Колхознӧй сиктын

by Лебедев Михаил Николаевич

Сиктысь сиктӧ ветлігӧн
Аддзан, кыдзи быдлаын
Лӧсьыда да гажаа
Олӧ сиктса морт.
Олӧ сійӧ сэтшӧма,
Кыдзи сійӧс велӧдіс,
Кыдзи тшӧктіс овнысӧ
Дона Ленин ёрт.

Юр весьтаным дзирдалӧ
Енэж вывсянь шондіыс,
Шонді улас му вылын
Дзоридзалан сад.
Сиктса мортлӧн сьӧлӧмыс
Долыдлунӧн тырӧма.
Сиктса мортлы воӧма
Нимкодясян кад.

Петалан кӧ му вылӧ,
Оз нин синмад шыбитчы
Омӧлик лёк вӧв вылын
Гӧрысь да пу гӧр.
Трактор сэні муркӧдчӧ,
Багатыр моз уджалӧ,
Важся ӧтка олысь моз
Му вылас оз дзӧр.

Кытшовтан кӧ видзьяссӧ
Гожся страдна лунъясӧ,
Ружтан шыа пессьӧмсӧ
Он нин сэтысь кыв.
Машинаӧн ытшкӧны,
Машинаӧн куртӧны,
Кыпыд лолӧн сьылӧны
Гажа сьыланкыв.

Уджыс эз ло сьӧкыдӧн,
Уджыс эз ло мустӧмӧн:
Ӧтув уджсӧ уджавны
Позьӧ ворсігмоз.
Мездіс сиктса войтырӧс
Нэмӧвӧйся гӧльлунысь,
Вайис няньсӧ, эмбурсӧ
Миянлы колхоз.

Сикт кузяыс мунан кӧ,
Аддзан, кыдзи сиктыслысь
Сӧветскӧй культураыс
Вежис чужӧмбан:
Быдлаын выль школаяс,
Читальняяс, больничаяс,
Клубъяс да магазинъяс —
Быдтор аддзан тан.

Котӧртӧны школаӧ
Сиктса йӧзлӧн челядьныс,
Сералӧны, дзольгӧны
Нимкодясигтыр.
Ичӧтысянь югыдлань
Туйсӧ налы восьтӧма,
Некод оз ло на пиысь
Важ моз пемыд мыр.

Кыпыд уджӧн, зільӧмӧн
Вӧльнӧй Сӧвет му вылын
Ассьыс шудсӧ ёнмӧдӧ
Быд колхозник ёрт.
Дзормӧм пӧльяс, пӧчӧяс
Шензьӧны да шуӧны:
«Ӧні весиг томмӧдчас
Ми кодь пӧрысь морт!»