Канѡ̑ны, си́рѣчь кни́га пра́вилъ/Сѷмво́лы вѣ́ры

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

Пра̑вила свѧты́хъ а҆по́столѡвъ, свѧты́хъ собо́рѡвъ вселе́нскихъ и҆ помѣ́стныхъ, и҆ свѧты́хъ ѻ҆те́цъ Сѷмво́лъ вѣ́ры

Пра̑вила свѧты́хъ а҆по́стѡлъ→

This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.

Кни́га пра́вилъ свѧты́хъ а҆по́столѡвъ,
свѧты́хъ собо́рѡвъ
вселе́нскихъ и҆ помѣ́стныхъ,
и҆ свѧты́хъ ѻ҆те́цъ

Сѷмво́лъ вѣ́ры
тре́хъ сѡ́тъ ѻ҆смина́десѧти ст҃ы́хъ ѻ҆тє́цъ
пе́рвагѡ вселе́нскагѡ собо́ра, нїке́йскагѡ.

Вѣ́рꙋемъ во є҆ди́наго бг҃а ѻ҆ц҃а̀, вседержи́телѧ, творца̀ всѣ́хъ ви́димыхъ и҆ неви́димыхъ. И҆ во є҆ди́наго гдⷭ҇а і҆и҃са хрⷭ҇та̀, сн҃а бж҃їѧ, є҆диноро́днаго, рожде́ннаго ѿ ѻ҆ц҃а̀, то́ є҆сть, и҆з̾ сꙋ́щности ѻ҆ц҃а̀, бг҃а ѿ бг҃а, свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша, ꙗ҆̀же на небесѝ и҆ на землѝ: на́съ ра́ди человѣ̑къ и҆ на́шегѡ ра́ди спасе́нїѧ сше́дшаго, и҆ воплоти́вшасѧ и҆ вочеловѣ́чшасѧ, страда́вша, и҆ воскре́сшаго въ тре́тїй де́нь, и҆ возше́дшаго на небеса̀, и҆ сѣдѧ́ща ѡ҆деснꙋ́ю ѻ҆ц҃а̀, и҆ па́ки грѧдꙋ́щаго сꙋди́ти живы̑мъ и҆ мє́ртвымъ. И҆ во ст҃а́го дх҃а. Глаго́лющихъ же ѡ҆ сн҃ѣ бж҃їемъ, ꙗ҆́кѡ бы́сть вре́мѧ, є҆гда̀ не бѣ̀, и҆лѝ ꙗ҆́кѡ пре́жде не́же роди́тисѧ, не бѣ̀, и҆лѝ ꙗ҆́кѡ ѿ не сꙋ́щихъ бы́сть, и҆лѝ и҆з̾ и҆ны́ѧ ѵ҆поста́си и҆лѝ сꙋ́щности глаго́лющихъ бы́ти, и҆лѝ преврати́ма и҆лѝ и҆змѣнѧ́ема сн҃а бж҃їѧ, си́хъ а҆наѳема́тствꙋетъ каѳолі́ческаѧ и҆ а҆по́стольскаѧ цр҃ковь.

Сѷмво́лъ вѣ́ры
ста̀ пѧти́десѧти ст҃ы́хъ ѻ҆тє́цъ
втора́гѡ вселе́нскагѡ собо́ра, кѡнстантїнопо́льскагѡ.

Вѣ́рꙋемъ во є҆ди́наго бг҃а ѻ҆ц҃а̀, вседержи́телѧ, творца̀ не́бꙋ и҆ землѝ, ви̑димымъ же всѣ́мъ и҆ неви̑димымъ. И҆ во є҆ди́наго гдⷭ҇а і҆и҃са хрⷭ҇та̀, сн҃а бж҃їѧ, є҆диноро́днаго, и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ: свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша: на́съ ра́ди человѣ̑къ, и҆ на́шегѡ ра́ди спасе́нїѧ сше́дшаго съ небе́съ, и҆ воплоти́вшагосѧ ѿ дх҃а ст҃а и҆ мр҃і́и дв҃ы, и҆ вочеловѣ́чшасѧ: распѧ́таго же за ны̀ при понті́йстѣмъ пїла́тѣ, и҆ страда́вша, и҆ погребе́нна: и҆ воскре́сшаго въ тре́тїй де́нь по писа́нїємъ: и҆ возше́дшаго на небеса̀, и҆ сѣдѧ́ща ѡ҆деснꙋ́ю ѻ҆ц҃а̀: и҆ па́ки грѧдꙋ́щаго со сла́вою сꙋди́ти живы̑мъ и҆ мє́ртвымъ, є҆гѡ́же ца́рствїю не бꙋ́детъ конца̀. И҆ въ дх҃а ст҃а́го, гдⷭ҇а, животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима, глаго́лавшаго прⷪ҇ро́ки. Во є҆ди́нꙋ свѧтꙋ́ю, собо́рнꙋю и҆ а҆по́стольскꙋю цр҃ковь. И҆сповѣ́дꙋемъ є҆ди́но креще́нїе во ѡ҆ставле́нїе грѣхѡ́въ. Ча́емъ воскресе́нїѧ ме́ртвыхъ, и҆ жи́зни бꙋ́дꙋщагѡ вѣ́ка. А҆ми́нь.

Догма́тъ
шестѝ сѡ́тъ три́десѧти ст҃ы́хъ ѻ҆тє́цъ
четве́ртагѡ вселе́нскагѡ собо́ра, халкидо́нскагѡ.

Ѡ҆ двꙋ́хъ є҆стества́хъ во є҆ди́номъ лицѣ̀ гдⷭ҇а на́шегѡ і҆и҃са хрⷭ҇та̀.

Послѣ́дꙋюще бж҃е́ствєннымъ ѻ҆тцє́мъ, всѣ̀ є҆диногла́снѡ поꙋча́емъ и҆сповѣ́дывати є҆ди́наго и҆ того́жде сн҃а, гдⷭ҇а на́шего і҆и҃са хрⷭ҇та̀, соверше́нна въ бж҃ествѣ̀ и҆ соверше́нна въ чл҃вѣ́чествѣ: и҆́стиннѡ бг҃а и҆ и҆́стиннѡ чл҃вѣ́ка, того́жде и҆з̾ дꙋшѝ и҆ тѣ́ла: є҆диносꙋ́щна ѻ҆ц҃ꙋ̀ по бж҃ествꙋ̀, и҆ є҆диносꙋ́щна того́жде на́мъ по чл҃вѣ́чествꙋ: по всемꙋ̀ на́мъ подо́бна, кромѣ̀ грѣха̀: рожде́нна пре́жде вѣ̑къ ѿ ѻ҆ц҃а̀ по бж҃ествꙋ̀, въ послѣ́днїе же днѝ того́жде, ра́ди на́съ и҆ ра́ди на́шегѡ спасе́нїѧ, ѿ мр҃і́и дв҃ы бг҃оро́дицы, по чл҃вѣ́чествꙋ: є҆ди́наго и҆ того́жде хрⷭ҇та̀, сн҃а, гдⷭ҇а, є҆диноро́днаго, во двꙋ́хъ є҆стества́хъ несли́тнѡ, неизмѣ́ннѡ, нераздѣ́льнѡ, неразлꙋ́чнѡ познава́емаго, [ника́коже разли́чїю двꙋ́хъ є҆сте́ствъ потреблѧ́емꙋ соедине́нїемъ, па́че же сохранѧ́емꙋ сво́йствꙋ коегѡ́ждо є҆стества̀, во є҆ди́но лицѐ и҆ во є҆ди́нꙋ ѵ҆поста́сь совокꙋплѧ́емагѡ:] не на два̀ лица̀ разсѣка́емаго и҆лѝ раздѣлѧ́емаго, но є҆ди́наго и҆ того́жде сн҃а, и҆ є҆диноро́днаго бг҃а сло́ва, гдⷭ҇а і҆и҃са хрⷭ҇та̀, ꙗ҆́коже дре́вле прⷪ҇ро́цы ѡ҆ не́мъ, и҆ ꙗ҆́коже са́мъ гдⷭ҇ь і҆и҃съ хрⷭ҇то́съ наꙋчѝ на́съ, и҆ ꙗ҆́коже предадѐ на́мъ сѷмво́лъ ѻ҆тє́цъ на́шихъ.

Догма́тъ
ста̀ седми́десѧти ст҃ы́хъ ѻ҆тє́цъ
шеста́гѡ вселе́нскагѡ собо́ра, кѡнстантїнопо́льскагѡ.

Ѡ҆ двꙋ́хъ во́лѧхъ и҆ дѣ́йствїѧхъ въ гдⷭ҇ѣ на́шемъ і҆и҃сѣ хрⷭ҇тѣ̀.

И҆ двѣ̀ є҆сте́ствєнныѧ вѡ́ли и҆лѝ хотѣ̑нїѧ въ не́мъ, и҆ два̀ є҆сте́ствєнныѧ дѣ́йствїѧ, неразлꙋ́чнѡ, неизмѣ́ннѡ, нераздѣ́льнѡ, неслїѧ́ннѡ, по ᲂу҆че́нїю ст҃ы́хъ ѻ҆тє́цъ на́шихъ, та́кожде проповѣ́дꙋемъ: два́ же є҆сте́ствєнныѧ хотѣ́нїѧ не проти̑вныѧ, да не бꙋ́детъ, ꙗ҆́коже нечести́вїи є҆ретїцы̀ реко́ша, но є҆гѡ̀ человѣ́ческое хотѣ́нїе, послѣ́дꙋющее, и҆ не противостоѧ́щее, и҆лѝ противобо́рствꙋющее, па́че же и҆ подчинѧ́ющеесѧ є҆гѡ̀ бж҃е́ственномꙋ и҆ всемогꙋ́щемꙋ хотѣ́нїю.

Догма́тъ
тре́хъ сѡ́тъ шести́десѧти седмѝ ст҃ы́хъ ѻ҆тє́цъ
седма́гѡ вселе́нскагѡ собо́ра, нїке́йскагѡ.

Ѡ҆ і҆кѡнопочита́нїи.

Храни́мъ не нововво́днѡ всѣ̀, писа́нїемъ, и҆лѝ без̾ писа́нїѧ ᲂу҆стано́влєнныѧ длѧ на́съ церкѡ́вныѧ преда̑нїѧ, ѿ ни́хъ же є҆ди́но є҆́сть і҆кѡ́ннагѡ живописа́нїѧ и҆зѡбраже́нїе, ꙗ҆́кѡ повѣствова́нїю є҆ѵа́нгельскїѧ про́повѣди согласꙋ́ющее, и҆ слꙋжа́щее на́мъ ко ᲂу҆вѣре́нїю и҆́стиннагѡ, а҆ не воѡбража́емагѡ воплоще́нїѧ бг҃а сло́ва, и҆ къ подо́бной по́льзѣ. Ꙗ҆̀же бо є҆ди́но дрꙋги́мъ ᲂу҆казꙋ́ютсѧ, несомнѣ́ннѡ є҆ди́но дрꙋги́мъ ᲂу҆ѧснѧ́ютсѧ. Си́мъ та́кѡ сꙋ́щымъ, а҆́ки ца́рскимъ пꙋте́мъ ше́ствꙋюще, послѣ́дꙋюще бг҃оглаго́ливомꙋ ᲂу҆че́нїю ст҃ы́хъ ѻ҆тє́цъ на́шихъ и҆ преда́нїю каѳолі́ческїѧ цр҃кве, [вѣ́мы бо, ꙗ҆́кѡ сїѧ̀ є҆́сть дх҃а ст҃а́гѡ въ не́й живꙋ́щагѡ,] со всѧ́кою достовѣ́рностїю и҆ тща́тельнымъ разсмотрѣ́нїемъ ѡ҆предѣлѧ́емъ: подо́бнѡ и҆зѡбраже́нїю чⷭ҇тна́гѡ и҆ животворѧ́щагѡ крⷭ҇та̀, полага́ти во ст҃ы́хъ бж҃їихъ цр҃квахъ, на сщ҃е́нныхъ сосꙋ́дахъ и҆ ѻ҆де́ждахъ, на стѣна́хъ и҆ на дска́хъ, въ дома́хъ и҆ на пꙋтѧ́хъ, чⷭ҇тны̑ѧ и҆ ст҃ы̑ѧ і҆кѡ́ны, напи̑санныѧ кра́сками и҆ и҆з̾ дро́бныхъ ка́менїй и҆ и҆з̾ дрꙋга́гѡ спосо́бнагѡ къ томꙋ̀ вещества̀ ᲂу҆строѧ́ємыѧ, ꙗ҆́коже і҆кѡ́ны гдⷭ҇а и҆ бг҃а и҆ сп҃са на́шегѡ і҆и҃са хрⷭ҇та̀, и҆ непоро́чныѧ влⷣчцы на́шеѧ ст҃ы́ѧ бг҃оро́дицы, та́кожде и҆ чⷭ҇тны́хъ а҆́гг҃лѡвъ, и҆ всѣ́хъ ст҃ы́хъ и҆ прпⷣбныхъ мꙋже́й. Е҆ли́кѡ бо ча́стѡ чрез̾ и҆зѡбраже́нїе на і҆кѡ́нахъ ви́димы быва́ютъ, потоли́кꙋ взира́ющїи на ѻ҆́ныѧ подвиза́емы быва́ютъ воспомина́ти и҆ люби́ти первоѻбра́зныхъ и҆̀мъ, и҆ че́ствовати и҆̀хъ лобыза́нїемъ и҆ почита́тельнымъ поклоне́нїемъ, не и҆́стиннымъ, по вѣ́рѣ на́шей, бг҃опоклоне́нїемъ, є҆́же подоба́етъ є҆ди́номꙋ бж҃ескомꙋ є҆стествꙋ̀, но почита́нїемъ по томꙋ̀ ѻ҆́бразꙋ, ꙗ҆́коже и҆зѡбраже́нїю чⷭ҇тна́гѡ и҆ животворѧ́щагѡ крⷭ҇та̀ и҆ ст҃о́мꙋ є҆ѵⷢ҇лїю и҆ про́чымъ ст҃ы́нѧмъ, ѳѷмїа́момъ и҆ поставле́нїемъ свѣще́й че́сть воздае́тсѧ, ꙗ҆ковы́й и҆ ᲂу҆ дре́внихъ бл҃гоче́стный ѻ҆бы́чай бы́лъ. И҆́бо че́сть воздава́емаѧ ѻ҆́бразꙋ прехо́дитъ къ первоѻбра́зномꙋ, и҆ покланѧ́ющїйсѧ і҆кѡ́нѣ, покланѧ́етсѧ сꙋществꙋ̀ и҆зѡбраже́ннагѡ на не́й. Та́кѡ бо ᲂу҆твержда́етсѧ ᲂу҆че́нїе ст҃ы́хъ ѻ҆тє́цъ на́шихъ, сі́есть, преда́нїе каѳолі́ческїѧ цр҃кве, ѿ конє́цъ до конє́цъ землѝ прїѧ́вшїѧ є҆ѵⷢ҇лїе.