Капитан ныл (Пушкин)/8
| ← VII люкетэз. Крепостез басьтон | Капитан ныл VIII люкетэз. Ӧтьымтэ куно Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
IX люкетэз. Люкиськон → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 55—62. |
Ӧтьымтэ куно
Пословица
Площадь тырттэм кылиз. Сыӵе кышкытэсь ужъёсты адӟем бере, мон, аслэсьтым йырвизьме радаз вуттыны быгатытэк, ялан ог интыям сылӥсько.
Котьмарлэсь но трос Марья Ивановналы мар луэмез тодымтэе монэ курадӟытэ. Кытын со? Мар солы луэмын? Быгатӥз-а меда ватскыны? Оскымон-а ватскем интыез?.. Сыӵе кышкыт малпанъёсын мон комендантлэн корказ пыри… Котырак буш: ӝӧкъёс, пуконъёс, шыкысъёс ваньмыз тӥямын, посудаос сӧрылэмын, ваньмыз тус-тас каремын. Светлицае мынон тубат кузя мон туби но, вордскем дырысьтым нырысьсэ Марья Ивановналэн висъетаз пыри. Пырем берам ик, разбойникъёсын таргаса кельтэм валессэ адӟи. Шкапез тӥямын, отысь котырез грабить каремын. Тырттэм мудор азьын почи гинэ тылын лампадка ӝуа. Борддораз ошем синучконэз но исатэк кылемын… Нош та ныллэн улон интыысьтыз кузёез кытын? Туж кышкыт малпан пыриз мынам йырвизям: мон сое разбойникъёслэн ки улазы адӟисько кадь… Сюлэмы ик мынам ӝиптӥськиз… Мон туж курыт синвуэн бӧрдыны кутски но аслам гажанэлэсь нимзэ шара верай… Соку кинлэн ке лушкем выремез кылӥськиз но шкап сьӧрысь ӟаректэм но куалекъясь Палаша потӥз.
— Ой, Пётр Андреич! — чапкиськыса шуиз со. — Кыӵе нунал! Кыӵе кышкытэсь ужъёс!..
— Нош Марья Ивановна? — чидатэк юасько солэсь, — кытын Марья Ивановна?
— Барышнямы улэп, — шуиз Палаша. — Со Акулина Памфиловна доры ватэмын.
— Попадья дорын! — кеськи мон кышкаса. — Боже мой! Отын Пугачёв ук!..
Мон висъетысь бызьыса потӥ но, ульчае вуыса, ури-бери поплэн корказ бызисько, пыдулме но уг шӧдӥськы, номре но уг адӟиськы. Отын кесясько, серекъяло, пӧртэм гуръёсын кырӟало. Пугачёв ас эшъёсыныз юон ортчытэ. Палаша но отчы мон бӧрсьы ик лыктӥз. Лушкемен гинэ попадьяез, Акулина Памфиловнаез, ӧтьыны ыстӥ мон сое. Ог минут ортчыса, кияз тырттэм штоф возьыса, мон доры, корказе, попадья потӥз.
— Кытын Марья Ивановна? — вераны луонтэм кушетскыса, юай мон солэсь.
— Кылле, дыдые, мынам кровать вылам, тӥни отын, висъет сьӧрын, — попадья мыным вера. — Ну, Пётр Андреич, ӧжыт гинэ асьмеос беда улэ ӧм пачкалэ, нош инмарлы тау, умой гинэ ортчиз. Злодей сиськыны гинэ пуксем вал, соку мынам куанере, сазёмиз но ӝуштыны кутскиз… Мон быдэсак шуэктӥ. Со кылӥз: «Нош кин тынад отын ӝуштэ, пересь?» Мон ворлы йыбыртӥ: «Племянницае, государь; висе, кыктэтӥ арнязэ кылле ини». — «Нош племянницаед тынад егит-а?» — «Егит, государь». — «Я возьматы-ай мыным, пересь, ас племянницадэ». — Мынам сюлэмы ик тэтчиське вал, нош мар карод? — «Изволь, государь; только нылмы султыны уг быгаты, тынад милостед, лыктэмез уз лу». — «Ничего, пересь, мон ачим но мыныса учко». Веть окаянной, висъет сьӧры мынӥз; кызьы тон малпаськод! Веть занавессэ киыныз палэнтӥз но аслаз душеслэн кадь синъёсыныз шораз учкиз. Инмар утиз. Нош оскиськод-а, мон но мынам батькае туж курадӟыса кулонэз шедьтыны малпаськом вал ни. Шудэз шуод-а мар-а, мынам гыдые, ӧз тодма сое. Господи владыко, вуизы ук праздник нуналъёс! Мар веранэз. Куанер Иван Кузьмич! Кин гинэ малпа вал! Нош Василиса Егоровна? Нош Иван Игнатьич? Сое мар понна?.. Кызьы гинэ тонэ кельтӥзы? Нош Швабрин кыӵе, Алексей Иваныч? Веть йырсиоссэ котыр ӵышкем но табере ми дорын, соин ӵош ик, юыса пуке! Быгатэ гинэ, мар веранэз! Нош мон племянницае висе шуыса верай но, оскы коть эн, со, пуртэн пыр потымон бышкалтэм кадь, мон шоры учкиз; однако шарае ӧз потты, со понна но солы тау. — Со куспын кудӟем куноослэн черекъямзы но Герасим поплэн куараез кылӥськиз. Куноос вина куро, поп аслэсьтыз кышнозэ черекъя. Попадья сояз но таяз но вуыны дыртэ. — Мынэ ас дорады, Пётр Андреич, — шуиз со, — тӥледын йырин ӧвӧл ни али, злодейёс юыны кутскизы. Кудӟем ки улазы шедид марад ке, беда луоз. Ӟеч луэ, Пётр Андреич. Мар луоз, луоз ини, оло инмар уз кушты!
Попадья кошкиз. Кӧня ке буйгаса, мон ас кунокаям кошки. Площадь дортӥ ортчыкум, мон кӧня ке башкирецъёсты адӟи. Соос, ошон котыре люкаськыса, ошем муртъёслэсь сурон сапегъёссэс пыдъёсысьтызы кыскало. Мон ас йыркурме мырдэм возьыны быгатӥ, дурбасьтэмлэн пайдаез уз лу шуыса чаклай. Крепостетӥ разбойникъёс офицеръёслэсь кунокаоссэс грабить карыса бызьыло. Котькытын но юись мятежникъёслэн кесяськем куараоссы кылӥське. Мон кунокаям вуи. Савельич монэ ӧс кусып дорын ик пумитаз. «Инмарлы тау! — кеськиз со, монэ адӟыса. — Злодейёс нош тонэ кутӥзы дыр шуыса, малпасько вал. Ну, батюшка Пётр Андреич! Оскиськод-а? Мошенникъёс асьмелэсь ваньзэ грабить каризы: вылдӥсьёсты, улдӥсьёсты но, посудаез но, мукетсэ но — номре но ӧз кельтэ. Ӵок ини! Инмарлы тау, коть тонэ улэпен лэзизы! Нош тодмад-а тон, сударь, атаманзэс?»
— Ӧй, ӧй тодма. Нош кин со сыӵе?
— Кызьы, батюшка, ӧд тодма? Татчы лыктыкумы, пьяница сюресмуртэн пумиськыса, тон солы постоялой дворын тулуп сётэмдэ вунэтӥд, шат? Кечку тулуп чылкак выль кадь ик вал на; со нош, укултэм, сое, ас вылаз дӥсякуз, ӧз-а ӟезьы!
Мон абдрай. Зэмзэ ик сюрес вылын, сильтӧл дыръя йыромыкумы, пумитамы шедем сюресмурт но Пугачёв кадь ик вал. Пугачёв но, со сюресмурт но одӥг адями луо шуыса, табере мон оски. Малы ошемлэсь мозмытэмзэ но мон соку валай ини. Таӵе ужъёслэн куспазы герӟаськемзылы мон чылкак абдрай: бродягалы кузьмам пинал муртлэн тулупез монэ чыртыям понэм гозы кыӵлэсь мозмытэ, постоялой дворъёстӥ калгись пьяница крепостьёсты басьтылэ но быдэс государствоез сэзъя!
— Сиськемед уг-а поты? — ас дышем сямъёссэ утьыса, Савельич юа. — Гуртын номырмы ӧвӧл, мыныса утчало но тыныд марке со дасяло.
Огнам кылем бере, мон нош мур малпаськонъёсы уси. Мар мыным кароно вал? Злодейлэн власть улаз шедем крепосте кыльыны яке солэн шайкаез бӧрсьы мыныны офицерлы умойтэм. Отечествомылэн таӵе секыт улэ пачкамез дыръя кытын ке мынам службае тросгес пайдазэ сётоз, отчы кариськыны монэ долыге ӧте… Нош мынам гажан мылкыды Марья Ивановна доры кыльыны, сое урод ужъёслэсь возьманы косэ. Мон ужтуслэн ӝоген вошкемезлы оскисько ке но, нош Марья Ивановналэн кышкыт улонэз сярысь чакласько ке, быдэс куалекъясько.
Мынэсьтым сыӵе малпаськонъёсме лыктэм казак ӝыныё кариз. «Быдӟым государь, пе, тонэ ас дораз ӧте» — шуыса, ивортыны лыктэм со. — «Кытын бен, со?» — кылскыны дасяськыса, юасько мон солэсь.
— Комендантскойын, — вера мыным казак. — Нуназезэ сиськем бераз, милям батюшкамы мунчое пыриз но, табере шутэтске ини. Ну, ваше благородие, солэн туж дано выжы луэмез, котьмаизъя адске: нуназезэ сиськон дыръяз, жарить карем парсьпиосты кыксэ сиыны быгатӥз. Нош мунчое пыремзэ ке верано, туж пӧсез яратыса пыре. Тарас Курочкин но ӧз чида, вениксэ Бикбаев Фомкалы сётӥз но, соиз нош вылаз кезьыт ву киськаса гинэ сазьскыны быгатӥз на. Марзэ вералод: ассэ ачиз возён сямъёсыз туж важноесь… Нош мунчоын мӧля вылысьтыз царской пусъёссэ но возьматэм шуыса кылӥське: одӥгез пусэз — петак быдӟа кык йыро ӧрӟи, пе, нош мукетыз — аслаз тусбуез.
Казаклэн сыӵе малпамъёсызлы пумит кариськыны мон кулэ ӧй кары, соин ӵош ик комендантлэн корказ мынӥ. Пугачёвен кыӵе мар адӟиськом, адсконмы кыӵе ужъёсын быроз но мар шуыса, ас поннам малпаса мынӥсько. Мынам мылкыд огсыр дыръя кадь ӧй вал, со сярысь та книгаез лыдӟись вератэк но тодоз.
Комендантлэн корказ мон вуоно дыръя, куазь ӝомыт луэ вал ини. Калыкез ошон но ошем калыкъёс сьӧд шимес адско. Куанер комендантшалэн шӧйыз ялан корказь дорын лошъяське на. Отын кык кузя казакъёс караулын сыло. Монэ вайись казак ваемез сярысь вераны пыриз но, туж ӝог берытскыса, монэ Марья Ивановнаен толон туж гажаса прощаться кариськем висъетэ пыртӥз.
Ноку но адӟылымтэ суред мынам син азям адскиз. Ӝӧккышетэн шобыртэм, штопъёсын но стопкаосын пуктылэм ӝӧк сьӧрын Пугачёв но ог дасо мурт казакъёслэн старшинаоссы пуко. Ваньзы соос изьыосын, пужыё дэремъёсын, винаез трос юэменызы, ымныръёссы ӵыжектэмын, синъёссы чилекъясь луэмын. Соос пӧлын выль изменникъёс, милям урядникмы но Швабрин, одӥгзы но ӧвӧл. «А, ваше благородие! — вазиз Пугачёв, монэ адӟыса. — Милости просим: дан но инты». Солэн эшъёсыз, артэгес кариськыса, мыным инты сётӥзы. Мон, вазьылытэк, ӝӧклэн пумаз ик пукси. Монэным артэ пукись чебер тусо, веськыт мугоро, егит казак быдэс стопка простой винаез мыным лэзиз но, мон со стопка борды ӧй но йӧтскылы. Тунсыкъяськыса мон та люкаськем калыкез учкылӥсько. Пугачёв тӧро интыын, ӝӧк вылэ гырпумъяськыса, паськыт мыжыкеныз сьӧд тушсэ пыкыса пуке. Ымныр тусыз солэн синмаськымон, нокыӵе лек тусыз но ӧвӧл. Со ог витьтон аресъем мурт шоры туж ӵем вазьылэ, сое либо граф, либо Тимофеич, куддыръя дядюшка но шуыса нималля. Ваньзы соос куспазы эшъёс сямен верасько, асьсэлэсь кивалтӥсьсэс номырин но уг висъяло. Вераськонзы соослэн туннэ ӵукна ортчем ужъёс сярысь мынэ, крепостез приступен басьтэмзы сярысь, калык пӧлын бугырсконлэн вӧлмемез сярысь но азьпалан ужан сярысь. Котькудӥз ушъяське, ас малпанъёссэ ӵектэ но, номырлэсь но кышкатэк, Пугачёвлы пумит вераське. Тӥни та, маскара кадь, военной советын, Оренбургез басьтыны мыноно шуыса, пуктӥзы. Веранэз ӧвӧл, дерзкой малпан но со ӧжыт гинэ бедаен ӧз йылпумъяськы! Походэ ӵуказе потом шуыса, ялэмын вал. «Ну, братцы, — шуиз Пугачёв, — вае-ай, кӧлон азьын мынэсьтым яратоно кырӟанме кырӟаломе. Чумаков! Кутскы!» Артэ пукись бускеле мынам, векчи куараеныз, бурлакъёслэсь мӧзмыт гуро кырӟанзэс кырӟаны кутскиз но со бӧрсьы ваньзы итӥськизы:
Эн куашеты тон, бадӟым сьӧд нюлэс.
Эн люкеты мыным доброй молодецлы малпаськын.
Мыным, доброй молодецлы, допросэ мыноно ӵуказе
Лек судья азе, ачиз государь азе.
Эшшо юалоз мынэсьтым эксэй-государь:
Я тон вера, вера мыным, крестьянской пи,
Кинэн лушкаськид, разбойничать кинэн карид,
Эшшо трос-а вал тонэн эшъёсыд?
Вань зэмзэ верало мон тыныд, верало шонер:
Эшшо первой эше мынам вал пеймыт уй,
Кыктэтӥ эше мынам вал лэчыт пурт,
Куиньметӥ эше мынам вал етӥз валэ.
Ньылетӥ эше мынам вал пезьгыт пукыӵе,
Мынэсьтым иворме нулло вал ӟырдыт пукыӵ ньӧръёс.
Вераз мыным соку православной государь:
Данлык тыныд, детинушка, крестьянской пи,
Кызьы лушкаськын быгатӥд, озь ик кыл кутны быгатӥд!
Со понна мон тыныд кузьмало
Луд шорын бадӟымесь, чебересь юртъёсын:
Кык ӝужытэсь юбоосын но ошон вамен пуэн.
Та асьсэос ошиськонэ шедьыны кылдэм адямиослэн ошон сярысь калык кырӟан гуръёсты кырӟамзы мынэсьтым мылкыдме вераны луонтэм бугыртӥз. Соослэн лек тусоесь ымныръёссы, куспазы тупась кырӟан куараоссы, сотэк но сюлэме йӧтымон ӝож кылъёсты ӝож кырӟамзы — ваньмыз таос вылтыр юзыр луымон сюлэмез бугырто.
Куноос нош котыр стопка юизы но, ӝӧк сьӧрысь султыса, Пугачёвлы ӟеч кыл вераса, кошкылӥзы. Соос сьӧры мон но озьы ик потыны малпасько вал но Пугачёв монэ дугдытӥз: «Пук; мон тонэныд вераськыны малпасько». Ми соин кык ӵошен кылим.
Кӧня ке минут кыкнамы ик номре вераськытэк пуким. Пугачёв мон шоры зол учке, паллян синзэ дырын-дырын кыньыртылэ, соку солэн ымныр тусыз аслэсьтыз кескичсэ но серекъямес каремзэ возьматэ. Собере со, чик кескичъяськытэк, капчи мылкыдын серекъяны кутскиз. Со шоры учкыса, мон но, малы серекъямме тодытэк, серекъясько.
— Мар ни, ваше благородие? — шуиз со мыным. — Мынам егитъёсы тынад чыртыяд гозы кыӵ понэмзы бере, зол ик кышкад дыр? Ин но тыныд соку ыжку быдӟа гинэ адскиз дыр шуыса малпасько… Слугаед ке ӧй вадсаськысал, ваменпу вылын шонаськысал ик. Пересь хрычез мон соку ик тодмай. Я малпад-а тон, ваше благородие, тонэ йыромон дыръяд постоялой дворе вуттӥсь адями быдӟым государь луэ шуыса? (Соку со аслыз ачиз лушкем улӥсь муртлэсь важной туссэ возьматоно кадь кариськиз.) Тон туж виноват луиськод мон азям, — вераськонзэ азьланьтыса шуэ со, — озьы ке но, мон аслэсьтым тушмонъёсылэсь ватскыса улоно луыкум юрттэмед понна, мон тонэ помиловать кари. Сое гинэ-а адӟод на! Аслэсьтым государствоме ас киям басьтэм бере, озьы гинэ-а мон тонэ пожаловать каро на! Вань сюлмысьтыд мыным служить карыны кыл сётӥськод-а?
Мошенниклэн юан сётэмез но солэн, возьытэз валатэк, ассэ ачиз государь шуэмез мыным туж тумошо потӥз, мон серемме возьыны ӧй ни быгаты.
— Малы тон серекъяськод? — юаз со, лек тусо кариськыса. — Оло мынам быдӟым государь луэмелы уд оскиськы-а? Вера меӵак.
Мон шуге уси. Бродягаез государен лыдъяны кыл уг ӝутскы: соку мон простить карыны луонтэм кышкась мурт кадь луисько. Нош сое азяз ик пӧялляськись ке шуоно — аслыд ачид бырон гинэ шедьтод… Нырысь лек мылкыд улэ ӝимем берам мон калык азьын но ошет улын котькыӵе ужлы дась вал ке, табере сыӵе ужъёс мыным пайдатэм ушъяськемлы гинэ пыро на. Мар вераны абдраса улӥсько. Пугачёв секыт тусын верамме вите. Собере (та минутэз мон али но шумпотыса тодам вайылӥсько на) адями ляблыкме мынам азям сылӥсь долге вормиз. Пугачёвлы мон тазьы верай: «Кылскы; ваньзэ тыныд шонерак верало. Малпа али ачид, быгатӥсько-а мон тонэ государен признать карыны? Тон визьмо адями: мынэсьтым пӧяса верамме тон ачид шӧдысал».
— Кин бен мон луисько тынад малпамедъя?
— Инмар тонэ мед тодоз; нош котькин тон мед луод но, туж кышкыт шудонэн шудӥськод.
Пугачёв мон шорам сэрытак учкиз. «Озьыен тон, — шуиз со, — мынам государь Пётр Фёдорович луэмелы уд оскиськы? Ну, ярам. Нош етӥз муртлы уг-а удалтылы? Вашкала дыръя Гришка Отрепьев царствовать ӧз кары шат? Мон сярысь котьмар малпа, нош сьӧрысьтым эн кыльы. Мукетъёсыз сярысь тынад мар ужед? Кин ке поп, со ик батько. Оскымон но шонер мыным служить карид ке, мон тонэ фельдмаршал, либо князь каро. Кызьы тон малпаськод?»
— Уг, — чутрак верай мон пумитаз. — Мон дворян выжыысь луисько, мон государыня императрицалы присяга сётӥ, соин ик тыныд служить карыны уг быгатӥськы. Нош тон зэмзэ ик мыным ӟеч малпаса улӥськод ке, лэзь монэ Оренбурге.
Пугачёв малпаны кутскиз. «Нош мон тонэ лэзи ке, — шуиз со, — по крайней мере, мыным пумит служить уг кары шуыса, кылдэ сётӥськод-а мыным?»
— Кызьы мон тыныд сыӵе кыл сётыны быгато? — пумитаз мон верасько. — Ачид тодӥськод, соизлы мынам воляе ӧвӧл: косӥзы ке, тыныд пумит но мыно, мынытэк мар карод. Табере тон ачид начальник, ас калыктэ ачид но кылскыны косӥськод. Мынам службае кулэ луон дыръя, мон службалэсь пыкиськи ке, малы лэсялоз сыӵе уж? Йыры мынам тон киын: лэзид ке — тау шуо; казнить ке карид — инмар тыныд судья; мон шонерзэ гинэ тыныд верай.
Мынам шонер вераськеме Пугачёвез абдратӥз. «Иське озьы ик мед луоз, — шуиз со, мынам пельпумам чапкыса. — Казнить ке казнить, миловать ке миловать кароно. Котькуд пала мын но котьмар лэсьты. Ӵуказе монэным проститься карыны пыра, табере изьыны берты; мынам но иземе потэ ини».
Пугачёвез кельтыса, мон ульчае потӥ. Уй чус но туж кезьыт вал. Толэзь но кизилиос площадез но ошетъёсты югытаса, туж яркыт пишто. Крепостьын котырак пеймыт но чус. Кабакын гинэ тыл пиштэ, отысь бер юисьёслэн кесяськем куараоссы кылӥське. Мон поплэн корка шораз учки. Укно пулъёссы но ӟезьызы пытсамын. Отын котырак чусомемын кадь адске.
Мон аслам кунокаям пыри но, мынам Савельиче, мон ӧвӧлэн сэрен, куректыса пуке. Мыным эрик сётэмез тодыса, со но вераны луонтэм шумпотӥз. «Инмарлы тау! — шуиз со, кирос карыса. — Ӵукна ӟарпотыку ик, крепостез кельтом но, кытчы ке синмы учкизы, отчы мыном. Мон тыныд марке-марке сиён дасям вал; сиськы али, батюшка, собере ӵукнаозь, Христослэн кунулаз кадь, кӧл».
Солэсь визь кенешсэ мон санэ понӥ, ӝыт сиськонме туж умой сиськи но, мугоры но йыры жадемен, гольык пол вылын ик умме уси.