Эрязста ласьки
Мокшень од стирня
Кели паксява,
[ 39 ]
Паксянь кинява;
Сон кува ласьки,
Меки варжаксни,
Сельмоведняса
Ожа пенц начфни.
Стирнять лангсонза
Акша панарня,
Прязонза сотфкя
Ташта руцяня;
Карьсефт пильгонза
Акша пракстаса,
Сисем ленгаста
Кодаф карняса.
Пужфкя, олафкя
Эвотьф шаманяц,
Лафту ланганза
Срафтфкя шяярняц.
Тяфта ков ласьки?
Ков эряскоды?
Мес кафта пяли
Пелезь ванонды?
Кие эвфтезе?
Кие обжазе?
Кие авардезь
Паксяв нолдазе?
Ласьки аканцты
Пиченя вели,
Меки ванонды:
Сединяц пели.
Салаюфть цёрац,
Вай, сонь обжазе,
Рахазь-пеедезь
Паксяв нолдазе.
Тяни од пингоц
Стирнять шоподсь ни.
Вов мес сединяц
Тотнай, комотни.
Содасы, кулясь
Пачкодсь велети,
Аф пара славась
Келес келемкшни.
Кулянь каннинят
Улихть велеса,
Ламонь кулендихть
Оржа пилесна.
Фкя куля маряйхть —
Тиихть ведьгемонь,
Тиихть ведьгемонь,
[ 40 ]
Оржа кяльнясост
Рахсесазь сембонь:
„Коленди стирьда
Велеса лама“, —
Кяднек—пильгонек
Кармайхть корхтама.
Вов мес велеста
Стирнясь ворьгоди,
Вов мес паксяса
Келукс кольгонди,
Молембачк лятфни
Горяв эряфонц.
Стакаста сюдофсь
Касозе серенц,
Вирень нумолнякс
Ломаньда пелендсь.
Одняста стирнясь
Кармась якама
Аватнень мархта
Паксяв покама.
Мяляфтсы, нуйхне
Рахайхть эсонза,
Мес аф кирдеви
Тарвазсь кядьсонза.
— Алду, сизеть ни?...
— Ха-ха-ха-ха-ха!
Архта куду ни:
Роснень тяйть тапа.
Эх, стирня, стирня,
Сюдоф уроскя, —
И кармайхть нума
Эрязста нуйхне.
Маладсь од пингоц,
Тяни оцю ни,
Аньцек эряфкац,
Вай, аф петневи.
Сякокс козянди
Виенц макссесы,
Эрь кши сускомнять
Ливсьса рамсесы.
Тядяц корхнекшнесь...
Алдусь мяляфтсы
Сонне корхтаманц —
Лядыкс тошкаманц:
„Шятта, Алдуняй,
Мон курок кулан,
Равжа модати
Эряма суван,
[ 41 ]
Мяляфтк: аяш тонь
Тряйце-аляце,
Курок аф ули
Щайце-каряйце.
Урозста, стирняй,
Эрямась цёлак...
Тята аварде,
Ваксказон озак...“
Тяфта корхтамста
Алдуть явсезе,
Кельме трваса,
Конянц палсезе.
Кафцьконянь шудесть
Сельмоведнясна,
Фкя-фкас ашкодовсть
Кафцьконь кяднясна.
„Кулхцонтт, Алдуняй,
Ашунь стирелень,
Ашу сокайнь
Йолма иделень.
Алязе кяжиль...
Вихца максомань,
Стирькс пингоняда
Одста явфтомань.
Кши, ведня лангса,
Идняй, эряме,
Мезе маштоме,
Сянь покодеме.
Сась стака киза
(Ульсь ни идезе) —
Вирень керомста
Шавовсь мирдезе.
Ся шитнень кельмось
Монь сединязе,
Юмась шамастон
Якстерь вернязе.
Удавакс стакаль,
Идняй, эрямась,
Вай, сяда стакаль
Идень касфтомась.
Мзярда сявомань
Аляце рьвакс,
Эряфса марса
Лезды ялганякс,
Эста цёфтамкшнесь
Монь сединязе,
Меки пуромкшнесь
Монь эрьгянязе.
[ 42 ]
Но курок соньге
Нужась керозе,
Козомань урмась
Ваймонц сявозе.
Мяляфтса, сёксесь
Кизоть мельге сай,
Велетнень ланга
Кельмоса уфай.
Эста велети
Сашендсть баярхне, —
Оцю азорти
Дацянь кочкайхне.
Ся шитнень яксесь
Шавфста аляце,
Пелезь кизефнень:
„Мзяра дацяце?“
„Ули, мокшава, —
Валоц маряви, —
Тядде коданга
Сон аф каяви.“
Ламоксть пуромксу
Сонне тернекшнезь,
Кельме седялу
Вихца пякснекшнезь.
Стакаста ётась,
Алду, векозе,
Ашезь топотькшне
Вача пекозе.
Знать, ни тяфтама
Минь уцясканьке,
Сянкса ашуста
Йотни веконьке.
Эх, тонга лядат
Ськамот эряма,
Ськамот эряфса
Нужань няема.
Оржаста ванонтт
Эряфонь кити,
Эста аф ваят
Перьфкат рдазти.
Лама шарьхкодемс
Одста эряви,
Эста эряфце
Аф тапаряви.
Аню акацти
Тя лац изь арьсев,
Кельме цинзерхнень
Сюдофкясь карьсесь.
[ 43 ]
Тяни Сибирьса
Ащи острогса,
Острогонь кенкшне
Пякснефт замокса.
Касат — шарьхкодят,
Мезенкса ащи,
Мес од пингонянц
Тоса ётафтсы.
Мяляфтк валозень:
Кода куйда, пельхть
Баяронь идьта,
Попонь цёрада.
Синь пинень седихть,
Эздот аф виздихть,
Кода тейст лад,
Синь лангсот тиихть.
Ух, ня козятнень!..
Идняй, кульсамак?
Сака тага весть,
Стирняй, паламак.
Касат — сидеста
Ульцяв тят яксе,
Од цёра мархта
Йофси тят латце.
Сетьмоста эряк,
Покотть пяконе,
Эста эрямась
Ули лямбоня.
Шкайти озонкшнек.
Уцясканя вешть...
Мес, тейть якшама?
Орнять потмос кяшть.
Крёсналяняце
Кармай касфтомот,
Семияц оцю,
Аф улят ськамот.
Куломдон меле
Кудняньконь мисы,
Сембе питненянц
Лангозт ётафтсы.
Сон улхка сашендсь,
Минь ни корхтаме,
Эряфцень колга
Лама арьсеме.
Школав кучтанза,
Кармат якама.
Шятта, кой-мезе
Кармат содама.
[ 44 ]
Нинге аляце
Тянь наказазе,
„Тонафтф улеза, —
Корхтай, — Алдазе“.
Ляды валозе:
Пелентть баярда,
Эста мянят тон
Цёлак славада.
Ужялят, идняй, —
Одняста лядат
Тон тядяфтома,
Тядя лемфтома.
Сака малазон,
Сака, Алдуняй.
У-у-ух, ух, ух ух!
Вай, кулан,стирняй“.
Тяфтане Алдуть
Тядяц кадозе,
Тяфтама валса
Сонь бславазе.
Ня валхнень Алдусь
Лац мяляфтсыне,
Вай, ёфси, ёфси
Аф юкстасыне.
Стакаль эрямась
Крёсналянц пяле
Сюдоф Алдути,
Уроз стирняти.
Крёсналяц ламоксть
Сонне пикссезе,
Калень розгаса
Копонц вельхнезе.
Сидеста сюдофсь
Тядянц лятфнезе,
Удомста, онца,
Ламоксть няезе.
Кеняртьф седиса
Эста сргозькшнесь
И сетьмоняста
Кувать аварькшнесь.
Тоса вастстонза
Стяй салаване,
Шкай уженяти
Моли валомне.
Пульцкомне арай,
Кувать озонды,
Шкай уженяти
Нужат азонды.
[ 45 ]
Кода тядяц мярьгсь,
Стане эрсекшнесь,
Коза аф кучсазь,
Тоса поксекшнесь.
Школавга яксесь:
Тонадсь лувома,
Лама молитват
Кармась содама.
Йотнесть шинятне,
Йотнесть недлятне,
Недлятнень мельге
Йотнесть кизотне.
Йотнихть кизотне —
Эряфсь полафни,
Лиякс эряма
Народть тонафни.
Коса вирьхть улендсть —
Тоса паксят ни,
Лангаст сёротне
Пряснон комафнихть.
Тяфта Алдутьке
Эряфкац полафтсь —
Йолма стирняста
Оцю стирькс арась.
Мази келунякс
Петевсь ронгоняц,
Алянь сельме вий
Салсесь мяштеняц,
Крфазне крфась
Сонне шаманяц,
Парьхцинь сюренякс
Цифтордсь шяярняц.
Касомань шовор
Полафтсь прявицка,
Пингонь юксневкшнесь
Кулоф тядяцка.
Ся кизотнень сась
Кельме Сибирьста
Анна аканяц,
Оцю сазорняц,
Кинди азови
Кенярдемасна,
Кинди маряви
Радовамасна!
Корхтайхть, авардихть,
Рахсихть, пеедихть.
Аватне, ялгат,
Месть аф тиендихть!..
[ 46 ]
Сяка шинятнень
Весялгодсь Алдусь,
Лия кинява
Эряманяц тусь.
Шамац мазелгодсь,
Кармась водяма
Стирнят—ялганят,
Кармась содама
Мази цёранят.
Лисенкшнесь ульцяв
Кизонь иляттнень,
Морай вайгялец
Сязендсь ульцятнень.
Сонне кельголезь
Сембе ломаттне.
„Алдусь пяк пара“, —
Корхнесть цёратне.
Мзярда аканяц
Тусь Пиче вели,
Арась аванякс
Мокша алянди,
Тоза конакокс
Яксесь Алдунясь,
Седи вакскава
Акань кельгинясь.
Тосонга пицесь
Цёрань сединят,
Мзярда морсекшнесь
Мокшень моронят.
„Вай, цебярь Алдусь,
Серецка сери,
Содаф, козянди
Рьвянякс моли“, —
Тяфта корхнекшнесть,
Аньцек исть сода
Сонне ёнензон,
Потма думонзон.
Зря кизефнезь
Козя кудатне,
Велень азорхне,
Веронь потяйхне.
— Тядде аф туян.
— Мес, ши валдоня?
— Кенерян нинге,
Пара щаканяй.
— Мяндьсак вастонять,
Сяльде пеняндат...
Азк ляды валцень,
[ 47 ]
Тядде аф туят? —
— Аф, аф, щаканяй, —
Корхтай Алдунясь,
И лиси кудста
Козянь аванясь.
Кяжсна сашенкшнесть
Ляй велень стирьхнень,
Мес панцесыне
Алдусь кудатнень;
Нльне латцекшнесть
Морот ланганза
Сяс, мес уроскять
Козят куданза.
Но курок ётась
Весяла сёксесь.
Эрязста ласькозь
Сась кяжи тялось,
Вельхтязе паксять
Ляпе ловняса,
Ляйхнень седязень
Эчке эйняса.
Кармасть увнама
Ловонь варматне,
Урокодсть вирьге
Эи тараттне.
Эйнь кудряса
Ацавсть вальмятне,
Морасть вармати
Соду турбатне.
Вай, юкставсть кизонь
Лямбе шинятне,
Юкставсть паксяста
Стака тевнятне.
Юксневсть стирьхненди
Сёксень ульцятне,
Аф эрявихть ни
Ульцянь моротне.
Эряви кундамс
Тялонь тефненди,
Кайгиста морай
Келунь кштирьхненди.
Вов тя тялоня
Яксесь Алдути
Сёмкань Ванянясь,
Кудряв шяярнясь.
Кона шабакска
Алдуть кельгозе,
Седи кучкаса
[ 48 ]
Лемонц кирдезе.
А тя тялоть ни
Мяленц азозе,
Лямбе трваса
Стирнять палазе.
„Алду, кельговат,
Лия аф кельган,
Вай, куломозон
Эздот аф яван“.
Тялонь-тялошка
Марса корхнекшнезь,
Эрямать колга
Думснон латцекшнезь.
Ашесть фатя синь,
Йотась тялоське,
Лоткась уфсемда
Ловонь даволське.
Мзярда пеедезевсь
Лямбе тунданясь,
Сиводсь постуфокс
Сёмкань Ванянясь.
Гайнязевсь локшец
Паксять келева,
Увназне-увнась
Пиже лашмова.
Сон эсь воляса
Сиводсь ванома,
Вай, траксонь стада
Мельге якама.
Ванозне ёрась
Ярмакт добувамс,
Штоба улеза
Мезьса рьвяямс,
Штоба кой-мезе
Рамамс Алдути:
Вдь тя сёксеня
Сонь рьвакс сявсы.
Йотай тунданясь,
Йотай кизонясь,
Кизонять мельге
Ласьки сёксенясь.
Сёксенда ёрдса
Кядьстон локшезень.
Эряфс ётафтса
Арьсеф мялезень:
Мази Алдунять
Рьвакс васькафтса,
Кресналянц кядьста
[ 49 ]
Рамазь рамаса“... —
Думсекшнесь Ванясь
Кели паксяса
Абедонди кантф
Кшида ярхцамста.
Весялаль тундась,
Лямботольхть шитне,
Опананятольхть
Сетьме иляттне.
Морсекшнесть илять
Стирьхне, цёратне,
Вай, велень-сядонь
Од вий ломаттне.
Алдусь, Ваняське
Лисендсть юргома,
Вай, кафта-колма
Валонь азома.
Исаня алу,
Вай, синь озсекшнесть,
Ши ётконь кулят
Марса корхнекшнесть.
Мезе шить думась,
Мази Алдути
Илять корхнезень,
Тошксезь-тошксезень.
— Надияк, Ваня,
Рьвясь тонь улян. —
— „Эх, аф надиян —
Козянди туят.
Мельгат мелямба
Козят яксекшнесть,
Лама питнеда
Инксот макссекшнесть.
Кармайхть тяддевок
Мельгат якама,
Стирень прявийхнень
Вай, тапаряма“. —
— Лоткака, Ваня,
Козят аф кельган.
Козя цёранди
Рьвакс аф молян...
Пинет козятне,
Ломань вер симихть,
Кода тейст лад,
Синь лангсот тиихть.
Тяфта куломста
Корхнесь тядязе,
Тяфта корхнекшни
[ 50 ]
Анна аказе.
Вов мес козяда,
Ваняняй, пелян,
Вов рьвянякс мес
Тейст аф аран. —
Тяфта кафонест
Илять корхнекшнесть,
Мзярда ульцяса
Марса ащекшнесть,
Кядень кундазне
Куду тушенкшнесть,
Пара мяльняса
Сёксеть ученкшнесть. —
Эх, думафкасна
Эряфс изь ёта,
Вай, цёлак слава
Алдути токась.
Шять, ни морафтысь
Кунарки шарьхкодсь,
Кодама осал
Алдути вачкодсь.
Но мон азондса —
Кирдеза мяльце,
Кирдеза мяльце,
Хоть морафтомста
Синневи кяльце...
Пяк тят пенянда,
Цёлак аф ули,
Кда морозе
Сембе лувови.
|
