Шыд-нянь пӧлын шыд-нянь вань,
Визьтэм карись арак вань;
Муртъёс пӧлын муртъёс вань,
Кузь йырсиё попъёс вань.
Емыш пӧлын емыш вань,
Пинь долкатӥсь сутэр вань;
Гордъёс пӧлын гордъёс вань
Тӧдьы йыро гордъёс вань.
Чорыг пӧлын чорыг вань,
Чорыг сиись чипей вань;
Пролет пӧлын пролет вань,
Шумес зӧкта кӧтъёс вань.
Пӧйшур пӧлын пӧйшур вань,
Лушкем ветлӥсь ӟичы вань,
Воръёс пӧлын воръёс вань,
Казна сиись чинъёс вань.
Папа пӧлын папа вань,
Син ишкалтӥсь куака вань;
Сютэм пӧлын сютэм вань,
Чабей гинэ сиись вань.
Пудо пӧлын пудо вань,
Урам саптась скал вань;
Кылбур пӧлын кылбур вань,
. . . . . . . . кылбур вань.
