Колхозонь эряф/1940/07/Акакий Церетели
| АКАКИЙ ЦЕРЕТЕЛИ. |
| (Шачема шистонза сявомок 100 кизонзонды — 21-VI) |
XIX веконь грузинскяй поэттнень ёткста сембода няеви васта занци Акакий Церетели. Сонь обширнай литературнай наследствац ащи оцю ценностекс. Акакий Церетели, великай грузинскяй поэтсь, ульсь беззаветна преданнай родинанцты и мекольдень шинзон самс служась тейнза. Церетели — народнай думонь инь цебярь выразитель и стойкай борец народть свободанц инкса.
Акакий Церетели шачсь 100 киза тяда инголе — 1840 к. июнть 9 (21) шистонза Западнай Грузияса. Сонь аляц ульсь знатнай, хотя и аф козя, княжескяй родонь. Стариннай обычайхнень коряс будущай поэтть потяй шабакс максозь воспитандамс крестьянскяй семьяс. Саванэ велеса, ваниенц и воспитательницанц — крестьянкать пяле сон эрясь 5—6 кизонзонды самс.
Комсь кизоса цёракс А. Церетели тусь Петербургу и ступиндась тонафнема Петербургскяй университетть восточнай кялень факультетозонза. Тя пингста ушедсь сонь поэтическяй деятельностец. Церетели курок васедсь Т. Г. Шевченкоть мархта. Украиннань великай кобзарть мархта беседась од поэтти тись оцю впечатления и кадсь крхка след сонь эряфсонза. Петербургскяй периодста од поэтсь сёрмадсь лама стихотворения, конатнень эса крхкаста сочувствует родной народонцты, конац куфцесь самодержавиянь игать ала.
А. Церетели ащесь XIX веконь кодгемонце кизонь революционнай демократтнень ширеса. Поэтть эряфонь тевонц сон лувондозе народти служениякс, художественнай литературать лангс ванць, кода „эрь шинь эряфса цебярь и добрай тевонь инкса тюремань оружиянь“ лангс.
Трудящайхненди служениянь ня великай принципненди. А. Церетели илядсь вернайкс куломозонза. Грузияса крепостной правать полафтомдонза инголькиге сон кармась сёрмадома вии и правдивай стихт люпштаф креетьянствать араламанц инкса.
А. Церетели мзярдовок ашезь лотксе тюремда родной народонц ингересонзон инкса — и русскяй самодержавиять каршес и грузинскяй помещикнень-дворяттнень каршес. Путомок эсь инголенза великай цель тюремс царизмать каршес, эсь родинанц национальнай возрождениянц инкса, сон кой-коста крхка каньксса ванць окружающайть лангс. Грузинскяй народть имафтф [ 33 ]свободанц сон сидеста ольксезе, кода кулоф кельгови стирнянь (кепотьксонди, „Сулико“ стихотворенияса, конац арась народнай морокс).
Тяфтама замечательнай историческяй поэматнень эса, кода „Торнике Эристави“ (1884) и „Натэла“ (1898) А. Церетели тага и тага шнакшнезень Грузиянь инь цебярь ломаттнень поступкаснон, ся ломаттнень, конат макссезь эсь пряснон родинаснон инкса. Эсь стихонзон эса сон макссесь народть ёткса популярнай руставелевскяй обраст и тернезень эсь современниконзон аф пелезь тюремс свободать инкса, кода тюрсть витясне — Руставелить поэманц геройнза.
1905 к. революциять А. Церетели васьфтезе, кода люпштаф нароттнень освобожденияснонды ушетксокс, кона учсефоль пяк ламос.
А. Церетелити маласа ульсь народонь братствань идеясь. Сон фалу ценил русскяй культурать, преклоняндакшнесь Украинань поэтическяй генийть — Тарас Шевченкоть инголе, кирдсь дружба Армениянь инь цебярь писательхнень мархта.
Народонь ся братствась, конань колга арьсекшнесь Акакий Церетели, ётафтф эряфс миньцонк. Минь ламанациональнай родинаньконь гражданонза мзярдовок аф юкстасазь великай грузинскяй поэтть.