Кечмиштеки сучларымыз
Бири ачкъан китабыны "Лянет!" — дий...
Элягюге, Баты хангъа, Темирге,
Бири язгъан тарихыны "Барбар!" — дий...
Бир вакъытлар бойнун буккен эмирге...
"Татар халкъы, Татар ханы!" — фысылдай,
Кяфир, мумин бутюн дюнья тиллери,
"Татар ханы джуртумызны джакъты шай,
Менгюликке атеш болсун эр джери!.."
Факъыр татар аттан тюшкен, шашыргъан,
Бетин орьте, сесин къыса, гизлене...
"Дженгиз, Темир, Батыны мен бильмиймен,
Мен оларны ич корьмедим..." — сеслене...
Душманлары: "Сенсинъ!" — дийлер, къыйнайлар. —
"Муна ресминъ тарихлерде корюне.
Сенсинъ Дженгиз аркъасындан джувургъан,
Бетинъ сары, пантик мурнынъ кичкене!"
"Мен тюгюльмен!" — дий факъыр, ай зарлана. —
"Дженгиз, Баты джынсымда ич болмады!
Бабам, анам бир шерифе, бир сейид,
Якъынларым я бир молла, я къады..."
Ташланъыз о факъыр халкъны, сучу джокъ,
Сучу болса, джашавында одийджек,
Менмен Дженгиз, Темир ханнынъ торуны,
Менмен онынъ джолун дайм кутийджек...
Юкленемен бар сучларын оларнынъ,
Бизлер джакътыкъ Багъдадынъны, Басранъны,
Бизлер джыкътыкъ сарайларын Романынъ,
Бизлер сойдыкъ акъ сюегинъ, къаранъны!..
Кель, бир сор! Берийим эп эсабын,
Далмачьянынъ, Маджарлыкънынъ, Къазакънынъ,
Индиянынъ, Акъ денъизнинъ, Азакънынъ,
Кель, бир сор! Барбарлыкънынъ эсбабын!..
Къылычым джокъ, атларым джокъ, джаявман...
Джурегимде джангъан атеш дурулды...
Мойнум бахтнынъ къолларында бурулды,
Бугунь олюм джолларында бир савман!..
Эй, Явропа, эй, улема, билинъиз!
Китапларынъ ялан айтса дайм шай,
Дайм къурсанъ козьяшынъдан кок сарай...
Силькинирмен, болурман тез бир Дженгиз!..
Китапларынъ Диджлелерге атарман!
Сарайларынъ ермен ексан эткен сонъ,
Баланъ, чагъанъ откъа къурбан кеткен сонъ,
Кене кетер, мезарсыз шай джатарман!
Эзилийим, юкленийим сучларын!
Буюк ханнынъ, буюк халкънынъ мирасын,
Юкленийим бабаларым гунасын,
Шай джурийим шу дюньянынъ уджларын!..
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1937 году и был посмертно реабилитирован в 1957 году, соответственно эта работа выйдет в России в общественное достояние в 2028 году.
The author died in 1937, so this work is also in the public domain in countries and areas (outside Russia) where the copyright term is the author's life plus 80 years or less. |