста́вленный и҆́мъ ѿню́дь да не по́льзꙋетсѧ кꙋ́пленнымъ рꙋкоположе́нїемъ, и҆лѝ произво́дствомъ: но да бꙋ́детъ чꙋ́ждъ досто́инства, и҆лѝ до́лжности, котѡ́рыѧ полꙋчи́лъ за де́ньги. А҆́ще же ꙗ҆́витсѧ кто̀ и҆ посре́дствꙋющимъ въ толи́кѡ гнꙋ́сномъ и҆ беззако́нномъ мздопрїѧ́тїи: то и҆ се́й, а҆́ще є҆́сть и҆з̾ кли́ра, да бꙋ́детъ низве́рженъ со своегѡ̀ сте́пени: а҆́ще же мїрѧни́нъ, и҆лѝ мона́шествꙋющїй, да бꙋ́детъ пре́данъ а҆на́ѳемѣ.
Пра́вило г҃.
Дошло̀ до свѧта́гѡ собо́ра, что̀ нѣ́которые и҆з̾ принадлежа́щихъ къ кли́рꙋ, ра́ди гнꙋ́снагѡ прибы́тка, берꙋ́тъ на ѿкꙋ́пъ чꙋжі́ѧ и҆мѣ̑нїѧ, и҆ ᲂу҆строѧ́ютъ мїрскі́ѧ дѣла̀, ѡ҆ бж҃їемъ слꙋже́нїи небрегꙋ́тъ, а҆ по дома́мъ мїрски́хъ люде́й скита́ютсѧ, и҆ порꙋчє́нїѧ по и҆мѣ́нїѧмъ прїе́млютъ, и҆з̾ сребролю́бїѧ. Посемꙋ̀ ѡ҆предѣли́лъ свѧты́й и҆ вели́кїй собо́ръ. что́бы впре́дь никто̀, ни є҆пі́скопъ, ни кли́рїкъ, ни мона́шествꙋющїй, не бра́лъ на ѿкꙋ́пъ и҆мѣ́нїй, и҆ въ распорѧже́нїе мїрски́ми дѣла́ми не встꙋпа́лъ: ра́звѣ то́кмѡ по зако́намъ при́званъ бꙋ́детъ къ неизбѣ́жномꙋ попечи́тельствꙋ над̾ малолѣ́тными, и҆лѝ є҆пі́скопъ гра́да порꙋ́читъ комꙋ̀ и҆мѣ́ть попече́нїе ѡ҆ церко́вныхъ дѣла́хъ, и҆лѝ ѡ҆ сирота́хъ, и҆ вдова́хъ безпомо́щныхъ, и҆ ѡ҆ ли́цахъ, котѡ́рымъ ѻ҆со́беннѡ нꙋ́жно ѡ҆каза́ть церко́внꙋю по́мощь, ра́ди стра́ха бж҃їѧ. А҆́ще же кто̀ впре́дь дерзне́тъ престꙋпи́ти сїѐ ѡ҆предѣле́нїе: таковы́й да бꙋ́детъ подве́ргнꙋтъ церко́вномꙋ наказа́нїю.
Пра́вило д҃.
И҆́стиннѡ и҆ и҆́скреннѣ проходѧ́щїе мона́шеское житїѐ да ᲂу҆досто́иваютсѧ прили́чныѧ че́сти. Но поели́кꙋ нѣ́которые, длѧ ви́да ᲂу҆потреблѧ́ѧ ѻ҆де́ждꙋ мона́шескꙋю, разстро́иваютъ цр҃кви и҆ гражда́нскїѧ дѣ́ла, по произво́лꙋ ходѧ̀ по града́мъ, и҆ да́же монастырѝ са́ми длѧ себѧ̀ составлѧ́ти покꙋша́ютсѧ: то разсꙋждено̀, что́бы никто̀ нигдѣ̀ не созида́лъ, и҆ не ѡ҆сно́вывалъ монастырѧ̀, и҆лѝ моли́твеннагѡ до́ма, без̾ соизволе́нїѧ є҆пі́скопа гра́да. Мона́шествꙋющїе же, въ ка́ждомъ гра́дѣ и҆ странѣ̀, да бꙋ́дꙋтъ въ подчине́нїи ᲂу҆ є҆пі́скопа, да соблюда́ютъ безмо́лвїе, да прилежа́тъ то́кмѡ постꙋ̀ и҆ моли́твѣ, безѿлꙋ́чнѡ пребыва́ѧ въ тѣ́хъ мѣста́хъ, въ кото́рыхъ ѿрекли́сь ѿ мі́ра, да не вмѣ́шиваютсѧ ни въ церкѡ́вныѧ, ни въ житє́йскїѧ дѣла̀, и҆ да не прїе́млютъ въ ни́хъ ᲂу҆ча́стїѧ, ѡ҆ставлѧ́ѧ своѝ монастырѝ: ра́звѣ то́кмѡ когда̀ бꙋ́детъ сїѐ позво́лено є҆пі́скопомъ гра́да, по неѡбходи́мой на́добности. Да не прїе́млетсѧ та́кже въ монастырѧ́хъ въ мона́шество никако́й ра́бъ, без̾ во́ли господи́на є҆гѡ̀. Престꙋпа́ющемꙋ же сїѐ на́ше ѡ҆предѣле́нїе, ѡ҆предѣли́ли мы̀ бы́ти чꙋ́ждымъ ѡ҆бще́нїѧ церко́внагѡ, да не хꙋ́литсѧ и҆́мѧ бж҃їе. Впро́чемъ є҆пі́скопꙋ гра́да надлежи́тъ и҆мѣ́ти ѡ҆ монастырѧ́хъ до́лжное попече́нїе.
Пра́вило є҃.
Ѡ҆ є҆пі́скопахъ, и҆лѝ кли́рїкахъ, преходѧ́щихъ и҆з̾ гра́да во гра́дъ, разсꙋждено̀, что́бы положє́нныѧ свѧты́ми ѻ҆тца́ми пра́вила пребыва́ли во свое́й си́лѣ.
Пра́вило ѕ҃.
Рѣши́тельнѡ никого̀, ни во пресвѵ́тера, ни во дїа́кона, нижѐ въ какꙋ́ю сте́пень церко́внагѡ чи́на, не рꙋкополага́ти и҆на́че, ка́къ съ назначе́нїемъ рꙋкополага́емагѡ и҆́меннѡ къ це́ркви гра́дской, и҆лѝ се́льской, и҆лѝ къ мꙋ́ченическомꙋ хра́мꙋ, и҆лѝ къ монастырю̀. Ѡ҆ рꙋкополага́емыхъ же без̾ то́чнагѡ назначе́нїѧ, свѧты́й собо́ръ ѡ҆предѣли́лъ: поставле́нїе и҆́хъ почита́ти недѣйстви́тельнымъ, и҆ нигдѣ̀ не допꙋска́ти и҆̀хъ до слꙋже́нїѧ, къ посрамле́нїю поста́вившагѡ и҆̀хъ.
Пра́вило з҃.
Вчинє́ннымъ є҆ди́ножды въ кли́ръ и҆ мона́хамъ, ѡ҆предѣли́ли мы̀ не встꙋпа́ти ни въ во́инскꙋю слꙋ́жбꙋ, ни въ мїрскі́й чи́нъ: и҆на́че дерзнꙋ́вшихъ на сїѐ, и҆ не возвраща́ющихсѧ съ раска́ѧнїемъ къ томꙋ̀, что̀ пре́жде и҆збра́ли длѧ бг҃а, предава́ти а҆на́ѳемѣ.
Пра́вило и҃.
Кли́рїки при богадѣ́льнѧхъ, монастырѧ́хъ и҆ хра́махъ мꙋ́ченическихъ, да пребыва́ютъ, по преда́нїю свѧты́хъ ѻ҆тє́цъ, под̾ вла́стїю є҆пі́скопѡвъ ка́ждагѡ гра́да, и҆ да не и҆сторга́ютсѧ, по де́рзости, и҆з̾ под̾ ᲂу҆правле́нїѧ своегѡ̀ є҆пі́скопа. А҆ дерза́ющїе нарꙋша́ти сїѐ постановле́нїе, каки́мъ бы то̀ ни бы́ло ѻ҆́бразомъ, и҆ неподчинѧ́ющїесѧ своемꙋ̀ є҆пі́скопꙋ, а҆́ще бꙋ́дꙋтъ кли́рїки, да подлежа́тъ наказа́нїѧмъ по пра́виламъ: а҆́ще же мона́шествꙋющїе, и҆лѝ мїрѧ́не, да бꙋ́дꙋтъ ѿлꙋчены̀ ѿ ѡ҆бще́нїѧ церко́внагѡ.
Пра́вило ѳ҃.
А҆́ще кото́рый кли́рїкъ съ кли́рїкомъ же и҆мѣ́етъ сꙋ́дное дѣ́ло: да не ѡ҆ставлѧ́етъ своегѡ̀ є҆пі́скопа, и҆ да не перебѣга́етъ къ свѣ́тскимъ сꙋди́лищамъ. Но сперва̀ да произво́дитъ своѐ дѣ́ло ᲂу҆ своегѡ̀ є҆пі́скопа, и҆лѝ, по и҆зволе́нїю тогѡ́же є҆пі́скопа, и҆́збранные ѻ҆бѣ́ими сторона́ми да соста́вѧтъ сꙋ́дъ. А҆ кто̀ вопрекѝ семꙋ̀ постꙋ́питъ: да подлежи́тъ наказа́нїѧмъ по пра́виламъ. А҆́ще же кли́рїкъ со свои́мъ, и҆лѝ со и҆ны́мъ є҆пі́скопомъ и҆мѣ́етъ сꙋ́дное дѣ́ло: да сꙋ́дитсѧ въ ѻ҆́бластномъ собо́рѣ. А҆́ще же на митрополі́та ѻ҆́бласти є҆пі́скопъ, и҆лѝ кли́рїкъ, и҆мѣ́етъ неꙋдово́льствїе: да ѡ҆браща́етсѧ и҆лѝ къ є҆ѯа́рхꙋ вели́кїѧ ѻ҆́бласти, и҆лѝ къ престо́лꙋ ца́рствꙋющагѡ кѡнстантїнопо́лѧ, и҆ пред̾ ни́мъ да сꙋ́дитсѧ.
Пра́вило і҃.
Не дозволѧ́етсѧ кли́рїкꙋ въ ѻ҆дно̀ и҆ то́жде вре́мѧ чи́слитисѧ въ це́рквахъ двꙋ́хъ градѡ́въ, си́рѣчь въ то́й, къ кото́рой ѻ҆́нъ нача́льнѡ рꙋкоположе́нъ, и҆ въ то́й, къ кото́рой переше́лъ, ꙗ҆́кѡ бо́льшей, и҆з̾ жела́нїѧ сꙋ́етной сла́вы. Творѧ́щихъ же сїѐ возвраща́ти къ со́бственной и҆́хъ це́ркви, къ кото́рой нача́льнѡ рꙋкополо́жены, и҆ та́мъ то́кмѡ и҆̀мъ слꙋжи́ти. А҆́ще же кто̀ ѿ ѻ҆дно́й це́ркви въ дрꙋгꙋ́ю преведе́нъ: таковы́й да не и҆мѣ́етъ никако́гѡ ᲂу҆ча́стїѧ въ принадлежа́щемъ пре́жней це́ркви, ка́къ-то, въ зави́сѧщихъ ѿ неѧ̀ мꙋ́ченическихъ хра́махъ, и҆лѝ въ богадѣ́льнѧхъ, и҆лѝ въ страннопрїи́мныхъ дома́хъ. А҆ дерза́ющихъ, по́слѣ ѡ҆предѣле́нїѧ сегѡ̀ вели́кагѡ и҆ вселе́нскагѡ собо́ра, дѣ́лати что́ либо ны́нѣ воспреща́емое, свѧты́й собо́ръ ѡ҆предѣли́лъ низлага́ти съ и҆́хъ сте́пени.
Пра́вило а҃і.
Всѣ́мъ ᲂу҆бѡ́гимъ, и҆ вспоможе́нїѧ тре́бꙋющымъ, ѡ҆предѣли́ли мы̀, по ᲂу҆достовѣре́нїи въ и҆́хъ бѣ́дности, ходи́ти съ ми́рными то́кмѡ церко́вными пи́смами, а҆ не съ представи́тельными гра́матами. Поне́же представи́тєльныѧ гра̑маты надлежи́тъ дава́ти то́кмѡ ли́цамъ, находѧ́щымсѧ под̾ сомнѣ́нїемъ.
Пра́вило в҃і.
Дошло̀ до на́съ, ꙗ҆́кѡ нѣ́кїе, вопрекѝ церко́внымъ постановле́нїѧмъ, прибѣ́гнꙋвъ ко властѧ́мъ, посре́дствомъ прагматі́ческихъ гра́матъ, є҆ди́нꙋю ѻ҆́бласть на двѣ̀ разсѣ́кли, ꙗ҆́кѡ бы́ти ѿ сегѡ̀ во є҆ди́ной ѻ҆́бласти двꙋ́мъ митрополі́тамъ. Посемꙋ̀ ѡ҆предѣли́лъ свѧты́й собо́ръ, да ничто̀ таково́е твори́ти впре́дь не дерза́етъ є҆пі́скопъ. И҆́бо покꙋси́вшїйсѧ на то̀ низве́рженъ бꙋ́детъ со своегѡ̀ сте́пени. Гра́дъ же, кото́рый по ца́рскимъ гра́матамъ почте́нъ и҆менова́нїемъ митропо́лїи, є҆ди́ною че́стїю да дово́льствꙋетсѧ, та́къ ка́къ и҆ є҆пі́скопъ ᲂу҆правлѧ́ющїй є҆гѡ̀ це́рковїю, съ сохране́нїемъ со́бственныхъ пра́въ и҆́стинной митропо́лїи.
Пра́вило г҃і.
Кли́рїкамъ чꙋжы́мъ и҆ незна́ємымъ въ дрꙋго́мъ гра́дѣ, без̾ представи́тельной гра́маты со́бственнагѡ и҆́хъ є҆пⷭ҇кпа, ѿню́дь нигдѣ̀ не слꙋжи́ти.
Пра́вило д҃і.
Поне́же въ нѣ́которыхъ є҆па́рхїѧхъ позво́лено чтеца́мъ и҆ пѣвца́мъ встꙋпа́ти въ бра́къ: то ѡ҆предѣли́лъ свѧты́й собо́ръ, что́бы никомꙋ̀ и҆з̾ ни́хъ не бы́ло позво́лено бра́ти себѣ̀ въ женꙋ̀ и҆новѣ́рнꙋю: что́бы роди́вшїе ᲂу҆жѐ дѣте́й ѿ такова́гѡ бра́ка, и҆ пре́жде сегѡ̀ ᲂу҆жѐ крести́вшїе и҆̀хъ ᲂу҆ є҆ретїкѡ́въ, приводи́ли и҆̀хъ къ ѡ҆бще́нїю съ каѳолі́ческою це́рковїю: а҆ не крести́вшїе не моглѝ крести́ти и҆̀хъ ᲂу҆ є҆ретїкѡ́въ, ни совокꙋплѧ́ти бра́комъ съ є҆ретїко́мъ, и҆лѝ і҆ꙋде́емъ, и҆лѝ ꙗ҆зы́чникомъ: ра́звѣ въ тако́мъ то́кмѡ слꙋ́чаѣ, когда̀ лицѐ, сочетава́ющеесѧ съ правосла́внымъ лице́мъ, ѡ҆бѣща́етъ прейтѝ въ правосла́внꙋю вѣ́рꙋ. А҆ кто̀ престꙋ́питъ сїѐ ѡ҆предѣле́нїе ст҃а́гѡ собо́ра: то́тъ да подлежи́тъ є҆пїтїмїѝ по пра́виламъ.
Пра́вило є҃і.
Въ дїаконі́ссы поставлѧ́ти женꙋ̀, не пре́жде четы́редесѧти лѣ́тъ во́зраста, и҆ прито́мъ по тща́тельномъ и҆спыта́нїи. А҆́ще же прїѧ́вши рꙋкоположе́нїе, и҆ пребы́вши нѣ́которое вре́мѧ въ слꙋже́нїи, встꙋ́питъ въ бра́къ: такова́ѧ, ка́къ ѡ҆скорби́вшаѧ благода́ть бж҃їю, да бꙋ́детъ предана̀ а҆на́ѳемѣ, вмѣ́стѣ съ тѣ́мъ, кто̀ совокꙋпи́лсѧ съ не́ю.
Пра́вило ѕ҃і.
Дѣ́вѣ, посвѧти́вшей себѧ̀ гдⷭ҇ꙋ бг҃ꙋ, ра́внѡ и҆ мона́шествꙋющымъ, не позволѧ́етсѧ встꙋпа́ти въ бра́къ. А҆́ще же ѡ҆брѣтꙋ́тсѧ творѧ́щїи сїѐ: да бꙋ́дꙋтъ лишены̀ ѡ҆бще́нїѧ церко́внагѡ. Впро́чемъ ѡ҆предѣли́ли мы̀ мѣ́стномꙋ є҆пі́скопꙋ и҆мѣ́ти по́лнꙋю вла́сть въ ѡ҆каза́нїи таковы̑мъ человѣколю́бїѧ.
Пра́вило з҃і.
По ка́ждой є҆па́рхїи, въ се́лахъ, и҆лѝ предгра́дїѧхъ сꙋ́щїе прихо́ды, должны̀ неизмѣ́ннѡ пребыва́ти под̾ вла́стїю завѣ́дывающихъ ѻ҆́ными є҆пі́скопѡвъ: и҆ наипа́че, а҆́ще, въ продолже́нїй три́десѧти лѣ́тъ, безспо́рнѡ и҆мѣ́ли ѻ҆́ные въ свое́мъ вѣ́дѣнїи и҆ ᲂу҆правле́нїи. А҆́ще же не да́лѣе три́десѧти лѣ́тъ бы́лъ, и҆лѝ бꙋ́детъ ѡ҆ ни́хъ како́й спо́ръ: то да бꙋ́детъ позво́лено почита́ющымъ себѧ̀ ѡ҆би́женными, нача́ти ѡ҆ то́мъ дѣ́ло пред̾ ѻ҆бластны́мъ собо́ромъ. А҆́ще же кто̀ бꙋ́детъ ѡ҆би́женъ ѿ своегѡ̀ митрополі́та: да сꙋ́дитсѧ пред̾ є҆ѯа́рхомъ вели́кїѧ ѻ҆́бласти, и҆лѝ пред̾ кѡнстантїнопо́льскимъ престо́ломъ, ꙗ҆́коже рече́но вы́ше. Но а҆́ще ца́рскою вла́стїю вно́вь ᲂу҆стро́енъ, и҆лѝ впре́дь ᲂу҆стро́енъ бꙋ́детъ гра́дъ: то распредѣле́нїе церко́вныхъ прихо́дѡвъ да послѣ́дꙋетъ гражда́нскомꙋ и҆ зе́мскомꙋ порѧ́дкꙋ.
Пра́вило и҃і.
Соꙋмы́шленїе, и҆лѝ составле́нїе ско́пища, а҆́ки престꙋпле́нїе, соверше́ннѡ воспрещено̀ и҆ внѣ́шними зако́нами: кольмѝ па́че до́лжно возбранѧ́ти въ цр҃кви бж҃їей, дабы̀ сегѡ̀ не бы́ло. А҆́ще ᲂу҆́бѡ нѣ́кїе и҆з̾ кли́ра, и҆лѝ мона́шествꙋющїе ѡ҆ка́жꙋтсѧ ѡ҆бѧзꙋ́ющими дрꙋ́гъ дрꙋ́га клѧ́твою, и҆лѝ стро́ющими ко́вы є҆пі́скопамъ, ли́бо свои́мъ соприче́тникамъ: совсѣ́мъ да бꙋ́дꙋтъ низве́ржены со своегѡ̀ сте́пени.
Пра́вило ѳ҃і.
Дошло̀ до слꙋ́ха на́шегѡ, что̀ въ ѻ҆бластѧ́хъ не быва́етъ, ᲂу҆становле́нныхъ пра́вилами, собо́рѡвъ є҆пі́скопѡвъ, и҆ ѿ сегѡ̀ мно́гїѧ церко́вныѧ дѣла̀, тре́бꙋющыѧ и҆справле́нїѧ, ѡ҆стаю́тсѧ въ небреже́нїи. Посемꙋ̀ ѡ҆предѣли́лъ свѧты́й собо́ръ, согла́снѡ съ пра́вилами свѧты́хъ ѻ҆тє́цъ, что́бы въ ка́ждой ѻ҆́бласти є҆пі́скопы два́жды въ годꙋ̀ собира́лисѧ во є҆ди́но, гдѣ̀ назна́читъ є҆пі́скопъ митропо́лїи, и҆ и҆справлѧ́ли всѐ, что̀ ѿкро́етсѧ. А҆ є҆пі́скопамъ, кото́рые не прїи́дꙋтъ на собо́ръ, хотѧ̀ нахо́дѧтсѧ въ свои́хъ гра́дахъ, и҆ прито́мъ пребыва́ютъ въ здра́вїи, и҆ свобо́дны ѿ всѧ́кагѡ неѡбходи́магѡ и҆ неѿло́жнагѡ занѧ́тїѧ, братолю́бнѡ сказа́ти сло́во преще́нїѧ.
Пра́вило к҃.
Кли́рїкамъ, ѡ҆предѣле́ннымъ къ це́ркви, не позволи́тельно, ка́къ ᲂу҆жѐ мы̀ постанови́ли, ѡ҆предѣлѧ́тисѧ къ це́ркви и҆на́гѡ гра́да: но должны̀ бы́ти дово́льными то́ю, въ кото́рой нача́льнѡ ᲂу҆досто́ены слꙋже́нїѧ, за и҆сключе́нїемъ тѣ́хъ то́кмѡ, ко́и, лиша́сь ѻ҆те́чества своегѡ̀, по нꙋ́ждѣ прешлѝ въ дрꙋгꙋ́ю це́рковь. А҆́ще же кото́рый є҆пі́скопъ, по́слѣ ѡ҆предѣле́нїѧ сегѡ̀, прїи́метъ кли́рїка принадлежа́щаго дрꙋго́мꙋ є҆пі́скопꙋ: то сꙋждено̀ на́ми бы́ти внѣ̀ ѡ҆бще́нїѧ церко́внагѡ и҆ прїѧ́томꙋ, и҆ прїѧ́вшемꙋ, доко́лѣ переше́дшїй кли́рїкъ не возврати́тсѧ во свою̀ це́рковь.
Пра́вило к҃а.
Ѿ кли́рїкѡвъ, и҆лѝ мїрѧ́нъ, доносѧ́щихъ на є҆пі́скопѡвъ, и҆лѝ на кли́рїкѡвъ, не принима́ти доно́са про́стѡ и҆ без̾ и҆зслѣ́дованїѧ: но предвари́тельнѡ и҆звѣ́дывати ѻ҆бще́ственное ѡ҆ ни́хъ мнѣ́нїе.
Пра́вило к҃в.
Не позволѧ́етсѧ кли́рїкамъ, по сме́рти своегѡ̀ є҆пі́скопа расхища́ти вє́щи є҆мꙋ̀ принадлежа́вшыѧ, ка́къ сїѐ воспрещено̀ и҆ дре́вними пра́вилами. Творѧ́щїи же сїѐ подверга́ютсѧ ѻ҆па́сности низложе́нными бы́ти со своегѡ̀ сте́пени.
Пра́вило к҃г.
Дошло̀ до слꙋ́ха свѧта́гѡ собо́ра, что̀ нѣ́которые и҆з̾ кли́ра и҆ мона́шествꙋющїе, не и҆мѣ́ѧ никаки́хъ порꙋче́нїй ѿ своегѡ̀ є҆пі́скопа, а҆ и҆ны́е, да́же бы́въ ѿлꙋчены̀ и҆́мъ ѿ ѡ҆бще́нїѧ церко́внагѡ, прихо́дѧтъ въ ца́рствꙋющїй гра́дъ кѡнстантїнопо́ль, и҆ въ ѻ҆́номъ до́лгѡ жи́тельствꙋютъ, творѧ̀ смѧтє́нїѧ, и҆ нарꙋша́ѧ церко́вное ᲂу҆стро́йство, и҆ да́же до́мы нѣ́которыхъ разстро́иваютъ. Тогѡ̀ ра́ди ѡ҆предѣли́лъ свѧты́й собо́ръ: во пе́рвыхъ, посре́дствомъ є҆кді́ка свѧтѣ́йшїѧ кѡнстантїнопо́льскїѧ цр҃кви, напомина́ти и҆̀мъ, да ᲂу҆далѧ́тсѧ и҆з̾ ца́рствꙋющагѡ гра́да. А҆́ще же безсты́днѡ продолжа́ти бꙋ́дꙋтъ тѣ́ же дѣла̀: то ᲂу҆далѧ́ти и҆̀хъ и҆з̾ ѻ҆́нагѡ и҆ нево́лею, посре́дствомъ тогѡ́ же є҆кді́ка, и҆ возвраща́ти къ свои́мъ мѣста́мъ.
Пра́вило к҃д.
Е҆ди́ножды ѡ҆свѧщє́ннымъ, по и҆зволе́нїю є҆пі́скопа, монастырѧ́мъ пребыва́ти монастырѧ́ми навсегда̀: принадлежа́щыѧ и҆̀мъ вє́щи сохранѧ́ти, и҆ впре́дь не бы́ти ѻ҆́нымъ мїрски́ми жили́щами. Попꙋска́ющїе же семꙋ̀ бы́ти, да подлежа́тъ наказа́нїѧмъ по пра́виламъ.
Пра́вило к҃є.
Поели́кꙋ нѣ́которые митрополі́ты, ꙗ҆́коже на́мъ содѣ́лалось гла́снымъ, небрегꙋ́тъ ѡ҆ ввѣ́ренныхъ и҆̀мъ па́ствахъ, и҆ ѿлага́ютъ поставле́нїе є҆пі́скопѡвъ: тогѡ̀ ра́ди ѡ҆предѣли́лъ свѧты́й собо́ръ, что́бы поставлє́нїѧ є҆пі́скопѡвъ соверша́емы бы́ли въ продолже́нїи тре́хъ мѣ́сѧцєвъ: ра́звѣ неизбѣ́жнаѧ нꙋ́жда заста́витъ продли́ти вре́мѧ ѿлага́тельства. Не творѧ́щїй сегѡ̀ подлежи́тъ церко́вной є҆пїтїмїѝ. Междꙋ̀ тѣ́мъ дохо́ды вдо́вствꙋющїѧ це́ркви да сохранѧ́ютсѧ въ цѣ́лости и҆коно́момъ є҆ѧ̀.
Пра́вило к҃ѕ.
Поели́кꙋ въ нѣ́которыхъ це́рквахъ, ꙗ҆́коже на́мъ содѣ́лалось гла́снымъ, є҆пі́скопы ᲂу҆правлѧ́ютъ церко́внымъ и҆мꙋ́ществомъ без̾ и҆коно́мѡвъ: тогѡ̀ ра́ди разсꙋждено̀ всѧ́кой це́ркви, и҆мѣ́ющей є҆пі́скопа, и҆мѣ́ти и҆з̾ со́бственнагѡ кли́ра и҆коно́ма, кото́рый бы распорѧжа́лъ церко́внымъ и҆мꙋ́ществомъ, по во́лѣ своегѡ̀ є҆пі́скопа: дабы̀ домострои́тельство церко́вное не без̾ свидѣ́телей бы́ло, дабы̀ ѿ сегѡ̀ не расточа́лосѧ є҆ѧ̀ и҆мꙋ́щество, и҆ дабы̀ не па́дало нарека́нїѧ на свѧще́нство. А҆́ще же кто̀ сегѡ̀ не ᲂу҆чини́тъ: таковы́й пови́ненъ бж҃е́ственнымъ пра́виламъ.
Пра́вило к҃з.
Похища́ющихъ же́нъ длѧ сꙋпрꙋ́жества и҆лѝ содѣ́йствꙋющихъ, и҆лѝ соизволѧ́ющихъ похити́телѧмъ, свѧты́й собо́ръ ѡ҆предѣли́лъ: а҆́ще бꙋ́дꙋтъ кли́рїки, низлага́ти со сте́пени и҆́хъ: а҆́ще же мїрѧ́не, предава́ти а҆на́ѳемѣ.
Пра́вило к҃и.
Во все́мъ послѣ́дꙋѧ ѡ҆предѣле́нїѧмъ свѧты́хъ ѻ҆тє́цъ, и҆ признава́ѧ чи́танное ны́нѣ пра́вило ста̀ пѧти́десѧти бг҃олюбе́знѣйшихъ є҆пі́скопѡвъ, бы́вшихъ въ собо́рѣ во днѝ благочести́выѧ па́мѧти ѳеодо́сїѧ, въ ца́рствꙋющемъ гра́дѣ кѡнстантїнопо́лѣ, но́вомъ ри́мѣ, то́жде са́мое и҆ мы̀ ѡ҆предѣлѧ́емъ и҆ постановлѧ́емъ ѡ҆ преимꙋ́ществахъ свѧтѣ́йшїѧ це́ркви тогѡ́жде кѡнстантїнопо́лѧ, но́вагѡ ри́ма. И҆́бо престо́лꙋ ве́тхагѡ ри́ма ѻ҆тцы̀ прили́чнѡ да́ли преимꙋ́щєства: поели́кꙋ то̀ бы́лъ ца́рствꙋющїй гра́дъ. Слѣ́дꙋѧ томꙋ́ же побꙋжде́нїю и҆ сто̀ пѧтьдесѧ́тъ бг҃олюбе́знѣйшїе є҆пі́скопы, предоста́вили ра́вныѧ преимꙋ́щєства свѧтѣ́йшемꙋ престо́лꙋ но́вагѡ ри́ма, пра́веднѡ разсꙋди́въ, да гра́дъ, полꙋчи́вшїй че́сть бы́ти гра́домъ царѧ̀ и҆ сѷгкли́та, и҆ и҆мѣ́ющїй ра́вныѧ преимꙋ́щєства съ ве́тхимъ ца́рственнымъ ри́момъ, и҆ въ церко́вныхъ дѣла́хъ возвели́ченъ бꙋ́детъ подо́бнѡ томꙋ̀, и҆ бꙋ́детъ вторы́й по не́мъ. Посемꙋ̀ то́кмѡ митрополі́ты ѻ҆́бластей, понті́йскїѧ, а҆сі́йскїѧ и҆ ѳракі́йскїѧ, и҆ та́кожде є҆пі́скопы ᲂу҆ и҆ноплеме́нникѡвъ вышерече́нныхъ ѻ҆́бластей, да поставлѧ́ютсѧ ѿ вышерече́ннагѡ свѧтѣ́йшагѡ престо́ла свѧтѣ́йшїѧ кѡнстантїнопо́льскїѧ цр҃кви: си́рѣчь, ка́ждый митрополі́тъ вышепомѧ́нꙋтыхъ ѻ҆́бластей, съ є҆пі́скопами ѻ҆́бласти, должны̀ поставлѧ́ти є҆пархїа́льныхъ є҆пі́скопѡвъ, ка́къ предпи́сано бж҃е́ственными пра́вилами. А҆ са́мые митрополі́ты вышеꙋпомѧ́нꙋтыхъ ѻ҆́бластей должны̀ поставлѧ́емы бы́ти, ка́къ рече́но, кѡнстантїнопо́льскимъ а҆рхїепі́скопомъ, по ᲂу҆чине́нїи согла́снагѡ, по ѻ҆бы́чаю, и҆збра́нїѧ, и҆ по представле́нїи є҆мꙋ̀ ѻ҆́нагѡ.
Пра́вило к҃ѳ.
Е҆пі́скопа низводи́ти на пресвѵ́терскїй сте́пень є҆́сть свѧтота́тство. А҆́ще же нѣ́каѧ пра́веднаѧ вина̀ ѿстранѧ́етъ є҆го̀ ѿ є҆пі́скопскагѡ дѣ́йства: то не до́лженъ ѻ҆́нъ занима́ти и҆ пресвѵ́терскагѡ мѣ́ста. Но а҆́ще без̾ всѧ́кїѧ вины̀ ѿстране́нъ ѿ своегѡ̀ досто́инства: то да бꙋ́детъ возстановле́нъ въ досто́инство є҆пі́скопства.
Пра́вило л҃.
Поели́кꙋ благоговѣ́йнѣйшїе є҆пі́скопы є҆гѵ́петскїе ѿложи́ли, въ настоѧ́щее вре́мѧ, подписа́ти посла́нїе свѧтѣ́йшагѡ а҆рхїепі́скопа льва̀, не а҆́ки бы проти́вѧсѧ каѳолі́ческой вѣ́рѣ, но представлѧ́ѧ сꙋществꙋ́ющїй въ є҆гѵ́петской ѻ҆́бласти ѻ҆бы́чай, ничегѡ̀ такова́гѡ не дѣ́лати без̾ соизволе́нїѧ и҆ ѡ҆предѣле́нїѧ своегѡ̀ а҆рхїепі́скопа, и҆ про́сѧтъ ѿсро́чити и҆̀мъ до поставле́нїѧ бꙋ́дꙋщагѡ є҆пі́скопа вели́кагѡ гра́да а҆леѯандрі́и: тогѡ̀ ра́ди за пра́ведное и҆ человѣколю́бное дѣ́ло призна́ли мы̀, ѡ҆ста́вити и҆̀хъ въ свое́мъ са́нѣ въ ца́рствꙋющемъ гра́дѣ, и҆ да́ти и҆̀мъ сро́чное вре́мѧ до поставле́нїѧ а҆рхїепі́скопа вели́кагѡ гра́да а҆леѯандрі́и. Посемꙋ̀, пребыва́ѧ въ свое́мъ са́нѣ, и҆лѝ да предста́вѧтъ порꙋчи́телей, а҆́ще возмо́жно и҆̀мъ сїѐ, и҆лѝ клѧ́твеннымъ ѡ҆бѣща́нїемъ да ѿвратѧ́тъ сомнѣ́нїе.
Свѧты́е ѻ҆тцы̀ пѧ́тагѡ вселе́нскагѡ собо́ра, собра́вшїесѧ въ кѡнстантїнопо́лѣ преимꙋ́щественнѡ длѧ ᲂу҆твержде́нїѧ халкидо́нскагѡ вселе́нскагѡ четве́ртагѡ собо́ра, ѻ҆со́бенныхъ пра́вилъ, ѿносѧ́щихсѧ къ благочи́нїю церко́вномꙋ, не соста́вили, ка́къ сїѐ ꙗ҆́вствꙋетъ и҆з̾ втора́гѡ пра́вила шеста́гѡ вселе́нскагѡ собо́ра, въ ко́емъ, при ᲂу҆каза́нїи на пра̑вила про́чихъ свѧты́хъ собо́рѡвъ, ѡ҆ пра́вилахъ пѧ́тагѡ вселе́нскагѡ собо́ра не ᲂу҆помина́етсѧ.