Капитан ныл (Пушкин)/1
| ← Йыръянэз | Капитан ныл I люкетэз. Гварди сержант Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
II люкетэз. Сюрес возьматӥсь → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 3—10. |
Гварди сержант
Ӵуказе ик со гвардиын луысал.
«Соиз кулэ ӧвӧл: армиын мед служить кароз
Туж умой верамын! Ойдо мед куректоз».
...... .....
Бен кин солэн бубыез?
Княжнин.
Бубые мынам, Андрей Петрович Гринёв, егит дыръяз Миних граф дорын служить кариз. 17… арын со премьер-майор чинэн отставкае потӥз. Со дырысен со аслаз симбирской гуртаз улӥз но отын ик начаргес дворянлэн нылыныз Ю… Авдотья Васильевнаен кышнояськиз. Соослэн нылпиоссы ми укмыс кузя вал. Мынам братъёсы но сузэръёсы пичиысен ик ваньзы кулӥзы.
Милемлы туж матысь родня луись гварди майорлэн, В. князьлэн, юртскемезъя, мон Семёновской полке сержантэ гожтэмын вал. Дышетсконме быдтытозям, мон отпускын лыдъяськылӥ. Соку дыръя милемыз али сямен ӧз дышетылэ. Вить арес луэм берам ик, монэ Савельич стремянной ки улэ сётӥзы. Юытэк, сазь улэмез понна, со мыным дядькае пуктэмын вал. Со дышетэмъя мон дас кык арескысен ӟуч сямен дышетсконэз ӧжыт валасько вал ини. Айы пунылэн сямъёсыз сярысь но зол ик йӧндырисько вал. Соку мынам бубые монэ дышетыны французэз, мосье Бопреез, медъяз. Сое Москваысь арлы тырмымон винаен но прованской вӧйын ӵош выписать каризы. Солэн вуэмез Савельичлы туж ӧз яра. «Инмарлы тау, — нургетылӥз со ас понназ, — пиналмы миськемын, сынамын, сюдэмын но кадь. Малы мултэс коньдон быдтыса мусьёез медъяны кулэ луиз, асьмелэн калыкмы ӧвӧл ке, шат!»
Бопре аслаз отечествояз парикмахер вал, собере Пруссиын салдатын вал, собере, дышетӥсь кариськыны малпаса (дышетӥсь шуон кылэз умой-умой уг ке но вала вал), Россие лыктӥз. Со лякыт адями вал, нош соин ӵош ик дурыстэм калгись но беспутной. Тужгес ик со нылкышноос азьын ассэ ачиз возьыны, кортнаны уг быгаты вал. Аслаз мусояськемъёсыз понна ӵем дыръя солэн кӧтурдэсъёсаз но шедьылӥз, вӧсь луэменыз берло со нунал лумбыт ӝуштылӥз. Собере, солэн аслаз кылъёсыныз вераса, со бутылкалы но тушмон ӧй вал, мукет сямен верано ке, мултэссэ юыны яратылӥз. Нош милям ӟеч винаосты ӝӧк сьӧрын сиськон дыръя гинэ удыло вал, нош дышетӥсьлы соку но уг сётыло вал, соин ик мынам Бопрее туж ӝог ӟуч настойкаез юыны дышиз, дышем гинэ ӧвӧл, ас французской винаосыз сярысь умоенгес лыдъяны кутскиз, туж, пе, кӧтпушлы пайда сётэ. Ми соин куспамы соку ик тупамы. Договоръя со монэ француз сямен, немец сямен но пӧртэм наукаослы дышетыны кутскемын вал, нош со ачиз мынэсьтым ӟуч сямен тяпыртыны дышетсконо кариськиз но, собере ми кыкнамы ик, нимаз-нимаз кариськыса, ас ужъёсмы борды кутским. Куспамы ми соин туж тупаса улӥм. Мукетсэ дышетӥсез мон кулэ но уг кариськы вал. Озьы ке но, малпамтэ шорысь, милемлы соин ӝоген люкиськоно луиз. Тани мар бордысен та люкиськонмы потӥз:
Одӥг пол Палаша нимо прачка, зӧк мугоро, шадра бамо ныл, искал утисен палсинмо Акулькаен куспазы кенешыса, асьсэлэн лябзы сярысь но соосты, улонэз валасьтэм муртъёсты, мусьё пӧям сярысь бӧрдыса, мемилэн пыд вылаз йыбыртыса ӝожкиллям. Мынам мемие сыӵе ужъёсын шудыны уг яраты вал, со сярысь со соку ик бубилы верам. Бубые нош, кема ик чаклатэк, французэз, канальяез, ас дораз ӧтиз. Мусьё монэ дышетэ шуыса, солы вераллям. Бубые мынам комнатаям лыктӥз. Со пырон дыръя Бопре, номре янгышсэ чаклатэк, ас кровать вылаз изе вал. Мон ас ужме ужасько вал. Сое но верано луоз на: мыным дышетскыны понна, Москваысь географической карта выписать каремын вал. Токма пайдатэк борд бордын ошыса улэмезлы но, ӟеч, паськыт лисо бумагаезлы мон туж кемалась синмаськыса улӥсько вал ини. Бопрелэн умме усем сьӧркытӥз, мон та географической картаез змей лэсьтыны кутски. Ӵапак мон Доброй Надежда мыс борды бун быж думыкум, комнатаям бубы пыриз. Мынэсьтым география бордын ужамме адӟыса, бубы монэ пельтӥм кыскиз, Бопре доры лыктыса, сое лек куараен сайкатӥз но куаретыны кутскиз. Паймем Бопре султыны малпа вал но ӧз быгаты: шудтэм французэ, шӧй кадь, кудӟемын вал. Сизьым куректон — одӥг пол кыл кутон. Бубы сое, чырты бертӥз кутыса, кровать вылысь ӝутӥз, донгаса ӧс сьӧры поттӥз но со нуналэ ик прочсэ улляз. Французэз уллямезлы Савельиче вераны луонтэм шумпотӥз. Тӥни озьы мынам дышетсконэ но быриз.
Мон, дыдыкъёсты улляса но дворовой пиналъёсын чехардаен шудыса, шузи-мази улӥ. Озьы мыным дас куать арес но тырмиз. Соку мынам улон-вылон азь воштӥськиз.
Одӥг пол сӥзьыл мемие гостиннойын чечыез варення пӧзьтэ вал, нош мон, кылме нюлыса, пӧзись варення шукы шоры учкисько. Бубые укно дорын Придворной календарез лыдӟе. Та календарез со арлы быдэ басьяз, лыдӟыны туж яратылӥз. Та книга солэсь мылкыдзэ прочсэ воштэ вал: выльысь кутскыса лыдӟыкуз но, со туж мылкыдаськыса лыдӟылӥз. Со книгаез лыдӟемезлы быдэ солэн сэпез бугырске вал. Мемие солэсь сыӵе сямъёссэ тодыса, та кулэтэм книгаез котьку ик кытчы ке пыдлогес, шедьтонтэм интые ватыны тыршылӥз. Озьы тӥни Придворной календарь быдэс толэзен бубылэн син азяз ӧз шедьылы. Со понна, бубы книгазэ куке-соку, малпамтэ шорысь, ки улаз шедьтэ ке, быдэс часын лыдӟыса пуке вал, киысьтыз но уг ни куштылы. Тӥни озьы, бубые Придворной календарез лыдӟыса пуке, дырын-дырын пельпумъёссэ шымыръяса каллен шыпыртэ: «Генерал-поручик!.. Со мынам ротаям сержант вал!.. Кыкнаизлэн ик российской орденъёслэн кавалерез!.. Нош кемалась-а ми…» Собере бубы календарзэ диван вылэ сэрпалтӥз но, номре ӟечсэ сӥзисьтэм малпаськонэ выйиз.
— Авдотья Васильевна, Петрушкамылы кӧня арес ини? — малпамтэ шорысь мемилэсь юаз со.
— Бен, дас сизьыметӥзэ мынэ ини, — вера меми. — Настасья Герасимовна кенаке палсин луон арын вордскиз Петрушамы, соку эшшо…
— Яралоз, — веранзэ куспетӥ кариз бубы, — сое службае сётыны дыр вуэмын ини. Тырмоз ни солы нылъёс котыртӥ бызьылыны но сигъёсысь дыдык каръёсы тубаны.
Яратоно пиеныз ӝоген люкиськоно луэмлэсь кышкаса, меми пуньызэ ик кастрюлькае уськытӥз, бамтӥз синвуэз вияны ӧдъяз. Нош мон — вераны луонтэм шумпотӥ. Служба сярысь малпанъёсы мынам ас эркам улон сярысь малпанъёсын, Петербургын шулдыр улон сярысь малпанъёсын огъя сурасько. Мон асме ачим гварди офицерен чакласько ни. Мынам малпамея, адямилы солэсь бадӟым шуд ик луоно ӧвӧл кадь.
Мынам бубые ас малпамъёссэ вошъяны но, кема азелы быдэстытэк кельтыны но уг яраты вал. Мыным гуртысь потон нунал но тупатэмын вал. Кошкон нуналэ азьын бубы, мынам начальник луоноелы гожтэт гожтыны малпасько шуыса, бумага но перо куриз.
— Б. князьлы мынам нимыным но салам вераса гожтыны эн вунэты, Андрей Петрович, — шуиз меми. — Петрушаез со уз аналты, ӟеч карытэк уз кельты шуыса, мынам оскеме сярысь гожты.
— Мар кулэтэмез зулиськод! — вожез потыса вераз бубы. — Мар муген мон Б. князьлы гожтэт гожто?
— Бен, тон ачид Петрушалэн начальникезлы гожтэт гожто шуид ук!
— Ну, собере мар?
— Бен, Петрушамылэн начальникез Б. князь луэ ук. Веть Петрушамы Семёновской полке гожтэмын.
— Гожтэмын! Гожтэмын ке, мынам мар уже? Петруша Петербурге уз мыны. Петербургын служить карыса малы со дышоз? юмшаны но коньдон быдтыны? Уг, уг лэзьы Петербурге. Армиын мед служить кароз, арми службалэсь секытсэ мед шӧмъялоз, порох зынэз мед зынъялоз, шаматон кадь медаз лу, салдат мед луоз. Гожтэмын гвардие! Кытын солэн пашпортэз? вай сое татчы.
Мемие пашпортме шкатулкаысьтыз, монэ черкын пыртэм дэрем пушкысь шедьтыса, куалекъясь киосыныз бубылы сётӥз. Бубы, пашпортме умой-умой лыдӟыса, азяз ӝӧк вылэ понӥз но ас гожтэтсэ гожъяны кутскиз.
Мынам туж тодэме потэ: Петербурге ке уг ысто, кытчы меда ысто монэ? Бубыелэн каллен ӵабъясь перо шораз синъёсме вошъятэк учкисько. Гожъяса-гожъяса со гожтэтсэ быдэстӥз, сое пашпортэн ӵош пакетэ запечатать кариз, очкизэ басьтӥз но, монэ дораз ӧтьыса, тазьы шуиз: «Тани тыныд гожтэт, сое Р. Андрей Карловичлы, мынам кемалась дырысен яратоно эшелы сётод. Тон Оренбурге мынод, отын служить карод, со тынад начальникед луоз».
Озьыен, мынам вань шулдыр малпамъёсы куашкало! Шулдыр Петербургской улон интые, кыдёкын, пеймыт сэрегъёсын мӧзмыт улон вите вылэм. Одӥг минут талэсь азьвыл, шумпотыса малпан служба табере мыным секыт, шудтэм улонэн адске ини. Нош ваменъяськыны пайда ӧвӧл. Ӵуказеяз ӵукна сюрес вылэ потон кибиткаез корка азе вайыса, отчы чемоданъёс, чай юон котыръёс, булка но пирожкиен бинетъёс но мукет сыӵе гуртын улон-вылонлэсь ческытъёссэ тыризы. Бубыен меми монэ благословить каризы. Бубы мыным тазьы шуиз: «Ӟеч лу, Пётр. Кинлы присяга сётӥд, солы умой служить кар; начальстволэсь кылскылы; соослэсь ӟеч каремзэс, ушъямзэс гинэ эн вить; службае ачид эн куриськылы, службалэсь но эн пыкиськылы; таӵе мадез но тодад вайыса возь: дӥськуттэ выль дыръяз утялты, нош ас дандэ егит дыръяд». Меми нош бӧрдон куспытӥз ас тазалыкме возьманы косэ. Савельичлы монэ золгес эскерыны наказ сётэ. Мон вылам кечку тулуп дӥсяса, вылаз нош ӟичыку шуба дӥсяй на. Савельичен артэ кибиткае пукси но, синвуосын пыласькыса, сюрес вылэ потӥ.
Со уе ик мон Симбирске вуи. Пӧртэм кулэ котыръёс басьтон понна мынам татчы сутка ӵожелы дугдылоно вал. Басьяськон ужъёс Савельичлы сётэмын вал. Мон трактире дугдӥ. Савельич ӵукна ик лавкаосы басьяськыны потӥз. Укноетӥ дэриесь проулкае учкыны акыльтыса, мон трактирлэн мукет висэтъёстӥз калгыны кутски. Озьы висъетысь висъетэ ветлонъям, биллиардное пырыны шедьтӥ но, ог куамын вить аресъем, ӝужыт мугоро, кузь но сьӧд мыйыко баринэз адӟи. Вылаз солэн халат дӥсямын, кияз биллиардэн шудон боды (кий), ымаз трубка. Со маркёрен шудэ вал. Шудыны соос тазьы вераськиллям: маркёр утэ ке, соку со баринлэсь одӥг рюмка вина юэ, нош келя ке, ньыльпыдъяськыса биллиард улэ пыроно луэ. Мон соослэсь шудэмзэс учкыны кутски. Пумен шудэмзыя, маркёр ньыльпыдъяськыса биллиард улэ туж ӵем пыраны кутскиз но, бервылаз прочсэ биллиард улэ кылиз. Со азьын барин, кулэм муртэз ватон дыръя сямен, кӧня ке маскаръяськиз но монэ шудыны ӧтиз. Шудыны уг быгатӥськы шуыса, мон пыкиськи. Мынам шудыны быгатымтэелы со абдраз кадь. Со мон шоры жаляса кадь учкиз; озьы ке но, ми куспамы вераськыны кутским. Сое Иван Иванович Зурин нимало шуыса, мон тодӥ. ** гусарской полкысь ротмистр луыса, со Симбирскын, рекрутъёсты басьтон бордын служить каре но, кунокаын трактирын улэ шуыса тодӥ. Зурин монэ, мар ке инмар сётэм, сое, солдатъёс сямен, ӵош сиыны-юыны ӧтиз. Мон мылысь-кыдысь соглаш луи. Ми ӝӧк сьӧры пуксим. Зурин данак гинэ юэ, монэ но секта, служить карыны дышоно шуэ. Со мыным армейской мадёнъёсты маде, соосты кылзӥськыса, мон пограмон серекъясько. Озьы ӝӧк сьӧрысь ми туж матысь эшъёс луыса потӥм. Собере со монэ биллиардэн шудонлы дышетыны ӵектӥськиз. «Асьме кадь служащойёслы туж кулэ маке, — шуэ со. — Кылсярысь, походын кыӵе ке местечкае вуод. Мар карыны косод? Веть ялан жидъёсты жугыса уд улы. Амалтэк трактире мынод но, биллиардэн шудыны кутскод; нош со понна шудыны быгатоно!» Мон, та кылъёслэн шонерзылы оскыса, биллиардэн шудонлы дышетскыны мылысь-кыдысь кутски. Дышетсконлэн ӝог азьланьскемезлы абдраса, Зурин монэ ушъя. Озьы кӧня ке урок ортчыса, со коньдонэн шудыны ӵектӥз, келямлы быдэ грошен, утон-келян понна ӧвӧл, — шуиз со, — коньдонтэк шудон самой урод сям, пе. Мон талы пумит ӧй кариськы. Зурин пунш куриз но, монэ шӧмъяны косӥз, службалы, пе, тыныд дышоно, пунштэк нош мар служба, пе, луоз! Мон солэсь кылски. Со куспын нош шудонмы ялан азьлань кошке. Пумен ӵемгес стаканысьтым пуншме шӧмъяса, мон чупыресгес, кышкатэк шудыны кутски. Минутлы быдэ мынам шаръёсы борт сьӧры тэтчыло, мон лекъяськисько, маркёрез куаретӥсько, умойтэм лыдъямезлы, часысен часэ шудэмелэсь лыдзэ будэтэмезлы йыркуръяськисько, огъя вераса, кыре мозмем пичи пи кадь вырисько. Шудон куспын дырлэсь ортчемзэ но шӧдыны уг лу. Зурин час шоры учкиз но, шудон бодызэ биллиард вылэ поныса, тон сю манет келяд шуыса, мыным ялӥз. Та кылъёсыз солэн монэ ӧжыт паймытӥзы. Коньдонэ мынам Савельич киын вал. Мон извиняться кариськыны кутски. Зурин монэ куспетӥ кариз: «Помилуй! Мар сюлмаськонэз. Мон витьыны но быгато, нош али айда-ко Аринушка доры мыном».
Мар шуоды? Нуналэз мон кызьы ке умойтэм кутски, озьы ик быдтӥ. Ӝыт сиськонмес ми Аринушка дорын ортчытӥм. Зурин мыным минутлы быдэ вина лэзьылэ, службалы дышыны кулэ, шуэ. Ӝӧк сьӧрысь султэм бере мон мырдэм пыд йылам сылӥсько на. Уйшор котырын Зурин ачиз монэ трактире келяз.
Савельич милемыз корказьын пумитаз. Мынэсьтым службалы дышетскемме но, нокытчы ватонтэм тусбуйме адӟыса, со ах! гинэ шуыны быгатӥз на. «Мар-о тыныд, сударь, таӵе луиз? — чигиськем куараен вазиз со, — кытын тон та мында юыны шедьтӥд? Ох ты, господи! вордскем дырысеныд таӵе сьӧлыке шедьылэмед ӧй на вал!» — «Эн куареты, хрыч! — мон солы пумитаз могӟылыса вазисько, — тон кудӟемын дыр, мын изьыны… монэ эн выдты».
Ӵуказеяз ӵукна мон йыры висьыса султӥ. Толло ужъёсме вӧтам кадь гинэ тодӥсько на. Малпаськонме Савельич висъяз, со мон доры, чашка чай вайыса, пыриз. «Вазь, Пётр Андреич, вазь гулять карыны кутскиськод, — йырзэ сэзъяса, мыным вазиз со. — Кин выжые гинэ тон мынэмын? Бубыед но бубаед но пьяницаос ӧй вал: нэнэед сярысь веранэз ик ӧвӧл; вордскем дырысеныз, сюкасез сяна, ымаз но ӧз понылы. Кин вань таӵе урод ужъёслы виноват? Каргам мусьё. Со ялан Антипьевна доры мыноз но: — „Мадам, же ву при, водкю“ — шуоз вал. Вот тыныд же ву при! Мар веранэз: ӟеч ужлы дышетӥз, пуны пи. Малы кулэ вал сыӵе бусурманэз тыныд дядькае медъяны! Баринлэн аслаз калыкез ӧй вал ке, шат!»
Мыным туж возьыт луиз, мышкин кариськыса, мон солы шуи: «Кошкы татысь, Савельич, мыным чай кулэ ӧвӧл». Нош проповедьзэ лыдӟыны кутскыкуз, Савельичез дугдытыны шуг вал. Сыӵе сямъёсыз солэн азьвыл ик тодмо вал ини. «Адӟиськод-а, Пётр Андреич, кыӵе гулять каремлэн пайдаез. Йырыдлы но секыт, сиемед но уг поты. Юись адями номырлы ярантэм адями… Ме али, огреч рассолэз чечыен сураса ю, яке пичильтык стаканэн вина ке юысал, солэсь но ӟеч макмыред веськасал. Косод шат вайыны?»
Со куспын пичи пи пыриз но И. И. Зуринлэсь гожтэтсэ мыным сётӥз. Гожтэтсэ басьтыса лыдӟи но отын тазьы гожтэмын:
«Гажано Пётр Андреевич, толон келям сю манет коньдондэ мынам пие сьӧры али ик пожалуйста ысты. Мон туж коньдонлы ёрмыса улӥсько.
Юртскыны дась луыса
Иван Зурин».
Номыре но уд кары. Шуге-леке вуэмме шараятэк, нош Савельич шоры вазисько, лыктэм адямилы сю манет сётыны косӥсько. Со угось мынам коньдонлы но, дӥськутлы но, мукет ужъёсылы но попечитель. «Кызьы! малы?» — абдраса юа Савельич. «Тыронэ вань», — шуисько мон солы, пӧсекъямме шараятэк. «Тыронэд вань! — пумитам вазе Савельич ялан паймыса, — бен тон, сударь, ку сыӵе пунэмаськыны вуид? Мар ке но татын умойтэм уж. Котьма кар, сударь, коньдонэз мон уг сётӥськы».
Та пересьлэсь ваменэс сямзэ таӵе пӧсь дыръя куасалтытэк кельтӥд ке, отӥяз солэн опека улысьтыз потыны уд ни быгаты шуыса, малпай мон ас поннам но со шоры чурыт учкыса шуи: «Мон тынад господинэд, тон мынам слугае. Коньдонэ мынам. Мон сое шудыса келяй, потому што мынам озьы кареме потӥз. Трос эн тодӥсьяськы, астэ визьмоен возьматыса эн ул, маке косо, сое лэсьты!»
Таӵе кылъёсылы паймыса, Савельич, бубые сямен, чапкиськиз но, юбо кадь, сылэ. «Мар, бен, тон сылӥськод?» — лек черетски со шоры. Савельиче бӧрдыны кутскиз. «Батюшка, Пётр Андреич, — куалектэм куараеныз вазиз со, — куректытыса эн виы монэ. Югыт дуннее тон мынам! кылзӥськы мынэсьтым, пересьлэсь, гожты со разбойниклы, мон лӧптӥ гинэ, милям со быдӟа коньдонмы ноку ӧй вал, шуыса. Сю манет! Остэ инмаре кылдысинэ! Бубы-мемие кедра мульыен сяна номырин но шудыны ӧз лэзе шуыса гожты солы…» — «Тырмоз пӧялляськыны, — лек куараен дугдытӥ сое, — вай татчы коньдонэз, а то мон тонэ чырты сьӧрад донгаса улляло».
Савельич мон шоры туж ӝож синъёсын учкиз но тыронме вайыны потӥз. Куанер пересь мыным жаль потӥз ке но, мынам асме пиналысь бадӟыме потэмме но, опека улысь мозмытскемме возьматэме потӥз. Коньдонме Зуринлы всё-таки вуттӥзы. Савельичлэн та юриськем трактирын улыны сюлмыз уг ни чида, ӝоггес татысь кошкыны дыртэ. Со пыриз но, валъёс дасямын ини шуыса ялӥз. Возьыт мылкыдэн, асме ачим куаретыса, мон Симбирскысь кошки. Дышетӥсеным но проститься ӧй кары, ноку но соин уг ни адскы шуыса малпай.