Колхозонь эряф/1941/01/Маргарита

 

 

Маргарита

Фкя ошса эрясь пяк козя купець. Сон сяшкава козяль, што должеттольхть тейнза иностраннай державатневок. Аньцек ся мархта кальдяволь эряфоц — ашельхть иденза. Вов сон ушедсь сире ломанень мархта корхнема. Сят и мярьгихть тейнза:

— Тинь якада воражьянди-стареценди, кизефнеда волхват: синь кода мярьгихть — стане и тиеда.

Купецсь и сонь авац кулхцондозь тя советть и ушедсть волхватнень толкавакшнема. Ня мудрай ломаттне тейст указвасть:

— Тинь оцю ошева строяфтода богодельнай кутт, аннеда беднайхть, нищайхть, калекат. Мзярда тяфта тихтяда, шачихть идентевок.

И синь ушедсть явома беднайнди подаяния, строяфтома богодельнай кутт. Беднай ломаттне кармасть тейст цебярень арьсема, и кизода меле синь шачсь цёрасна.

Тисть крестина — пяк оцю пир. Тердезень совсем велетнень эзда нищайхнень: симдезень-андозень и макссь оцю подаяния.

Тяни, цёранц шачемда меле сон нинге сяда пяк добрайгодсь, сяда лама жертва заводясь явома.

Колма киза ётазь синь ш ачсь стирьсна — всемирнай красавица Маргарита.

Тага тись сядонга оцю бал-крестина. Волшебник-волхватнень тердезень нинге ранакиге и путсь тейст пяк оцю угощения. Мзярда аделавсь гуляндамась, сон кизефтезень ся ломаттнень:

— Азость, ичкози няи атянят, кодама ули павазоц минь стирняньконь?

Волхватне тейнза азозь, што сонь эряфоц ули пяк кальдяв, сонь мазышинц кувалма кармай шудема пяк лама ломанень вер.

Азондомасна купецть пяк тревожазе. Сон тага кизефнесыне синь:

— А кодане ётама вакска ся несчастьять эзда?

— Хуш пяк трудна, но малость можна пряце идемс. Аньцек тиема тя, пока сон ёмла, мезевок аф шарьхкоди. Путома сон пещёрас, тоса кирдема кевейхксые кизонц самс, штоба тяза няе мезевок и сонценьге кивок афольхце няе. Вешема мархтонза ся пещёрав профессорша бабаня, кона ушеды сонь тонафнемонза.

Сяка ошса купецть ульсь пяк кельгома ялгац поп-протоиерей Воскресенский. Тердезе попть пялонза и тисть совет. Купецсь мярьги попти:

— Давай, батюшка, посабляк тонга тейне: тя тевсь оцю.

Попсь ушедсь указвама:

— Аноклак пещёрав продукта кевейхксые кизонди, а тонць архт Англияв, Лондону, тейть тоса корольське знакомай: анак кядьстонза учительница-бабаня.

Ялгац согласиндась попть валонзон мархта и тусь Англияв. Тоса сиводсь пяк оцю ярмакта бабаня и ускозе мархтонза. Самозонза пещёрась аноклафоль. Попсь служась молебен, крапиндазе пещёрать святой ведьса и путозь тоза Маргарита мархта бабанять эряма.

Сонць купецсь семейканек меки тусь Лондону торгавама, попть кадозе эсь вастозонза азоркс, а стирсь и бабушкась станяк эряйхть пещёраса.

Йотась кемнилие киза. Попсь сяшкава козякодсь, што ушедсь арнема ошева тройкаса. Да кода аф козякоды, кда эстейнза ярмакнень каймоса, а купецти — кайме недть мархта. Козякодсь попсь и кармась думандакшнема купецть стиренц кувалма.

— Мон тяса тяни полнай азоран, молян ванца, кодама красавица тяни Маргаритась.

Наряжась и тусь пещёрав. Пачкодсь пещёрать малас, нежедсь сонь кенкшенц ваксс пильге сурбря лангса, кулхцондсь горбонгодозь и ушедсь сяльде стукама, штоба панжелезь. Бабушкась ювадсь потмоста:

— Кие тя? Кодама аф пара дух сей кандонзе?

— Бабушка, монць тя — батюшкась. Сань варжамонт. Думандакшнень, думандакшнень, мярьгонь: „Хуш ялгазевок кяжияй, молян сембе сяка варжасайне“. Ужялькс араде.

— Аяф, батюшка, аф нолдате: тя вастсь заповежонай, тонць вдь служать молебен, бславидондайть. Грефта содалеть: эцят коза аф эряви. Архт, аф нолдате, аш тяса тонь тевце.

— Ах, коське пакарь! Да мон сембонь лангса оцюван! Тага монь аф нолдат? А то синнеса кенкшть и вихца суван... Мон ушедан преподавать тейнза закон божийть.

— Ну, раз стане — вднать, ащек аф ламняс. Мон стирезти максан предупреждения. Пелян, каба сон тонь эздот афоль эводе. Мон тейнза няфнине, кодама чортсь. Луфтанза чортонди и эводемати сединянцка сязьсы. Тонь платьяцевок стама, равжа шяярьхневок кувакат...

Попсь, мес бабась лувозе сонь чортонди, сяшкава обижавсь, што арама вастонц ашезе мушенда. Но кенкшсь нинге пякстафоль. Йотась мзярксть меки-васу кяженьбачк, арьсезевсь тага стирть кувалма...

— Эх, сире клдом, мон няфтелине тейть, кода батюшкать лангса рахсемс, аньцек Маргарита кяжияфтови, — мрнась пейньбачка попсь.

А потмоса бабушкась корхнесь Маргаританди:

— Йофси, ёфси чортонди похож попсь. Сейчас сон сувай. Варжак, тят эводе.

Панжезе бабась кенкшть. Попсь сувась. Макссть тейнза озама васта и путсть угощения. Ушедсь сон тонафтомонза стирть закон божийти, а стирсь тейнза и мярьги:

— Батюшка, тейне хуш тяты азонкшне. Мон сятнень тондедот лац содасайне, бабушказе ашезе учсе сянь, мзярда тон саят сей, сон инголькиге монь тонафтомань. Монь бабушказе тондедот лама содай. Кда лоткалеть, сяда пара улель. Сембе сяка мон аф кулхцонтте. Мон монць тондедот лама содан.

Попсь эльбафнезень валонзон. Сон аньцек варжакстсь Маргаритань лангс, шорявсь вероц. Тяфтама красавица косонга и мзярдонга ашезь няенде. Священнай валхнень вастс ушедсь азондома приманчивай валхт кальдяв тевти. Бабушкать пещёраста совсем панезе и кенкшть путозе крючокс.

Маргарита няйсы, сатнесы неизбежнай беда, — и ушедсь оцю вайгяльхть авардема. Попсь всякай лаца басяй эсонза и утешандай.

— Месть тят тиенде, батюшка, а мон тя вастса живойста прязень оскверниндамс аф максса! — Азозень ня валхнень стирсь и нардазень сельмоведензон, весялгофтозе шаманц. Сяльде тага мярьги попти:

— Батюшка, кульхть тяни мезе корхтан. Тя вастть бславидондазь монь аляне-тядяне, тонцьке нльне служать молебен. Тяса кальдяв тев мезь мархтонга аф тиян, а вага мезе давай тийхтяма: стама секрет... Аньцек надиязан лангозт... Мон илять вейхкса частса лисян пещёраста и уштфтан баня. Банясь кенери веть 12 частста, и эста мон молян эшеляма, салаване, штоба кивок афолемань няе. Тонгамолят баняв, и эшелятяма марса. Тоса месть кельк мле, сянь мархтон тиентть. — Штоба батюшкась сяда верондаль, сембе валонзонды Маргарита макссь подписка.

Попсь кенярдсь и вихца, вихца тусь тоста. Кудса аф кирдемшкаста учсесь банять яваманц.

Сувась меки пещёрав бабушкась, и кафцьке авардихть.

— Норавак, маминька, тят аварде. Раз монь тонафнемайть оцю наукати, раз азончнить тейне, што улихть солдатт, конат должны ваномс обижаф ломаттнень, минь сонь эшелясаськ пяконя, пси мархта. — Азондозе, кодане ащи сембе тевсь, и прибавась:

— Сейчас молян управляющайти и мярьган баня уштомда.

Лиссь стирсь пещёраста и сай родительскяй кудозонза. Тяса, кодак содазь, што сонць барышнясь сай, васьфтемонза — тройка алаша, карета мархта. Народсь умборондась сембе ваномонза.

Тердезь управляющайть. Маргарита макссь тейнза приказ, штоба уштфтоль баня и аноклафтоль баня коридору смала боцькя. Мярьгсь тага рамамда кота путт нармонень толга и путомс синь смала боцькять ваксс.

Сонць кильтьф тройкати озафтсь кафта кучерхт и тусь ардозь ошева. А ошса ульсь солдатонь полк. И сон таргазе тройканц видеста солдатскяй казармать инголи. Сувась и шарфтсь васенце ротань фельдфебельти:

— Господин фельдфебель, мон сань тяни кизефтемот: макст тейне ротастот вете солдатт. Мон тейть тянкса пандан, мезе тят сяве.

— Можна, — сюконязь отвечась фельдфебельсь.

— Спасиба. И кочкак, господин фельдфебель, ротаста сембода храбрайхнень и штоба улест кядьсост ногайкат. Нилетне хуш рядовойхть, а ветецесь улеза лангсост старшайкс.

Фельдфебельсь сразу кочкась вете солдатт. Маргарита озафтозень мархтонза экипажу, ардсть алянц пяли, тоса стирсь путфтсь синь инголест оцю угощения. Симдезень-андозень и сявозень баняв. Мархтостка сявсть вина и закускат.

Ванцы стирсь, кемгафтувоце частть пялец ни, и корхтай сон солдаттненди:

— Сейчас сай попсь, каясть шинелентень и снярс кяшеда. Мзярда сай попсь и аньцек каясы панаронц и ушеды сувама баняв, старшайсь максы тейнть команда. Кундасть гривада и ногайкантень мархта эшелясть кода эряви.

Марясазь, попсь сай. Старшайсь макссь команда:

— Ну, молодецт, анокт уледа. Варжада аньцек, фатясть сяда осторожна, шумфтома, штоба тяза ворьгоде.

Сувась коридору попсь и пшкядсь:

— Тясат што ли, душенька?

— Тясан, батюшка. Куроконе карянтьфнек. Пяк ламос ни ашеть са.

Аньцек панжезе баня кенкшть, кодак кундазь кафцьке бокста гривада, реськафтозь кияксу и давай керсемс плеттнень мархта. Маргарита кати-коста лихтсь поляна. Старшайсь фатязе ся полянать и тожа попть ушедсь эшеляма...

Маргарита ванондсь лангозост и корхнесь:

— Эрь, батюшка, конашкава цебярь банясь. Тяшкава цебярь, улема, афи учсеть.

Тялязь мзярс долгогривайть, и Маргарита мярьги старшайти:

— Ну, старшай, тяни ацасть толгатнень кияксу, а сонцень навасть пря пяльде смала боцькав и катандасть пуховой ацамть лангса, тейнза эшелямда меле эряви ваймамс цють.

Тиезь стирть мярькфонц, и арась попсь ломанендиге аф похожайкс. Валяндай, кода чорт, кияксса и аньцек куфци.

Попть тяфта стама псиста эшелязь, ашесть када нльне телазонза суронь путома вастовок, толга почкне сембе пезондсть телазонза. Сон ёжедонга маштсь. Мярьгат, вот-вот ваймоцка лиси.

Солдаттнень андозень-симдезень Маргарита, ваймясть тоса лацкас, и корхтай сон тейст:

— Тяни сявость щамонзон и аряда куду. Пандан тейнть работамда и симттядязь тага винада.

Тусть синь, а попть кадозь тозк баня коридору. Очнюндась омбоце шиня обедшкада. Сельмонза цють нинге няихть.

— Эх, мезе тись мархтон. Эрь месендема тяни? Кодане тяни пачкодян куду, кода няфтян пря авазти?

Учезе шоподемать. Пачкодсь кудозонза вень кучкать. Ушедсь стукама. Лиссь каршезонза горничнайц, панжезе кенкшть и ванцы, каршезонза сувай чортсь:

— Матушка, чортсь сувай пялонк!..

Лиссь матушкась, варжакстсь лангозонза и — ах! — прась боком.

Попсь ся ёткова сувась куду и куроконе вельхтязе прянц, штоба сяда пяк афольхть эводе, и ушедсь саворне, саворне корхтама — цють аньцек марявихть валонза:

— Афи содамасть ни. Тяда эводе. Тя аф чортсь, тя — монць, батюшкась. Сатомань пяк оцю беда. Сявондень кассаста колмогемонь тёжянь ярмак и срхксень кучемс синь Лондону азорть мельге, но врьгятсть лангозон юмаф-араф ломатть, ярмаконень сявозь, а монцень вага кода тиемазь.

Банять сёпозе. Азонтка, — попавась илядыкс кулоценьге машфтсы!

— Врачть тердеда, матушка. Куроконе сяда. Тяфтак козонга мон аф яраштан, — станяк ляпоняста эняльдсь попсь.

Сась докторсь и фатязе сонь ужасть:

— Эх, месендедязь лима-сюнотне! Но тят эвочне, тя сярятьфть минь уфазь уфасаськ.

Ускфтозе эстокиге попть больницяв, путозе ваннайс и щипецьса тарксезень теластонза толгатнень и пчкафнесь эсонза круглай киза. Тя лечениясь тейнза стясь пяк питниста.

Бабушкась и Маргарита эряйхть станяк пещёраса.

Попсь кизода меле лиссь больницяста, но пещёрать малаванзонга пелель ётамать, аньцек ширем сельмот ванондоль и фалу мяльшакшни, кода стожамс Маргаритань и бабушкать.

Бабушкась кармась арьсекшнема, што сяда ламос тяса, пещёраса, эрямс аф пчкяй. Коданга тяста ворьгодема лия вастс. Азондозень тя думонзон Маргаританди. Сявок тянь кувалма арьсекшнесь ни, и синь прасть фкя мяльс: пещёраста тума.

Сявсть мархтост лама ярмак и салава веть лиссть пещёраста, и ворьгодсть. Тусть видеста Лондону.

Тяда меле кафта-колма ши ётазь, попсь сиводсь мархтонза кафта ломатть, и мольсть вень кучкать шавомост. Панжезь пещёра кенкшть — тоса кивок аш. Пяк досадондавсь долгогривайсь и кармась думандакшнема, кодане стирть лангс колафнема-калафнема алянцты. Думандась, думандась — смекась. Кучсь азорти, Лондону телеграмма, коса пачфнесь куля, што волхватне аф зря корхтасть Маргаритань кувалма: аф зря синь азозь, што сонь мазышинц инкса пяк лама вер шуди. Сон сёрмадсь:

„Ашель пяк мялезе, ялгазе, ацергофнемс тонь седицень, но монь долгозе мярьгонди мезевок аф кяшендемс. Сатомазь оцю несчастья. Минь бславиндаф стиреньке пещёраста лиссь, бабушкать аделазе, а сонць ушедсь ералашнечендама. Эряй публичнай кудса, и сонь инксонза несколька ломань фкя-фкянь печксть“.

Азорсь верондась. Шорявсь тя куляти пяк седиец и пяк кяжиясь. Сон эстокиге тяштсь Воскресенский поп-ялганцты сёрма. Тоса тернезе сонь Англияв переговорс: мезе тиема стиренц мархта.

А бабушкась стиренц мархта Лондонца самай шобда уголняс сиводсть квартира и эряйхть. Маргарита козонга аф лисенди... Но ярмаксна ушедсть маштома. Стирсь кармась думандакшнема, мезе тиема. Сон вов и корхтай бабанцты:

— Грошнень лангса, бабушка, ламос аф кирдят. Эрявихть коданга ярмакт кальхтячендамс. Архт тячи рамак магазинцта тейне костюм, понань шляпа и тростик. Наряжан кавалеркс, а то барышнякс лисикска мон ошу аф пчкан. Сяльде вешан должность и ушедан работама.

Сяка шинякиге алянь щапне ульсть анокт. Маргарита наряжась кавалеркс и тусь ошень центрав. Моли тротуарга и афи фатясь, кода кружендазь сонь стирьхне, од аватне. Кажнай эци ваномонза. Йотай корольть дворецонц вакска. Ванцы, сай каршезонза пяк важнай, наряжаф аля. Тя ульсь министр.

— Здорова, молодец!

— Здравствуй, барин!

Баярсь кизефтезе сонь:

— Коста угадять, молодец, минь ошезонк. Тяфтама кавалер тяса ашезь куленчнев. Кодама тон ломанят?

— Мон сань ичкозде. Мон российскяй ломанян, сиротан. Аляне-тядяне кулость и илядонь ськамон. Тяни вешендян должность: кодама-кодама управляющайкс или бухгалтеркс.

— Э-э, молодец, тонь бта шкайсь кандонзе. Тейне эряви управляющай магазиттнень лангс. Кодама сяват жалования ковти?

— Мезевок мон пока аф анан. Ванцак работазень: пади, мон семишниковок аф тиян.

Баярсь кенярдсь, сявозе эстокиге эсь пялонза, путсь инголенза угощения, и афи м арязь корхнеманьбачк, кода шоподсь шиське.

— Матт, тязк, Ванюша, илядь ни, квартиразт якамс ичкозе, тяк маятафта пряцень, — кармась сонь кирнемонза тозк удома баринць.

— Аф, барин, тязк мон аф удан. Монь квартирасон ули бабушказе, сон ушеды монь инксон канзечнема. Мон саян шобдава, туса мархтон бабушказеньге и вейхкса частса ушедан работама. Аньцек сатоза товарце тейне мишендемс.

Кодак лиссь Ванюша, сонь тага кружазь, кода каруфт. Эрь стирсь ёрай варжакстомс лангозонза, эрь од авась ёрай пшкядемс тейнза. Толкавайхть эсонза, коса служай, коста саф сей.

Сась шобдавась. Ваня мольсь торгавама. Народта магазинть инголи пуромсь несколька. Сувасть баринть мархта Ванясь потму. Кавалерсь и мярьги азорти:

— Тячи монь кадомак ськамон магазину торгавама, аньцек азость, кона товарсь мезьда мишендема.

А товарда аноклафоль пропасть. Колма кизонди сатольхть мишендемс.

Панжезь магазинть, умборондась народсь, пока каязе верхняй щамонц. Ушедсь мишендема. Кона товарсь тии цалковай, сянди колма цалковайхть, а народсь фалу эци и эци рамама. Ярмакнень Ваня валясыне счётфтома. Илядьс ашезь када магазину синтьф пиле салмокска. Пякстазь магазинть, ушедсть ярмакнень лувома — насилта лувовсть.

— Ну, барин, давай тяни расчёт тячиень шить инкса.

Баярсь мярьги:

— Сяфть тонць, мзяра кельги седице.

— Пока аф эряви мезевок. Спасиба принядондамайть, няить монь сиротаксшизень.

Эряй министрть пяле Ваня бабушканц мархта — тейст сембе почётсь тоса. Азорть ульсь стирец Актриса. Сонга афи лоткси лангозонза ванондомда. Баярсь баяр авать мархта тожа думандайхть эсь ёткова: тя кавалерсь аф мяндема, максома рьвакс стиреньке.

Министрсь курокста сяшкава козякодсь — перебил сембе ошть. Кавалерсь пяк прославился. Сон министрть пряма названнай овоц. Аньцек лиси ошу, графт, графинят — кядняда сонь, сембе ёрайхть знакомондамс.

И вов тяни кавалерть эряфоц кольсь. Барышнясь, министрть стирец, мяленцка сонь мольфтезе: давай да давай венчандатама или лиякс коданга... Ванюша няйсы: тевсь козонга аф ярашты, сась пеняти.

— Но, барин, тяни давай расчёт. Мон туян.

Баярсь эводсь:

— Мес тяфтане? Мезь мархта аф довольнаят?

— Вов мезь мархта, барин. Актриса тейне покой аф максси. Давай да давай венчандатама или илякс коданга. А монь нинге кизоне ашесть са: тейне нинге 16 киза. Мон меки туян — сяда пара ули.

— Ага, вона кие виноватсь. Ах, швалень!.. Актриса, сака сей! — сявсь ногайка, валозе кеденц, мзяра тяльги, и корхтай тейнза:

— Кда тонь кувалмат Ванюшка туй, то нинге аф тянь няят.

Кавалерть тевоц петевсь. Меки ушедсь прогулкас — коза якама. Актриса венчандамать кувалма оду фкявок валня изь мянне.

Сась корольть именинац — оцю праздник. Мольсть корольть пяли праздникс министрське сембе семьянц мархта и кавалерське бабушканц мархта. Тоса корольсь макссь тейст почётнай васта. Ваны кавалерсь: инжихнень ётксот алянза-тядянзовок, батяцка и алянц кельгома ялгац русскяй священниксь протоиерей Воскресенскяйське, конань Маргарита „эшелязе пси баняса“.

И вов ушедсь балсь. Кругом — оцю баярхт, ламотне сафт конакокс иностраннай державаста, — и сембе синь ваныхть кавалерти, дивандайхть мазышинц лангс.

Бабушкась стясь вастстонза и мярьги:

— Ваше именитое королевское величество, нельзя ли азонтфтомс монь цёразень кядьста фкя аф оцю расскаскя? Сон сембонди ули пяк интереснай. Но эрь кулхцондысь должен максомс подписка: рассказть аделамс киндиге аф пшкядема, аф азома фкявок туркс вал, а кие азы, сянь кядьста васенце валть инкса — вете сятт цалковай штраф и сембе инжихнень сельминголе кеветиексть розгаса каяма, а омбоце валть инкса тёжянь цалковай штраф и комсь ветексть розгаса. Вдь интересна ули?

— Азонтт, почтеннай инжиньке. Минь раттама сембе кулхцондомс, — мярьгсь корольсь.

— Приветствуем, молодец! Азонтт! — ювадсть перьфпяльге конакневок.

Кандсть розгат, анокласть палач. Корольсь приказал ушедомс рассказть.

Кавалерсь арась публикать кучкас и кармась азондома:

„Вов, куледа. Великай и славнай Россияса эрясь пяк козя купець. Тейнза мянь должеттольхть иностраннай державатневок, но аньцек ся кальдяв вастсноль — ашельхть идьсна“.

Сон азонды и азонды эсь эряфонц кувалма. Аш кашт моли. Сембе шуфтомсть бта фкя вастс. Пачкодсь сянди, кода Маргаританди пещёрав якась попсь, кода уштфнесь стирсь тейнза баня и кода тоса сонь „эшелязь“.

Тя вастса кулхцонды попсь ашезь кирде, стясь вастстонза и мярьги.

— Ваше королевское величество, тяса честнай и благороднай лицат ащихть. Минь саме праздникс, тонь чествондамот, а сон азонды кулемска аф пчкяй басня, кодамовок визьксонь аф содай васькафнема.

— Лоткак, чорт долгоривай! — цяткофтсь корольсь. — Путода тейнза вете сятт цалковай штраф. Карянтьфнесть лиме-сюноть. Коса тоса палачсь? Дайте сей сонь!

Карянтьфнезь протоиерейть. Палачсь макссь копорезонза кеветие розга, и корольсь корхтай попти:

— Озак меки вастозт да, варжак, оду тят эльбяде. Содак кулхцондомацень и сембе. — Тяда меле шарфтсь кавалерти:

— Продолжай рассказцень.

Азондсь, азондсь тага Маргаритань кувалма, шумордазе сембе баснять и мярьги:

— Баснясь аделавсь, ваше королевское величество. Красавица Маргаритась — тя самай мон. — Сон юксозень вдруг пунянзон, штафтозе мяштенц, и сембе кулхцондыхне няезь, што кавалерсь ульсь стирь прокс.

Маргарита аварьгодсь и сельмоведеньбачк сюконясь сембонди:

— Простиндамасть монь, мес эсь прязень азондыне баснякс. А тя долгогривайть мархта тяни месть тяда тиенде.

Корольсь комотсь вастстонза и уткстсь кяденц яфодезь:

— Пондамс сонь сейчас жа!

И попть пондазь.

Меки ушедсь весяласта гуляндамась.

Сёрмадозе Я. К. Чекашкин,
Ковылкинскяй р-н, Порапа веле.