Колхозонь эряф/1932/19-20/Днепростройсь анок!
| Днепростройсь анок! |
Мезе стамсь Днепростройсь, кода сон пуроптф и мезе сон эсь эздозонза няфни?
Днепрсь — эсь оцю шинц коряс колмоцекс ляйсь Европаса. Васенцесь — Волгась, омбоцесь — Дунайсь, колмоцесь — Днепрсь. Днепрсь ульс дикарькс эсь европейскай эряй ялганзон (собратиянзон) йоткса. Порогонза — пяк оцю кевонь панттне, конат перьсезь ляйть кинц, тиендезь сонь суднань афуендевиксокс. Аньцек кой-кона отькярь ломаттне машнекшнесть Днепрань порогатненди уема Днепрать эрь пингонь аф кирьфневи виец лама сяда кизонь пинге ляткшнесь апак работафтт. Оцязоронь пингонь правительствась ашезь арьсекшне и ашезь машта арьсекшнема Днепрать работафтомаса планонь тиемать колга.
Сась Октябрьсь. Владимир Ильичсь пуць кемя и цебярь зацача минь масторнеконь инголи:
„Аньцек эста — азозе сон, — мзярда масторланксь ули электрифицировандаф, мзярда промышленности, велень хозяйствати и транспортти ули сувафтф техническай база тяниень пингонь оцю промышленносьцта, аньцек эста минь листяма сяськикс педа—пес“.
Февральста 1917 кизоня Народнай комиссаронь совець путозе уставамс Днепрати строямс гидростанция. Омба масторонь капиталисттне кеподезь рахсемс Днепрань строительствань проектть. Синь азозь, што тя фантазия.
Но „аш стама крепостть, конатнень ба большевикне афолезь сяве“ (И Сталин). Большевикне пуцть эсь инголест задача — 10 кизоста йотамс ся вастть конашка минь лядоме технико—экономическай ширеста инголи моли капиталистическай масторхнень эзда.
Апрельста 1927 кизоня сетьме Кичкас велесь, аф ичкизе Запорожья ошть эзда арафтф строительнай машинань тии вастокс, лама автомобилень якай вастокс. Модати пезфтафт васенце Днепростроень строителень каймотне. Стакатне ульсть оцюфт. Дикай панттнень и ляень шуди веттнень васц эряволь строямс сембе масторланкса инь оцю плотина 60 метрань сереса и 3/4 километрань квалмоса. Днепрать шава берягоц пяшкоць од омба масторонь машинаса. Союзть сембе ширензон эзда тяза сась 17 тьожань модань шувихть, бетонщикт, слесарьхть, машинистт, техникт.
Штоба марамс фундамент плотинати, эрявсь Днепрать шудеманц шарфтомс васенда кяржи шири а меле види шири. И ломаттне тянь тиезь. Шочконь и кевонь марамась ляйть перьсезе, то фкя васца, то омба васца, и Днепрась кулхцондозь шарфнезе кинц, Крхка пеелькс ащи потмаксозонза мадонцть васенце бетононь кубометратне.
Вию паравосне, под‘емнай краттне, подвеснай карьхкятне бетононь туста шоряфксть макссезь инголе пяльдень плотинань пролетти, коса работасьть вишкя и кемоста ащи бетонщиконь отряттне, — ударнай стройкань геройхне. Тяса, плотинать ланкса ульсь тийф бетононь марамаса сембе масторлангонь васенце рекорць. 57 тьожань кубометра бетон марасьть Днепростроень ударникне сентябрь ковста. Тя пцтай 10 проценц касфцы вельф мировой рекордтть, кона путф американецнень мархта Инь цебярь бетонщикнень лемсна — Ткаченко, Романько, Макаренко, — содаф сембе масторланкса. Аф шиса, а часца кассть вишкя ингольдень плотинань „бычокне“. Эрь „бычокть“ — серец 14 этажса кудонь сереса.
Плотинать ваксс ломаттне шувсть шлюз, конань эзга кармайхть якама суднатне алуце Днепраста вярецети и меки. Тя ули васенцесь сембе масторлангонь техникаса каналсь километрань квалмоса сьолкф гигантонь механическай пякстави ортаса Кафта оцю ляень парохоттненди ули кода йотнемс тя каналга фкя пингова.
И вов арась няевикс Днепраса ни оцю плотинаса бетононь стена. Днепрась [ 29 ]покоридондаф большевиконь оцю мяльса работать вельде. Плотинать прудяманц вельде вець кассь 37 метрань сереса. Порогатне ляцть ветть потмос. Вець шуди плотинать гребенензон вельф. Тя ульсь 1932 кизоня мартть 28 шиня. Днепрань ветть богатырень виец шарфць лама турбина, конат ащихть гидростанциянь зданияса эрь турбинать виец сяда пяк оцю сембе Волховстроень турбинатнень коряс. Тяни ни работайхть васенце вете турбинатне, конат максыхть эрявикс энергия. Запорожиянь сембе завоттненди. Сатомшка работафтозь сембе 9 турбинатнень Днепрогэсонь вийсь ули 810 тьожань алашань вийса. Кда йотафтомс тянь ломанень вийс, то Днепрань гиганць полафты 12 миллион ломанень вий али 2/5 талика сембе Украинань эряйхнень эзда.
Днепрогэсонь энергиясь пяк уцес. Фкя энергиянь киловаттчасць (али фкя частонь пинкста 10 ломанень работась) сашондови фкя трьошнекта уцез питнеса. Европаса фкавок электростанциянди аш кода кяльготнемс тяфтама уцезонь колга.
Коза жа йотафтомс тя басьнякс азондови социалистическай гигантонь вийть?
Марса плотинать и электростанциять мархта Днепростройса кармась касома оцю промышленнай комбинат. Тяни ни шумордакшневи металлургическай „Запорожесталь“ завотть строямац конань эса ули 4 доменнай и 10 мартеновскай пянакутт. Строяви коксо-химическай завод, ферросплавонь завод, оцю алюминневай комбинат. Сембоц 7 завотт 30 тьожань рабочаенди. Сембе комбинатть марса од ошть строяманц мархта питнец ули 580 миллион цалковай. Или маластонь пинкть од завоттне получайхть ток Днепрань станциять эзда.
Но тя аф сембе.
Кепотьф плотинать мархта Днепрась вельхтясы веца кяржи кядь ширень берягонц. Вельхтясь лама коське вастт и лоткт. Тянь мархта пуроптф орошениянь тиемс цебярь система. Кяржи берягонь пяле милион гектар степень модась курок шарфтыхть цебярь сьоронь урожаень максыкс, тя крайса пуропневихть ни 9 од оцю комбинатт.
Тяда башка Днепрось арси судоходнайкс — Смоленскайста и Оршаста мянь Чернай моряти Аф лама ковда мелени караблятне грус мархта туйхть днепрань шлюзатнень эзга алу Одессав. А вяди Днеправа кармайхть якама суднат красин и нефта мархтот.
Строительствань плантть коряс днепрань станциясь эряволь шумордамс 1932 кизонь декабрьть 1 шиня. Но ударнай вийсна тьожань геройхнень — рабочайхнень, инжинерхнень, омба масторонь специалисттнень работамаснон вельдя плантть шумордазь пяле кизода инголе — майть 1-це шиня 1932 кизоня Днепрогэссь макссь васенце ток. А октябрьть 10 шиня Совецкай масторсь прьмай оцю сатфкст пятилеткаса, партиять и рабочай клазть гордосцна, стройса ащи социализмань гиганцна.
Днепрогэссонь строительхне аф кадонцазь оружияснон. Пуропцть лама цебярь строяма опытт, тонацть сяськомс—йотамс Америкать, синь кармайхть строяма од, нинге сяда вишке гидростанцият.
| Совецкай масторть гордостец — Днепровскай гидроэлектростанциясь нолдаф. Пуропцайнек сембе виеньконь Днепровскай промышленнай комбинать тиеманц эсь пингова шумордаманц инкса. Инголи од сатфксненди Ленинской электрификациянь фронца! |