Кионъёс но куанер

Кионъёс но куанер Калык выжыкыл

Источник: Гаврилов Б. Г. Произведения народной словесности, обряды и поверья вотяков Казанской и Вятской губерний. — Казань, 1880. — С. 59—60• Текстэз туала орфографие берыктэмын но абзацъёслы люкемын

Одӥг мурт кӧчыса гурезь баме корка пуктэм, покчи гид лэсьтэм, солэн пудоез вылэм: одӥг чуньы, одӥг кунян, одӥг ыж, одӥг каза.

Гурезь улын кионъёс уло вылэм. Соос, адямилэсь пудоез ваньзэ шӧдыса, асьсэос сютэм пуксьыса, кенеш кариллям, бускель доры гурезь баме мыныса, сиён курыны.

Лыктыса кырӟало, пе: «Тон ӟеч бускель, милемыз сютэм эн ви, одӥг чуньы сёт сиыны», — шуыса, укно выжыын пукыса, тэк кырӟало, пе, бускельлы изьыны эрик уг сёто, пе, чуньы курыса.

Пересь кышно, нерад луыса, картлы чуньы сётыны косэм. Карт, кышнолэсь кылзэ кылзыса, кионъёслы чуньы куштэм но верам: «Табере эн лыктэлэ ини», — шуэм.

Кионъёс тау карыса кошкиллям. Одӥг арня улыса нош лыктӥллям ветыл курыны, нош ик укно выжые пуксьыса, кырӟаны кутскиллям ветыл курыса, нош кышно, нерад луыса, ветыл сётыны косэм картлы, со нош ик куштэм.

Собере кионъёс, огпол дышем бере, нокытчы но уг кошко, пе, со пересь ачиз но нерад луэм, коркась потыны уг лу, пе. Чистой пудозэ кионлы сюдыса быдтэм, собере нылпизэ но, кышнозэ но сётэм, пересь огназ гинэ кылем.

«Та кионъёсыз кызьы каром ини», — шуыса, тэк малпаса улэ, пе.

Собере, бадӟым куды вурыса, корка азе ошем, ачиз кудые пуксем.

Нош кионъёс лыктӥзы, пе. Ог кесэг укно выжыын кырӟаса пукем бере, куарамы уг кылӥськы, дыр, шуыса, баскич доры лыктӥзы, пе, корка азе пыризы, пе.

Со куспын пересь кудыын вырӟем но гозыез чигем, пересь бадӟым кудыен усем кионъёс вылэ, ог витьсэ кудыен пачкатэм. Музон кионъёс курдаменызы баскич вылэ тубыса огез огзэ пачкатӥллям.

Собере пересь кудыысь потэм но бадӟым пуртэн кионъёсыз вием. Кузэ базаре поттыса вузам, со уксёен юрт лэсьтыса, али ке но узыр улэ.