Кни́га житі́й ст҃ы́хъ/Ное́мврїй/и҃

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Ное́мврїа з҃

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а ное́мврїа во и҃ де́нь

Ное́мврїа ѳ҃→

Мцⷭ҇а ное́мврїа во и҃ де́нь,
сло́во на собо́ръ ст҃а́гѡ а҆рхїстрати́га
мїхаи́ла, и҆ про́чихъ нбⷭ҇ныхъ си́лъ безпло́тныхъ.

Собо́ръ ст҃ы́хъ а҆́гг҃лѡвъ цр҃ковь ст҃а́ѧ ѿ преда́нїѧ бг҃одꙋхнове́нныхъ ѻ҆ц҃ъ прїѧ̀ пра́здновати бл҃гоче́стнѡ, ѿве́ргши дре́внее ѕлочести́вое а҆́гг҃лѡвъ почита́нїе, ѿ є҆ретїкѡ́въ и҆ і҆дѡлопокло́нникѡвъ и҆з̾ѡбрѣ́тенное: и҆́бо є҆щѐ въ ве́тхомъ завѣ́тѣ, є҆гда̀ лю́дїе бж҃їи ѿстꙋпи́вше ѿ бг҃а созда́телѧ своегѡ̀, нача́ша кла́нѧтисѧ созда́нїю бж҃їю, и҆ дѣ́лꙋ рꙋ́къ свои́хъ, творѧ́ще і҆́дѡлы по подо́бїю ви́димыѧ тва́ри, є҆ли́кѡ на нб҃сѝ горѣ̀, и҆ є҆ли́кѡ на землѝ ни́зꙋ: тогда̀ приносѧ́ще съ бг҃оподо́бнымъ поклоне́нїемъ жє́ртвы сл҃нцꙋ, мцⷭ҇ꙋ, и҆ ѕвѣзда́мъ, и҆́хже дꙋ́шꙋ живо́тнꙋ и҆мѣ́ти мнѧ́хꙋ: таковы́мъ же поклоне́нїемъ съ же́ртвами кла́нѧхꙋсѧ и҆ а҆́гг҃лѡмъ, ѡ҆ чесо́мъ въ кни́гахъ ца́рскихъ воспомина́етсѧ си́це: кадѧ̀ ваа́лꙋ, и҆ сл҃нцꙋ, и҆ лꙋнѣ̀, и҆ плане́тамъ, и҆ все́й си́лѣ нбⷭ҇нѣй, сі́есть а҆́гг҃лѡмъ, ті́и бо сꙋ́ть вѡ́и нбⷭ҇ныи, по рече́нномꙋ въ є҆ѵⷢ҇лїи: и҆ внеза́пꙋ бы́сть со а҆́гг҃ломъ мно́жество вѡ́й нбⷭ҇ныхъ. То́е небл҃гоче́стное а҆́гг҃лѡмъ поклоне́ніе и҆ во днѝ ст҃ы́хъ а҆пⷭ҇лѡвъ мно́жашесѧ, є҆́же и҆скоренѧ́ѧ па́ѵелъ ст҃ы́й въ посла́нїи къ колосса́емъ глаго́летъ: никто́же ва́съ да прелща́етъ, и҆зволе́ннымъ є҆мꙋ̀ смиреномꙋ́дрїемъ и҆ слꙋ́жбою а҆́гг҃лѡвъ, ꙗ҆́же не ѹ҆вѣ́дѣ ѹ҆ча̀, без̾ ѹ҆ма̀ дмѧ́сѧ ѿ ѹ҆ма̀ пло́ти своеѧ̀, а҆ не держа̀ главы̀, сі́есть хрⷭ҇та̀. Бѧ́хꙋ бо въ то̀ вре́мѧ нѣ́цыи є҆ретїкѝ, ѻ҆́бразомъ ꙗ҆влѧ́ющїисѧ смире́ни, и҆ а҆́гг҃лѡмъ подража́ти возде́ржнымъ и҆ чи́стымъ житїе́мъ свои́мъ го́рдостнѡ мнѧ́щїисѧ, ѹ҆ча́щїи же ра́вное поклоне́нїе твори́ти а҆́гг҃лѡмъ, ꙗ҆́коже и҆ самомꙋ̀ бг҃ꙋ. По то́мъ наста́ша и҆ні́и, гл҃ющїи бы́ти а҆́гг҃лѡвъ созда́телей ви́димыѧ тва́ри, и҆ па́че хрⷭ҇та̀ сн҃а бж҃їѧ вы́шшихъ и҆ чⷭ҇тнѣ́йшихъ ꙗ҆́кѡ безпло́тныхъ, мїхаи́ла же бг҃а є҆вре́ѡмъ бы́ти глаго́лахꙋ. дрꙋзі́и же волше́бствꙋ вда́вшїисѧ, и҆ люде́й лстѧ́щїи, под̾ и҆́менемъ а҆́гг҃лами и҆̀хъ нарица́юще: наипа́че же въ колосса́ехъ, лаодикі́йской митропо́лїи подлежа́щихъ, такѡвы́ѧ мно́жахꙋсѧ є҆́реси, и҆ ѿ мно́гихъ ѕлоче́стное а҆гг҃лопоклоне́нїе і҆дѡлопоклоне́нїю подо́бное вта́йнѣ соверша́шесѧ. є҆́же помѣ́стный, и҆́же въ лаодїкі́и, ст҃ы́хъ ѻ҆ц҃ъ собо́ръ проклѧ̀, и҆ а҆на́ѳемѣ предадѐ. Про́клѧтꙋ же и҆ ѿве́рженꙋ бы́вшꙋ томꙋ̀ неблагоче́стномꙋ а҆гг҃лопоклоне́нїю, ѹ҆зако́нисѧ бл҃гочести́вое и҆ достодо́лжное ст҃ы́хъ а҆́гг҃лѡвъ, ꙗ҆́кѡ слꙋжи́телей бж҃їихъ, храни́телей же ро́да человѣ́ческагѡ, почита́нїе и҆ пра́зднованїе. И҆ въ то́йже колосса́йстѣй странѣ̀, въ не́йже пе́рвѣе та́йнѡ и҆ ѕлѣ̀, є҆реті́чески бо, творѧ́шесѧ а҆гг҃лопоклоне́нїе, нача̀ ꙗ҆́вѣ правосла́вное соверша́тисѧ а҆́гг҃лскагѡ собо́ра пра́зднованїе, и҆ созида́хꙋсѧ прекра́сныѧ во и҆́мѧ ст҃а́гѡ а҆рхїстрати́га мїхаи́ла а҆́гг҃лѡмъ нача́лника, хра́мы, ꙗ҆́коже въ хо́нѣхъ та́можде сꙋ́щихъ, над̾ чꙋдотво́рнымъ и҆сто́чникомъ, пресла́вный и҆ пречꙋ́дный хра́мъ со́зданъ бы́сть, въ не́мже и҆ самагѡ̀ ст҃а́гѡ а҆рхїстрати́га мїхаи́ла ст҃о́мꙋ а҆рхі́ппꙋ бы́сть ꙗ҆вле́нїе. Ѹ҆ста́висѧ же собо́ръ ст҃ы́хъ а҆́гг҃лѡвъ пра́здновати мцⷭ҇а ное́мврїа, сі́есть девѧ́тагѡ по мартѣ мцⷭ҇ѣ пе́рвомъ ѿ созда́нїѧ мі́ра, во и҆зображе́нїе числа̀ а҆́гг҃лскихъ чинѡ́въ, и҆́хже де́вѧть и҆зочтѐ ст҃ы́й дїонѵ́сїй а҆реопагі́тъ, ѹ҆чени́къ ст҃а́гѡ а҆пⷭ҇ла па́ѵла, восхище́на бы́вша до тре́тїѧгѡ нб҃сѐ , и҆ та́мѡ разли́чїе ст҃ы́хъ а҆́гг҃лскихъ чинѡ́въ ви́дѣвша, и҆ є҆мꙋ̀ ꙗ҆́кѡ ѹ҆ченикꙋ̀ своемꙋ̀ сказа́вша. Ті́и же де́вѧть чи́ни раздѣле́ни сꙋ́ть на трѝ і҆ера́рхїи, по трѝ чи́ны в̾ себѣ̀ содержа́щыѧ: на вы́шшꙋю, сре́днюю, и҆ нижа́йшꙋю.

Въ пе́рвой ѹ҆́бѡ вы́шшей, и҆ прⷭ҇тѣ́й трⷪ҇цѣ ближа́йшей і҆ера́рхїи, сꙋ́ть серафі́ми, херꙋві́ми, прⷭ҇то́ли. Въ нача́лѣ творцꙋ̀ и҆ зижди́телю своемꙋ̀ предстоѧ́тъ бг҃олюби́вїи шестокри́лнїи серафі́ми, ꙗ҆́коже ви́дѣ и҆са́їа глаго́лѧй: серафі́ми стоѧ́хꙋ ѻ҆́крестъ є҆гѡ̀, ше́сть кри́лъ є҆ди́номꙋ, и҆ ше́сть кри́лъ дрꙋго́мꙋ: и҆ сꙋ́ть пламенноѻбра́зни, ꙗ҆́кѡ непосре́дственнѣ предстоѧ́щїи томꙋ̀, ѡ҆ не́мже пи́шетсѧ: бг҃ъ на́шъ ѻ҆́гнь поѧда́ѧй є҆́сть : прⷭ҇то́лъ є҆гѡ̀ пла́мень ѻ҆́гненный: ѻ҆бли́чїе же сла́вы гдⷭ҇ни ꙗ҆́кѡ ѻ҆́гнь пла́менꙋѧ. Таково́й сла́вѣ серафі́ми предстоѧ́ще, ѻ҆гненноѻбра́зни сꙋ́ть, по ре́кшемꙋ: творѧ́й а҆́гг҃лы своѧ̀ дх҃и, и҆ слꙋгѝ своѧ̀ пла́мень ѻ҆́гненный. пала́ютъ же бж҃е́ственныѧ любвѐ пла́менемъ, и҆ и҆ны́хъ къ любвѝ бж҃їей разжиза́ютъ, ꙗ҆́коже и҆ и҆́мѧ и҆́хъ и҆з̾ѧвлѧ́етъ: и҆́бо въ є҆вре́йскомъ ꙗ҆зы́цѣ серафі́мъ, сказꙋ́етсѧ, возжига́ѧй, и҆лѝ согѣва́ѧй. По серафі́мѣхъ же всеви́дцꙋ бг҃ꙋ живꙋ́щемꙋ во свѣ́тѣ непристꙋ́пномъ предстоѧ́тъ бг҃омꙋ́дрїи многоѻчи́тїи херꙋві́ми, въм свѣ́тлости неисповѣди́мѣй, па́че и҆ны́хъ нижа́йшихъ чинѡ́в, сїѧ́ющїи всегда̀ свѣ́томъ ра́зꙋма, бж҃їѧ позна́нїѧ, та́инствъ же бж҃їихъ и҆ глꙋбины̀ є҆гѡ̀ премꙋ́дрости ѹ҆вѣ́дѣнїѧ, просвѣща́емїи, и҆ и҆ны́хъ просвѣща́ющїи. и҆́бо и҆́мѧ и҆́хъ херꙋві́мъ, въ то́мже є҆вре́йстѣмъ ꙗ҆зы́цѣ сказꙋ́етсѧ, мно́гое разꙋмѣ́нїе, и҆лѝ премꙋ́дрости и҆злїѧнїе: ꙗ҆́кѡ чрез̾ хрꙋві́мѡвъ и҆ и҆ны́мъ и҆злива́етсѧ премꙋ́дрость, и҆ подае́тсѧ разꙋ́мны́хъ ѻ҆че́съ просвѣще́нїе къ бг҃овидѣ́нїю и҆ бг҃а позна́нїю. Та́же сѣдѧ́щемꙋ на прⷭ҇то́лѣ высо́цѣ и҆ превознесе́ннѣ предстоѧ́тъ бг҃оно́снїи [ꙗ҆́коже и҆́хъ ст҃ы́й и҆менꙋ́етъ дїонѵ́сїй] прⷭ҇то́ли, на ни́хъ бо ꙗ҆́кѡ на разꙋ́мныхъ престо́лѣхъ бг҃ъ почива́етъ разꙋ́мнѡ, [ꙗ҆́коже пи́шетъ ст҃ы́й маѯі́мъ и҆сповѣ́дникъ]. Бг҃оно́снїи же глаго́лютсѧ, не сꙋщество́мъ, но бл҃года́тїю и҆ слꙋже́нїемъ: пи́шетъ бо ст҃ы́й васі́лїй вели́кїй и҆ хрⷭ҇то́вꙋ пло́ть бы́ти бг҃оно́снꙋ, но пло́ть гдⷭ҇нѧ по сꙋществꙋ̀ и҆ по ѵ҆поста́си соедине́на бѣ̀ самомꙋ̀ бг҃ꙋ сло́вꙋ, ꙗ҆́кѡ носѧ́щаѧ бг҃а сло́ва по соедине́нїю нераздѣ́лномꙋ, сво́йственнѣ и҆ и҆́стѣ є҆гѡ̀ пло́ть глаго́лѧсѧ и҆ пребыва́ѧ. Прⷭ҇то́ли же, не по сꙋществꙋ̀, но по бл҃года́ти да́нной къ таково́мꙋ слꙋже́нїю, и҆мꙋ́ще бг҃а въ сами́хъ себѣ̀ несказа́ннѡ и҆ недовѣ́домѡ, бг҃оно́снїи глаго́лютсѧ. Неизрече́ннымъ ѹ҆́бѡ ѻ҆́бразомъ почива́ѧ на ни́хъ бг҃ъ, сꙋдбы̑ своѧ̀ првⷣныѧ ѹ҆ставлѧ́етъ, по рече́нномꙋ дв҃домъ: сѣ́лъ є҆сѝ на прⷭ҇то́лѣ, сꙋдѧ́й пра́вдꙋ. чесѡ̀ ра́ди въ ни́хъ и҆зрѧ́днѣе правота̀ сꙋде́бъ бж҃їихъ сїѧ́етъ: слꙋ́жатъ же правосꙋ́дїю бж҃їю и҆ прославлѧ́ютъ є҆̀, и҆ и҆злива́ютъ правосꙋ́дїѧ си́лꙋ на до́лныхъ сꙋде́й прⷭ҇то́лы, подава́юще царє́мъ и҆ влады́камъ првⷣныѧ сꙋды̀ твори́ти.

Въ сре́дней же і҆ера́рхїи та́кожде трѝ сꙋ́ть ст҃ы́хъ а҆́гг҃лѡвъ чи́ни: гдⷭ҇ствїѧ, си̑лы, вла̑сти. Гдⷭ҇ствїѧ гл҃ютсѧ, ꙗ҆́кѡ про́чымъ и҆̀же под̾ ни́ми а҆́гг҃лѡмъ гдⷭ҇ствꙋютъ, са́ми сꙋ́ще свобо́дни. ѿло́жше же [по дїонѵ́сїю] ра́бскꙋю боѧ́знь, доброхо́тнѡ и҆ ра́достнѡ гдⷭ҇ꙋ слꙋ́жатъ непреста́ннѡ. и҆злива́ютъ же дѡ́лнимъ си́лꙋ благоразꙋ́мнагѡ владѣ́нїѧ, и҆ мꙋ́драгѡ строе́нїѧ, поста́вленымъ сꙋ́щымъ ѿ бг҃а на власте́хъ, да до́брѣ гдⷭ҇ствꙋютъ над̾ врꙋче́нными и҆̀мъ ѻ҆́бластми. є҆ще́ же ѹ҆ча́тъ ѡ҆блада́ти чꙋ́вствы, смирѧ́ти безчи́ннаѧ въ себѣ̀ вожделѣ̑нїѧ и҆ стра̑сти, пло́ть порабоща́ти дх҃ꙋ, гдⷭ҇ствовати над̾ волею свое́ю, и҆ бы́ти всѧ́кагѡ и҆скꙋше́нїѧ вы́шшымъ. Си̑лы же, бжⷭ҇твенныѧ крѣ́пости и҆сполнѧ́ющесѧ, всеси́лнагѡ и҆ всемогꙋ́щагѡ гдⷭ҇а своегѡ̀ крѣ́пкагѡ и҆ си́лнагѡ во́ли слꙋ́жатъ, неме́дленнѡ и҆ неꙋтрꙋжде́ннѡ ю҆̀ соверша́юще, и҆ содѣ́ловаютъ чꙋдеса̀ превели́каѧ, и҆ тꙋ́южде чꙋдотворе́нїѧ бл҃года́ть и҆злива́ютъ на ѹ҆го́дникѡвъ бж҃їихъ бл҃года́ти тоѧ̀ досто́йныхъ, є҆́же чꙋдодѣ́йствовати и҆̀мъ, и҆ и҆сцѣлѧ́ти всѧ́кїѧ бѡлѣ́зни, и҆ грѧдꙋ̑щаѧ предглаго́лати. Помога́ютъ же ст҃ы́ѧ си̑лы человѣ́кѡмъ трꙋжда́ющымсѧ и҆ ѡ҆бремене́ннымъ въ ноше́нїи возложе́ннагѡ на ни́хъ и҆́га какова́гѡлибо послꙋша́нїѧ, да си́лни бꙋ́дꙋтъ своѐ зва́нїе и҆сполнѧ́ти, и҆ нє́мощы немощны́хъ носи́ти. ѹ҆крѣплѧ́ютъ же всѧ́каго человѣ́ка въ терпѣ́нїи, да не и҆знемога́етъ въ ско́рбехъ, но да крѣ́пкимъ великодꙋ́шїемъ, и҆ си́лнымъ мꙋ́жествомъ, всѧ̀ находѧ̑щаѧ претерпѣва́етъ, смире́ннѡ ѡ҆ все́мъ благодарѧ́щи бг҃а, всѧ̑ на по́льзꙋ на́шꙋ стро́ѧщаго. Вла̑сти же глаго́лютсѧ, ꙗ҆́кѡ и҆́мꙋтъ ѻ҆́бласть на дїа́волы, є҆́же ѹ҆кроща́ти бѣсо́вскꙋю вла́сть, и҆ ѿража́ти и҆скꙋшє́нїѧ и҆́ми человѣ́кѡмъ наноси̑маѧ, не попꙋска́ти же и҆̀мъ, да вредѧ́тъ кого̀ толи́ко, є҆ли́кѡ бы са́ми хотѣ́ли. ѹ҆твержда́ютъ же до́брыхъ подви́жникѡвъ въ дх҃о́вныхъ по́двизѣхъ и҆ трꙋдѣ́хъ, брегꙋ́ще и҆̀хъ, дабы̀ не ѿщети́лисѧ дх҃о́внагѡ црⷭ҇тва. борю́щымсѧ же со страстмѝ и҆ похотмѝ помога́ютъ в̾ де́нь бра́ни и҆́хъ, посо́бствꙋюще и҆̀мъ ѿгонѧ́ти ѕлы́ѧ по́мыслы, и҆ вра́жїѧ навѣ́ты, и҆ побѣжда́ти дїа́вола.

Та́кожде и҆ въ нижа́йшей і҆ера́рхїи трѝ сꙋ́ть чи́ны: нача̑ла, а҆рха́гг҃ли, а҆́гг҃лы. Нача́ла глаго́лютсѧ, ꙗ҆́кѡ над̾ нижа́йшими а҆́гг҃лы старѣ́шинство и҆́мꙋтъ, ко и҆сполне́нїю бжⷭ҇твеннагѡ повелѣ́нїѧ ѻ҆́ныхъ ѹ҆строѧ́юще. Врꙋче́но же и҆̀мъ є҆́сть вселе́нныѧ ѹ҆правле́нїе, и҆ хране́нїе всѣ́хъ ца́рствъ и҆ кнѧ́жествъ, земе́ль же и҆ всѣ́хъ наро́дѡвъ, племе́нъ и҆ ꙗ҆зы́кѡвъ. ко́еждо бо ца́рство, и҆ пле́мѧ, и҆ ꙗ҆зы́къ, ѻ҆со́бнаго и҆́мать себѣ̀ храни́телѧ и҆ ѹ҆прави́телѧ всецѣ́лой свое́й странѣ̀, є҆ди́наго а҆́гг҃ла ѿ тогѡ̀ нбⷭ҇нагѡ чи́на, глаго́лемагѡ нача́ла. Тогѡ̀ чи́на [по григо́рїевꙋ разꙋмѣ́нїю] слꙋже́нїе є҆́сть: поꙋча́ти человѣ́ки, да всѧ́комꙋ нача́лникꙋ по досто́инстꙋ сте́пене є҆гѡ̀ до́лжнꙋю воздаю́тъ че́сть. и҆ ті́и а҆́гг҃ли на высо́кїѧ честны́хъ са́нѡвъ сте́пени досто́йныхъ возво́дѧтъ, и҆ наставлѧ́ютъ и҆̀хъ, да не своегѡ̀ ра́ди прїѡбрѣ́тенїѧ, самопита́нїѧ, любоче́стїѧ же и҆ тще́тныѧ сла́вы, на нача́лство ко́е восхо́дѧтъ: но са́мыѧ ра́ди бж҃їѧ че́сти, разшире́нїѧ же и҆ ѹ҆множе́нїѧ є҆гѡ̀ ст҃ы́ѧ хвалы̀, и҆ по́льзы ра́ди бли́жнихъ, слꙋжа́щи ѻ҆́бщей всѣ́хъ поднача́лныхъ свои́хъ потре́бѣ. А҆рха́гг҃ли же гл҃ютсѧ, вели́цыи бл҃говѣ́стницы, вели́каѧ и҆ пресла̑внаѧ возвѣща́ющїи: тѣ́хъ слꙋже́нїе [ꙗ҆́коже гл҃етъ вели́кїй дїонѵ́сїй] є҆́сть: прⷪ҇рѡ́чествїѧ ѿкрыва́ти, просвѣщє́нїѧ же, и҆ во́ли гдⷭ҇ни ѹ҆вѣ̑дѣнїѧ, и҆ разꙋмѣ̑нїѧ, ѿ вы́шнихъ чинѡ́въ и҆́ми прїе́млємаѧ, нижа́йшымъ а҆́гг҃лѡмъ возвѣща́ти, и҆ чрез̾ и҆́хъ лю́демъ и҆звѣствова́ти. Ст҃ы́й же григо́рїй бесѣ́довникъ глаго́летъ: ꙗ҆́кѡ ті́и ст҃ꙋ́ю вѣ́рꙋ въ лю́дехъ ѹ҆множа́ютъ, просвѣща́юще и҆́хъ ѹ҆́мъ свѣ́томъ ра́зꙋма ст҃а́гѡ є҆ѵⷢ҇лїа, и҆ ѿкрыва́юще и҆̀мъ та̑инства вѣ́ры благочести́выѧ.

А҆́гг҃ли же сꙋ́ть въ нбⷭ҇номъ ѹ҆строе́нїи и҆ расположе́нїи ѿ всѣ́хъ чинѡ́въ нижа́йшїи, и҆ человѣ́кѡмъ ближа́йшїи: ті́и ме́ншаѧ та̑инства бж҃їѧ, и҆ є҆гѡ̀ хотѣ̑нїѧ возвѣща́ютъ человѣ́кѡмъ, добродѣ́телнѡ же и҆ првⷣнѡ по бз҃ѣ жи́ти наставлѧ́ютъ. Приста́влени же сꙋ́ть храни́ти коего́ждо на́съ вѣ́рныхъ: стоѧ́щихъ ѹ҆́бѡ держа́тъ на́съ, да не паде́мсѧ, па́дшихъ же под̾емлютъ, да воста́немъ, и҆ никогда́же ѡ҆ставлѧ́ютъ на́съ и҆ согрѣша́ющихъ, всегда́ бо гото́ви сꙋ́ть помога́ти на́мъ, а҆́ще то́чїю са́ми восхо́щемъ.

Нарица́ютсѧ же и҆ всѝ вы́шшїи нбⷭ҇нїи чи́ни тѣ́мъ и҆менова́нїемъ, а҆́гг҃ли: а҆́ще и҆ и҆на̑ѧ и҆́мꙋтъ по бг҃омъ расположе́нномꙋ сочине́нїю и҆ ѹ҆строе́нїю своемꙋ̀, и҆ по да́нной себѣ̀ ѿ негѡ̀ блгⷣти и҆менова̑нїѧ, ꙗ҆́коже серафі́ми, херꙋві́ми, прⷭ҇то́ли, и҆ и҆ні́и чи́ни: ѻ҆ба́че а҆́гг҃лами всѝ ѻ҆́бще нарица́ютсѧ, ꙗ҆́кѡ и҆́мѧ то̀ а҆́гг҃лъ, нѣ́сть и҆́мѧ є҆стества̀, но и҆́мѧ слꙋже́нїѧ. Всѝ ѹ҆́бѡ сꙋ́ть а҆́гг҃ли, ꙗ҆́кѡ всѝ бж҃їю повелѣ́нїю слꙋжа́щїи, по пи́санномꙋ: не вси́ ли сꙋ́ть слꙋже́бнїи дꙋ́си, въ слꙋже́нїе посыла́еми (Євр. а҃ : д҃і). Разли́чнаѧ же и҆́хъ и҆ не ра́внаѧ сꙋ́ть слꙋжє́нїѧ, но кі́йждо чи́нъ своемꙋ̀ ѹ҆строе́нїю подоба́ющее и҆́мать слꙋже́нїе, тогѡ̀ ра́ди, ꙗ҆́кѡ не ра́внѡ всѣ̑мъ премꙋ́дрый созда́тель бжⷭ҇твеннагѡ своегѡ̀ хотѣ́нїѧ та̑йны ѿкрыва́етъ, но посре́дственнѣ, чрез̾ вы́шшїи чи́ны нижа́йшихъ просвѣща́ѧ, и҆ во́лю свою̀ ст҃ꙋ́ю и҆̀мъ и҆з̾ѧвлѧ́ѧ, и҆ и҆сполнѧ́ти ю҆̀ повелѣва́ѧ, ꙗ҆́коже въ кни́зѣ прⷪ҇ро́ка заха́рїи ꙗ҆́вѣ зри́тсѧ: и҆дѣ́же а҆́гг҃лꙋ съ прⷪ҇ро́комъ бесѣ́дꙋющꙋ, и҆́нъ а҆́гг҃лъ и҆схожда́ше въ срѣ́тенїе томꙋ̀ а҆́гг҃лꙋ, повелѣва́ѧ є҆мꙋ̀ и҆тѝ къ прⷪ҇ро́кꙋ, и҆ ꙗ҆̀же ѡ҆ і҆ерⷭ҇ли́мѣ бы́ти хотѧ̑щаѧ, возвѣсти́ти. си́це бо пи́шетсѧ: сѐ а҆́гг҃лъ глаго́лѧй во мнѣ̀ стоѧ́ше, и҆ и҆́нъ а҆́гг҃лъ и҆схожда́ше во срѣ́тенїе є҆мꙋ̀. и҆ речѐ къ немꙋ̀, глаго́лѧ: тецы̀, и҆ рцы̀ къ ю҆́ноши ѻ҆́номꙋ [сі́есть къ прⷪ҇ро́кꙋ заха́рїи], глаго́лѧ: без̾ стѣ́нъ ѡ҆бита́ти бꙋ́дꙋтъ во і҆ерⷭ҇ли́мѣ мно́жества ра́ди чл҃вѣ́кѡвъ, и҆ а҆́зъ бꙋ́дꙋ є҆мꙋ̀, гл҃етъ гдⷭ҇ь, стѣна̀ ѻ҆́гненна ѻ҆́крестъ (Зах. в҃ : г҃ є҃). Є҆́же разсꙋжда́ѧ григо́рїй ст҃ы́й гл҃етъ: є҆гда̀ а҆́гг҃лъ къ а҆́гг҃лꙋ гл҃етъ: тецы̀ и҆ гл҃и къ ю҆́ноши ѻ҆́номꙋ: нѣ́сть сꙋмнѣ́нїѧ, ꙗ҆́кѡ а҆́гг҃ли є҆ди́ни дрꙋги́хъ посыла́ютъ, ме́ншїи ѹ҆́бѡ сꙋ́ть посыла́емїи, бо́лшїи же сꙋ́ть посыла́ющїи. Та́кожде и҆ въ данїи́ловомъ прⷪ҇ро́чествѣ ѡ҆брѣта́етсѧ, ꙗ҆́кѡ а҆́гг҃лъ а҆́гг҃лꙋ повелѣва́етъ сказа́ти видѣ́нїе прⷪ҇ро́кꙋ (Дан. и҃ : ѕ҃і). Ѿсю́дꙋ ѹ҆́бѡ ꙗ҆́вѣ є҆́сть, ꙗ҆́кѡ нижа́йшихъ чинѡ́въ а҆́гг҃ли, ѿ а҆́гг҃лѡвъ высоча́йшихъ чинѡ́въ, ѡ҆ бжⷭ҇твеннѣй творца̀ своегѡ̀ во́ли и҆ хотѣ́нїи и҆звѣща́ютсѧ, просвѣща́ютсѧ, и҆ ѻ҆́ными посыла́ютсѧ.

Достодо́лжнѡ же въ ѻ҆смы́й де́нь мцⷭ҇а сегѡ̀ ное́мврїа, сі́есть девѧ́тагѡ, собо́ръ всѣ́хъ тѣ́хъ девѧтѝ чинѡ́въ а҆́гг҃лѡвъ ст҃ы́хъ цр҃ковь правосла́внаѧ во́инстꙋющаѧ, по́мощи и҆́хъ тре́бꙋющи, и҆зрѧ́днѣйшимъ моле́нїемъ пра́зднꙋетъ: поне́же всѝ ті́и де́вѧть чи́ни а҆́гг҃лстїи соберꙋ́тсѧ въ де́нь стра́шнагѡ ѻ҆́нагѡ гдⷭ҇нѧ сꙋда̀, и҆́же нарица́етсѧ ѿ бжⷭ҇твенныхъ ѹ҆чи́телей цр҃ковныхъ дне́мъ ѻ҆смы́мъ: ꙗ҆́кѡ по вѣ́цѣ се́мъ, седми́цами дне́й ѡ҆браща́ющемсѧ, настꙋ́питъ ꙗ҆́коже де́нь ѻ҆смы́й: є҆гда̀ прїи́детъ сн҃ъ чл҃вѣ́ческїй и҆ бж҃їй, сꙋдїѧ̀ првⷣный, въ сла́вѣ свое́й, и҆ всѝ ст҃і́и а҆́гг҃ли съ ни́мъ (Мт. к҃є : л҃а): ꙗ҆́коже са́мъ то́йже гдⷭ҇ь въ є҆ѵⷢ҇лїи проречѐ. И҆ по́слетъ а҆́гг҃лы своѧ̀ съ трꙋ́бнымъ гла́сомъ ве́лїимъ, и҆ соберꙋ́тъ и҆збра̑нныѧ є҆гѡ̀ ѿ четы́рехъ вѣ́тръ (Мт. к҃д : л҃а), сі́есть: ѿ восто́ка, за́пада, сѣ́вера и҆ ю҆́га: тогда̀ ѹ҆́бѡ и҆ на́съ собо́ръ и҆́хъ че́стнѡ пра́зднꙋющихъ, къ ли́кꙋ и҆збра́нныхъ гдⷭ҇нихъ, ѽ дабы̀ собра́ли.

Всѣ́хъ же тѣ́хъ нбⷭ҇ныхъ девѧтѝ чинѡ́въ а҆́гг҃лскихъ собо́ра чинонача́лникъ и҆ воево́да ѿ бг҃а ѹ҆чине́нъ є҆́сть ст҃ы́й а҆рхїстрати́гъ мїхаи́лъ, ꙗ҆́кѡ вѣ́рный слꙋжи́тель бж҃їй, и҆́же во вре́мѧ па́гꙋбнагѡ сатанина̀ въ го́рдость возноше́нїѧ, и҆ ѿстꙋпле́нїѧ є҆гѡ̀ ѿ бг҃а, и҆ низпаде́нїѧ въ бе́зднꙋ собра́въ всѝ а҆́гг҃лскїѧ чи́ны и҆ вѡ́инства, воⷥзва̀ велегла́снѡ: во́нмемъ, ста́немъ до́брѣ пред̾ сотво́ршимъ ны̀, и҆ не помышлѧ́имъ проти̑внаѧ бг҃ꙋ: во́нмемъ, что̀ пострада́ша, и҆̀же бѧ́хꙋ съ на́ми вкꙋ́пѣ со́здани, и҆ съ на́ми досе́лѣ бжⷭ҇твеннагѡ причаща́ющїисѧ свѣ́та: во́нмемъ, ка́кѡ внеза́пꙋ ѿ свѣ́та во тмꙋ̀ преложи́шасѧ го́рдости ра́ди, и҆ съ высоты̀ въ бе́зднꙋ низверго́шасѧ: во́нмемъ, ка́кѡ спадѐ съ нб҃сѐ денни́ца восходѧ́щаѧ заꙋ́тра; и҆ сокрꙋши́сѧ на землѝ (Иса. д҃і : в҃і). Та́кѡ ко всемꙋ̀ а҆́гг҃лскомꙋ собо́рꙋ гл҃ѧ, нача̀, ꙗ҆́кѡ на пе́рвомъ мѣ́стѣ стоѧ́й, съ серафі́мы и҆ херꙋві́мы, и҆ со всѣ́ми нбⷭ҇ными чина́ми, сла́вити прест҃ꙋ́ю є҆диносꙋ́щнꙋю и҆ нераздѣли́мꙋю трⷪ҇цꙋ є҆ди́наго бг҃а, торже́ственнꙋю согла́снѡ пѣ́снь пою́ще: ст҃ъ ст҃ъ ст҃ъ гдⷭ҇ь саваѡ́ѳъ, и҆спо́лнь нб҃о и҆ землѧ̀ сла́вы твоеѧ̀. Таково́е ѹ҆́бѡ ст҃ы́хъ а҆́гг҃лѡвъ совокꙋпле́нїе, нарече́сѧ собо́ръ а҆́гг҃лскїй, сі́есть: внима́нїе, є҆диномы́слїе, согла́сїе, соедине́нїе, ꙗ҆́кѡ є҆динокꙋ́пнѡ и҆ є҆диногла́снѡ сла́вѧтъ ѻ҆ц҃а̀ и҆ сн҃а и҆ ст҃а́го дх҃а ст҃ꙋ́ю трⷪ҇цꙋ, є҆́же и҆ ѿ на́съ бре́нныхъ да бꙋ́детъ сла́ва во вѣ́ки, а҆ми́нь.

І҆кѡ́на ст҃а́гѡ а҆рхїстрати́га мїхаи́ла, а҆рха́гг҃льскїй собо́ръ въ мо́сквѣ.

Тропа́рь, гла́съ д҃:

Нбⷭ҇ныхъ во́инствъ а҆рхїстрати́зи, мо́лимъ ва́съ при́снѡ мы̀ недосто́йнїи: да ва́шими моли́твами ѡ҆градитѐ на́съ кро́вомъ кри́лъ невеще́ственныѧ ва́шеѧ сла́вы, сохранѧ́юще ны̀ припа́дающыѧ прилѣ́жнѡ и҆ вопїю́щыѧ: ѿ бѣ́дъ и҆зба́вите ны̀, ꙗ҆́кѡ чинонача́льницы вы́шнихъ си́лъ.

Конда́къ, гла́съ в҃:

А҆рхїстрати́зи бж҃їи, слꙋжи́телїе бж҃е́ственныѧ сла́вы, а҆́гг҃лѡвъ нача́льницы и҆ человѣ́кѡвъ наста́вницы, поле́зное на́мъ проси́те и҆ ве́лїю ми́лость, ꙗ҆́кѡ безпло́тныхъ а҆рхїстрати́зи.

---

Лаодикі́йскїй собо́ръ помѣ́стный, на не́мже ѕлоче́стное а҆гг҃лопоклоне́нїе пра́виломъ три́десѧтъ пѧ́тымъ ѿве́ржено, бл҃гоче́стное же а҆́гг҃лѡвъ почита́нїе, и҆ собо́ра и҆́хъ пра́зднованїе воспрїѧ́то бы́сть во вре́мѧ ст҃а́гѡ сѷлве́стра па́пы ри́мскагѡ, пре́жде пе́рвагѡ вели́кагѡ вселе́нскагѡ, и҆́же въ нїке́и, собо́ра за нѣколикѡ лѣ́тъ. Бѣ́ же то́й лаодикі́йскїй собо́ръ въ лѣ́то ѿ рождества̀ хрⷭ҇то́ва тѳ҃і, и҆ні́и мнѧ́тъ въ лѣ́то т҃к и҆лѝ тк҃а, а҆ є҆пⷭ҇кпѡвъ на то́мъ собо́рѣ бѣ̀ л҃в. Нача́лствова митрополі́тъ лаодикі́йскїй и҆́менемъ нꙋне́хїй. Нѣ́цыи гл҃ютъ ѳеодо́та бы́ти тогда̀ митрополі́та, но достовѣ́рнѣе є҆́сть, ꙗ҆́кѡ бѣ̀ нꙋне́хїй первосѣда́тель въ то́мъ собо́рѣ.