Капитан ныл (Пушкин)/13
| ← XII люкетэз. Сирота | Капитан ныл XIII люкетэз. Арест Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
XIV люкетэз. Суд → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 89—95. |
Арест
Вождэ эн вай, сударь: мынам долгея
Али ик мон тонэ
Келяно луисько тюрьмае.
— Келялэ, мон дась: нош мон оскисько,
Келямлэсь азьло уж сярысь вераны лэзёды.
Княжнин
Туннэ ӵукна гинэ курадӟымон сюлмаськем мусо нылын малпамтэ шорысь кусыпмес герӟам бере, сыӵе ужлэн луэмезлы, мон аслым ачим но уг оскиськы, ваньмыз со уйвӧтын адӟем кадь потэ. Марья Ивановна, туж мур малпаськыса, либо мон шоры, либо сюрес вылэ учкылэ, мар луэмзэ пыр-поч валаса уг вуылы на кадь. Ми ум вераськиське. Милям сюлэмъёсмы туж жадемын вал. Озьы ог кык час ортчыса, ми дырлэсь ортчемзэ шӧдытэк, матысь крепосте вуим. Та крепость Пугачёвлэн ик ки улаз луэ. Татын ми валъёсмес воштӥм. Валъёсты туж ӝог кыткемзэс но бадӟым тушо казаклэн, Пугачёвен пуктэм комендантлэн, ми котырамы куалектыса котьмарлы юрттыны, котьмар косэмез быдэстыны дась луэмзэ адӟыса, милемыз Пугачёвлэн юрттӥсь муртэз кожаса пумитамзэс валай. Со милемыз вайись ямщик озьы супыльтэм вылэм.
Ми азьлань кошким. Куазь ӝомыт луыны кутскиз. Ми пичи городлы матын ини. Бадӟым тушо комендантлэн верамезъя, та городын Пугачёвлы юрттыны мынӥсь туж кужмо отряд дугдэмын, пе. Милемыз караульнойёс дугдытӥзы. «Кин лыктэ?» — шуыса юамзылы пумит ямщик зол куараен вера: «Государьлэн кумез аслаз кышноеныз». Малпамтэ шорысь, милемыз, туж юн даллашыса, гусаръёс котыртӥзы. «Пот, беслэн кумез! — шуиз мыным кузь мыйыко вахмистр. — Ӝоген тыныд хозяйкаеныд валче пӧсь мунчо луоз!»
Мон кибиткаысьтым потӥ но, монэ соослэн начальниксы доры келяны косӥсько. Офицер луэмме адӟыса, салдатъёс даллашемысь дугдӥзы. Вахмистр монэ майор доры нуиз. Савельич мон бордысьтым уг кыльы, ялан ас понназ супыльтэ: «Вот тыныд государьлэн кумез! Ляб тылысь лек тылэ… Господи владыко! маин гинэ быроз ини вань та ужмы?» Кибитка ми бӧрсьы вамышен мынэ.
Вить минут куспын ми туж яркыт югдӥсь корка доры вуим. Вахмистр монэ караул ки улэ кельтӥз но мон сярысь вераны кошкиз. Со соку ик берен берытскиз но его высокоблагородилэн монэн вераськыны дырыз ӧвӧл, со монэ тюрьмае келяны косӥз, нош хозяйкаме ас дораз пыртыны косӥз шуыса, мыным вераз.
— Мар сыӵе та луэ? — ортчыт воже потыса, кеськи мон. — Ма со визьтэммиз-а мар-а?
— Уг тодскы, ваше благородие, — пумитам вахмистр вазе. — Только его высокоблагородие ваше благородиез тюрьмае келяны косӥз, нош её благородиез его высокоблагородие доры вайыны косӥз, ваше благородие!
Мон бызьыса корказе туби. Караульнойёс монэ дугдытыны уг но малпало. Мон шонерак комнатае пыри, отын ог куать кузя гусарской офицеръёс картаен шудо вал. Банксэс майор возе. Кыӵе мон абдрай со шоры учкыса: мон Иван Иваныч Зуринэз тодмай; куке соку симбирской трактирын шудыкумы мынэсьтым со утэм вал.
— Зэм-а? — кеськи мон. — Иван Иваныч! Тон-а?
— Ба, ба, ба, Пётр Андреич! Мар адӟонэн? Кытысь тон? Ӟечбур, брат. Картаен шудыны мылкыдыд ӧвӧл-а?
— Тау. Тон лучше мыным кунока сётыны кос вал.
— Кыӵе кунока тыныд? Кыль татчы мон дорам.
— Уг быгатӥськы: мон огнам ӧвӧл.
— Иське, эштэ но татчы ик вай.
— Мон эшеным ӧвӧл; мон… дамаен.
— Дамаен! Кытысь, бен, тон сое конгыртӥд? Эге, брат! — (Та кылъёссэ веракуз, Зурин шултӥз но, ваньзы серекъяны кутскизы, мон нош чылкак сураськи.)
— Ну, — шуэ Зурин, — так и быть. Кунока тыныд луоз. А жаль… Асьмеос азьвыл сямен юысалмы… Гей! малой! Нош малы Пугачёвлэсь кумушказэ (кумазэ) татчы уг ваё? ваменъяське шат со? Верано солы, медаз кышка: баринмы, пе, туж ӟеч, уз ултӥя; чырты бераз солэн золгес сётъяно.
— Мар тон сыӵе? — шуи мон Зуринлы. — Кытын Пугачёвлэн кумаез? Покойной капитанлэн, Мироновлэн, нылыз со. Мон сое пленысь поттӥ но табере бубыелэн гуртаз келясько, отчы ик сое кельто.
— Кызьы! Иське тон сярысь мыным али веразы? Помилуй! мар бен та таӵе?
— Берло ваньзэ верало. Нош али, ради бога, кызьы ке но тон гусаръёсыныд кышкатэм куанер нылэз буйгаты.
Зурин соку ик распорядиться кариз. Малпамтэ шорысь пӧяськем улэ шедим шуыса, Марья Ивановна азьын извиниться карыны со ачиз ульчае потӥз. Собере городысь самой ӟечсэ кунокаез Марья Ивановналы сётыны косыса, вахмистрлы вераз. Мон со доры кӧлыны кыли.
Ми ӝытсэ сиським но, кык ӵошен кылеммы бере, мон солы аслэсьтым ортчем ужъёсме мади. Мадемме Зурин туж сак кариськыса кылскиз. Веранме быдтэм берам, со, йырзэ сэзъяса, тазьы шуиз: «Ваньмыз со, брат, умой; одӥгез гинэ умойтэм: малы тонэ чорт кышнояськыны косэ? Мон честной офицер, тонэ пӧяме уг поты: оскы тон мыным, кышнояськон со — шузимон. Я, тыныд-а кышно котырын берган но пиналъёсты утялтыны? Сялӟы. Кылзӥськы мынэсьтым: мозмытскы тон капитанлэн нылыз бордысь. Симбирске сюресэз мон сузяй, отчы мыныны кышкытэз ӧвӧл. Келя сое огназэ ӵуказе ик аслад мумы-бубыед доры но ачид мынам отрядам кыль. Оренбурге берытскыны тыныд немалы. Нош ик бунтовщикъёслэн ки улазы шедид ке, соос бордысь ӟечкын уд ни мозмы, дыр. Тӥни озьы, гажанэн визьтэммемед но пумен ас сяменаз ачиз ортчоз но ваньмыз умой луоз».
Солэн вераменыз мон быдэсак уг ке но тупатскиськы вал, нош шӧдӥсько: мынам сӥ-данэлэн косэмезъя, мыным али императрицалэн войскаяз луыны кулэ. Мон Зуринлэн визь-кенешезъя кариськи: Марья Ивановнаез огназэ гуртэ ыстыны, аслым Зуринлэн отрядаз кыльыны.
Савельич монэ кыльыны лыктӥз. Ӵуказе ик со Марья Ивановнаен ӵош сюрес вылэ потыны дась мед луоз шуыса, мон солы верай. Со пумитъяськыны кутскем вал. «Мар тон, сударь? Кызьы мон тонэ огнадэ кельтом? Кин тон бӧрсяд ветлоз? Мар шуозы тынад бубыед, мумыед?»
Дядькалэсь ваменэс сямъёссэ тодыса, мон сое небыт кылъёсын но сюлэме пырымон кылъёсын буйгатыны кариськи. «Друге тон мынам, Архип Савельич! — шуи мон солы. — Лэсьты мыным ӟеч уж, быдэсты куремме. Татын мыным прислуга кулэ уз лу, нош Марья Ивановна сюрес вылэ тонтэк ке потӥз, мон пыр сюлмаськыса уло. Солы служить карыса тон, мыным служить кариськод, малы ке шуид, дыръёс ӧжыт умойгес луизы ке, мон соин одно кышноясько».
Соку Савельиче, вераны луонтэм паймем тусын киосыныз чапкиськиз.
— Кышнояськыны! — шуиз со. — Пинал мурт кышнояськыны ӧдъя! Нош бубыед мар шуоз, мумид мар малпалоз?
— Марья Ивановнаез умойгес тодӥзы ке, соглаш луозы, зэм соглаш луозы, — шуисько мон солы. — Тыныд но мон оскисько. Буби но, муми но тыныд оско: тон ми пала дурбасьтӥсь луод, озьы-а?
Кылъёсы пересьлэн сюлмаз пыризы. «Ох тон, мынам батюшкае Пётр Андреич! — шуэ со. — Коть вазьгес ке но тон кышнояськыны малпаськод, со понна Марья Ивановна туж ӟеч сюлмо барышня, сыӵе оказиез киысь лэзьыны но сьӧлык. Иське тынад сямен ик мед луоз. Келяло мон сое, инмарлэсь ангелзэ, нош таӵе невесталы нокыӵе пирданъёс но кулэ ӧвӧл шуыса, бубы-мумыедлы ляльчи сюлмыным верало».
Мон Савельичлы тау кари но Зуринэн одӥг комнатае изьыны выдӥ. Мылкыд бугырскем пумысь мон чик дугдылытэк вераськисько. Зурин монэным нырысь мылыз потыса вераське вал, нош каллен-каллен солэн кылъёсыз шер но радтэм луыны кутскизы, бервылаз, мынам маке юамелы верам интые со шуласа соргетыны кутскиз. Мон вераськемысь дугдӥ но ӝоген умме уси.
Ӵуказеяз ӵукна мон Марья Ивановна доры лыктӥ. Мон солы ас малпамъёсме верай. Мынэсьтым малпамъёсме со визьмоен лыдъяз но соку ик монэным огкылысь луиз.
Зуринлэн отрядэз со нуналэ ик городысь потоно вал. Ӝегатскыны дыр ӧвӧл. Мон соку ик Марья Ивановнаен люкиськи, сое Савельичен кельтӥ, бубые-мумиелы гожтэм гожтэтме сётӥ. Марья Ивановна бӧрдыны кутскиз. «Ӟеч лу, Пётр Андреич! — шуиз со каллен куараен. — Кылдоз-а асьмелы адскыны, уз-а, одӥг инмар сое тодэ; нош тонэ кулытозям уг вунэты; шайгуэ пырытозям тон огнад мынам сюлэмам кылёд». Мон номре но вераны ӧй быгаты. Милемыз калыкъёс котыртӥзы. Соос азьын ас бугыръяськись мылкыдме шӧдытэме мынам ӧз поты. Со кошкиз. Мон Зурин доры мӧзмыт но вераськыны мылкыдтэм луыса берытски. Со монэ капчи мылкыдо карыны турттэ вал. Мон но асме ачим капчигес карыны малпасько: нуналэз ми шулдырен ортчытыса, ӝытпал походэ потӥм.
Февральлэн берло нуналъёсаз вал со. Воевать карон ужъёсты секыт карись толалтэ но пумен ортче ни. Милям генералъёсмы огкылысь кариськыса ожмаськыны дасясько. Пугачёв ялан Оренбург дорын сылэ на. Со куспын со котыре отрядъёс ялан огазеясько, злодейлэн пузкар котыраз котыр интыосысь отрядъёс лыктыло. Бунтовать карись гуртъёс, милесьтым войскаосмес адӟыса, уг ни пумитъясько; разбойникъёслэн шайкаоссы милесьтым пегӟыло. Котьмар ик ожмаськонлэсь ӝоген но ми пала пайдаен быремзэ возьматэ.
Ӝоген князь Голицын Татищев крепость дорын Пугачёвлэсь войсказэ вормиз, солэсь калыкъёссэ пазяз, Оренбургез мозмытӥз. Озьы бунтлы туж юн, берпум удар лэсьтӥз кадь. Соку дыръя Зурин ми адӟемлэсь азьло пазяськем, бугыръяськись башкирецъёслэн шайкаоссылы пумит ыстэмын вал. Тулыс куазь милемыз бигер гуртэ дугдытӥз. Шуръёс вуэн пачылскизы но сюресъёс ветлыны луонтэм луизы. Тэк улон дыръёсмес ми, та разбойникъёсын но дикаръёсын номырлы лэсянтэм мӧзмыт но чыры-пыры ожмаськон ӝоген быроз шуыса, буйгатскыса ортчытӥськом.
Нош Пугачёв кутэмын ӧй вал. Со сибирской заводъёсы вуэм. Отын выль шайкаос люказ но нош ик йыртэманы кутскиз. Солэн азин ужъёсыз сярысь иворъёс нош ик паськыт вӧлмизы. Сибырысь крепостьёсты разорить каремзы сярысь но кылӥм. Адӟем потостэм бунтовщиклэн кужымез лябӟонлы оскыса, номре ужтэк нырулыса улӥсь войсковой начальникъёс, самозванецен Казанез басьтэм сярысь но Москва вылэ походэн мынэмез сярысь иворъёс кылыса, куалектӥзы. Зурин Волга шур вамен выжыны приказ басьтӥз.
Милям походмы сярысь но войналэн быремез сярысь мон уг гожъя. Вакчияк сое гинэ верало: бугыръяськонлэн бервылыз чидантэм дорозь вуиз. Правлениос котькытын ик дугдытэмын вал; помещикъёс нюлэсъёсын ватскыса улӥзы. Разбойникъёслэн шайкаоссы котькытын йыртэмазы. Нимаз отрядъёссылэн начальникъёссы, ас тодэмзыя, наказать либо миловать карылӥзы. Туж паськыт улосын тылпу вӧлскемен, улон туж кышкыт вал… Инмар медаз кылдыты бессмысленной но беспощадной ӟуч бунтэз адӟыны!
Пугачёв пегӟиз, сое пытьыетӥз Иван Иванович Михельсон генерал уйыса мынӥз. Сое пумозяз ик быдтӥллям шуыса, ми ӝоген тодӥм. Ӧжыт улыса, самозванец кутэмын шуыса, Зурин ивор басьтӥз, соин ӵош ик солы азьлань мынэмысь дугдыны косэмын вал. Война быдтэмын вал. Табере мыным ас бубы-мумыосы доры но мыныны луоз ини. Марья Ивановналэсь мон нокыӵе иворзэ но ӧй на басья. Ӝоген соосты ӟыгыръян сярысь, Марья Ивановнаез адӟон сярысь малпан мынэсьтым мылкыдме шумпотонэн пачыл кариз. Мон, пичи мурт сямен, тэтчасько. Зурин серекъяса пельпумъёсыныз выретылӥз: «Уд, тон уд мозмы! Кышнояськод но ни за што бырод!»
Со куспын ик, мынэсьтым шумпотонме валантэм мылкыд курыт карыса возе: со мында виноваттэм калыклэн вирыныз наштаськем злодей сярысь, сое витись казнь сярысь малпанъёсы монэ мылпотэмелы пумит сюлмаськыто: «Емеля, Емеля! малы меда штык шоры тон ӧд бышкалскы, либо картеч шоры ӧд вадсаськы? — шуыса, мон малпасько. — Солэсь ӟечсэ тон аслыд номре но малпаны ӧй быгатысал». Мар карыны косоды? Со сярысь малпанъёсы мынам солэн кышкыт улон дыръёсаз монэ виемзылэсь мозмытэмез сярысь но, мынэсьтым невестаме жоб Швабринлэн ки улысьтыз мозмытэмез сярысь малпанъёсыным герӟаськемын.
Зурин мыным отпуск сётӥз. Кӧня ке нуналъёс ортчыса, мон нош аслам семьяе пӧлын луо, нош аслэсьтым Марья Ивановнаме адӟо… Малпамтэ шорысь, монэ гудыри ӵашйиз.
Ас гуртам кошкыны пусъем нуналам, ӵапак сюрес вылэ потыны дасяськем минутэ, мон доры, кияз бумага возьыса, туж мур малпаськись тусын Зурин пыриз. Мынам сюлмам маке бышкалтӥз кадь. Мон кышкай, малэсь кышкамме ачим но уг тодӥськы. Со мынэсьтым денщикме потыны косӥз но монэным вераськонэ вань шуыса ялӥз. «Мар сыӵе?» — юай мон сюлэм сэректыса. «Почи неприятность, — бумагазэ сётыса, шуиз со мыным. — Лыдӟы, мае мон али басьтӥ». Мон сое лыдӟыны кутски. Со секретной приказ вал. Вань нимаз начальникъёслы монэ — котькытын мон мед луом — арестовать карыны косэмын но, караул киулэ сётыса, чик ӝегатскытэк, Пугачёвлэн ужпумъёсызъя кылдытэм нимаз комиссие Казане келяны косэмын.
Мынам киысьтым бумагае ӧжыт гинэ ӧз усьы. «Номре но уд кар! — шуиз Зурин. — Приказэз санэ поныны службае монэ косэ. Тынад Пугачёвен эшласькыса улэмед сярысь иворъёс кызьы ке правительство доры вуизы дыр. Номре но тыныд уз дыр луы, комиссия тонэ шонере поттоз дыр шуыса оскисько. Эн куректы, мын». Мынам шеке ӧй вал, мон судлэсь уг кышкаськы; нош адсконлэсь шумпотон минутсэ кельтыны, оло нош трос толэзьёс ӵожелы бере кельтыны, тӥни со сярысь малпан монэ кышкатэ. Уробомы дась ини. Зурин монэным эш мылкыдэн люкиськиз. Монэ уробое пуктӥзы. Монэным артэ кык кузя гусаръёс пуртэсысьтызы поттэм сабляоссэс урдыса пуксизы но, мон бадӟым сюрес кузя кошки.