Колхозонь эряф/1933/09/Вете кизот национальнай литературать инкса тюремаса
| Вете кизот национальнай литературать инкса тюремаса |
Октябрьскай революциясь макссь пяк оцю возможностть фталу лятф национальносттненди кеподемс эсь лятф, самодержавиянь рамкатненьди кемокстаф культураснон.
Лама сядонь киза люпштаф йомбла национальносттне пяк оцю мяльса васьфтезь Октябрть тя мероприятиянц и путозь сембе мяльснон сонь пяшкодеманц ланкс, лиякс азомс эрь культураснон ингольдень национальностнень культураснонь мархта ряц арафтоманц ланкс.
Мокшэрзянь областень трудяйхне ряцок сембе фталу лятф национальностнень мархта ленинскай национальнай политикать коряс Октябрьскай победань вождть и организаторть — ВКП(б) руководстванц ала тяфта жа сембе эсь большевиконь настойчивосьцнон мархта кярьмоцть эсь культураснон кеподемя. Синь палучасть возможность нолямс синьцень печатнай изданияснон эсь мокшонь, теест шарьхкодеви кяльсост. 4 газетать (конатнень эзда 3 мокшонь и эрзянь кяльсот) и 4 журнальхт (сембе мокшонь и эрзянь кяльса) лисендихть автономнай областень центраса, аф лувомс районнай газетатнень, конат нолявихть пцтай эрь районца.
Фкя изданиякс сембонь нятнень эзда арси „Колхозонь эряф“ журналсь, конац эсь вете кизонь работасонза кемоста содондовсь областень трудяень массатнень мархта.
„Колхозонь эряф“ журналсь васенда лисенць кода общественно-политическай журнал, но тяфта лисендезь сон пяшксеста ашезень пяшкочне трудяй мокшотнень литературати вишкста касы вешфксснон. Сяс партиянь Обкомть инголи арась кизефкс журналть общественно-политическайста литературно-художественнайкс шарфтоманц колга. Тяфтама реорганизациясь цебярьста пяшкодезе эсь целенц. Литературно-художественнайкс лисендемстонза журналсь арась кузницакс, конац ковандай литературнай кадрат коренной эряйхнень эзда, сон кемоста содондовсь нят массатнень мархта и арась кельговиксонди теест, конац ашель кода сатомс тяда инголе.
Нят валхнень виде шиснон ули кода няемс оц ушоды писательхнень и поэттнень сьормаста, конатнень синь кучьсезь „колхозонь эряф“ журналть редакцияс. Няфтян аф лама цитата нят сьорматнень эзда. Фкя оц ушоды писатель — Царапкинць эсь редакцияв кучф сьормасонза сьормады: „журнальт эрь номеронц мон морафнеса васень строчкаста сявомок, мекольдень строчкати молемс. Тя морафнемась кеподезе монь мялезень литературати и мон энельдян теентть, кда тинь няфцасьть тейне кода эряви сьормадомс, то монь улихть лама темане и фактоне, конатнень сьормацайне и кучсайне теентть. Кда можете тейне максомс лезкс, то пожалоста максода, монь пяк оцю мялезе тонадомс сьормадома“.
Омбоце оц ушоды писательсь — коммунарсь Пунтилиць эсь сьормасонза сьормады: „Тяни мон ушодонь кода эряви работама эсь мокшонь литературанеконь ланкса. Эрь шиня сембе пингть, конань муян, путса тя тевти. Надйян, што лездтада мондине работамс мокшонь литературать эса“.
Сембе тя корхтай сянкса, што журналсь арась штабкс, конац вяти руководства оц ушоды писателень и поэтонь армиять ланкса.