Кило (Айво Иви)

«Кило» Автор: Айво Иви

Поттэмын: 1925. Источник: Удмурт дунне : газет. — 2018. — № 81. — 16-тӥ бам.

Вӧй дыр. Бигер арня. Калык вузкарон эштосэ трос лыктэмын. Басьясько.

Ӟуч приказчик умой-умой вуз мертаны ик уг вуы. Востэмъёсыз, кема сылыса, черод возьмало. Салдыр гуртысь Жагбей, сюлмыз чурытмыса, сылэ.

«Та ӧвӧлтэмъёслэн вузкаронзы но мыдлань луиз, оломар „килоен“ вуз но вузало», — шуса, малпаське.

Кышкаса-кышкаса вузаськись доры Жагбей матэяськиз. Ӟуч кыл тодымтэеныз дӥсьтытэк вузасьлэсь одӥг гирвонка сакыр но 10 гирвонка тӧдьы пызь куре.

Вузаськись «продаем на кило» шуиз но мукетызлы мертаны кутскиз. Жагбей, кӧтсэ кормаса, лавкаысь потӥз.

«Кызьы кариськом на табере, та шайтанъёс килатэк вуз но уг сёто», — шуса, ӝогӝог дораз кошкиз. Пумитаз комсомол Яша шедиз.

— Кытчы ветлӥд, Жагбей кенак, малы озь дыртӥсь кариськид?

— Лавкае, Яша, ветлӥ но басьяськонлэсь номырзэ ик ӧй вала, дорам бертӥсько.

— Лык, Жагбей кенак, ӵош мыном но, мон тыныд басьтыны юртто.

— Тон но, Яша, сыӵе ик, — шуиз но ӵыштыр гинэ гурт палаз вамышъяны кутскиз.

Жагбей ас корказ ӧз пыр, мынӥз Сясег доры. Сясег кемалась висе ини «кила» висёнэн.

Возьдаськыса Жагбей Сясеглэн корказ пыриз. Сясег кут кута. Корка выж вылаз нин пуппыос куямын.

— Ӟеч-а, бур-а, Сясег, кужмо лу кутаны.

— Пуксьы, Жагбей, ӟеч улыны ик уг вормиськы, висьыса уй-нуналэ ортче, быгатэмъям кутасько. Кут-а тыныд оло кулэ, одӥг куз вань, кулэ ке, вузало.

— Кут кулэ ӧвӧл мыным, Сясег, мынам туннэ эмеспие лыктоз, утялтыны номыр но ческыт сиён-юонэ ӧвӧл, ветлӥ лавкае басьяськыны но, отын «килаен» вузаськомы шуизы, возьыт ке но, тон доры лыктӥ, тон мыным маке-маке уд басьты-а шуса, тон кемалась, лэся, соин висиськод ини.

— Мон, Жагбей, кемалась висисько ини, умой-умой ветлэме но уг лу, туннэ, тон сяна но, куинь мурт ветлӥзы, мыныны луымтэен кылме ик ӧй сёты.

Жагбей, бӧрдыса сямен, куриське на вал но, Сясег мынымтэысь, солэн коркасьтыз потӥз.

Дораз мыныкуз, нош ик пумитаз Яша шедиз.

— Малы синъёсыд, Жагбей кенак, гордэктэмын, оло кин ке жугиз-а тонэ, вера?

— Ӧз жуг ненокин но, Яша, кӧты ӝож, вуз басьтэме ӧз луы. Лавкае ветлӥ но, «килаен» вузаськом шуизы. Туннэ эмеспие лыктоз, ческыт сиён-юонэ ӧвӧл, оломаин келялом на сое; бырод тӥледын, вуз но карыны «килаен» кутскиллямды. Со-а дунне луоз на. Сясег доры ветлӥ, со уз мын-а басьтыны шуса, висько шуиз, ӧз мыны.

— Эк, эк, эк, Жагбей кенак, — шуса, Яша гор-гор серекъяны кутскиз. — Лык, мыном лавкае ӵошен, мон басьто тыныд. Туэ гирвонкаен вузэз уг ни вузало, килограммен вуз вузаське, килограмм со гира луэ. Тон Сясег доры мынэм. Весэн мертанэз килограммен вузало, басмаез — метрен.

— Э, шайтан, тон сое азьло ик вера вал, мон таӵе курадӟоно ик ӧй луысал, — шуса, Жагбей вераз но зур гинэ лавкае кошкиз.

Комсомол Яша со ӝыт ик, калыкез гуртысьтыз кенеше люкаса, «кило» но, «метр» но сярысь валэктон вераз.