Колхозонь эряф/1941/05/Бурясь и вармась
| БУРЯСЬ И ВАРМАСЬ |
Эрясть цёрась сестранц мархта кафонест. Тядясна-алясна ашельхть.
Фкя шобдава шись ульсь мани, лямбе, менельса ашель фкявок туцяня. Цёрать сестрац тусь вири, и меки самстонза схркась оцю буря, кеподезе сестранц и лийфтезе кати-коза.
Ламос учсь цёрась сестранц эса, а сестрац нинге изь сашенда. Цёрась пяк тоскавась инксонза и арьсекшнесь: коса тяни сон, али, пади, шисонга ёфси аш?
„Ожу, молян вешемонза“, — корхтась цёрась.
Сон сявсь копозонза сумка, кшиня мархта, и тусь сестранц вешендема. Вешендсь ши, недяля, киза, сестранц ашезе му.
Весть сон мольсь вирьге и мусь виреста кудня, и сувась. А кудняса эрясь охотник атяня. Атясь озафтозе, андозе, кизефнезе и меле мярьгсь тейнза:
— Илятт, цёра, мархтон охотендама, охотендат кафта кизот, и азса, коса сестраце.
Согласиндась цёрась и кармасть охотас якама. Весть ваны, атясь канды копсонза офта. Сон ласьксь, фатязе атять копста офтть и кандозе куду.
— Тяни ва мезе, — корхтась атясь, — сяфть пеель и ваткак офтть, аньцек тят кастя кеденц.
Цёрась пяк маштоль кедень ваткама и вестенге ашезь касне кетть.
Кельгозе атясь цёрать тя работанц инкса и корхнесь:
— Лацкас аделасак кафта кизоть, мон максан тейть награда.
— Ладна, — мярьгсь цёрась. И сон старандазь работазень кафта кизотнень.
Кафта кизонь работада меле атясь кизефтезе цёрать:
— Мезе тейть тянкса эряви?
— Мезе максат, — мярьгсь цёрась.
Атясь шукадезе прянц и мярьгсь:
— Аде мархтон карду, мон максан тейть алаша и сабля. Тя алашась лии туцяда вярьге, а саблясь керсыне любовай панттнень.
Максозень алашать и саблять, азозе сестранц, и тусь цёрась вешемонза. Ламос арнесь цёрась, и вдруг алашац лоткась и корхтай:
[ 58 ]— Цёра, няят мезевок?
— Аф, — отвечась цёрась.
— Ватт сембе шири и няйсак, — мярьгсь алашась. Цёрась варжакстсь кругом и мярьгсь алашати:
— Няян оцю здания, ваксстонза шуфттнень вии вармась синни.
— Тя вармать мархта минь карматама тюрема, — мярьгсь цёрати алашась. Цёрась лихтезе саблянц и корхтай алашати:
— Эста ина сяда вишконяста лийхть, а мон керсеса саблять мархта.
Алашась кеподсь вяри, вишкомсь, и васедсть синь туцятнень ала и кармасть тюрема. Тя тюремасост цёрась крошиндазе вармать, и сувасть зданиять пирьфи. Пирьфса сон мярьгсь алашати:
— Тон ащек, а мон суван зданияв.
Тяфта и тись. Сувась зданияв, а зданияса ульсь клянцеконь комната, коста марявсь стирень морама вайгяль. Сувась сон комнатавга и кармась стирть кизефнема. Стирсь азондозе, коса сонь сестрац.
А цёрать пяк кельгозе стирсь и тумстонза авардезь корхтай тейнза:
— Сувак меки ётамстот, цёра.
— Ладна, — мярьгсь цёрась и тусь алашанц мархта сяда ичкози.
Аф ламос ардомда меле алашась кизефтезе цёрать:
— Цёра, няят мезевок?
— Няян, — отвечась.
— Мезе?
— Пяк сери дворец.
— Тяса тейнек сави пяк тюремс, ульхть сяда оржа, — мярьгсь алашась.
Лийсь цёрась дворецти и лоткась алашанц мархта пирьфозонза. Алашанц кадозе пирьфи, а сонць сувась дворецу. Дворецса ульсь 13 комната. 12 комнатать эса утцель бурясь, а фкять эса марявсь авардема вайгяль, тя ульсь сестрац. Цёрась няезе сестранц, и ашкодсть авард езь палама.
— Местеме сать, браткяй, смертезт? — корхтай сестрац, — тяса эряй сонць бурясь, кона монь виреста самста саламань.
Синь ашесть кенере сембонь корхтамска — вдруг шерьхкозевсь дворецсь. Тя лийсь бурясь.
Цёрась ластязе алашанц, кеподсь каршезонза. Тя бурясь ульсь пяк вии, сон 12 прянц мархта шорсезень морятнень и панттненьге. Каршек васедемдост инголе цёрась пешкодсь тейнза:
— Тюрят али тяфтак юмат?
Бурясь отвечась:
— Сязентте инголи, а сяльде корхтан мархтот.
Каршек васедемстост цёрась керозень сонь 6 прянзон, но [ 59 ]бурясь врьгятсь нинге цёрать мельге панема. Цёрась шарфтозе алашанц и керозень илятф 6 прянзонга.
Тяда меле сявозе сестранц и ётамстонза сявозе стиртьке, конань идезе бурять брадонц (вармать) кядьста. И эряй эсь кудсонза мархтонза. Сестранц сявозе корольть цёрац.
| Сёрмадозе И. Сурдяев, Инсарскяй педучилищань учениксь. |