Колхозонь эряф/1940/10/Прославленнай акын

 

ПРОСЛАВЛЕННАЙ   АКЫН

Тядде сёксенда Киргизияса отмечандави выдающай народнай акынть — талантливай композиторть, виртуоз-музыкантть Токтогул Сатылгановть шачема шистонза сявомок 75 кизонц топодемац. Прославленнай народнай акынть юбилейц киргизскяй народть эряфсонза ащи культурно-политическяй оцю событиякс.

Токтогул шачсь беднай семьяса 1864 кизонь майста, Сасык-Джийде велеса, Сусамырскяй волостьса. Аляц сонь — кяльс коре киргиз, эрясь оседлайста, трясь пря модань витцезь, мекпяли эрясь батракокс Казанбак байть ширеса. Тядяц — Бурма — беднай крестьянинть Джолдошть семьяста, маштсь морама, латцесь „кошокт“ — кулыхнень колга авардемань морот. Шабакс шиц Токтогулонь ульсь пяк стака. Сон сонць азонткшнесь эсь колганза: „Пялес вачеда эрямась, алянень-тядянень аф кирдемшка стака трудсна и Сасык-Джийдеть пяк кяжи природац сембе пингс лядсть монь мялезон“. Токтогулонь шабакс пингстонзокиге лиссь лангти моронь латцемань талантоц, но сонь ашельхть возможностенза серьёзнайста работамс тя тевса, сяс мес ульсь батракокс. Сяка пингть, любознательнай и одареннай шабась ашезь новля певецонь фкявок состязания, оцю мяльса кулхцонткшнесь мелодиятненди и мяляфтольхцень синь. Тядяц эрь илядня азонткшнель тейнза народнай ёфкст. Тянь мархта сон лездсь цёранцты художественнай вкусонц касомаса.

1882 кизоня фкя празднестваса Курбан-Тюбинскяй Дыйканбай манапть цёранц певецонц Арзыматть мархта Токтогулонь ульсь состязаниясна. Кемгафксува кизоса бедняцкяй цёрась лиссь победителькс и эстокиге завоевал популярность народть ёткса. Эста жа сонь эвондакшни лия страстец — латцемс музыка. Тостонь правительхне — байхне и манапне враждебнайста васьфтезь юношать смелай и воляшинь кельги моронзон и всякай лаца — подкупса, всякайнь надияфнезь старандасть тиемс сонь эстейст придворнай певецокс. Токтогул тянди отвечась: „Катк мон улян беднай, аньцек кельголемань ба монь народсь. Тейне сяда лама мезевок аф эряви“.

Токтогул якась аулхнень ланга, ульсь честнай инжикс „кыз-оюнатнень эса“ — стирнятнень налхксемаса, выступал народнай праздникнень эса, келиста использовандамок сонцень валда многограннай творчествасонза народнай поэзиять.

1884 кизоня Токтогул сявсь рьвакс эсь велеряйснон Карабалотть стиренц — Тотуень. Ся пингти сон ульсь ни прославленнай акынкс, сонь содалезь аф аньцек родной Кетмень-Тюбеса, но сонь эздонза ичкоздень васттнень эсонга. Сонь „Назидательмай стихонза“, „Алымкан“, „Одксшить колга“ и лиятне народть ёткса пользовандасть оцю популярностьса. Однака, Токтогулонь славанц касоманц мархта сяка пингть кассь Рыскулбекофнень лагерьста сонь врагонзон ненавистьсна. Эстонь Кетмень-Тюбеса Рыскулбекофнень семьясна ульсь инь козясь и влиятельнайсь.

Рыскулбекофне Токтогулонь шачема вастсонза ульсть российскяй царизмать ставленниконза. Синь кирдезь населениять стака рабстваса, путнесть лангозонза пяк оцю подать, кона нинге сяда вишкопнезе родтнень срадомаснон. Народть передовой ломанензон сознаниясост аф ламнянь-аф ламнянь тиендевсть революционнай взглятт. Воляшинь кельги певецсь Токтогул, конац афи няельхце национальнай гнётть, русскяй самодержавиять, ушеткшни активнайста выступандакшнема Рыскулбеконь цёранзон — Дыйканбайнь, Бахтиаронь и лиятнень каршес, лихнемок лангти рдазу тевснон, жаднайшиснон и лицемерияснон. „Вете манапт“ моросонза (1884 к.) Токтогул пяк оцю вийса няфтезень киргизскяй вете властительхнень, конат аф ломанькс пяк кяжиста грабселезь народть.

Колмогемонь кизонзон самс Токтогул ульсь ни общепризнаннай акынкс.

Сонь поэзиянц политическяй киц кизоста кизос сатнесь сяда пяк отчетливай и решительнай характер. 1897 кизонь „Паначфокс панчт“, „Мезьса наслаждениясь“ и лия лирическяй моронзон мархта ряцок, акынць латци обличительнай морот, конат ладяфт тостоконь буржуазиять и русскяй чиновникнень каршес. Тяфтама произведениякс можна лувомс „Ишанкалпа“ морось. Сонь эсонза Токтогул лихнесыне лангти религиознай культонь служительхнень жаднайшиснон и лицемерияснон.

Акынць лама мяль шарфни народти и курок латци стама лроизведеният, конатнень эса пяк цебярьста няеви сонь кельгомац беднотань ся частьти, конац тюрсь аф справедливостть и тостоконь администрациять пяк кяжи произволонц каршес. 1897-98 кизонь пяк якшама тялось населенияти кандсь пяк оцю убыткат. Кочевникнень ашельхть кормасна, и пцтай сембе синь жуватасна кулсесть. Налогонь кочкаматне ашесть кирьфнев. Ламонцне кочевникнень эзда тушендсть эсь родной вастстост. Недовольствась народть ёткса кассь.

1898 кизоня Токтогул рьванц и идензон мархта тунда ранакиге, обычнайть коряс, тусь кизоть ётафтома Ири-сув. Оцю цёранцты — Топчубайти эста топодсь ниле кизот. Тялонда Токтогулонь кулость сембе жуватанза, и ашель мезьда трямс семьяцка. Ири-суса эрясь Токтогулонь приятелец, конац макссесь тейнза материальнай лезкс.

1898 кизонь майста Минь-Тюбинскяй ишанць Мухаммад-Али азсь священнай война иноверецнень каршес. Национально-освободительнай движениясь пяк келемкшнесь и мог шарфтомс всенароднай войнакс, кда ба аф трусливай, предательскяй ролец Минь-Тюбинскяй ишанть, кона выступил ружьяфтома и апак аноклак толпать мархта. Андижанть маласа оцязоронь карательнай отряттне машфтозь повстанецнень мекольдень вийснонга.

Волостной управительсь Бахтиар Рыскулбеков, штоба аерфтомс смелай, рамамс прянь аф максы акынть — Токтогулть, азозе сонь андижанскяй восстаниянь участникокс.

Июнть 11-це шинц карша веть Токтогул ульсь арестовандаф и прважаф наманганскяй тюрьмав. Сембоц Сусамырскяй волостьса ульсь арестовандаф 64 ломань. Арестовандафнень ёткса ульсть сембе ся ломаттне, конат ульсть Бахтиарть аф мялезонза.

Оцязоронь правительствась тись расправа революционна настроеннай народть мархта. Наманган ошса 1898 кизонь августть 3-це шистонза временнай военнай судсь ванозе „крайса русскяй владычествать каршес восстанияса муворукс лувф 64 туземецнень тевснон“. Судса подсудимайхнень муворгофтомаснон инкса свидетелькс лиссь Бахтиар и сонь рамаф ломаненза, кода, например, аульнай старшинась Мамеджан Дикамбаев, пятидесятниксь Осаке Якиев, волостнойть джигитоц Сюттибай Кошаев и Токтогулонь кунардонь врагоц — волостнойти кандидатсь Керимбай Атаханов. Обвиняемайхнень эзда 58 ломань, сяка лувксса Токтогулоньге, судсь приговорил смертнай казньц — пондамс. Однака, туркестанскяй генерал-губернаторсь, военнай министрть разрешениянц коряс, смертнай казнть полафтозе 7 кизонь каторжнай работаса.

1898 кизонь августть 17-це шистонза Токтогул прощандась кельгома рьванц и идензон мархта, конат сяда ламоксть тейнза няемс ашесть сав. Сон ульсь ковандаф кандаласа и прважафоль васенда Красноводскяи, а сяда меле Москуву. Статейнай спискатнень эса сёрматфоль: „Максф полнай казеннай арестантскяй обмундирования, кона сёрматф одежать и обувть колга башка спискаса, и положениять коряс кормовой ярмак. Сонцень ярмаконза аш“. (ЦИА Уз. ССР. Турк. генерал-губернаторть канцелярияц, 14251 № тевсь, 273-274 стр.).

Бай и манап предательхнень лезксснон вельде оцязоронь правительствась тяфта расправился киргизскяй народть кельгома акынонц мархта.

Йотамок кувака и стака ки, 1900 кизонь январьста ссыльнай поселенецень группать мархта марса Токтогул сась Иркутскяи. Знаменитай Александровскяй централти молемста Токтогул ворьгодсь, но кафта ковда меле сон ульсь кундаф и меки ковандаф кандаласа. Ворьгодемать инкса оцязоронь власттне прибавасть тейнза нинге кемгафтува кизот каторжнай работа.

Тюрьмаса Токтогулонди ашесть мярьгонде морамда, но сон сякокс жа латцесь морот. Аньцек колма кизода меле сонь кядьстонза валхтозь кандалатнень, кота кизода меле — пильгстонза. Токтогул работась Круго-Байкальскяй машина кить тиемаса. Сонь современникоц Болот Джыртаков азонткшнесы, кода ссыльнай киргисне синцень лядыкс грошснон лангс русскяй крестьянонь кядьста рамасть балалайка и максозь сонь прославленнай акынти. „Тя аф привычнай инструментть мархта морсезь Токтогул сидеста минь развлекал, — лятфнесы Джыртаков. — А пяк пичедеманц пингста морсель тейнек седиваксстонь киргизскяй морот“. Но тюремнай администрациясь балалайкать сявозе. Токтогул эсь моронзон инкса ульсь озафтф карцеру.

Ворьгодемать колга мяльсь Токтогулонь ашезе кадонда. Ялганзон лезксснон вельде — русскяй поселенецнень, тейнза все жа удалась ворьгодемс тюрьмаста. Сибирьге и аральскяй степнень эзга ламос шарондомда меле, 1910 кизонь сёксеня Токтогул няезень родной киргизскяй панттнень. Родной аулсонза певецть учсезь горя мархта кулят. Рьвац-Тотуя лама кизот лажназь учсемда меле, ашезь надья, што васеди Токтогул мархта, и тусь рьвакс лиянди, а кельгома цёрац Топчубай кулось. Кудоц ульсь срафтф. Эста Токтогул моразе сонцень известнай моронц „Аш монь цёразе“. Тя морось тянемс ляткшни настоящай поэтическяй искусствань образецокс.

Сембе аулхнень эзда пуромкшнесть беднякне-киргисне, штоба приветствондамс эсь кельгома певецснон. Всенароднай кельгомась Токтогулонди мрдафтозе творчестванди вийнц. 1916 кизоть самс Токтогул эрясь зсь шачема вастсонза салава. Рыскулбеконь цёранза, кодак содазь, што Токтогул Сибирьста ворьгодсь, азондозь власттнеди, и певецсь ульсь меки кундаф и озафтф тюрьмав. Но Токтогулонь ичкоздень раднянза кочкасть ярмакт и сявозь сонь порукас.

Певецсь выступал народть инголе, азонткшнесь моронзон эса Сибирьстонь стака, воляфтома эряфть колга. Токтогулонь Сибирьса эрямац пяк цебярьста няфтьф тяфтама произведениянзон эса, кода „Седойгодонь, сиредень мон“, „Ишмамбат мархта васедемазе“, „Страшнай пингть колга ёфкс“ и лиятнень эса.

Йофси одкс кайгозевсть Токтогулонь моронза, мзярда ичкоздень Кетмень-Тюбев сась куля Великай Октябрьскяй социалистическяй революциять колга. 1918 кизоня большевистскяй комиссарть инголе, кона сась од Советскяй властть колга азондома, Токтогул морась Ленинонь колга историческяй мора, кона панчсь од этап аф аньцек акынть сонцень творчествасонза, но и киргизскяй народнай поэзиять сембе развитиясонза.

Земельно-воднай реформать пингста Токтогул яксесь аулхнень эзга и од эряфть колга морсесь морот. Советскяй властень кизотнень Токтогул лама и упорнайста работась. Сонь талантоц панжезь панчсь. Токтогул пяк цебярь моронь и назидательнай стихонь автор, тяфта жа сон ульсь виртуоз-музыкантокс. Мелодиятне, конатнень сон латцезень, сувасть киргизскяй народть музыкальнай культуранц золотой фондозонза.

Токтогул кулось 1933 кизоня; народсь калмазе эсь певецонц оцю почет и кельгома мархта. Йофси куломдонза инголе сон азсь моронь валхт, конатнень эса корхтавсь, што „народсь кармай мяляфтомонза эсь певецонц“. Токтогулонь ня валонза пяшкодевсть. Советскяй народсь пара мяльсонза кирдсы ломанень воляшить честнай и беззаветнай морайнц лемонц.