Кулӧмдінса бунт

by Нёбдінса Виттор

Йӧз:

Кипрушёв Ӧнись Гриша — Кулӧмдінса «гӧлӧва» (старшина), ар 50, сьӧд морт, олӧ озыра, асьсӧ вылӧ пуктӧ.

Матрен — сылӧн гӧтыр, ар 45, полысь, рам нывбаба.

Русинов Тима Митрей — налӧн зять, писар, отставнӧй салдат.

Попов Елесь Иван — сылӧн помощник, ар 40, сьӧдов морт, ичӧтика чотыштӧ.

Попов Елесь Габӧ} Кулӧмдінса крестьяна, ставныс олӧма йӧз

Попов Елесь Рӧдь

Попов Семӧ Миш

Турьев Матвей Педӧр

Кипрушёв Опонь Васька

Морокин Сергей Сидӧр

Попов Семӧ Тикӧн

Сладкоштиев Епрем Ярӧ — Носимса крестьянин.

Васьӧ Дарья — Елесь Габӧ гӧтыр, збой нывбаба.

Волков — исправник, роч.

Нагель — Вӧлӧгдаса палатаысь управляющӧй, роч.

Питерса военнӧй округысь жандарм — полковник, роч.

Ӧпичер — роч.

Нехорошев Васька Марка — Кулӧмдінса крестьянин, ар 40, рыжӧй.

Кӧчанов Ӧвдей Кузьма } сотскӧйяс

Рассыхаев Митрей Варлам

Пӧлик — гӧлиник крестьянин, пӧрыськодь нин.

Балин — кӧнӧвал.

Станӧвӧй — роч.

Шахов Васька.

Салдатъяс, мужикъяс, нывбабаяс.

Вӧчсьӧ 1841–1843 воясын.

МЕДВОДДЗА ТОР

Вӧчсьӧ Ӧнись Гриша ордын. Керка пытшкӧсыс (горничаыс) бура гажа: шуйгавылас ӧшиньяс, енув пельӧсын пызан, вевттьӧма пызан дӧраӧн, веськыда ӧдзӧс керкаӧ; веськыдвылас мӧд ӧдзӧс — посводзӧ, пельӧсас шкап, джоджсӧ вольсалӧма мича джодж дӧраясӧн; уна улӧсъяс. Тувйын ӧшалӧны паськӧмъяс.

Арся лун. Праздник. 1841-ӧд во.

Пызан дорын пукалӧны: Ӧнись Гриша, Тима Митрей да Елесь Иван. Пызан вылас паськӧдӧмаӧсь кабалаяс. Митрей чуньнас визьтӧмӧн видзӧдӧ гижӧд вылӧ (кабала вылӧ), Иван гижӧ. Гриша юрсӧ гӧгрӧдлӧмӧн висьтавлӧ да юасьӧ, сёрнитігӧн кияснас шлапкӧдлӧ пызанас. Занавес восьтігӧн Матрен пыртӧ яндӧваӧн сур, кӧсйӧ пуктыны пызан вылӧ да — некытчӧ, пасьтала кабалаяс, сэсся кутӧ яндӧвасӧ киас.

1-я петкӧдчӧм

ГРИША (Матренлы). Но, мый сэтчӧ дувгӧдчин? Пукты! Эн мешайтчы тані.

МАТРЕН (чургӧдлӧ ӧтарӧ-мӧдарӧ яндӧвасӧ, корсьӧ пуктанін). Сійӧ жӧ эськӧ видзӧда да, некытчӧ пуктыныс, Григорей Ӧнисимович, кабалаясӧн став пызансӧ тыртӧмныд да.

ГРИША. Но, йӧрмин тай сэсся дзикӧдз, пикӧ воин. (Босьтӧ Матренлысь яндӧвасӧ.) Вай, ме ачым пукта. (Кӧсйӧ пуктыны да местаыс абу. Сэсся юӧ дорсьыс.)

МИТРЕЙ (юрсӧ лэптӧ). Бура ковмас артавныыд тайӧс, Григорей Ӧнисимович. (Чуньнас тувкйӧдлӧ кабала вылас.)

ГРИША (усъяссӧ чышкӧ кинас). Арталам, зять. Куимнад ӧні дивъя артавныыд, ме тай нӧ во квайт кымын ӧтнам артавлі да пыр жӧ артавлі, дай артавлісӧ пыр стӧч... Вай, зять, горштӧ веськӧдышт. (Сетӧ яндӧва.)

МИТРЕЙ. Кыдзкӧ ӧд быть артав, шурин. (Юӧ.)

МАТРЕН. Мый нӧ ті вӧскресенньӧ кузьтаыс талун арталанныд?..

ГРИША (скӧрысь Матренлы). Тэныд, баба, татчӧдз абу могыс, ассьыд уджтӧ тӧд.

МАТРЕН. Ме нинӧм ог шу, Григорей Ӧнисимович... Грексьыс пола-а, вӧскресенньӧ кузя, мися, мыйкӧ уджаланныд да...

ИВАН (юрсӧ лэптӧ). Грек кӧть милӧсьт, Матрен тьӧт, а быть уджав обществоыдлы. Бур йӧзлы праздник талун, а ми со уджалам: вот тшупам.

ГРИША (Иванлы). Тэныд, Иван, ичӧтик жӧ могыс сэтчӧдз. Вӧч, мый вӧчан... (Чуньнас индӧ яндӧва вылӧ.) Со, юышт сурсӧ дай гиж. Тэнад, дзоля писарлӧн, ичӧт на чиныд, кытчӧдз оз юавны, эн сюйсьы. (Матренлы.) Тэ сэсся, баба, мун татысь, эн мешайтчы миянлы. (Иван юӧ.)

МАТРЕН. Час, яндӧвасӧ босьта да муна. (Босьтӧ Иван ордысь яндӧва.) Ещӧ нӧ колӧ оз, Григорей Ӧнисимович, сурыд?

ГРИША. Мун, шуӧны тэныд! Мый сэні бызгыны пондін? Ковмас кӧ, ачым кора. (Матрен петӧ.)

2-ӧд петкӧдчӧм

ГРИША (аслысмоз). Быд грекысь кӧ повны, сэсся кӧть жель эн бергӧдлы. Кутшӧм ен водзын грешитам — сійӧ ен и прӧститас... Ӧти праздник эз на кольлы менам вичкоӧ ветлытӧг — юрбита-кевмыся пыр став общество пондаыс. Сэсся ӧд тайӧ пызан саяд лыддьысьӧмыд абу кутшӧмкӧ сьӧд удж... (Митрейлы.) Нолтӧ, Митрей зять, уна-ӧ тэ ногӧн лои?

МИТРЕЙ (видзӧдӧ кабалаяс вылӧ). Куш локтан во вылас вотыс кайӧ податнӧй список серти 6114 р. 21 к. Миян Кулӧмдін обществоын 754 душ; быд душ вылӧ сійӧ воӧ 8 рублей 11 кӧпейкаӧн... (Иванлы.) Сідз, Иван Елисеевич?

ИВАН. Пӧшти сідзи, Митрей Тимофеевич, муртса озджык во сы мынданас, 73 кӧпейкиӧн вылынджык сэки став суммаыс лоӧ.

ГРИША. Вылын понда немтор, медтыкӧ улын эз ло-а. Сэки аслад зептысь лоӧ пуктыны... Уна-ӧ вылыныс, шуан?

ИВАН. 73 кӧпейки, Григорей Ӧнисимович.

ГРИША (сьӧлыштӧ). Тьпу! Ме чайті кӧ 73 рубли... «73 кӧпейки»... сьӧлыштӧм доныс оз сулав... Дай сэсся став вотыс зэв улын — 8 рублей!.. Этша!.. Но, водзӧ лыддьы, зять!

МИТРЕЙ (кабала вылӧ видзӧдӧмӧн). Водзӧ ӧд сэсся недӧимкаясыд, шурин...

ГРИША. Недӧимкаяссӧ ӧд колӧ жӧ перйыны, зять? Кыссьӧ нин, гашкӧ, во дасъясӧн... Рассыхаев дырся на эмӧсь недоимкаясыс... Уна-ӧ нӧ тэ пуктан, зять, ставсӧ?

МИТРЕЙ. Мыйта пасйӧма торъя тетрадьӧ, сійӧ и лыддям, Григорей Ӧнисимович. (Видзӧдӧ кабалаяс вылӧ.) Штрапъяс вӧр кералӧмысь 800 чӧлкӧвӧй, сэсся пӧдаркияс вылӧ чиновникъяслы 2363 р. 05 коп., сэсся воддза недоимкаясыс 5364 р. 16 коп...

ГРИША. Но, уна-ӧ сійӧ ставыс лоӧ?

МИТРЕЙ. Ставыс 8527 р. 21 коп. Сідз абу, Иван Елисеевич, тэ серти?

ИВАН (видзӧдӧ кабалаяс вылӧ). Сідзи — 8527 руб. 21 коп.

ГРИША. Сідзкӧ, вернӧ?

МИТРЕЙ. Кыкнаннымлӧн сідзи да, дерт, вернӧ — 8527 р. 21 к... Быд душ вылӧ тайӧ воӧ 11 р. 31 кӧпейкаӧн. Сідз, Иван Елисеевич?

ИВАН. Пӧшти сідзи, — муртса озджык во сы мынданас, 54 кӧпейкиӧн вылынджык лоӧ суммаыс.

ГРИША (сьӧлӧмысьджык). Мый пыр вылынсьыс полан, трустӧс. Тэнад пыр вылын — вотыд вылын, недоимкаыд вылын. Ме ногӧн, кымын вылын — сымын бур. Тэ ӧд эн на сборщикавлы да он тӧд. А ме вывті ёна нин мунліс быдторйыс. Квайт во ӧтнам ме вӧлі челӧвальникӧн да менам ки пыр бура уна деньга нин исковтіс... Сэки ме ачым вӧлі ыджыдыс став вылас. Некутшӧм начальство ме водзын эз ыджыдавлы. Ещӧ быдӧн вӧлі пӧчитайтӧны. Эг ӧд ӧтчыд ме и Сыктывкарад лэччыв, гашкӧ, дасысь нин вӧвлі. Пыра вӧлі окружнӧй начальник ордӧ да милости просим пӧ, Григорей Ӧнисимович, сёйны-юны, гӧститны, — медбур гӧсьт вӧлі ме... дай ӧні на сэтшӧм. (Иванлы.) А тэ сэні кутшӧмкӧ пӧлтинник вӧсна сёрнитан!.. Код лыддьыліс менсьым казнасӧ? Гашкӧ, недоимкаыс абу вит тысяча чӧлкӧвӧй, гашкӧ, дас тысяча!..

ИВАН. Ме нинӧм ог шу, Григорей Ӧнисимович, висьталі тай сӧмын, кыдзи артмӧ арталӧмыс...

ГРИША. «Кыдзи артмӧ»... Кыдзи ми вӧчам, сідзи и артмас, кыдзи ме шуа, сідзи и лоӧ.

МИТРЕЙ. Вернӧ, шурин! Иван Елисеевич оз на тӧд пӧрадоксӧ.

ИВАН (сьӧлӧмсьыс). Сідзкӧ, нинӧмла тані, Митрей Тимофеевич, миянлы и артавныыс, мед Григорей Ӧнисимович шуас быд душ вылӧ 25 чӧлкӧвӧйӧн — дай ставыс...

ГРИША (скӧрысь). Верма дай шуа, окотита кӧ, сы вылӧ ме и власьт имеита! Сытӧг некутшӧм пӧрадок оз ло!

МИТРЕЙ. Вернӧ, шурин! Власьттӧг кутшӧм али пӧрадок! Сы вылӧ ӧд тэнӧ, Григорей Ӧнисимович, обществоыс и бӧрйис.

ГРИША. Дерт жӧ, зять, сы вылӧ! (Иванлы.) Гӧгӧрвоан тэ?

ИВАН. Кыдзи нӧ ог гӧгӧрво, Григорей Ӧнисимович. Шуа тай, мися, тэ верман воттӧ 25 чӧлкӧвӧйӧн душ вылӧ пуктыны... Кызь чӧлкӧвӧйнас пӧшти воӧ нин-а...

ГРИША (Митрейлы). Мыйӧн душ вылӧ воӧ, зять, ставыс?

МИТРЕЙ (видзӧдӧ кабала вылӧ). 8 р. 11 к. да 11 р. 31 к., ставыс лоӧ 19 р. 42 к. душ вылӧ. Сідз, Иван Елисеевич?

ИВАН. Дерт, сідзи... Тавосяыд вӧлі дас нёль чӧлкӧвӧйӧн душ вылӧ, а мӧд во кежлӧ пӧшти кызьӧн нин... Ме чайта, сьӧкыд лоӧ мынтыны йӧзыдлы...

ГРИША. Этша на, шу, — этша!.. Ыджыд-ӧ нӧ сійӧ деньга — кызь чӧлкӧвӧйыд? Миян обществоын кык душысь унджык некодлӧн абу... Нелямын чӧлкӧвӧйыд абу на сё чӧлкӧвӧй!.. Ме тай нӧ рӧскодуйта вонас, гашкӧ, кыксёӧс да нинӧм ог шу... Мынтасны на и кызь витнас, шуам кӧ... Быть ӧд мынты!..

МИТРЕЙ. Вернӧ, шурин, мынтасны, быть ӧд мынты.

ИВАН. Ме тай ог шу: оз мынтыны ли, мый ли, сӧмын сьӧкыд лоӧ перйыны сы ыджда воттӧ.

ГРИША. Перъям! Вотыд ӧд абу кутшӧмкӧ йӧзкостса удждысьӧм. Сійӧ ӧд мунӧ сарскӧй казнаӧ, сар-государ тшӧктӧ перйыны. Кодкӧ нӧ лысьтас сылы прӧтивляйтчыны? Гоз-мӧдӧс розгаалам да колода пытшкын видзыштам да, небось, мынтасны, котӧрӧн ваясны расправаӧ, оз ков и корны.

МИТРЕЙ. Вернӧ, шурин!.. Кыв шуны весиг некод оз лысьт прӧтив.

ГРИША (ошйысьӧмӧн). Кыв шуны ещӧ дай... Мед видлас кодкӧ, кучикыс кӧ лудӧ!

ИВАН. Став обществоыс кӧ кутас шуны, став мирыс...

ГРИША (торкӧ скӧрысь). Мый?! «Мир»... (Петкӧдлӧ кабырсӧ.) Со кӧні обществоыс и мирыс менам!.. (Иванлы.) Тэ, Иван, тыдалӧ, Габӧ вокыдлань жӧ кусыньтан. Виччысь, эн вывті ёна ышмы... Ме ӧд аддза: ті — Ельӧсь котыр — мукӧдсьыс вылӧ кӧсъянныд пуксьыны, чайтанныд асьнытӧ зэв нин дошлӧйясӧн... Но, ме чайта, меысь дошлӧйыс Кулӧмдінын абу на... Менӧ став округыс тӧдӧ, став начальствоыс тӧдӧ: тайӧ пӧ Григорей Ӧнисимович Кипрушев!.. Мыйла тӧдӧны? Мыйла чорыда кужа власьтсӧ кутны — сійӧн и тӧдӧны. Мукӧд моз ме ог пӧтачит, сэки ставыс разьсяс, пӧрадок дзугсяс...

МИТРЕЙ. Вернӧ, шурин. Сійӧн ӧд тэнӧ и обществоыс бӧрйис сарскӧй служба вылас...

ГРИША. Мый нӧ меным обществоыд? Менӧ, гашкӧ, тӧдӧ ачыс государ-император Микулай Павлович да!.. Со ӧд ме кутшӧм морт! Абу кутшӧмкӧ мӧмӧт!.. Мый ме шуа — лоӧ кывзыны, мый тшӧкта — лоӧ вӧчны, менам кыв — закон!

ИВАН. Ме тай ог мун, Григорей Ӧнисимович, тэныд воча, шуа сӧмын, кыдз эськӧ, мися, бурджыка вӧчны, мед шыльыдджыка вот перйӧмыд муніс.

ГРИША. Сы понда тэ эн тӧждысь, шыльӧдам-мольӧдам ставсӧ... Уна-ӧ лыддинныд душ вылӧ?

МИТРЕЙ да Иван (видзӧдӧны кабала вылӧ да тшӧтш шуӧны). 19 руб. 42 кӧпейкаӧн.

ГРИША. Этша на тайӧ!.. Татчӧ абу на став недоимкаыс веськалӧма... Ещӧ на ковмас содтыны тысяча куим кымын сэтчӧ...

МИТРЕЙ. Кытчӧ, шурин?

ГРИША (чуньнас тувкӧдӧ кабала вылӧ Митрей водзын). Сэтчӧ, зять, важ недоимкаясас...

ИВАН. Кутшӧм куим тысяча нӧ сійӧ, Григорей Ӧнисимович?

ГРИША. «Кутшӧм»... Кутш кодь сера, варыш кодь бордъя... Кутшӧм эм — сэтшӧм и эм, тэныд сэтчӧдз абу могыс, — вӧч, кыдзи ме тшӧкта! Гиж, вай, тшӧтш аслад кабала вылӧ да артав, мыйӧн сійӧ душ вылӧ воӧ. (Иван гижӧ.)

МИТРЕЙ (Гришалы гусьӧн). Збыльысь, шурин, мыйсяма деньга тайӧ?

ГРИША (сідз жӧ). «Мыйсяма деньга»... Казеннӧй деньга, зять!.. Лишнӧй кытчӧкӧ видзсьӧма менам, ачым ог тӧд... Унджыкыс, дерт, стрӧитчӧмӧ муніс, сэсся карӧ ветлігъясӧн видзи да, мый да... Гашкӧ, куим тысяча саяс на лоӧ да, гижлы стӧч куим тысячасӧ...

МИТРЕЙ (сідз жӧ). Кытчӧ нӧ, шурин, сійӧс сюйныыс: штрапъясӧ, недоимкаясӧ али чиновникъяслы пӧдарокъяс вылӧ?

ГРИША (сідз жӧ). Кытчӧ гажыд сюяв, зять! Медтыкӧ сюйӧма вӧлі-а, перъям сэсся. (Иванлы гораа.) Арталін эн на, Иван? (Митрей гижӧ.)

ИВАН (кабала вылӧ видзӧдӧмӧн). Куим тысяча чӧлкӧвӧйыд, Григорей Ӧнисимович, воӧ 3 рубли 98 копеекӧн быд душ вылӧ...

ГРИША. Сы мында со и ставыс, весиг нёль чӧлкӧвӧйӧн оз во, а тэ вӧлі полан... Мый сійӧ дзонь обществоыдлы, ыджыд-ӧ мынтантор?.. Сэсся ӧд сійӧ деньгаыс оз кытчӧсюрӧ мун, ставнас жӧ пырас сарскӧй казнаӧ...

МИТРЕЙ (юрсӧ лэптӧ). Уна-ӧ тэнад лои, Иван Елисеевич?

ИВАН. Три рубли девяносто восемь копеек...

МИТРЕЙ. Вернӧ!.. Став вотыс кайӧ 23 рубли 40 копеекӧн душ вылӧ...

ГРИША (Иванлы). Со мыйта на и ставыс, а тэ дзуртан вӧлі: 25 чӧлкӧвӧй пӧ.

ИВАН. Абу нин зэв ылын сэтчӧдз, Григорей Ӧнисимович...

ГРИША. Ылын кӧть матын, а лишнӧй огӧ на босьтӧ...

МИТРЕЙ. Вернӧ, шурин: мыйта лыдыс висьталӧ, сы мындаӧн и арталӧма…

ГРИША. Менӧ кӧть ёна видӧны катыдсаыд: вывті пӧ жмитӧ Ӧнись Гришаыд, а ме быдтор вӧча закон серти, сытӧг пӧрадокыд оз ло!.. Вӧскресенньӧ кежлӧ, зять, скод колӧ вӧчлыны да висьтавны йӧзыслы тайӧ вот йывсьыд...

МИТРЕЙ. Чукӧртам.

ГРИША. Ӧні сэсся ті верманныд мунны... да мед уна сёрни та йылысь эз вӧв!.. (Чеччӧны, мӧдӧдчӧны мунны.)

МИТРЕЙ. Оз ло, шурин...

ИВАН. Митӧ эськӧ огӧ пондӧ сёрнитны ёна да скод вылад, ме чайта, кыптылас-а.

ГРИША. Но, сы йылысь ме ачым тӧда!..

МИТРЕЙ. Вернӧ, шурин, кыв некод оз лысьт шуны... (Иван да Митрей петӧны веськыд ӧдзӧсӧд.)

ГРИША (чукӧстӧ бӧрсяньыс). Митрей зять, кольччы, пажнайтам! (Митрей бӧр бергӧдчӧ.)

Занавес.

МӦД ТОР

Вӧчсьӧ Елесь Габӧ ордын. Прӧстӧй крестьянскӧй керка пытшкӧс: веськыда ӧдзӧс; шуйгавылас кык ӧшинь, пельӧсас пызан; гӧгӧрыс лабичьяс; пызан дорас матын пеша, лабичас сартас. Веськыдвылас пач (вомнас ӧшиньлань), пач бокас гӧбӧч, пос (гӧбӧч вылӧ кайны). Пачводз дорас дзоля джадж, кутшӧмсюрӧ дозмукъяс сэні. Веськыдвыв стенас ӧшалӧ кӧлуй. Джоджас кымынкӧ улӧс. Рыт. Олӧны сартаса биӧн. Воддза вӧчӧмсяньыс кольӧ ӧти вежон.

1-я петкӧдчӧм

ДАРЬЯ (пач вом дорас нянь кӧтӧ, сэсся нянь шомӧссӧ лэптӧ паччӧрӧ. Пешаын сартассӧ пыр колӧ вежлавны, мед оз кус биыс, воръяс колӧ ва кисьтны, мед ӧгырыс оз сотчы да оз тшынӧд). Вот, колӧкӧ, и скодуйтӧм талун лои. Лунтыр, кузь лунтыр, — ӧбед бӧрын муніс да век на абу... Мый праксӧ и вӧчӧны та дырасӧ. Сувтӧмаӧсь да, кӧнкӧ, кывзӧны Ӧнись Гришлысь бызгӧмсӧ... Сьӧд рыныш тупйӧд юрлӧн вом паськыд, гӧлӧс ыджыд... (Ывлаын кылӧ гора сёрнитӧм.) Локтӧны жӧ тай, кылӧ, эштӧма жӧ, тыдалӧ, вой шӧрӧдзыд.

2-ӧд петкӧдчӧм

Пырӧны: Габӧ, Рӧдь, Миш, Педӧр, Васька, Сидӧр, Тикӧн да Ярӧ. Габӧ кындзи, ставныс пернапасасьӧны да здоровайтчӧны кывйӧн: «Чолӧм-здорово!»

ГАБӦ (пыригас). Ме ог тӧд, мыйӧн асьсӧ и чайтӧ. Этшсӧ эз нин кут тӧдны. Вайӧ кытчӧкӧ тӧрӧдчылӧй да сёрнитыштамӧй ичӧтика. (Йӧз пуксялӧны, Габӧ пӧрччысьӧ.)

ДАРЬЯ. Кӧні нӧ лунтырсӧ довъялан? Войӧдз ӧд энӧ жӧ скодуйтӧ?.. Корсьны нин вӧлі кӧсъя мунны: мися, буракӧ, юсис да ылаліс кытчӧкӧ...

ГАБӦ. Ютӧгыс, Дарья, коддзан татшӧм уджнад... (Пуксьӧ пызан дорӧ.)

РӦДЬ. Мый бара ӧні сэсся лоӧ-а? Вермас оз Ӧнись Гришыд миянӧс джагӧдны?

ГАБӦ. Мый нӧ тэ, вокӧ, сэтшӧма полан? Да ӧд став мирӧн огӧ жӧ сетчӧй ӧти Ӧнись Гришалы? Кутшӧмкӧ права ӧд эм жӧ на и сы вылӧ?..

СТАВЫС ТШӦТШ. Огӧ!.. Корсям правдасӧ!.. Ми ӧд абу жӧ кывтӧм пемӧсъяс!..

ДАРЬЯ (пуксьӧ пеша дорӧ). Мый нин бара сьӧд юрыс вӧчис?

УНАӦН. Вот сюйӧма!.. Габӧ висьталас!..

ГАБӦ. Эз кӧ пышйыны эськӧ скод вывсьыс, инмаліс талун зятя-шуриналы да. Вот лӧсьӧдӧмаӧсь мӧд во кежлӧ, пӧшти кызь нёль шайтӧн душ вылӧ!..

ДАРЬЯ (повзьӧкодь). Кызь нёль шайтӧн?!. Сё благӧслӧви кристос, морӧн лыйӧм голяяс!.. Мыйсяма вот нӧ сы ыдждаыс?

ГАБӦ. Пӧдаркияс вылӧ!..

РӦДЬ. Ӧнись Гришлы козин!..

УНАӦН. Стрӧитчыныыс!.. Русинов Митрейлы да!.. Зятя-шурина вӧчӧмаӧсь!..

ДАРЬЯ. Сё кузь висьӧмъяс!.. Ад горшъяс!.. Сэсся нӧ сідзи и мынтыны лоӧ?

ГАБӦ. Нӧрӧвитлам сідзи мынтысьӧмысь!..

РӦДЬ. Кыдзи нӧ сы ыджда вотсӧ мынтан, кытысь босьтан деньгасӧ?

СИДӦР. Висьталіс тай ачыс Ӧнись Гришыд: няньнытӧ пӧ пуд дасӧн кымын вузаланныд либӧ гоз-мӧд десятка пӧ лишнӧй ур кыянныд дай — мынтанныд.

ТИКӦН. Ачыс нӧ ёна-ӧ вӧр-васӧ чурскывліс прӧмышляйтігъясас?

РӦДЬ. Мый помысь нӧ эськӧ сэтшӧм озырасӧ олӧ?

ГАБӦ. Ме тай скод вылас сылы шуи: мися, тэ йӧзыдлысь вирсӧ юан, кучиксӧ кулян. Кутшӧм деньга вылӧ, мися, стрӧитін сы ыджда керка-короминатӧ, мый вылӧ карсьыд ваялан быдторсӧ? Ставсӧ, мися, тэ сэтчӧ лотайтін общественнӧй, казеннӧй деньга!.. Ӧні сэсся кӧсйӧ тыртны казнасӧ миян сьылі вылӧ ӧшӧдчӧмӧн?.. Нӧрӧвитлас!..

ДАРЬЯ. Оз ӧмӧй позь Ӧнись Гришсӧ став мирнас туркнитны сэтысь. Кӧвъясис жӧ, зонмӧ, сьӧд юрыд дай помыс сылы эз кут воны! Челӧвальникӧн, буракӧ, во вит-ӧ-квайт сійӧ вӧлі, ӧні гӧлӧваын бара жӧ сійӧ? Дырджык кӧ олас, ставнымӧс кокалас сьӧд кырнышыд!..

УНАӦН. Дзикӧдз джагӧдас!..

ГАБӦ. Часлы, ӧні сэсся, гашкӧ, вытьсӧ сылысь этша чинтыштам.

РӦДЬ. Судзсяс оз вынным миян-а?

ГАБӦ. Дерт, Ӧнись Гришакӧд сьӧкыд лоӧ миянлы тышкасьны: сылӧн ӧд пыдӧдз нин вужйыс пырӧма дай карын эмӧсь дорйысьясыс — став окружнӧй начальствоыс сы дор сулалӧ. Ме ӧд ачым сы дырйи кык во олі сельскӧй писарӧн да тӧда... Ӧткӧн-ӧткӧн Ӧнись Гришакӧд он вермы водзсасьны, став обществоӧн колӧ!

УНАӦН. Ставӧн, дерт!.. Код нӧ лысьтас сувтныыс?

ГАБӦ. Коді лысьтас сувтны!.. Сійӧ ӧд и пӧгибыс миян — некод оз лысьт сылы воча шыасьны... Мый сэсся, йӧзыд пемыдӧсь, грамотнӧйыд абу, мый вӧчас Ӧнись Гриша — сідзи быттьӧ и колӧ. Сылы ӧд мый! Пуктас воттӧ крестьяна вылӧ мыйта окотитас дай — вай! Вермӧ ли, оз ли крестьяниныд мынтыныыс — сэтчӧдз сылы абу могыс... Кымынӧс нин Ӧнись Гришаыд розгаӧн нӧйтліс, лым вылын ӧтпӧлӧсӧн сулӧдіс, кымынӧс бобыльӧ-корысьӧ воштіс?..

СИДӦР. Асьсӧ эськӧ, трасичаӧс, колӧ колода пиас сувтӧдны...

ДАРЬЯ. Чептӧ дорӧмӧн видзны, жытник кокӧ тувъялӧмӧн...

РӦДЬ. Сійӧ, понйыд, бара, орӧдчас, кӧть кытчӧ домав...

ГАБӦ. Кывзылӧй!.. Ӧнись Гришаыд талунъя споруйтӧмсьыд пиньсӧ йирны кутас миян вылӧ, лёкысла, кӧнкӧ, ӧні ку пиас оз тӧр, быд ногыс кутас зыртчыны миян вылӧ... Миянлы оз ков сетчыны сылы!.. Заводитім кӧ талун, помӧдз нин колӧ нуны!.. Мый лоны лоӧ-а, права сы вылӧ корсьлам наперво!..

СИДӦР. Воропыс кӧ сюрлас миянлы, Ӧнись Гриштӧ ми песовтлам на...

РӦДЬ. Оз кӧ водзджык сійӧ миянлысь кучикнымӧс лэдз!

ГАБӦ. Зэв тай тэ полан, вокӧ. Иван вок сельскӧй писарад веськаліс да кыв жӧ оз лысьт ӧні шуны Ӧнись Гришаыдлы... Мынты нӧ, сідзкӧ, кызь нёль шайтнас воттӧ, тырт пӧтлытӧм горшсӧ Ӧнись Гришалысь!..

РӦДЬ. Мыйӧн нӧ, Габӧ, ме мынта?.. Тавося вотӧй на вештытӧм-а, ог тӧд, кыдзи и мына. Таво вылӧ нин вӧлі загреки ыджыд — дас нёль шайтӧн душ вылӧ, а кыдзи нӧ кызь нёльнас мынтыны пондам?..

УНАӦН. Оз позь!.. Рӧзӧра ставнымлы!..

ГАБӦ. Сідзи и колӧ ставнымлы шуны: оз ков, огӧ вермӧ дай огӧ мынтӧ!

СТАВНЫС. Вернӧ, Габӧ!.. Огӧ мынтӧ!..

ГАБӦ. Ми эськӧ, катыдса, огӧ нин мынтӧ да, Ӧнись сиктсасӧ тшӧтш ышӧдны колӧ, мед став обществоыс ӧтмоз сувтіс.

СИДӦР. Лӧсьыд эськӧ сідзтӧ да оз ӧд найӧ лысьтны — став кывтыдсаыс Ӧнись Гришсьыд полӧны.

ГАБӦ. Полӧмнад тӧлкыд оз босьт... Олім нин тай полӧмнад: вотыд кутіс воысь воӧ содны, кызь витӧдз кутіс воны...

РӦДЬ. Норасьны нӧ кыдзкӧ оз позь кодлыкӧ?

ТИКӦН. Карса начальстволы эськӧ, ме чайта, позьӧ да... Оз-ӧ этша ӧлӧдны Ӧнись Гришӧс...

ГАБӦ. «Карса начальстволы»... Ланьт нин, Тикӧн, сы йылысь сёрнитныыд. Ме тай шулі нин: мися, став окружнӧй начальствоыс сулалӧ сы дор...

СИДӦР. Сарлы сідзкӧ колӧ веськыда норасьны, сар батюшколы!..

УНАӦН (нимкодьпырысь). Збыльысь ӧд, кыдз шуӧ Сидӧр, сарлы и норасьны!..

ГАБӦ (шпыньмунӧ). О-о-ок!.. Ылын ӧд, другъяс, сарӧдзыд Кулӧмдінсяньыд!.. Кор на ещӧ сар дінӧдз сибалан!.. Сарсянь суд да милӧсьттӧ виччысигкості Кипрушевыд сизим кучик вермас на миянлысь кульны, лэдзчысям кӧ.

СИДӦР. Мый нӧ эськӧ сэсся вӧчам, — енмӧдз вылын, сарӧдз ылын, Ӧнись Гриш джагӧдӧ, — мый олӧм нӧ сэсся олам? Кувны эштӧма ставнымлы?..

ГАБӦ. Ловъя войтыр огӧ на жӧ сетчӧ ӧти Ӧнись Гришалы!..

УНАӦН. Дерт жӧ, кыськӧ корсям жӧ права сы вылӧ!..

ГАБӦ. Ме тай сійӧ и шуа... Медвойдӧр колӧ аслыным чорыда кутчысьны: 24 шайтӧн вот нинӧм вылӧ оз ков мынтыны! Сэсся вермам и сарлы прошенньӧ ыстыны, медым Григорей Кипрушев вӧсна мӧдысь эз пондыны миянӧс мыждыныыс!

СТАВНЫС. Вернӧ!.. Сідзи и вӧчамӧй!..

ДАРЬЯ. Весиг ӧти грӧш оз ков вотсӧ мынтыны, мед этша чеччалас, сьӧд юр!..

УНАӦН. Веськыда шуан, Дарья Васильевна, — грӧш огӧ сетӧй!..

ГАБӦ. Ньӧти мынтытӧг, зонъяс, оз позь: сійӧ ӧд дзик нин бунт вӧчӧм лоӧ, сыысь ёна вермасны мыждыны... Дерт, огӧ кызь нёль шайтӧн душ вылӧ кутӧ мынтыны, а мыйтаӧн воас прамӧй вотыс — мынтам.

СИДӦР. Мыйӧн нӧ эськӧ сійӧ воӧ душ вылас?

ГАБӦ. Лыддис тай писарыд ӧнтайнад эськӧ да, зыкыд сэсся лыбис да эг и слӧймы гижыштныыс... Наперво, некутшӧм пӧдаркияс вылӧ да штрапъяс огӧ примитӧ-а. Важ недоимкаясыс кодлӧн эм, найӧ жӧ асьныс мед и мынтасны, — нинӧмла сюйны быдӧнлы... Меным тай помнитсьӧ, быттьӧ душ вотсьыс ӧприч, Русиновыд лыддис дас ӧти сюрс саяс на-а... Сэсся ӧд позьӧ ылӧссӧ артыштлыны: миян Кулӧмдін обществоад, буракӧ, 750 душ лыддьыссьӧ. Босьтам кӧ дас шайтӧн душ вылӧ, сійӧ толькӧ на лоӧ сизим сюрс да джын, ещӧ кӧ вит шайтӧн содтам, буретш и лоӧ дас ӧти тысяча гӧгӧрыд... Со ӧд, дас вит шайтнас дзик нин лишнӧй сюйӧма сэтчӧ Ӧнись Гришаыд!..

ДАРЬЯ. Сьӧд кырныш!.. Ад горш!..

СИДӦР. Сідзнад, чӧлкӧвӧй ӧкмысӧн кымын воас душ вылӧ. Сійӧ ещӧ на кыдзкӧ, гашкӧ, мынтам, а кызь нёльнад некыдзи нин ог вермӧ...

УНАӦН. Ӧкмыснас позьӧ на мынтыны...

ГАБӦ. Тавося серти нин сійӧ ёна ыджыд... Бура кӧ арталам, гашкӧ, и сы мынданас на оз во да!.. Талун ӧд скодыд эз помась, вӧчлыны мӧдысь на лоӧ. Сэки лыддям-арталам стӧч, мыйӧн душ вылӧ воас...

ТИКӦН. Ме чайта, Ӧнись Гришаыд оз и вӧч сэсся скодтӧ, сідзи и кутас перйыны.

УНАӦН. Сійӧ бара сідзи и вӧчас, буртӧ эн виччысь.

РӦДЬ. Он кӧ кут мынтыны — розгаалас...

ГАБӦ. Оз, став обществотӧ оз розгаав!.. Оз кӧ Ӧнись Гришыд выльысь скодтӧ вӧчлы да кутас кӧ ас ногыс перйыны, ми сэки асьным скодсӧ чукӧртам.

УНАӦН. Сідз позьӧ!.. Асьным!..

ГАБӦ. Дырӧ-ӧ нӧ, ковмас кӧ, йӧзтӧ чукӧртлыныыд? Таті, катыдсьыс, ме верма юӧртны йӧзыслы, вичкодорсалы Тикӧн висьталас...

ТИКӦН. Ме кӧть, Педӧр сват кӧть юӧртас...

ЯРӦ. Носимсаӧс ме чукӧста дай...

ГАБӦ. Кывтыдсасӧ колӧ кыскыны тшӧтш и, накӧд паныдасигъясӧн колӧ сёрни костын та йылысь гаровтлыны...

УНАӦН. Позьӧ!.. Унджыкыс локтас!..

ГАБӦ. Но вот, ӧні сэсся оз ков полӧм улӧ лэдзчысьны-а, ставыс бура артмас. (Сувтӧ. Йӧз мӧдӧдчӧны мунны.)

УНАӦН. Медъя эськӧ кыдзкӧ Ӧнись Гришысь мынтӧдчыны миянлы!..

ГАБӦ. Мынтӧдчам, мынтӧдчам! Сы вылӧ права корсьлам нин ӧні, босьтчим да!..

СИДӦР. Тэ жӧ кӧ, Габрил Елисеевич, кыдзкӧ туйдӧдан миянӧс-а...

ГАБӦ. Мый верма, ме отсала, а сэсся ставнымлы колӧ ӧтувджык овныыс, оз ков торйӧдчыны да бокӧ кежны!..

УНАӦН. Огӧ, дерт!.. Ставным ӧтвылысь правасӧ корсям!..

РӦДЬ. Но, мунамӧй сэсся!.. Бабаясным, кӧнкӧ, воштісны нин миянӧс...

УНАӦН. Мунамӧй!.. Талун кыклаын лои скодуйтны!.. (Петӧны ньӧжйӧник.)

СИДӦР (петігмозыс). Тайӧ скодыс бурджык лои воддза дорсьыд!..

КОДСЮРӦ (посводзас нин). Бур, бур!.. Ӧнись Гришалы огӧ сетчӧ!

Занавес.

КОЙМӦД ТОР

Вӧчсьӧ тӧлын. Кулӧмдінса «расправаын» (правленньӧын). Шуйгавылас ӧдзӧс (ывлаӧ); веськыда — мӧд ӧдзӧс, ӧдзӧс дорас (шуйга бокас) пач; пач дорсяньыс таланьӧ (авансценалань) локтӧ перилӧа потшӧс, ляпкыдик перегородка пӧшти шӧри юкӧ «расправа» пытшкӧссӧ; потшӧсас эм ичӧтик кост — ветлыны. Веськыда стенас ӧшалӧны кабалаяс (объявленньӧяс), стен бердас сулалӧ шкап, пельӧсас ичӧтик пызан. Веськыдвыв стенас кык ӧшинь; костас сар Николай І-лӧн портрет ӧшалӧ. Шӧрас (неуна веськыдвывланьыс) сулалӧ ыджыд пызан, пызан вылас кабалаяс, книгаяс, чернила доз, ручкаяс, тшӧтки. Пызан гӧгӧрыс прӧстӧй улӧсъяс либӧ скамьяяс. Веськыд пельӧсас — ӧбразъяс.

Перилӧ сайын (шумӧвӧйын) тырыс йӧз сулалӧны: мужикъяс, бабаяс тшӧтш, медводзын тыдалӧны: Габӧ, Рӧдь, Миш, Педӧр, Васька, Сидӧр, Тикӧн да Ярӧ. Пытшкӧсас, перилӧ дорас, кык сотскӧй — Ӧвдей Кузьма да Митрей Варлам кутӧны ӧтар-мӧдар сойбордйӧдыс Пӧликӧс, сійӧ ӧтпӧлӧса, шапкатӧм, кӧмтӧм, вӧньтӧм, еджыд гача, кокъяссӧ йӧршитӧма пу колодаӧ, пидзӧсъяссьыс улітіджык. Пызан сайын некод абу.

1-я петкӧдчӧм

Занавес воссигӧн йӧз костын кылӧ бура ыджыд зык, ызгӧм, торъявлӧны гӧлӧсъяс: «Абу нин тайӧ олӧм!» «Рӧзӧра ставнымлы!» «Ен грек ӧд суас жӧ асьсӧ!..» «Петасны оз нӧ сэтысь? Кыскыны колӧ ставнысӧ!..»

ГАБӦ (йӧзлы кинас ӧвтӧмӧн). Ланьтлӧй! Энӧ увгылӧй! Ланьтыштлӧй, мися. (Йӧз ланьтӧны.) Тадзи тӧлкыд оз босьт — весьшӧрӧ толькӧ ызгам ставным...

ПӦЛИК (кевмысьӧ йӧзлы). Лэдзӧй менӧ, бур йӧз! Сё криста радиӧн кевмыся — лэдзӧй менӧ татысь!.. Ӧнись Гришаыд джагӧдас менӧ.

ГАБӦ. Энлы, Пӧлик дядь... Нинӧм оз вӧч сійӧ. Кытчӧ нӧ татшӧм кӧдзыднас тэ мунан? Видзӧд, тэ кӧмтӧм-пасьтӧм, дзикӧдз кынман.

ПӦЛИК. Мый нӧ керан? Сэтшӧм законыс да, быть кывзы, — кынмы кӧть эн сэсся. Вот мынтыны ог вермы-а... (Сотскӧйлы, вӧрӧдчигтырйи.) Кузьма, лэдз, сё ен могысь!..

КУЗЬМА (кутӧ). Ми нӧ мый вермам вӧчны, Пӧлик? Тшӧктіс Григорей Ӧнисимович да новлӧдлам. Сы вылӧ ӧд миянӧс и сотскӧяс пуктісны.

ВАРЛАМ. Ми кӧ тэнӧ лэдзам — асьнымӧс розгааласны... (Пӧлик пельпомъясас синвасӧ чышкалӧ.)

НЫВБАБА (йӧз пӧвстын). О, господьӧ, олӧм миян, шондібанӧй!..

КОДСЮРӦ. Но, мый нӧ сэсся виччысям? Кыскыны колӧ!

ГАБӦ. Мырдӧн нӧ кысь начальствоӧс кыскан? Час, бурӧн корам. (Ӧдзӧслань чукӧстӧ.) Григорей Ӧнисимович! Петалан он талун миян дінӧ?

ГРИШАЛӦН ГӦЛӦС (ӧдзӧс сайын). Рӧзбойникъяс дінӧ ме ог пет!

Йӧз костын шызьӧ сёрни, кылӧны гӧлӧсъяс: «Нинӧм видзӧдны сы вылӧ!..» «Корис кӧ нӧ — мыйла оз восьт?» «Мыйсяма скод талун?»

ГАБӦ. Ланьтлӧй, другъяс! Кывзылӧй: талун скодсӧ ми чукӧртім, эз гӧлӧва кор!

МАРКА. Ті кӧ коринныд, ті и висьталӧй вайӧ!

КОДСЮРӦ. Гӧлӧватӧгыс нӧ кыдзи!

ГАБӦ. Гӧлӧвасӧ ӧд ми асьным бӧрйылім!

МАРКА. Асьным. Дерт, обществоӧн пуктім. Мед сійӧ и бергӧдлас став обществонас, мыйла тэ сэтчӧ, Габӧ, сюйсян?

2-ӧд петкӧдчӧм

Лыбӧ зык. Сэки веськыда ӧдзӧссянь петӧны: Гриша, Митрей да Иван. Локтӧны пызан дорӧ. Гришалӧн морӧсас медаль.

ГРИША (локтігмозыс, скӧрысь). Мыйсяма зык? Ланьтӧй! Коді тіянӧс татчӧ корис?.. Мый морла нӧ локтінныд?..

КОДСЮРӦ. Корисны тай мыйлакӧ-а.. Скод вылӧ тай ысталісны-а...

ГАБӦ (Гришалы). Тэ, Григорей Ӧнисимович, эн вывті горзы... Скод вылас корим йӧзсӧ ми!..

ГРИША. Кодъяс нӧ ті?.. Тэ ӧтнад ставнысӧ мутитан?..

ГАБӦ. Меысь кындзи на эмӧсь, Григорей Ӧнисимович...

ГРИША. Некод сэсся абу, эн сӧр!..

СИДӦР (пырӧ водзӧ). Эмӧсь на, — ме тшӧтш!..

ТИКӦН (сідз жӧ). Ме на тшӧтш дай!..

ЯРӦ (сідз жӧ). Ме тані и... Став Носимса тшӧтш и...

Сэки вочасӧн пырӧны перилӧ сайсянь пытшкас унаӧн шумитігтырйи.

ГРИША (скӧрысь горзӧ). Кытчӧ ті сюйсянныд?.. Сотскӧй, мый видзӧдан? Энӧ лэдзӧй, тойлалӧй ставнысӧ!..

КУЗЬМА да ВАРЛАМ. Энӧ пырӧй!.. Петӧй татысь, мунӧй!.. Григорей Ӧнисимович вӧтлыны тшӧктӧ, кыланныд ӧд, буракӧ?.. (Пыкӧны йӧзсӧ.)

УНАӦН. Ачыс регыдджык петас татысь!.. Ми огӧ петӧ, скод вылӧ локтім да!

ПӦЛИК (Гришалы кевмысьӧмӧн). Ме, Григорей Ӧнисимович, эг ачым татчӧ лок — менӧ мырдӧн кыскисны... Эн мыжды менӧ — ме законлы паныд ог сувт. Ог кӧ вермы вотӧс мынтыны, быть лоӧ терпитны розгасӧ и. (Йӧзлы.) Лэдзӧй менӧ, ме эг сувт законлы паныд!.. (Вӧрӧдчӧ петны.)

ГРИША. Коді лысьтіс менсьым приказсӧ торкны?.. Ставнытӧ йӧршита колода костӧ!..

ГАБӦ. Ставнымлы оз тырмы колодаыд, Григорей Ӧнисимович!.. Тэнӧ ӧд эз бӧрйыны гӧлӧваад йӧзӧс мучитны!.. (Индӧ Пӧлик вылӧ.) Видзӧд, мый тэ вӧчан? Пӧрысь мортӧс колодаӧ йӧршитӧмыд да тӧв шӧрын кӧмтӧг-пасьтӧг ывла вылын сулӧдан, туй кузя новлӧдлыны тшӧктан. Сійӧ нӧ закон?

УНАӦН. Вывті ӧбӧдитӧ йӧзсӧ!

ГРИША. Тэ нӧ менӧ велӧдны али мый кӧсъян?.. Да ме тэнӧ асьтӧ, трасичаӧс, медпервой клячала колоданас!.. Ме ӧд, буракӧ, тані гӧлӧваыс?..

СИДӦР. Гӧлӧва кӧть абу, а йӧзӧс мучитны оз позь!..

УНАӦН. Асьсӧ колӧ клячавлыны колоданас, кутшӧмджык кажитчас...

ПӦЛИК. Сьӧкыд эськӧ да быть новлӧдлы: вотӧс мынтыны ог вермы-а...

ГРИША. Оз кӧ нӧ мынты вотсӧ, сэсся нинӧм и не вӧчны, сідзи и лэдзчысьны?.. Не куш Пӧликӧс ӧд тадзи лоӧ тшӧктыныыс, — гашкӧ, гоз-мӧдӧс на ковмас колодаавлыны дай розгаавны.

ГАБӦ. «Оз мынты»... Оз вермы мынтыныыс да кыдзи мынтас? Нӧйтӧмнад да колодаалӧмнад нӧ мынас вотыс?..

ГРИША. Кыдзи нӧ сэсся тшӧктан мынтыныыс!.. Бурӧн кӧ оз мынты, лёкӧн лоӧ перйыны татшӧм коддьӧмыслысь!..

ГАБӦ. Коді нӧ мынтас сы ыджда воттӧ? Ачыд тэ думышт: кызь нёль шайтӧн душ вылӧ сюйӧмыд! Ме первой ог мынты!..

ГРИША. Он мынты? Эстшӧм колода пиас кӧ абу окота лым вылын сулавны, мынтан, небось!..

ГАБӦ. Ог мынты ни, он сулӧд ни!..

ГРИША (лёкысь). Мый? Ещӧ лысьтан тэ тшӧкӧлдывайтны, прӧтивляйтчыны? Меным? Гӧлӧвалы?!. Да ме тэнӧ!..

ГАБӦ. Эн сэтшӧма пузьы, Григорей Ӧнисимович!.. Он на другӧн курччы.

КОДСЮРӦ. Мый бара лоӧ-а? Тышкӧ воасны, буракӧ...

ГРИША. Мый окотита, сійӧ и вӧча! Ме тані гӧлӧваыс!.. Убирайтчӧ татысь ставныд!.. Пинясьны локтінныд татчӧ? Мекӧд?

ГАБӦ. Пинясьны-тышкасьны ми эгӧ локтӧ. Чукӧртчим татчӧ скод вылӧ, — колӧ вот тшупны!..

ГРИША. Кутшӧм вот тшупны? Воттӧ миян арталӧма и тшупӧма. Кызь куим чӧлкӧвӧйӧн да сорок копеекӧн душ вылӧ... Сідз ӧд, буракӧ, Митрей зять?

МИТРЕЙ. Сідзи, Григорей Ӧнисимович, стӧч сідзи!..

ГАБӦ. Тіян ногӧн, зятя-шуриналӧн, гашкӧ, и стӧч сідзи, а миян арталӧм серти абу дзик стӧч сідзи!..

УНАӦН. Абу!.. Дас вит шайтӧн лишнӧй сюйӧмаӧсь!..

КОДСЮРӦ. Лишнӧй?.. Дас вит шайтӧн? Загреки тай!.. Рӧзӧра!..

ГАБӦ. Сійӧ ӧд и эм!.. Некод оз вермы мынтыны... Лэдзчысям кӧ, ставнымлы Пӧлик моз лоӧ колодатӧ новлӧдлыны...

ГРИША. Весиг куим ур абу тані лишнӧйыс, мыйта колӧ, сы мында и пуктӧма! Сы мындаӧн и перъям, тіянлысь огӧ юалӧ ни!..

ГАБӦ. Кыдзи нӧ сідзи, Григорей Ӧнисимович? Дзик ньӧти юасьтӧг ӧд оз жӧ позь... Миянлысь кӧ мырдӧн пычканныд сы ыджда вот, колӧ жӧ кӧть тӧдны — кытчӧ сійӧ мунӧ?

УНАӦН. Вернӧ!.. Гашкӧ, казнаад джынйыс оз во да?..

ГРИША. Ставыс казнаӧ пырӧ, оз ӧд, буракӧ, ортсӧ кытчӧкӧ мун!.. Нинӧм сы йылысь больгыны!.. Тіянлы ӧд висьталӧма нин вӧлі тӧндзи, мый ещӧ колӧ? Кыдз вӧчӧма, сідзи и олас!

ГАБӦ. Оз ло сідзи, Григорей Ӧнисимович! Чинтыштны ковмас!..

УНАӦН. Ковмас, дерт!

ГРИША. Чинтыны некысь, лишнӧй абу пуктӧма!.. Сэсся бызгыны нинӧм тані, вензьыны ог лэдз!.. Мунӧй татысь, убирайтчӧ!..

КОДСЮРӦ. Мый бара лоӧ-а?.. Гӧлӧвалысь оз кывзыны, вот дивӧыд!..

ГАБӦ (матыстчӧ пызанлань, сы бӧрся мукӧдыс водзӧджык жӧ пырӧны). Вӧтлыны ставнымӧс он вермы татысь... Ми вот тӧдмасям ичӧтика податнӧй списокъясӧн да асьным мунам. (Писарлы.) Нолтӧ, Митрей Тимофеевич, лыддьы вай, кутшӧм рӧскодъяс ті сюйинныд вотаныд?

МИТРЕЙ (видзӧдлӧ Гриша вылӧ). Ме ог тӧд, Габрилӧ Елисеевич... Кыдз Григорей Ӧнисимович шуас...

ГРИША (скӧрысь). Дас пӧв нинӧм лыддьӧмсьыс... Шуа тай, мися, кыдзи вӧчӧма, сідзи и олас!

УНАӦН. Мед лыддяс!.. Гашкӧ, збыль лишнӧй рӧскодъяс эмӧсь да?..

ГРИША (йӧзлы, скӧрысь). Ті нӧ мый?.. Ме нӧ мый?.. Ме нӧ абу тіян вылын гӧлӧва али мый?.. (Мыччӧ медальсӧ.) Этійӧ медальсӧ нӧ ті онӧ аддзӧ али мый? (Торкӧдӧ чуньнас медаляс.) Со, сарскӧй медальыс ӧд, буракӧ, менам морӧсын!..

ГАБӦ. Мый медальнад тэ ошйысян?.. Эз на ӧд сійӧ тэныд нэм кежлад веськав: гӧлӧваӧ бӧрйисны да медалясин, гӧлӧвасьыд чӧвтасны да медальтӧм лоан...

КОДСЮРӦ. Смел жӧ, зонмӧ, Елесь Габӧыд — гӧлӧвакӧд лысьтӧ вензьыны!..

ГАБӦ. Быть ӧд смелмӧдчы, кучиктӧ кӧ кульны лӧсьӧдчӧны!.. Медальӧн ошйысьӧ!.. Пӧликӧс кӧ пуктам гӧлӧваад, сійӧ вермас жӧ медальсӧ морӧсас ӧшӧдны...

КОДСЮРӦ (сералігтыр). Шуас жӧ ӧд мыйкӧ... Збыль вермас!..

ПӦЛИК. Мый нӧ менӧ сераланныд?.. Ме гӧлӧваавныыд ог пуксьы, меным медальсьыс нинӧм — ог ӧшӧд морӧсӧ, законыс абу миян дор да... Ӧні меным колода ӧшӧдӧны, сэки аслым ковмас тшӧктыны мукӧдлы ӧшӧдны, — ме ог вермы сідзи... Мед нин, ме пайысь, новлас Григорей Ӧнисимович...

ГРИША. Но, мый сэсся виччысянныд ещӧ? Мунӧй, мися, шуӧны тіянлы!..

ГАБӦ. Виччысям, кор лыддяс Русинов рӧскоднӧй статьяяссӧ... Сытӧг ми огӧ мунӧ!

УНАӦН. Огӧ!.. Сійӧн и локтім да... Мед лыддяс!.. (Лыбӧ шум. Митрей Гришакӧд мыйкӧ сёрнитӧны.)

КОДСЮРӦ. Прамӧя топӧдісны начальствотӧ!.. Мый бара лоӧ-а?..

ӦТИ ГӦЛӦС (став зыксӧ вевттьӧ). Мед лыддяс!.. Дыр-ӧ нӧ ещӧ ковмас кевмысьны!..

УНАӦН. Лыддьы, Митрей!.. Лыддьы!..

ӦТИ ГӦЛӦС (гораа). Босьт да ачыд, Габӧ, лыддьы!..

УНАӦН. Габӧ, Габӧ!.. Мед Габӧ лыддяс!

ГРИША. Ланьтӧй!.. Габӧ абу писар, сылы книгаяс ме ог сет киас!..

УНАӦН. Мед нӧ Русиновыс лыддяс!.. Мед лыддяс!..

ГРИША (Митрейлы). Вай нӧ, Митрей зять, лыддьы! (Йӧзлы.) Нем уджтӧмъяс!.. (Митрей шкапысь вайӧ пызан вылӧ книгаяс.)

ГАБӦ (йӧзлы). Бура кывзӧй, мед пеляныд сюркнясьӧмӧн ставыс пырас!

МИТРЕЙ (паськӧдӧ книга). Унасӧ нинӧм лыддьыныыс, лыддьӧма нин вӧлі тіянлы ӧтчыд...

ГАБӦ. Мӧд пӧв лыддьы, Митрей Тимофеевич, абу ӧд сійӧ зэв сьӧкыд удж кутшӧмкӧ... Сэки пышйинныд да некод нинӧм эз и гӧгӧрволы...

УНАӦН. Лыддьы нин, Митрей, лыддьы ӧдйӧджык!

ГАБӦ (кыскӧ кабала да карандаш, лӧсьӧдчӧ гижавны). Эн тэрмась вывті да гораджыка лыддьы!

МИТРЕЙ (видзӧдлӧ книгаысь да висьталӧ йӧзыслы, оз лыддьы книгасьыс). Податнӧй список серти куш окладнӧй вотыс таво вылӧ 6114 руб. 21 копеек. Сэсся штрапъяс самӧвӧльнӧй...

ГАБӦ (торкӧ). Уна-ӧ вотсӧ шуин?

МИТРЕЙ. Шесть тысеч сто четырнадцеть рублей двадцеть один копеек... Ме кык пӧв ог понды висьтавлыны тіянлы!..

ГРИША. Эн висьтавлы, зять, лыддьы дорвыв ставсӧ...

ГАБӦ. Мыйӧн нӧ душ вылӧ воӧ сійӧ суммаыс, Митрей Тимофеевич?

МИТРЕЙ (видзӧдлӧ книгаӧ). Сійӧ 754 душ вылӧ воӧ 8 руб. 11 копеекӧн... Сэсся штрапъяс вӧр сотӧмъясысь да самӧвӧльнӧй порубкаясысь 1800 рублей.

ГАБӦ. Тысеча восемьсот?! Сюрс да кӧкъямыссё?! Сійӧ нӧ кымын во чӧжӧн Кулӧмдінса крестьянаыс сотісны да гусьӧннас кералісны вӧрсӧ сы доныс?

СИДӦР. Сюрс вонас, гашкӧ, сы доныд лоӧ... Эсы мында штрап?..

МИТРЕЙ. Тайӧ? Та доныс изведитӧмныд вӧрсӧ куш ӧти воӧн ті...

ТИКӦН. Эн сӧр, «ӧти воӧн»... Ме весиг ӧти пывсян кер на эг вайлы гусьӧннад...

ГРИША. Тэ кӧ эн вайлы, мукӧд вайлісны, — кымынӧн стрӧитчӧны да унджыкыс гусьӧн лэдзисны керка вӧртӧ... (Митрейлы.) Водзӧ вай лыддьы, Митрей зять!..

ГАБӦ (йӧзлы). Тайӧ штрапсӧ лишнӧй сюйӧмаӧсь!.. Ачыс кор стрӧитчис, Кипрушёвыд, уна-ӧ мынтыліс штрапсӧ? А кык судта ӧкмыс пельӧса керка вылад ӧд бура уна вӧрыд муніс... Ми кӧ гоз-мӧд майӧг перъям сёрд дорысь — штрап? Огӧ примитӧй тайӧ ас выланым, оз ков!..

УНАӦН. Нинӧмысь!.. Огӧ!..

ГРИША. Быть ӧд примит!.. Пырӧма нин тайӧ вотад!..

ГАБӦ. Сюйныыд ӧд позьӧ и вит сюрс да кыдз ещӧ босьтан-перъян йӧзыдлысь?

ГРИША. Перъям, эн тӧждысь сы понда!.. (Митрейлы.) Лыддьы, зять, водзӧ...

КОДСЮРӦ. Перйытӧм на лоӧ!.. Быдӧнӧс ӧд, Пӧликӧс моз, он кляптав!..

МИТРЕЙ. Весьшӧрӧ дзик вензянныд, лишнӧй абу пуктӧма татчӧ ньӧти, дай воӧ зэв этшаникӧн — 2 р. 38 копеекӧн душ вылӧ толькӧ...

КОДСЮРӦ (нерӧмӧн). Этша тай, колі нин куимӧдзыс лэптыны!.. Огӧ примитӧй тайӧс, водзӧ лыддьы!..

МИТРЕЙ (видзӧдӧ книгаӧ). Воддза недоимкаяс — шесть тысяч триста шестьдесят четыре рубли шестнадцеть копеек...

ГАБӦ. Мыйсяма недоимка нӧ сы мындаыс?.. Квайт сюрс дай куимсё саяс на? Быд во тай нӧ перйӧны, пычкӧны-кульӧны вотсӧ, а недоимкаыс вотсьыс на унджык?..

УНАӦН. Лишнӧй сюйӧмаӧсь!.. Ӧти сайын нин!..

ГРИША (скӧрысь). Мый нӧ ті чайтанныд, ме аслым зептӧ пуктала деньгасӧ али мый? Кыдз нӧ ті лысьтанныд менӧ укӧрайтны?

ГАБӦ (йӧзлы). Некыдз оз позь веритны, другъяс: кытысь нӧ лои квайт сюрс саяс недоимкаыс?.. Кодлӧнкӧ кӧ эм, сійӧ мед ачыс и мынтас ньӧжйӧник, мыйла быдӧнлы сюйныыс?

УНАӦН. Сідзи и колӧ!.. Вернӧ!..

ГРИША. Кысь нӧ «сідзи»? Мыйӧн нӧ тӧдан: кодлӧн пӧ мыйта недоимкаыс? Став общество вылас и лоӧ пуктыны...

ГАБӦ. Но!.. «Мыйӧн нӧ тӧдан»... Кытчӧкӧ ӧд пасйӧма жӧ недоимкаяссӧ? Кытыськӧ тай нӧ асьныд босьтӧмныд жӧ квайт сюрссӧ?

УНАӦН. Эм, дерт, кӧнкӧ!.. Корсьлыны ковмас!..

ГРИША. Кытысь корсян? Дас во саяс нин сійӧ кыссьӧ да, — Рассыхаев дырся на сійӧ да!.. Лишнӧй абу татчӧ сюйӧма!.. Вай, Митрей зять, водзӧ лыддьы, нинӧм на вылӧ видзӧдны!..

КОДСЮРӦ. Прамӧй чипырсӧ колӧ видзӧдлыны, абу-ӧ вежлалӧмаӧсь...

МИТРЕЙ (видзӧдлӧ книгаӧ да висьталӧ). Сэсся чиновникъяслы пӧдаркияс вылӧ три тысечи триста шестьдесят три рубли пять копеек (3363 р. 05 к.), — сэсся и ставыс...

ГАБӦ. Ещӧ куим сюрс саяс!..

КОДСЮРӦ. Тайӧ нӧ мый нин лоӧ?.. Кутшӧм куим сюрс лешак нин пырӧма вотас тшӧтш?

ГРИША. Код мор нӧ сэні лешкӧ? «Расправаын» лёк ногӧн ёрччыны оз позь!..

ГАБӦ. Ыджыдджык «матьӧдз» эськӧ, буракӧ, волам на да.

КОДСЮРӦ. Дерт жӧ!.. Быд лешаксӧ кӧвъялӧмаӧсь миян вылӧ да... Кутшӧм пӧдарки нӧ тайӧ?..

ГАБӦ (йӧзлы). Энӧ ӧмӧй кывлӧ: чиновникъяслы пӧ тай пӧдарки вылӧ, карса начальстволы козин вылӧ... (Сералӧны.)

ГРИША. Мыйсяма серам?.. Сытӧг оз позь!.. Начальстволы кӧ он сетышт мыйкӧ мында, быд нинӧм абусьыс дзескӧдӧны-зырсьӧны.

ГАБӦ. Висьтав вай, Григорей Ӧнисимович, мый бур кузяыс налы пӧдаркисӧ вӧчныыс? Омӧля на дзескӧдӧны да мед ёнджыка пондасны, — сійӧн?.. Али ыджыд штрапсьыд, пасибӧ пыдди?.. Али мед тэнӧ асьтӧ ёнджыка ошкисны йӧзсӧ ӧбӧдитӧмысь?.. Нинӧм абусӧ висьталан тэ!

УНАӦН. Оз ков!.. Козинъястӧгыс нин сьӧкыд лоӧ овныс!..

ГРИША. Мый пырӧма вотас, лыддис тай Митрей зять — ставсӧ сійӧс лоӧ нин мынтыны, быть!..

УНАӦН. Некутшӧм быть абу! Огӧ мынтӧй!.. Ті зятя-шурина дзикӧдз рӧзӧританныд!..

КОДСЮРӦ. Корысьясӧ воштанныд ставнымӧс!

ГРИША (скӧрысь). Бӧрвылас аддзам, мынтанныд али онӧ!.. Ӧні нинӧм ызгыны... Шань!.. (Митрейлы.) Сюй, зять, книгаястӧ бӧр шкапад да мунам!.. (Лӧсьӧдчӧ мунны.)

УНАӦН (матыстчӧны). Бара кӧсъянныд пышйыны?.. Нӧрӧвитланныд!.. (Лыбӧ зык.)

ГАБӦ (сувтӧ пызан сайӧ). Ланьтӧй!.. Кывзылӧй!.. Аддзанныд, Кипрушёвыд кутшӧма миянӧс жмитӧ быд ногыс?.. Дырджык кӧ ещӧ зятя-шурина кутасны миян вылын ыджыдавны, ставнымӧс рӧзӧритасны!..

УНАӦН. Чужъявны кыкнаннысӧ колӧ!..

ГАБӦ. Чужъявны огӧ чужъялӧй, а, ме ногӧн, вежны найӧс колӧ.

ГРИША (лёкысь). Мый?.. Кыдзи вежны?..

ГАБӦ. «Кыдзи вежны»? Тэ пыдди выль гӧлӧваӧс бӧрйыны, мӧдлы эсійӧ медальсӧ сетны!..

УНАӦН. Вернӧ!.. Вежамӧй!.. Ӧнись Гриша оз ков!..

ГРИША (зэв лёкысь, пуӧ). Менӧ гӧлӧваысь чӧвтны?.. Ме ог лэдз!.. Тіянлы, рӧзбойникъяслы, ме ог сетчы!..

ГАБӦ. Сетчан, Григорей Ӧнисимович, тэнӧ ӧд гӧлӧваас общество пуктыліс, общество и бӧр вермас чӧвтны!..

УНАӦН. Выль гӧлӧваӧс пуктамӧй!.. Оз ков Ӧнись Гришаыс!..

ГРИША. Ме бурӧн ог чӧвтчы гӧлӧва чинысь!.. (Медальсӧ морӧссьыс перйӧ.) Медальӧс некодлы ог сет ни!

ГАБӦ. Эн сэтшӧма ышмы, Григорей Ӧнисимович, абу ӧд ми посни челядь... (Йӧзлы.) Миянлы колӧ гӧлӧваӧ бӧрйыны веськыд мортӧс, мед эз понды Кипрушёв моз вывті вылӧ пуксьыны да йӧзӧс ӧбӧдитны.

УНАӦН. Кодӧс нӧ бӧръям? Ачыд, Габӧ, гӧлӧваас пуксьы!

ГАБӦ. Ме лучшӧ писарала, этша тӧдса нин сійӧ меным... Гӧлӧваас позьӧ бӧрйыны Морохинӧс, Сидӧр Сергеевичӧс!

УНАӦН. Бур!.. Шань мортыс!..

СИДӦР. Ог тӧд, сямма ог ме сэтчӧ?

УНАӦН. Сямман!.. Гӧлӧваав, Сидӧр!..

ГАБӦ. Коді Сидӧрӧс гӧлӧваӧ бӧрйӧ — вешйӧй веськыдвывлань!.. (Ставӧн сувтӧны веськыдвылӧ.)

ПӦЛИК. Ме сылань жӧ сувта. (Ньӧжйӧник мунӧ.)

ГРИША. Мунам, Митрей зять!..

ГАБӦ. Энлӧй на!.. Лок, Сидӧр Сергеевич, пызан саяс пуксьы. (Сидӧр пуксьӧ пызан сайӧ.) Сет, Григорей Ӧнисимович, медальсӧ выль гӧлӧвалы, кылан?

ГРИША (кабыртӧ медальсӧ киас). Ог сет некодлы!

СИДӦР. Вай бурӧн, колӧкӧ, Гриша!..

УНАӦН. Чижовкаӧ колӧ сюйлыны — регыд сетас!.. Сет!..

ГРИША (шыбитӧ пызан вылӧ). Налӧй, лешак чукӧр, мед горшаныд тасасяс!.. Мунам, зять!.. (Кӧсйӧны мунны. Сидӧр ӧшӧдӧ морӧсас медаль.)

ГАБӦ. Кытчӧ нӧ сідз тэрмасянныд?.. Эштас да ставным мунам. (Йӧзлы.) Сэсся колӧ сборщикӧс бӧрйыны... Кипрушёвыд ачыс тшӧтш и сборщикавліс да сідзтӧ абу лӧсьыд — верман дзугсьыны.

ЙӦЗ. Колӧ, колӧ!.. Кодӧс нӧ сэтчӧ пуктам?

ГАБӦ. Позьӧ Кипрушёв Опонь Васькаӧс, тӧлка мортыс!

ЙӦЗ. Вернӧ!.. Пуктамӧй Васькасӧ!

ГАБӦ (Сидӧрлы). Вай сэсся тэ, Сидӧр Сергеевич, ачыд нуӧд скодсӧ.

СИДӦР (сувтӧмӧн йӧзлы). Но, мый нӧ, пуктам Васькасӧ сборщикас?

ЙӦЗ. Пуктам, мед олас Васькаыс!

СИДӦР. Лок нӧ, сідзкӧ, Васька, татчӧ! (Васька пызан сайӧ пуксьӧ.)

ГАБӦ. Ӧні сэсся колӧ корны, мед Кипрушёвыс сетас выль гӧлӧвалы да сборщиклы став казнасӧ, мыйта эм деньгаыс лыддям да гижам...

ГРИША. Некутшӧм деньга абу! Мый вӧлі, ставсӧ видзӧма!..

ГАБӦ. Бур тай!.. Сідзкӧ, куш казнаыд? Сідзи нӧ и гижам... (Митрейлы.) Тэ, Митрей Тимофеевич, вай меным книгаястӧ, бумагаястӧ и ставсӧ!

МИТРЕЙ (индӧ шкап вылӧ). Ставыс эсійӧ шкапас да тані пызан вылас, мый эм, босьт, колӧкӧ...

ГРИША (скӧрысь). Часлы, петкӧдла жӧ ме тіянлы мӧдысь гаж!.. Рӧзбойникъяс! (Габӧлы грӧзитӧ.) А тэныд, сё кузь висьӧм, Сибыръясӧд лоӧ на гуляйтлыны... Помнитлы!.. Мунам, зять!.. (Лӧсьӧдчӧны петны.)

ГАБӦ. Мед мунтӧдзыс разяс ещӧ Пӧликлысь колодасӧ...

ГРИША. Ме разя?!

УНАӦН. Тэ кӧ клячалін, тэ и разь!.. Тшӧкты, Сидӧр!

СИДӦР. Разь, Гриша, бурӧн, колӧкӧ...

КУЗЬМА. Час, ме разя. (Кӧсйӧ разьны.)

ГАБӦ. Кипрушёвыс мед ачыс разяс!..

ПӦЛИК. Олас, гортын ачым разя, пуртӧн колӧ вундыны...

КОДСЮРӦ. Мед Ӧнись Гришаыс разяс!.. Кӧть пиньнас мед орӧдас гӧрӧдсӧ!..

СИДӦР. Кылан, разь, мися, Гриша!.. (Гриша разьӧ.)

МИТРЕЙ. Час, ме тшӧтш, шурин, отсала. (Тшӧтш разьӧ.)

ГАБӦ. Вот-вот!.. Зятя-шурина мед разясны!.. (Йӧзлы.) Но сэсся миян ӧні лои выль начальство, другъяс!.. Колӧ кывзыны налысь, оз ков сетчыны важ дорыс. Вот мынтыны лӧсьӧдам, дерт, этшаджык, — некутшӧм штрапъяс да пӧдаркияс огӧ сюйӧ... «Расправасӧ» лӧсьӧдам ме ордын — кивывджык лоӧ. (Иванлы.) Иван вокӧс позьӧ кольӧдны... Мун йӧз дінас сувт тшӧтш! (Иван копыртчӧмӧн мунӧ йӧз дінӧ.)

ГРИША (пуктӧ колодасӧ пызан вылӧ). Налӧй, джагалӧй!..

ГАБӦ. Ӧнӧдз кӧ эн джагӧд, ӧні он нин вермы разьӧм бӧрад!.. (Босьтӧ да шыбитӧ бокӧ.) Миянӧс бура дыр нин кляптад видзлін, сэсся миянлы тайӧ оз нин ковмы!.. (Гриша Митрейкӧд броткигтырйи петӧны йӧз пӧвстӧд.)

КОДСЮРӦ (налы бӧрсяньыс шуалӧны). «Гӧлӧва» мунӧ — лэдзӧй!.. Клячтӧ вунӧдін, Григорей Ӧнисимович!.. (Сералӧны.)

Занавес.

НЁЛЬӦД ТОР

Вӧчсьӧ Елесь Габӧ ордын (кӧні вӧлі мӧд торйыс). Пызан вылас и лабичас книгаяс, кабалаяс. Тӧвся лун. 1842-ӧд во.

1-я петкӧдчӧм

Пызан сайын гижӧ Балин; сыкӧд орччӧн улӧс вылын пукалӧ Габӧ; пызан помас, лабичын пукалӧ Сидӧр; Балинкӧд орччӧн, веськыдвылас — Васька; таланьынджык — Рӧдь да Тикӧн.

ГАБӦ (Балинлы). Тэ кыдзкӧ-мыйкӧ лӧсьыдджыка гиж, мед сарыдлы сьӧлӧмӧдзыс йиджас!.. Клячьяс йывсьыс чорыдджыка крукыльт...

БАЛИН (гижӧ, сэсся сьӧлыштӧ скӧрысь). Тьпу!.. Мыйла торканныд менӧ? (Нямралӧ бумагасӧ.) Со, бара тшыки ӧти лист кабала!.. Вай выльӧс!.. Витӧд лист нин, буракӧ, тшыкӧді тіян понда.

ГАБӦ (перйӧ кабалаяс пӧвстысь да сетӧ). Этша нин кольӧ бумагаыд, ог тӧд, тырмас оз.

БАЛИН (нямралӧм бумагасӧ бӧр веськӧдлӧ, лӧсьӧдчӧ гижны сы вылысь). Гижигӧн оз ков сёрнитны — мешайтанныд!.. Тайӧ ӧд, буракӧ, абу кутшӧмкӧ салдатскӧй письмӧ ли, мый ли. Сар-государлы ӧд шлюп-шлёпӧн оз артмы прошенньӧыд... Ме аслам нэмӧн куимысь нин гижлі сарыдлы — тӧлксӧ тӧда... Меысь грамотнӧйыд ӧд сэсся став кар улас абу!.. Мыйкӧ кӧ сарыдлы ли, губернаторыдлы ли гижны ковмас, пыр менӧ корӧны.

ГАБӦ. Дерт, абу шутка сійӧ — сарыдлы гижны прошенньӧтӧ... Менам эськӧ лёкиник грамотаыд эм жӧ да, мый сыысь — рака кок туй кодь артмӧ гижӧмӧй... Прӧстӧ ӧд эгӧ лэччылӧ тэла Сёськаӧдз — кыксё верст сайӧдз. Сюсь мортыд тай ылӧдз нималӧ... Пасибӧ локтін да.

БАЛИН (ошйысьӧмӧн). Гижам, сарлы кӧть корольлы — огӧ йӧрмӧ!.. Римскӧй папалы на, окотитам кӧ, норасям!..

СИДӦР да РӦДЬ (шензьӧмӧн). Со ӧд вежӧра грамотнӧй мортыд!..

БАЛИН. О, менӧ уналаын тӧдӧны!.. Кӧнӧвалитігад, ветліг-мунігад уналаӧ жӧ лои и волыны да... Кытчӧ ог пыр, быдлаын: «Милости просим!» Кодзсян кӧ эм — кодзсян, мукӧд дырйиыс виччысян лун-мӧд-коймӧд, письмӧяс гижан да мый да... Быд праздникӧ вичкоӧ ветла, кырлӧсын сьыла, кытчӧкӧ кӧ крам праздник кежлӧ веськала, апостол лыддя пӧнӧмар пыдди. Сувта вичко шӧрӧ, двери-ӧдзӧс весьтӧ да кыдз горӧда (гора) «братие», — став йӧзыс шемӧс чуймасны. Со ӧд Балиныд кутшӧм!.. Но, энӧ нин сэсся торкӧй ті менӧ, колӧ помавны кыдзкӧ, луныс кольны кутіс...

ГАБӦ. Огӧ, огӧ!.. Гиж толькӧ-а, кляпт йывсьыд эн вунӧд...

БАЛИН. Кляпт али кляч... Ме тай кляч гижлі-а...

ГАБӦ. Кляч кӧ гижлін — кляч и коль, эн нин веж...

БАЛИН (гижны кӧсйӧ). Тэнад нӧ салтыр ли, евангелльӧ ли оз сюр?..

ГАБӦ. Кӧнкӧ эськӧ евангелльӧыс вӧлі да, час корсьла. (Корсьӧ.)

БАЛИН. Вайлы, другӧ... Меным колӧ кытчӧсюрӧ бурджык кывъяс гартыштны прошенньӧас. Сарыдлы ӧд прӧстӧй кывъясыд — нинӧм, оз и мӧрччывны... Сэсся «клячыд» кыдзи лоӧ рочнас, колӧ видзӧдлыны и...

ГАБӦ (сетӧ книга). На, видзӧдлы да прамӧя та серти гартлӧдлы прошенньӧсӧ!..

БАЛИН. Оз ков велӧдны менӧ!.. Сэсся энӧ сёрнитӧй!.. (Гижӧ. Важ гижӧд вылас унаысь видзӧдлӧ, книгаысь частӧ корсьысьӧ листалӧмӧн; гижигас юрнас личкыштлӧ корсюрӧ. Гижӧ дыр. Гижигкостіыс ставныс пукалӧны шы ни тӧв. Кызӧктігъясӧн вомнысӧ тупкылӧны кинаныс. Габӧ куритчыны чигарка вӧчӧ. Мыйкӧ дыра мысти Сидӧр очсавны кутӧ, Рӧдь вугравны.)

СИДӦР (Габӧлы ньӧжйӧникӧн). Габӧ, тэнад абу кутшӧмкӧ дӧмсянтор — тюни ли, мый ли... Вугрӧдлыны кутіс нинӧм вӧчтӧгыд да унмовсян ещӧ...

ГАБӦ (юрсӧ бергӧдлӧ). Ланьт!.. Сарлы прошенньӧ гижигӧн нӧ кыдз узьны позьӧ!.. (Перйӧ бивасьыс тывкӧрт, тшак да биа из.)

СИДӦР (ньӧжйӧник). Сійӧн тай и кора кутшӧмкӧ уджтор, мед оз вугрӧдлы.

ГАБӦ. Час, корсьла мыйкӧ. (Биасьӧ-гальскӧ.)

БАЛИН (юрсӧ лэптӧ дӧзмӧмпырысь). Коді нӧ сэні гальскӧ бара?.. Бара ӧд тшыкӧда, выльысь ковмас гижны. (Бӧр заводитӧ гижны.)

ГАБӦ (биваас сюйӧ ставсӧ, чигаркасӧ и. Чеччӧ да паччӧрысь судзӧдӧ лёк тюни пӧв, гын сапӧг пӧв да калауш,^Калауш — ичӧтик мешӧк, уна вежӧса. Сэні видзӧны сунис, ем да мукӧдтор. Кӧнсюрӧ шуӧны мӧгыль мешӧкӧн./^ сетӧ Сидӧрлы.) На тайӧ гын сапӧгсӧ кӧть дӧмышт; дӧмасыс тюни пытшкас, шыла, ем, нырагезйыс калаушас тані. (Пуксьӧ бӧр.)

Сидӧр заводитӧ дӧмсьыны. Габӧ чеччӧ, бӧр перйӧ бивасьыс став куритчан кӧлуйсӧ да петалӧ посводзӧ; сэні кылӧ гольскӧ, сэсся бӧр пырӧ — куритчӧ, пуксьӧ бокӧ пачланьысджык.

ГАБӦ (аслыс). Дыр жӧ кутіс мыйкӧ гижны... Со ӧд, эськӧ кӧнӧвал ачыс, бывалӧй морт нин да лунтыр пӧшти тырмас ноксьыны, миянлы кӧ воӧн не гижны!.. Но, ӧні сэсся, буракӧ, регыд жӧ нин эштас евангелльӧ сертиыд... Мыйла водзджык эз кор, ӧнӧдз эськӧ важӧн нин гижсис... Ми кӧ эськӧ эгӧ кужлӧ и думыштныыс евангелльӧ йывсьыд, а кӧнӧвалыд тай, небось, тӧдӧ!.. «Клячтӧ» сэтысь кӧсйис корсьлыны и... Быдлаӧ жӧ, буракӧ, сійӧ клячыд клячасьӧма.

БАЛИН (кызӧктӧ гораа, сэки ставныс матыстчӧны пызан дорӧ). Но, эштіс!.. Кывзӧй!.. (Босьтӧ кабаласӧ кыкнан киас, лыддьӧ.)

«Его императорскому величеству, великому и самодержавному государю императору Николаю Павловичу.

От верноподданных вашему величеству податных крестьян 2-го податного участка Усть-Куломского общества и села, Усть-Сысольского уезда, Вологодской губернии.

Всеподданнейшее прошение...» (Юрсӧ лэптыштлӧ.) Со ӧд кыдзи сарыдлы прошенньӧтӧ колӧ заводитны. Сылы, небось, он гиж «Его благородию», сійӧс быд кывйын лоӧ величайтны «его императорское величество»-ӧн!.. Ӧні сэсся прошенньӧсӧ кывзӧй. (Лыддьӧ.) «Всемилостивейше просим, ваше императорское величество, заступиться за нас о нижеследующем. После рождества христова, с 1835 году до теперешнего 1842 году, а именно семь лет тому назад уже пройдено, служил в нашем обществе целовальник, впоследствии головой выбранный, крестьянин нашего селения Григорий Онисимов Кипрушов. Во время оной службы выборной целовальник или же впоследствии голова Григорий Онисимов Кипрушов, беззаконным велением вместе с писарем, — с зятем, или же с сестриным мужем сего же селения оставной салдат Дмитрий Тимофеев Русинов, творил тяжелые подати. Во время оной же службы вышеизложенный голова Григорий Онисимов Кипрушов выстроил большую избу на девяти углах и на двух этажах, как храм в три дня созидающий»... (Книгаӧ кинас шлапкӧ да висьталӧ.) Евангелиеын сідз жӧ шуӧма да содтӧма на ещӧ сэтчӧ «разрушающий»... (Лыддьӧ.) «Во время оной службы голова Григорий Онисимов Кипрушов взыскивал вышеизложенные подати под страхом и трепетом бедных крестьян, а именно: чинил по своему благорассудию беззаконное наказание, ударял по 20 раз розгами без рубашки. Но и вышеизложенного еще ему мало. Многих неимущих крестьян за взыскивание оной подати в лютый мороз зимой запрягал, как ярых жеребенков...» (Шуӧ.) Татчӧ эськӧ колі «нутреч» гижны да эг аддзы евангельесьыс кывсӧ, ог тӧд, кыдзи рочнас лоӧ... «Жеребёнковнас» гӧгӧрвоас государыд... (Лыддьӧ.) «Без шапки, в одной рубашке, босиком и одной штаны, в деревянную клячу». (Висьталӧ.) Клячтӧ сідзи жӧ и лоӧ кольны «клячӧн», евангельеад абу жӧ, буракӧ, сійӧ кывйыс, — эз тай сюр-а... Гӧгӧрвоас, «клячӧн» шуи да... (Лыддьӧ водзӧ.) «Видя оное жестокое мучение вышеизложенного голова Григория Онисимова Кипрушова, народ стал бунтоваться и во уверение правильного закона его, Кипрушова, скинули с головы и выбрали новую голову, Сидора, сына Сергеева Морохина, сборщика податей Василия, сына Афанасия Кипрушова, и писаря Гаврила, сына Елисеева Попова...» (Шуӧ.) Тані со тіян йылысь нин казьтыштӧма лои... (Лыддьӧ.) «По усмотрению оных трех должностных лиц доказано беззаконное покорение бывшей головы Григория Онисимова Кипрушова, а именно, в следующем: подать падала на каждую ревизскую душу по 8 рублей 11 к., а Кипрушов тянул за душу по 23 руб. 40 коп. По усмотрению оных трех должностных лиц доказано, что старый голова Григорий Онисимов Кипрушов оные незаконные сборы взыскивал на пользу своего девятиугольного дома, то-есть издержал или же растратил преступлением. По одному вышеизложенному всемилостивейше и всеподданнейше обращаемся к стопам ног вашего императорского величества не наказать, а миловать нас, труждающихся и обремененных податных крестьян Усть-Куломского общества. Мы великую нужду терпели, а против закона не пошли и повинуемся властям. Еще милосердно просим вас, императорское ваше величество, не чинить нам тяжелого допросу, а по закону устроить суд и расправу вышеписанному Григорию Онисимову Кипрушову и его зятю Димитрию Тимофееву Русинову». (Помалӧ.) Со и пом воис. (Ставныс ыджыда ышловзьӧны.)

ГАБӦ. А бура гижӧмыд, другӧ!.. Лӧсьыд!..

СТАВНЫС. Зэв лӧсьыд!..

БАЛИН. Менам лӧсьыдтӧмыд некор оз лолы!.. Но, сэсся вай кырымалӧй!.. (Чургӧдӧ гижӧдсӧ.) Ставныд кужанныд?

ГАБӦ (босьтӧ гижӧдсӧ зэв видзчысьӧмӧн). Меысь кындзи, ставныс неграмотнӧйӧсь...

БАЛИН (бӧр босьтӧ гижӧдсӧ). Сідзкӧ, вайлы содтыштам ещӧ. (Гижӧ.)

ГАБӦ. Бура жӧ, другӧ, гижӧма, зэв мича!..

СТАВНЫС. Лӧсьыда тай артмӧма!.. Рочнад вот омӧля гӧгӧрвоам-а...

БАЛИН (лыддьӧ). «К сему прошению за крестьян Усть-Куломского общества подписываются выборные должностные лица: голова Сидор Морохин по неграмотности печать приложил...» (Шуӧ индігмоз.) Мед гӧлӧва со этатчӧ пуктас ассьыс печатьсӧ. (Габӧлы.) А тэ улӧджык ачыд кырымась, гиж: «Писар Гаврило Попов руку приложил». На! (Габӧ босьтӧ да кырымасьӧ. Сидӧр сы кості зепсьыс перйӧ медальсӧ.)

ГАБӦ (Сидӧрлы). На, Сидӧр Сергеевич, шняпкы этатчӧ печатьтӧ!

СИДӦР (ӧшӧдӧ морӧсас медальсӧ). Час, медаляся да... Тайӧ ӧд ыджыдтор, медальтӧгыд, гашкӧ, оз и туй да... (Пызан вылысь босьтӧ печатьсӧ, лолыштӧ сы вылӧ да пуктӧ — личкӧ гижӧд вылӧ.) Саыс вушйӧма да омӧля нин и тӧдчӧ, колӧма выльысь тшынӧдны...

ГАБӦ (видзӧдлӧ). Тӧдчӧ на.

БАЛИН (босьтӧ гижӧдсӧ). Ӧні ӧд и меным на сэсся ковмас кырымавны. Сытӧг сарыд оз и видзӧдлы прошенньӧ вылад!.. (Гижӧ.)

ГАБӦ. Со ӧд, другӧ, ещӧ... Крепитны на вӧлӧм колӧ дай...

БАЛИН (гижсьӧм мысти лыддьӧ). «Настоящее прошение по просьбе и со слов просителей собственноручно написал вашего императорского величества верноподданный крестьянин села Шошкинского, Вологодской губернии, Василий Балин». (Сетӧ Габӧлы.) Налӧй! Сэсся ӧні позьӧ смела ыстыны!..

ГАБӦ (босьтӧ гижӧдсӧ). Но, вот, зэв ыджыд аттьӧ тэныд! (Кусыньтӧ гижӧдсӧ шӧри да сюйӧ кабалаяс костӧ.) Ӧні кыдзкӧ мӧдӧдам нин тайӧс... Уна-ӧ нӧ тэныд за труд ковмас таысь?

БАЛИН. Мыйта сетанныд, донъясьны ог понды... Тӧдӧмысь, онӧ ӧбидитӧй-а.

ГАБӦ. Ачыд нин тэ, другӧ, урчит — тэнад ӧд уджыс... Ме серти кӧ, дерт, шайт-мӧдтӧ лоӧ мынтыны-а...

БАЛИН. Сійӧ ӧд вывті жӧ этша! Позьӧ ӧд ылӧсас артыштны: быд чаньӧс кодзӧмысь ме босьта ӧти шайт, талун гортысь петӧмлы куим лун нин тырӧ; а луннад, эм кӧ кодзсяныд, этша вылӧ нин чань куим-нёльтӧ кодзан, — сэсся со и лыддьы... Ӧкмыс чаньсӧ кӧ пуктам чӧлкӧвӧйнас, сэні нин лоӧ... (мӧвпалӧ.)

СИДӦР. Ӧкмыс чӧлкӧвӧй!

БАЛИН. Но вот — ӧкмыс... Сэсся ӧд сарыдлы прошенньӧтӧ гижӧмыд сьӧкыдджык на кодзсьӧм дорсьыд, — ковмас нин содтыны сэтчӧ ещӧ ӧти шайттӧ.

СИДӦР. Стӧч дас шайт и лоӧ сэки!

ТИКӦН (аслыс бокӧ). Дас чань туйӧ тай наперво миянӧс кодзыштіс кӧнӧвалыд-а.

БАЛИН. Мый нӧ, уна али мый сійӧ?

ГАБӦ (балябӧжсӧ гыжъялӧ). Уна кӧть этша, а быть мынтысь, прошенньӧтӧ ӧд бӧр он косявлы ӧні дай колӧ прошенньӧыс!.. (Сидӧрлы да Васькалы.) Мый сэсся, дерт, лоӧ мынтысьны?

СИДӦР да Васька (тшӧтш). Мынтам!

ГАБӦ (Васькалы). Сюрас оз тэнад дас шайтыс, сборщик?

ВАСЬКА. Сюрас, гашкӧ, сы мындаыд. (Кыскӧ деньга мошнясӧ да лыддьӧ.)

ГАБӦ (Балинлы). Вай нӧ распискатор гижышт. (Сетӧ бумага.)

БАЛИН. Ме лишнӧй ог кор, ог босьт... Сэсся ӧд ковмас на и бӧр гортӧ лэччыны дай... (Гижӧ.)

ГАБӦ. Вӧлӧн вайим — вӧлӧн жӧ и бӧр лэччӧдам. Карӧдзыс ковмас жӧ прошенньӧтӧ лэччӧдны-а, пӧпуттьӧ и лэччӧдам...

БАЛИН (сетӧ распискасӧ, босьтӧ деньга, лыддьӧ да мошняӧ сюйӧ). Дас и эм, вернӧ! Ӧні, гашкӧ, тулысланьӧдзыс нин ола да... Кодзсянъясыд ӧд, кӧнкӧ, эмӧсь жӧ та гӧгӧрын-а... Тані да, Кужйын да тырмас меным тулысӧдзыд. (Чеччӧ пызан сайысь, пасьтасьӧ.)

СИДӦР. Сюрас бара!..

Ывлаын кылӧ Дарьялӧн гӧлӧс: «Зільджыка, зільджыка, котӧрӧн!.. Мед пырысь-пыр чукӧртчасны миян дінӧ!.. Оружйӧясӧн мед!..» Керкаын ставныс чуймӧны, кодсюрӧ ӧшиньясӧд видзӧдны уськӧдчӧны. Сы кості Балин петӧ.

РӦДЬ (ӧшиньӧд видзӧдӧ). Кытчӧкӧ челядь зэв ӧдйӧ котӧртӧны!..

2-ӧд петкӧдчӧм

ДАРЬЯ (повзьӧмӧн пырӧ, лолыс тырӧма). Начальство воӧма карсянь!..

ГАБӦ. Кодъяс, кӧнӧсь?..

ДАРЬЯ. Карса судьяяс. Ӧнись Гриш ордӧ сувтӧмаӧсь... Куим вӧла пӧ!.. Татчӧ регыд воасны!.. Ті жмотвидзанныд гортын да нинӧм онӧ и тӧдӧ...

ГАБӦ да СИДӦР (тшӧтш). Колӧ йӧзӧс чукӧртны... Тикӧн!.. Рӧдь!.. Ӧдйӧджык!.. (Тикӧн Рӧдькӧд лӧсьӧдчӧны петны.)

ДАРЬЯ (налы). Катыдлань котӧртӧй!.. Курича сиктас ме юӧрті нин кодсюрӧлы!.. Мед оружйӧяс босьтасны!.. (Тикӧн Рӧдькӧд петӧны.)

ГАБӦ (горӧдӧ налы бӧрсяньыс). Татчӧ мед локтасны!..

СИДӦР (лӧсьӧдчӧ мунны). Меным колӧ ветлыны да аслым тӧдмавны.

ГАБӦ. Вичко шорсӧ оз ков лэдзны налы вуджны... (Сидӧр петӧ.)

3-ӧд петкӧдчӧм

Габӧ пасьтасьӧ.

ДАРЬЯ. Катыдас эськӧ ме ысті челядьӧс да ог тӧд!.. Мый нӧ ті вӧчанныд? Кутасны ӧд ставнымӧс.

ГАБӦ. Сарлы прошенньӧ гижӧдім. Васька!.. Мый нӧ тэ пукалан?

ВАСЬКА (лӧсьӧдчӧ мунны). Муна жӧ... Деньга лои сьӧрысь да мед эськӧ оз вош кытчӧкӧ.

ГАБӦ. Оз!.. Тышкӧдз ӧд огӧ жӧ кӧ воӧ-а. (Васька шапкаасьӧ да петӧ. Посводзын кылӧ шум, сёрни.)

4-ӧд петкӧдчӧм

Керкаӧ пырӧны 5–6 мужик, накӧд тшӧтш Миш да Педӧр; ставныслӧн кианыс вилаяс, тоинъяс, пыридзьяс да мукӧд кӧлуй.

ДАРЬЯ. Со тай, локтӧны нин...

ПЕДӦР. Мый нин бара лои? Мыйла оружйӧяснас коринныд?..

ГАБӦ да ГРИША (тшӧтш). Карсянь начальство бара воӧма. (Дарья ӧшиньӧд видзӧдӧ.)

МИШ да ПЕДӦР (тшӧтш). Бара нин?.. Бара на ӧд вӧтлам тӧндзия мозыд!

ГАБӦ. Вичко шор таладорас найӧс оз ков лэдзны!.. Энӧ сетчӧй!

МИШ да ПЕДӦР (тшӧтш «оружйӧясӧн» джоджӧ зымӧдӧны). Но, огӧ жӧ сетчӧ! Зырам!..

ДАРЬЯ (ӧшиньӧд видзӧдігмоз). Со, ещӧ на локталӧны дай...

ГАБӦ. Морт ветымын кымын кӧ чукӧрмас — вермам!..

МУКӦДЪЯС. Кымынӧнӧсь нӧ найӧ?

ГАБӦ. Куимӧн пӧ ли, нёльӧн ли...

МУКӦД. Но-о, комынӧс-нелямынӧс ӧд ми вермам жӧ!..

ГАБӦ. Энӧ полӧй-а!.. Талун сарлы прошенньӧ гижим... Сысянь ӧтвет вотӧдз некодлы огӧ сетчӧй!.. Петамӧй, ӧшинь улын виччысямӧй! (Дарьялы.) Тэ, Дарья, гортын пукав, — оз позь пуста кольны расправасӧ... (Ставныс петӧны мургигтырйи, Дарья ӧтнас кольӧ. Ывлаын кылӧ пыр вочасӧн сёрни, ызгӧм.)

5-ӧд петкӧдчӧм

ДАРЬЯ (ӧшиньӧд видзӧдӧ сувтӧмӧн). То тай, люзьгыны кутіс йӧзыд!.. (Ывлаын гӧлӧс Габӧлӧн: «Сарлы... прошенньӧ... виччысьлам!.. Энӧ сетчӧй!..» Йӧзлӧн ызгӧм кылӧ.) Сидӧр со котӧрӧн бӧр локтӧ татчӧ...

Ывлаын гӧлӧсъяс: «Сидӧр!.. Мый нӧ?.. Кӧнӧсь?..» Сидӧрлӧн гӧлӧс: «Татчӧ локтӧны!.. Ӧдйӧджык!.. Вичко шорӧ лэччӧны!.. Ӧнись Гриша накӧд тшӧтш!.. Локтӧй!..» Гӧлӧсъяс: «Мунамӧй!.. Зырамӧй!..»

ДАРЬЯ. О-о! Уськӧдчисны ставныс кывтыдлань!.. Зырасны найӧс!.. (Ывлаын гӧлӧсъяс ылыстчӧны пыр, сэсся бырӧны.) Тшӧтш ветла видзӧдла, мый вӧчны кутасны!.. Керкаын ӧд ог жӧ пукав татшӧм дырйи!.. Петкӧдласны начальстволы и гаж!.. (Ӧдйӧ петӧ. Керка пытшкӧс бура дыр кежлӧ пуста кольлӧ.)

6-ӧд петкӧдчӧм

РӦДЬ (пырӧ да пуксьӧ лабичӧ, киас чегӧм чепня, шатиныс кольӧма аршын кузьта кымын). Морт кыксё кымын, буракӧ, чукӧрмис-а... Ставныс вичко шорлань мунісны... Меным эз и сюр прамӧйджык оружйӧ да бӧр бергӧдчи... Мый тайӧ пыдӧстӧм чепня туиснад мунан?!. (Кучкӧ чепнянас джоджӧ.) Небыдик мач кодь со!.. Кучкан да бӧр чеччӧ, ньӧти он и доймы. (Ывлаын кылӧны гӧлӧсъяс. Рӧдь бергӧдчӧ да видзӧдӧ ӧшиньӧд.) Со Педӧр Петыр да Кондрат бӧр жӧ нин мунӧны... Зырӧмаӧсь нин, тыдалӧ... Тонӧ ещӧ на локтӧны и... (Бергӧдчӧ ӧшинь дорысь.) Ми бара пыркӧдам, кӧть код локтас Кулӧмдінад!.. (Чепнянас тапкӧдӧ джоджӧ.) Мӧдысь нин таво тӧв начальствоыд карсянь локтіс... Велӧдам трустъясӧс да водзӧ сэсся нырнысӧ оз лысьтны петкӧдлыны!.. Став начальствоыс ӧд пырӧ Ӧнись Гриша ордӧ... Мый эськӧ и пырныыс сы ордӧ? Гӧлӧва чиныс сылӧн важӧн нин уси... Ми ӧні асьным ыджыдӧсь!.. (Посводзын кылӧны сёрнияс, кок шыяс.) Локтӧны нин, кылӧ.

7-ӧд петкӧдчӧм

Сёрнитігтырйи пырӧны: Дарья, Габӧ, Васька да Сидӧр.

РӦДЬ. Но, бара на зыринныд начальствоӧс?

ГАБӦ. Зыртӧг ӧд огӧ олӧй!.. Мыйӧн тай казялісны миянӧс, ӧдйӧ бӧр аддзисны туйсӧ — котӧрӧн пышйисны!..

РӦДЬ. Энӧ и вӧтӧдӧ найӧс? Ме кӧ эськӧ вӧлі...

ДАРЬЯ. Мый нӧ эськӧ тэ эн вӧв?..

РӦДЬ. Бурджык оружйӧыс эз сюр да...

ГАБӦ да ДАРЬЯ (тшӧтш). Киад нӧ абу оружйӧ?..

РӦДЬ. Таысь нӧ мый? Со (кучкалӧ чепнянас джоджӧ), кучкан да бӧр чеччӧ небыдик мач моз...

ГАБӦ. Кучкавныыс ӧд некодӧс оз вӧлі и ков, эгӧ ӧд тышкасьны петалӧ!.. Повзьӧдныыс вӧлі колӧ-а. Тайӧн (босьтӧ Рӧдьлысь чепнясӧ) зэв на позис повзьӧдны. Пельпом вылад кӧ пуктін тадзи (пуктӧ аслас пельпом вылӧ), чайтісны нӧшкӧн либӧ свӧлӧкӧн!.. Медводзӧ на ещӧ позис сувтны... Полан тэ, тыдалӧ, вокӧ!..

РӦДЬ. Ме ог пов! Мед сюрласны менам кипод улӧ!.. Асьныд кӧ ті поланныд-а? Абу весиг вӧтӧдӧмныд найӧс...

ГАБӦ. Вӧтчисны жӧ кодсюрӧ, Тикӧн тшӧтш и...

ДАРЬЯ. Кодъяс нӧ асьныс вӧліны найӧ? Кутшӧм чина судьяяс нин?..

СИДӦР. Кыкыс тӧндзинад волісны нин, а коймӧдыс кодкӧ тӧдтӧм...

ДАРЬЯ. Колі эськӧ ёнджыка стращитны да, мед мӧдысь сэсся эз локны миянӧ!..

ГАБӦ (ставныслы). А мый нӧ, другъяс, лоӧ вӧчны! Ещӧ на ӧд вермасны локны!..

СИДӦР. Мый нӧ вӧчан?.. Тулысӧдз тадзи нин лоӧ овны. Лым сылас да туйыс сэки бырӧ, — некыдз лоӧ локныыс, пыжӧн кӧ оз катны Эжва кузя... Карын пӧ тай эськӧ эмӧсь кутшӧмкӧ гӧгыля додьяс да миян матігӧгӧрын сэтшӧм дивӧыд абу на...

ВАСЬКА. Пыжӧн татчӧ начальствоыд оз кат!.. Гӧгыль вылад этша нин воан!..

ГАБӦ. Тулысӧдзыс на ӧд куим тӧлысь колӧ овны! Сэтчӧдз куимысь вермасны на волыны...

СИДӦР. Мый нӧ эськӧ, тэ ногӧн, вӧчан: потшан али мый мир туйсӧ?

ГАБӦ. Кысь нӧ потшан?.. Ме ногӧн, позьӧ сувтӧдны Дереваннӧй вӧлӧкӧ застава, салдатын моз. Сэні сэсся туй тшыктӧдзыс и караулитны, мед некутшӧм начальство эз вермы сибавны Кулӧмдінӧ!..

КОДСЮРӦ. Бур ӧд сійӧ делӧыд?!

СИДӦР. Зэв эськӧ бур, да кодӧс нӧ караулитчыныыс сувтӧдан?

ГАБӦ. Кодӧс? Ставным кутам вежласьӧмӧн караулитны, быдӧнлы ӧчередь лӧсьӧдам... Миянлы колӧ кутны власьтсӧ, кытчӧдз сарсянь оз во ӧтвет прошенньӧным вылӧ!.. Колӧ ӧд сійӧс вӧчны, кыдзи ті думайтанныд?..

СТАВНЫС. Колӧ, другӧ, колӧ!.. Зэв сідзнад лоӧ бур! (Посводзын кылӧны кок шыяс.)

ГАБӦ. Оружйӧ кутшӧмӧскӧ сетам караульщикъясыслы...

8-ӧд петкӧдчӧм

Пырӧны: Тикӧн, куйӧд вилаа, да Миш, карнана.

ТИКӦН. Некысь эгӧ аддзӧ!.. Кыкыс зэв ӧдйӧ пышйисны Ӧнись Гришаяскӧд, коймӧдыс эськӧ быттьӧ Варлам Митрей карта сайӧ котӧртіс да воши кытчӧкӧ, пывсянас, буракӧ, дзебсис, сэсся ми бӧр бергӧдчим.

ГАБӦ. Но, мед энӧ кӧ аддзӧ; найӧ ӧнӧдз гӧнитӧны нин, кӧнкӧ, Носимъясын...

ТИКӦН. Ми, Микайлӧкӧд, кӧсъям вӧтчывны на бӧрся вӧлӧн... Лок, Микайлӧ, ӧдйӧнджык доддясям да вӧтӧдам!..

МИШ. Мунам. (Кӧсйӧны петны.)

ГАБӦ. Суанныд кӧ, энӧ жӧ вывті ёна нӧйтӧй!..

ТИКӦН да МИШ (петігмозныс тшӧтш). Огӧ!.. Стращайтыштам ичӧтика дай шань! (Петӧны.)

9-ӧд петкӧдчӧм

РӦДЬ. Тшӧтш эськӧ меным колі вӧтчывны да...

ДАРЬЯ. Ланьт нин тэ лучшӧ!.. Падмӧдан сӧмын найӧс... Тэтӧг на найӧ петкӧдласны страсьттӧ начальствоыдлы — эн тӧждысь.

ГАБӦ. Эз эськӧ ков да...

СТАВНЫС. Мед!.. Мед этша страститыштасны!..

Занавес.

ВИТӦД ТОР

Вӧчсьӧ Елесь Габӧ ордын жӧ. Нёльӧд вӧчӧмсянь кольӧ вежон кымын. Лун. Пызан сайын пукалӧны: Габӧ — гижӧ; Сидӧр, медаля — сартаса биӧн тшынӧдӧ печать; Васька — пукалӧ улӧс вылын, деньга лыддьӧ. Джоджын сулалӧ Пӧлик.

1-ӧд петкӧдчӧм

ГАБӦ (вештыштӧ гижӧдсӧ Сидӧрлань). Со, татчӧ вай пукты печатьтӧ. (Индӧ.)

СИДӦР (первой кусӧдӧ сартассӧ, сэсся нюлыштӧ кабаласӧ да сы местаӧ пуктӧ печатьсӧ). Ак, зонмӧ, кутшӧм мича петіс!.. Куим шайт да джын? (Васька сюйӧ деньгасӧ ичӧтик ящикӧ да заводитӧ куритчыны.)

ГАБӦ. Сідзи. Ставыс лои Пӧликлӧн мынтӧма тавося вотсӧ сизим шайт да джын. (Пӧликлы.) Кылан, Пӧлик дядь? Сизим шайт да джын лои тэнад мынтӧма. Ещӧ коли куим шайт да джын. Став вотыд тэнад дас ӧти шайт таво вылӧ вӧлі.

ПӦЛИК. Кыла, Габӧ... Слабог, абу уна да... Воддза серти кӧ, джынсьыс нин этшаджык.

ГАБӦ. Воддзатӧ мый нин казьтылан? Ёна дзуглӧмаӧсь Ӧнись Гриша зятя-шуринаыд, некыдз пом ни дор он аддзы... Сэсся тэ вылын, Пӧлик дядь, лыддьыссьӧ зэв уна недоимка...

СИДӦР (Габӧлы). Сы йылысь, Габрилӧ Елисеевич, тшук тӧдмалам да вӧлисти шыасьлам йӧзыслы. Надейнӧ унджыксӧ лишнӧй Кипрушёвъясыд сюйӧмаӧсь, воттӧ моз жӧ. Ӧні сэсся, Пӧлик дядь, мунны верман... (Пӧлик шапкаасьӧ.)

ГАБӦ. Дерт, дзик помӧдз тӧдмавтӧг ми огӧ кутӧ недоимкаяс перйыны... Пӧлик дядьлысь ӧд недоимкасӧ Кипрушёвыд ёна нин босьтіс быд ногыс, позьӧ нин сылысь и ньӧти не корны.

ПӦЛИК. Пасибӧ тіянлы, бурӧн ставсӧ вӧчанныд да... Ӧнись Гришалӧн законыс некытчӧ шогмытӧм вӧлі — кымыныськӧ менӧ сійӧ розгаавліс да кляптавліс жӧ!.. Ӧні, пасибӧ, ёна ті кокньӧдінныд!.. Пасибӧ, сё пасибӧ!.. (Мунӧ.)

2-ӧд петкӧдчӧм

ГАБӦ. Ӧні сэсся мыйкӧ ковмас вӧчны, другъяс, Ӧнись Гришакӧд. Сійӧ став кывтыдсасӧ мутитӧ-дзугӧ. Оз тшӧкты вот мынтыны миянлы ни, миянӧс пӧ пыдди оз кӧв пуктыны ни.

ВАСЬКА. Ассьыс вотсӧ оз мынты ни. Тіянлы пӧ, рӧзбойникъяслы, ог жӧ сет деньга, шуӧ.

СИДӦР. Воттӧ эськӧ мынтас да, быть ӧд мынты. Дырджык кӧ пондас тадзи дурны, вермам на ӧд и гӧбӧчад, Габӧ, йӧртлыны сійӧс, дарӧм Кипрушёв! Сылӧн ӧд ӧні чиныс дзоляник... Васька Марка тай сідз жӧ пондіс ыръянитны да мыйӧн гӧбӧчад куим сутки видзим — регыд мӧдарӧ кусыньтчис, шӧвк кодь лои, воттӧ ставсӧ ӧтпырйӧ мынтіс... Кипрушёвтӧ на ӧд вермам сідз велӧдны. Дарьяыдлы тшӧктам дай вайӧдас.

ВАСЬКА. Вермам на и розгаавны Ӧнись Гриштӧ, оз кӧ кут кывзыны. Ачыс тай нӧ мыйта йӧзӧс нӧйтліс. Мед водзӧссӧ видлас!..

СИДӦР. Дерт жӧ, вермам дай лоӧ, буракӧ, ичӧтика шлячкӧдыштны...

ГАБӦ. Розгаӧн нӧйтны, ёртъяс, ми огӧ на пондӧ некодӧс... А гӧбӧчӧ йӧртлыны позяс. Кыдзкӧ ӧд колӧ жӧ ичӧтика стращайтыштны. Вот мыйӧн сарсяньыд воас приказыд, сэки вермам и чорыдджыка кутчысьлыны Кипрушев дінад.

ВАСЬКА. Кор на ещӧ сійӧ воас?

ГАБӦ. Воас нин ӧні коркӧ. Мӧд вежон вылӧ нин петіс прошенньӧнымӧс ыстӧмсянь. Тулысланьыс колӧ нин воны... Кодъяскӧ локтӧны, кылӧ. (Видзӧдлӧ ӧшиньӧд.) Вӧла сулалӧ... (Посводзын кылӧ Дарьялӧн гӧлӧс: «Кыскасьӧны, трасичаяс!» Керкаын ставныс ланьтӧны да полігтырйи виччысьӧны.)

3-ӧд петкӧдчӧм

Пырӧны: Дарья, сы бӧрся Тикӧн да Миш да нӧшта кымынкӧ морт пыртӧны Шахов Васькаӧс, кияссӧ сылысь мышкас кӧрталӧмаӧсь, ачыс ӧтпӧлӧса, мукӧдыс быдсӧн пасяӧсь да дукӧсаӧсь. Шахов тіралӧ, кынмӧ.

ДАРЬЯ (пыригмозыс). Ветлӧны, шӧйтӧны!.. Новлӧдлӧны кузьясыс трасичаясӧс!..

ГАБӦ (чеччӧ). Кодӧс нин нӧ вайинныд?

МИШ. Код морыс быд трустӧс тӧдас? (Шаховӧс пуксьӧдӧны лабичӧ.)

ТИКӦН. Заставаын тай кутім-а... Кутшӧмкӧ начальствоӧн ачыс висьтасьӧ...

ДАРЬЯ. Да ӧд век кыскасьӧны, кузь висьӧмъясыд!.. Эськӧ тӧдӧны жӧ нин: Кулӧмдінӧ быд начальниклы туйыс тупкӧса... (Пӧрччысьӧ.)

ГАБӦ (Шаховлы). Кытчӧ нӧ тэ вӧлі мунан, коді ачыд?

ШАХОВ (нориника, тіралӧмӧн). Ме — заседатель. Василей Васильевич Шахов.

ДАРЬЯ (нерӧ). «Заседатель»... Быд трасичаыс судья, быдӧнысь лоӧ видзчысьны...

ГАБӦ (Шаховлы). Мыйла нӧ тэ вӧлі локтан татчӧ, мый корсьны?

ШАХОВ. Ме — Нёбдін вӧлӧсьтса заседатель. Локта вӧлі Кулӧмдінад дереваннӧйсаяслысь вот перйыны... Дереваннӧяс висьталісны кымынкӧ мортӧс татысь да... Сэсся вӧлӧкас кутісны тайӧяс (индӧ Тикӧн вылӧ), паськӧмӧс кулисны да доддьӧ кӧрталӧмӧн и вайисны татчӧдз, ӧтпӧлӧсӧн... Дзик изӧймиттӧдз кынми...

ДАРЬЯ. Этша на ещӧ... Колі эськӧ юр кучиктӧ тэнсьыд кульны, трустлысь!.. Начальство ветлӧдлӧ... (Матыстчӧ Шаховлань да сы водзын шарк бергӧдчӧ.) Тьпу!.. Со ӧд кутшӧм и эм миянлы тэ кодь начальствоыд... (Мукӧдыс сералӧны.)

ТИКӦН. Ми эськӧ Микайлӧкӧд кӧсйим локтігмоз «Шумливӧй вӧрын» тайӧс пожӧм ув йылӧ тоньгӧдны да вайим жӧ нин тай татчӧдз-а...

ГАБӦ. Вӧлыс нӧ кодлӧн ӧшинь улас?

ШАХОВ. Менам, аслам.

МИШ. Аслас талӧн...

ДАРЬЯ. Буретш Конӧ Ӧсип гӧтырлы и лоӧ турунсӧ кыскавны вӧлыд... Мед начальство вӧвнас ӧні Петрунь кыскасяс лун-мӧд-коймӧд... Асьсӧ, начальствосӧ, сэк кості гӧбӧчын видзыштам!.. (Тойлалӧ Шаховӧс.) Мун, чеччы сэсь, «заседатель»!.. (Йӧз костын сералыштӧны.)

СИДӦР. Бур жӧ станӧвӧй миян Дарья Васильевнаыд!..

ШАХОВ (чеччӧ). Мыйла нӧ?..

ДАРЬЯ. Ӧдйӧджык вӧр!.. «Мыйла нӧ»... ещӧ ӧд и юасьӧ сэні!.. Мун пыр гӧбӧчӧ да сэні лун-мӧд заседателяв!.. (Кыскӧ тодмышкалігтырйи гӧбӧч ӧдзӧслань.) Куим лун кежлӧ пуксьӧда тэнӧ, начальникӧс! Эн кыскась водзӧ кежлӧ, кытчӧ оз ков!.. (Йӧртӧ гӧбӧчӧ да ӧдзӧс каличӧдыс тасалӧ тоинӧн.) Трасичаяс, шӧйтӧны, быдӧнлы колӧ ыджыдавны крестьяна вылын!

ГАБӦ. Лэдзам кӧ тайӧс-а? Мый таысь? Абу ӧд кутшӧмкӧ ыджыд судья?

ДАРЬЯ. «Лэдзам?» Ланьт, Габӧ. Абу, шуан, судья? Заседатель пӧ да? Мед куим суткисӧ сэн журитас, шаньджык лоас! (Локтӧ ӧшиньлань.)

ШАХОВ (гӧбӧчсянь). Лэдзӧй, криста ради!.. Кӧть киясӧс разьӧй!

ДАРЬЯ (мунӧ гӧбӧчлань, кокнас зымнитӧ). Эн лысьт шыасьны!.. Ёнджыка кӧ кутан сэні горзыны, ме тэнсьыд регыд ныр-вомтӧ на тшӧтш кӧртала. Ме, бара, дыр ог виччысь... Ме ӧні тіян кодь вылас ыджыдыс, велӧда трасичаясӧс дорын узьлыны!.. Шы ни тӧвджык, бур кӧ колӧ, сэні пукав! (Бӧр локтӧ да пуксьӧ лабичӧ.)

ГАБӦ. Менам баба тай, небось, регыд морттӧ судитіс-радитіс!

ТИКӦН. Мый нӧ сэсся лешпечикьяс вылӧ видзӧдныыс?

СИДӦР (Дарьялы). Мӧдысь ми гӧлӧваас тэнӧ, Дарья, пуктам!.. Сарсяньыд мыйӧн манифестыд воас, пырысь-пыр и пуктам!.. (Йӧз костын сералыштӧны: «Оз ӧд, кӧнкӧ, позь нывбабатӧ-а, зэв эськӧ бур гӧлӧва вӧлі Дарьяыд».)

ДАРЬЯ. Ӧнись Гришсӧ аски кыска да дзумгыла гӧбӧчӧ, сьӧд юрӧс!..

ВАСЬКА. Он ӧд вермы сійӧс.

ДАРЬЯ. Ме ог вермы? Ми ӧд, буракӧ, ӧні ыджыдъясыс? Муна кык сотскӧйӧн дай босьта, вая... Локтас тон!.. Кляпталам асьсӧ, петитчыны кӧ кутас. (Йӧз костын лыбӧ шум. Кылӧны гӧлӧсъяс: «Ӧні жӧ колӧ вайны!.. Талун кутас... йӧртны рыныш тупйӧд юрсӧ!»)

ГАБӦ (зык пырыс). Сарсянь воас да вӧлисти. Кывзылӧй!.. (Зык содӧ.) Сарсянь манифест воас да йӧртам!.. (Йӧз костын: «Кор на воас сарсяньыд!» «Дарья, ветлам вай ставным!..»)

ДАРЬЯ. Ланьтлӧй! (Зык лӧньӧ.) Ӧнись Гришыд миян кипод улысь ӧні некытчӧ оз пышйы... Виччысям нин сарсяньыс манифестсӧ да вӧлисти. Сэки Ӧнись Гриштӧ и видзыштам пемыд гӧбӧчад!.. (Йӧз костын: «Сідзи но мед и лоас!..» «А сэки кувтӧдзыс видзам сійӧс иган сайын!..»)

Занавес.

КВАЙТӦД ТОР

Вӧчсьӧ Кулӧмдін сиктын (ывла вылын), вичко дорын, эрд вылын, тӧвся лунӧ — 1843 вося февраль 26-ӧд лунӧ. Витӧд торсӧ вӧчӧмсянь кольӧ во. Сулалӧны зэв уна йӧз (шуйгавылас), салдатъяс (веськыдвылас). Йӧз дінас медводзын сулалӧ Ӧнись Гриша, сы бердын Русинов (киас кабала). Веськыда сулалӧ начальство: жандарм-полковник, управляющӧй Нагель, исправник Волков, — налӧн кианыс сюмыс плетьяс (нагайкаяс), боканыс — сабляяс. Салдатъяс (ружйӧясаӧсь) сулалӧны кругӧн — тыдалӧ сӧмын кругыслӧн бокыс: ӧтарас (мышкӧн видзӧдысьяслы) и мӧдарас (видзӧдысьяслы паныдӧн) 4–5 мортӧн. Водзынджык сулалӧ офицер.

1-я петкӧдчӧм

Веськыдвылын (салдатъяс кытш пиын, саяс) кылӧ: розгаӧн кучкалӧм шыяс да мортлӧн ымзӧм, ойгӧм. Шуйгавылас, йӧз костын, кылӧ ойгӧм да нывбабаяслӧн ньӧжйӧник лыддьӧдлӧм бӧрдӧм шы; водзынджык муас куйлӧ кӧлуй (паськӧм).

ЖАНДАРМ (йӧзлань скӧрысь). Замолчать! (Плетьнас грӧзитӧ.)

ВОЛКОВ (матыстчӧ йӧзлань да горӧдӧ плетьнас грӧзитӧмӧн). Замолчать!

ГРИША (йӧзлань). Ланьтӧй, энӧ лӧвтӧй!.. Ставнытӧ розгааласны!..

ЖАНДАРМ (йӧзлань). Я вам покажу, как бунтоваться, сволочи!..

НАГЕЛЬ (Гришалы). Кипрушев!

ГРИША (ӧдйӧ локтӧ нюклясьӧмӧн). Я здесь, ваше высокородие...

НАГЕЛЬ. Хорошо!..

ЖАНДАРМ. Всех запорю!

ГРИША. Можно, ваше высокородие!.. Розга хватит — четыре воза привезли! (Веськыдвылын кылӧ барабанӧ таркӧдӧм.)

ЖАНДАРМ. Следующий. (Ӧнись Гриша зэв ӧдйӧ бӧр мунӧ местаас.) Живо!

НАГЕЛЬ. Кто следующий?

ГРИША (видзӧдӧны Русиновкӧд кабала вылӧ). Сейчас!.. Коді сэсся?..

РУСИНОВ. Кондрат, незаконорожденный Лодыгин!

ВОЛКОВ (йӧзлань). Лодыгин!.. Выходи!.. (Йӧз костын бара лыбӧ мургӧм да нывбабалӧн бӧрдӧм.)

ГРИША (йӧзлань скӧра). Кондрат!.. Лок ӧдйӧджык!.. (Кондрат петӧ. Йӧз пӧвстын: «Кондратӧс, коньӧрӧс, нуисны...»)

ВОЛКОВ (йӧзлы). Замолчать!.. (Кондратлы.) Одежду снимай!..

ГРИША (сылы жӧ). Пӧрччы паськӧмтӧ!

КОНДРАТ (уськӧдчӧ Волковлы кок улас). Прӧститӧй!.. Мыйысь нӧ менӧ?..

ВОЛКОВ (плетьнас кучкалӧ). Встать! Живо! (Кондрат сувтӧ, пӧрччысьӧ, — кольӧ ӧтпӧлӧсӧн, шапкатӧг.)

2-ӧд петкӧдчӧм

Веськыдвывсянь шатлалігтырйи петӧ Пӧлик, зэв нюкыр чужӧма, ӧтпӧлӧса; сьӧкыда лолалӧ ымзігтыр. Начальство дінӧ усьӧ муас.

ПӦЛИК (тіралӧ). Прӧститӧй менӧ!.. Эбӧсӧй быри...

ЖАНДАРМ (кокнас чужйӧ Пӧликлы, плетьнас шлочнитӧ воздухас). Убрать!..

ГРИША. Сейчас!.. (Йӧзлань.) Пӧлик гӧтырыс кӧні? Ну мужиктӧ! Лок босьт!.. (Йӧз костысь петӧ нывбаба синвасӧ чышкалігтырйи, лэптӧ Пӧликӧс да нуӧ йӧз сайӧ; мунігас босьтӧ сылысь паськӧмсӧ. Тайӧс вӧчигкості Кондратлӧн пӧрччыссьӧ.)

ВОЛКОВ (плетьнас тойыштӧ Кондратӧс). Ступай, марш!..

НАГЕЛЬ. Бунтовщик, мерзавец!.. (Кондрат пырӧ салдат кытшӧ.)

ЖАНДАРМ (офицерлы). Дать ему 40 горячих!

ӦПИЧЕР («под козыр» босьтӧмӧн). Слушаюсь! (Бергӧдчӧ веськыдвылӧ, командуйтӧ.) Сорок ударов горячих! (Сайсянь гӧлӧс: «Так точно, ваше скородие, рад стараться!..» Йӧз костын кылӧ сёрнитӧм, мургӧм. Пӧликлӧн гӧлӧс: «Нелямынысь кучкисны... Мед, мый нӧ керан, сэтшӧм законыс да».)

ВОЛКОВ (йӧзлань). Замолчать! (Веськыдвылын кылӧ Кондратлӧн ойгӧм, розгаӧн швачкӧдӧм да лыддьӧм: «Пять, шесть, семь...» сідз водзӧ, жандарм Нагелькӧд мыйкӧ сёрнитӧны, юрнаныс лайкйӧдлӧны, сералӧны.)

ГРИША (Митрейлы). Ещӧ пӧ ӧд и государлы норасьлӧмаӧсь — прошенньӧ мӧдӧдлӧмаӧсь... (Серӧктӧ.) Ке-ке-ке! Кысь нин налы меысь вылӧ пуксьыны?.. Ӧні бара, небось, тӧдлісны — пуж петкӧдлісны налы!.. Дыр кутасны гыжъясьны!..

МИТРЕЙ. Главнӧйясыс тай пышйисны-а... Габӧясӧс, Сидӧръясӧс эськӧ колі кырссьыныыс прамӧясӧ!..

ГРИША. Локтасны, век оз пышъявны!.. Корсям на и найӧс!.. Со ӧд найӧ мый лэптісны?.. Вӧлӧгдасянь салдатъясӧс Кулӧмдінӧдз лои вайлыны кыксё морт, нёль пушка кыскыны, начальствоӧс беспокоитны. Но, мед, ас выланыс ӧд ставыс усьӧ!

ВОЛКОВ (Гришалы). Еще кто остался по списку?

ГРИША. Еще один... (Митрейлы.) Ӧвдей Кузьма, буракӧ, зять, коли?

МИТРЕЙ (видзӧдлӧ кабала вылӧ). Сійӧ, шурин... Кочанов...

ГРИША (Волковлы). Ещӧ Кузьма Авдеев Кочанов, ваше благородие!.. (Веськыдвылын кылӧ барабан шы.)

ЖАНДАРМ (юрсӧ лэптӧ, гораа). Следующий!

ГРИША. Кузьма Авдеев Кочанов. (Йӧзлань.) Кузьма!.. Ӧвдей Кузьма, лок!.. (Кузьмалӧн гӧлӧс: «Локта...» Сэсся петӧ водзӧ. Йӧз костын сёрнияс: «Кузьмаӧс нуисны нӧйтны...»)

НАГЕЛЬ. Живей, Кочанов!..

ВОЛКОВ (Кузьмалы). Снимай одежду!..

ГРИША. Пӧрччысь, шыбит пасьтӧ!.. (Кузьма пӧрччысьӧ. Гриша начальстволы.) Кочанов-то сотский мой был да не повиновался же...

НАГЕЛЬ. Покажут ему, как нужно повиноваться властям!.. (Веськыдвывсянь петӧ нюкыртчӧмӧн, ружтігтырйи Кондрат; нинӧм шутӧг босьтӧ ассьыс паськӧмсӧ да мунӧ йӧз сайӧ. Волков тойыштӧ Кузьмаӧс плетьнас.)

НАГЕЛЬ (жандармлы, Кузьма вылӧ индӧмӧн). Этому можно прибавить — грубиян, к тому же он последний!.. (Кузьма пырӧ салдат кытшӧ.)

ЖАНДАРМ. А-а! (Офицерлы.) Дать ему, мерзавцу, 45 горячих!..

ӦПИЧЕР («под козыр» босьтӧмӧн). Слушаюсь!.. (Веськыдвылӧ горӧдӧ.) Сорок пять ударов горячих! (Сайын гӧлӧс: «Слушаюсь, ваше скородие, рад стараться!» Веськыдвылын недыр мысти бара кылӧ розгаӧн швачкӧм шы да лыддьӧм — «раз, два, три...» да Кузьмалӧн ойзӧм-ымзӧм.)

ГРИША (босьтӧ Митрейлысь кабаласӧ да матыстчӧ жандармлань). Кузьма-то последний, ваше высокородие!.. Больше список-то нету. (Петкӧдлӧ списоксӧ.) Сто да десять человек — сё!.. (Йӧз костын гӧлӧсъяс: «Слава тебе, господи, пӧследней пӧ! Сё дас мортӧс нӧйтісны!..»)

ВОЛКОВ (йӧзлы). Не разговаривать!.. Молчать!..

ЖАНДАРМ (Гришалы). Хорошо!.. (Босьтӧ списоксӧ.) Дай сюда этот список!.. Потом приказываю: разыскать главных виновников этого волнения и отправить для допроса, суда и расправы в Усть-Сысольск!..

ГРИША (копрасьӧ). Корошо, непременно найдем сек!.. Сибыр не убежал жӧ!.. Век не будет бегать, ваше высокородие!.. Придет домой-то!.. Стараться будем ловить, сек на кватим!..

НАГЕЛЬ (Гришалы). Объяви крестьянам потом, что за указание места, где скрываются главари бунта, будет выдана награда из государевой казны!

ГРИША. Корошо!.. Сякий укажет!.. Скажу только — сё пойдет искать!.. (Веськыдвылын кылӧ барабанӧ таркӧдӧм. Гриша бӧр мунӧ аслас местаӧ.)

ЖАНДАРМ (офицерлы). Поручик!.. Все, больше нет!

ӦПИЧЕР. Слушаюсь!.. (Бергӧдчӧ салдатъяслань.) Рота, вольно!.. (Веськыдвывсянь петӧ Кузьма — мышсӧ малалӧ, ружтӧ, босьтӧ ассьыс паськӧмсӧ да мунӧ йӧз сайӧ. Кузьмакӧд тшӧтш петӧ станӧвӧй.)

НАГЕЛЬ (Гришалы). Кипрушев!.. Скажи крестьянам, чтобы они слушали, я буду говорить!..

ГРИША. Кывзӧй!.. Ӧні кӧсйӧ тіянлы висьтавны мыйкӧ начальник Вӧлӧгӧдскӧй губернскӧй палатаысь! (Йӧз костын кызӧны, сэсся ланьтӧны.)

НАГЕЛЬ (бергӧдчыштӧ йӧзлань да скӧрысь висьталӧ). Ну, вот, бунтовщики, довольны теперь? Я в прошлом году зимой приезжал к вам, но вы тогда оказали нам вооруженное сопротивление... Теперь мы приехали с военной силой, вместе с господином жандармским полковником Санкт-Петербургского военного округа. И вот мы вас, мерзавцев, проучили, как родной отец учит своих непокорных детей. Сволочи!.. Не забудьте это! Не смейте вперед бунтоваться! Повинуйтесь, мерзавцы, властям военным и гражданским, они поставлены богом и великим государем императором! Передайте это вашим детям, внукам и правнукам! Пусть эти розги послужат всем хорошим уроком!.. Приказываю найти и остальных — главных бунтовщиков!.. Они больше вас виноваты! Их, сволочей, больше накажут!.. Кто укажет место, где они скрываются, тому будет выдана награда из царской казны!.. Да, смотрите, вы, черти: если не укажете, на всех наложим большой штраф! Скажите еще, слава богу, что только розгами наказали вас, а не стреляли из ружей! Приказываю завтра всем явиться в церковь на благодарственный молебен по случаю усмирения вашего мятежа!.. Ну, что же вы взяли, мерзавцы? Себе же хуже сделали: все расходы по усмирению бунта падут на вас; здесь будут жить солдаты, которых вы должны содержать — кормить, поить и квартиры давать! Да не прекословить им! Ну, вот!.. Живите вперед тихо, смирно!.. Теперь все пройдемся с барабанным боем по всему селу, чтобы все люди видели и почитали начальников!.. Кипрушев и Русинов снова будут на своих прежних должностях, — подчиняйтесь им беспрекословно! Вот и все! (Бӧр бергӧдчӧ, важ мозыс сувтӧ. Жандарм киӧдыс тракӧдӧ Нагельӧс нимкодьпырысь.)

ГРИША (йӧзлы). Гӧгӧрвоинныд? Кывзӧй пӧ начальствоӧс, Кипрушёвлы пӧ да Русиновлы — меным зятькӧд — энӧ прӧтивляйтчӧй!.. Награда пӧ сэсся сетам, коді индас ли висьталас, кӧні пышъялӧны-дзебсясьӧны главнӧй бунтовщикъясыс — Елесь Габӧ, Сергей Сидӧр, Опонь Васька, мукӧдыс — ставнысӧ колӧ кутны да накажитны!.. Аски ставныд вичкоӧ локтӧй — молебен вылӧ! Кевмысьӧй енлы, мед прӧститас тіянлысь мыжнытӧ!.. Ӧні пӧ сэсся первой ставным лэччылам йи вылӧ, босьтасны сэтысь пушкаяс тшӧтш да сэсся пӧ Кулӧмдін кузяыс ставным мунамӧй барабанӧн ворсігтырйи... (Бергӧдчӧ бӧр.)

ЖАНДАРМ (офицерлы). Поручик! Сейчас пойдем сначала на реку, в лагерь, оттуда возьмем пушки и все пройдемся по Усть-Кулому с барабанным боем!

ӦПИЧЕР (жандармлы). Слушаюсь! (Бергӧдчӧ салдатъяслань да командуйтӧ, лӧсьӧдӧ найӧс параӧн-параӧн.) Рота, в две шеренги стройся! (Салдатъяс лӧсьӧдчӧны кык радӧн, йӧзлы мышкӧн.) Равняйсь!.. Смирно!.. На-пра-во!.. (Ставныс бергӧдчӧны веськыдвылӧ чужӧмнаныс.) Барабанщики, на места!.. На плечо! (Салдатъяс лэпталӧны ружйӧяснысӧ пельпом выланыс.) Прямо по дороге шагом марш! Ать, два, три!.. (Барабан таркӧдӧ, салдатъяс мунӧны веськыдвылӧ, офицер (бокӧд) водзлань мунӧ; на бӧрся мӧдӧдчӧны начальство, сэсся Гриша да Митрей, медбӧрын став йӧзыс пернапасасьӧны. Мыйӧн йӧзыс вӧрзьӧдчасны да муныштасны — занавес усьӧ.)

СИЗИМӦД ТОР

Вӧр. Вуктыл ю пытшкӧс (17 верст сайын Кулӧмдінсянь). Шуйгавылас тыдалӧ вӧр керка — «Марка керка», ичӧтик ӧдзӧса. Ӧдзӧсыс воссьӧ веськыда (йӧзлы паныдӧн); керка бокас сулалӧны 3 гоз лызь; ӧдзӧс дорас — пу зыръяс. Тӧв. 1843 во, март тӧлысь. Вӧчсьӧ лун дас мысти квайтӧд тор бӧрын. Асывводз.

1-я петкӧдчӧм

Керка водзын ичӧтик бипур: ӧшалӧ мӧтыр йылын пӧрт. Бипур гӧгӧрыс кыз чуркаяс вылын пукалӧны: Габӧ, Рӧдь да Миш. Рӧдь пусьӧ; сёрни костын видлывлӧ паньӧн пӧртсьыс, кодсюрӧ пыралӧ керкаас да мыйкӧ вайӧ сэтысь; мукӧдыс куритчӧны. Ставныс лазъяӧсь.

ГАБӦ. Код тӧдас, гашкӧ, тувсавны на тані миянлы лоӧ да?..

МИШ. Тулысӧдз ӧд оз жӧ овны?

РӦДЬ. Кодъяс, салдатъясыд?.. Оласны бара найӧ — мый нӧ не овны налы? Нянь-сов дась, жӧритӧны пӧ вӧвъяс моз, мырдӧн пӧ ещӧ тшӧктӧны чӧскыдджыка вердны...

ГАБӦ. Мыйла нӧ, пӧдлиннӧ, сарыс эз гиж нинӧм миян прошенньӧ вылӧ?.. Дзонь во нин коли, а некутшӧм ӧтвет абу... Мыйкӧ ӧд вӧлі кывсьӧ ещӧ — наследник пӧ локтӧ Кулӧмдінӧ-а, эз жӧ во.

РӦДЬ (сералігтырйи). Заставаыд, кӧнкӧ, эз лэдз сійӧс Кулӧмдінад, кутіс да Дереваннӧй вӧлӧксянь бергӧдіс... Асьным жӧ шулім: некутшӧм начальствоӧс не лэдзны да...

ГАБӦ. Мыйла тэ шмонитныыс любитан, Рӧдь? Наследникӧс ӧд эськӧ эз жӧ кутны да...

РӦДЬ. Код нӧ тӧдас, наследник абу?.. Кымын начальникӧс сэтысянь вӧлі бӧр бергӧдӧмаӧсь... Колӧкӧ, на пытшкын и сійӧ вӧлі да!..

ГАБӦ. Ланьт, Рӧдь! Сійӧ кӧ ӧд вӧлі, висьтасис жӧ... Ме чайта, сарыд ачыс сулалӧ йӧзӧс ӧбӧдитысь начальство дорыд, Ӧнись Гришъяс дорыд, сійӧн и эз гиж нинӧм. Сы пыдди тай медбур йӧзсӧ миян Кулӧмдінсьыд кулисны, сё дас мортӧс пӧ розгаӧн нӧйтӧмаӧсь. Кодӧс пӧ индалісны Ӧнись Гриша зятьыскӧд, ставнысӧ нӧйтісны...

РӦДЬ. Ми кӧ эськӧ сюрим — виисны, ме чайта... Кутасны на ӧд и миянӧс...

ГАБӦ. Салдатъясыс кӧ эськӧ мунасны, оз кутны сэки да, Ӧнись Гришалы огӧ сетчӧй да... Кор вот найӧ мунасны? Ме тай шуа: мися, гашкӧ, тувсавны на тані лоӧ да...

МИШ. Тулысӧдзыд кӧ оласны — локтан тӧлӧдз оласны нин, туй сувттӧдзыд.

РӦДЬ. Сідзнад и миянлы ковмас гожӧмбыд пышъялӧмӧн овны?.. Страдуйтныыс нӧ кыдзи сэсся?..

ГАБӦ. Гортсалы нин кыдзкӧ лоӧ пуктысьныыд сэки, — мый вермасны — сійӧ и олас... Мунасны жӧ ӧд туй тшыктӧдзыс?.. Медтыкӧ сёйны мыйкӧ лои-а, сэсся кыдзкӧ тані олам нин эськӧ вежон кык-куимтӧ да...

МИШ. Гортса кӧ оз вайны, мый сёян?

РӦДЬ. Сійӧ и эм. (Пӧртйысь гудралӧ паньӧн.) Со, кос черитӧ медбӧръяысь пуам. Ещӧ «сюра» коли ӧтчыд пумӧн, — сэсся и бырӧ. Талун ли аски кӧ оз вай некод, и тшыгъявны ковмас...

МИШ. Нинӧм огӧ уджалӧ, а кыдзкӧ вот сёйсьӧ жӧ; вежоныс на абу припастӧ вайӧмыдлы, а бырӧма нин. Наста сэки нин вӧлі висьталӧ: туйыс пӧ омӧльтчӧма да вӧв кокъяс вӧйласьӧны нин... Джын туйсӧ кӧть вӧлӧн и позьӧ вӧлі вайны — песла мунӧм улӧ, а тшыксяс кӧ туйыд — кыдз кыскан припастӧ дас сизим верст саяд?.. Дерт, подӧн лоӧ Марка туйӧдыд вайны. Унатӧ зэв он нопъяв подӧннад.

ГАБӦ. Пӧдлиннӧ, Настаыд вӧлі сэки висьталӧ: Васька Маркаыс пӧ паныдасис туй вылас... Сійӧ, морыд, вермас на и индыны миянӧс ещӧ... Миянӧс индӧмысь пӧ награда кӧсйысьӧмаӧсь сетны да...

РӦДЬ. Мыйӧн нӧ тӧдас сійӧ миянӧс татысь?

ГАБӦ. Сійӧ? Сійӧ бара тӧдас... Да ӧд кӧть коді гӧгӧрвоас, кытчӧ ӧнія пӧраӧн, мый кыскӧ нопнас Настаыд Марка чӧс туй кузяыс. Пырысь-пыр Маркаыд и думыштас миянӧс аслас керкаын олӧмӧн.

МИШ. Вермис, дерт... Эг ӧд и юав Насталысь, мыйкӧ сёрнитіс эз сыкӧд Маркаыс.

ГАБӦ. Сійӧ бара весиг эз и сёрнит... Ме думайта да, миянлы татысь колӧ мӧдлаӧ сетчыны регыдджык.

РӦДЬ да МИШ (ӧтпырйӧ). Няньтӧгыд? Кодарӧ?

ГАБӦ. Няньтӧ ӧд ваясны жӧ... Каям Вуктыл йывланьыс Педот керкаӧдз.

МИШ. Ок, сійӧ ӧд зэв ылын! Кыдз сэтчӧдз каян, омӧля нин лызьнад лыбан да?

ГАБӦ. Ылын кӧть абу, а колӧ кайны, — татысь аддзасны, кутасны миянӧс.

РӦДЬ (пӧртсӧ босьтӧ). Вайӧ, наперво, ӧбедайтамӧ да вӧлисти сэсся мыйкӧ вӧчамӧ, — луныс тай, майбыр, миян!.. Тані али керкаас пырам?..

ГАБӦ да Миш (тшӧтш). Тані, би дорас... (Лӧсьӧдчӧны да сёйӧны — панясьӧны пӧртйысь.)

РӦДЬ. Кӧнӧсь бара мукӧд тӧварышъясным-а: Сидӧръяс, Васькаяс?..

ГАБӦ. Найӧ Джеджимлань пышйисны кытчӧкӧ... Код тӧдас, гашкӧ, найӧ сетчисны нин да... (Сёйӧны.)

2-ӧд петкӧдчӧм

ДАРЬЯ (локтӧ веськыдвывсянь, нопъя, туиса). Сёйӧны буретш!.. А ме нянь вая тіянлы... (Первой ставныс повзьӧны. Габӧ уськӧдчӧ пыридзла.)

РӦДЬ. Но, Дарья вӧлӧма!.. Кутшӧма ставнымӧс повзьӧдін, менам юрсиӧй весиг сувтліс!..

ГАБӦ (локтӧ Дарья дінӧ). Ме пыридзла нин уськӧдчылі. Ме чайті кӧ, збыль нин кодкӧ миянӧс кутны локтіс... Вай, пӧрччы ноптӧ да шойччы...

ДАРЬЯ (пӧрччӧ нопсӧ). Ёна и мудзи, шойччыны лоӧ: туйыс зэв омӧль да ӧдва вои...

ГАБӦ. Пыр подӧн?

ДАРЬЯ. Подӧн, дерт... (Сетӧ нопсӧ.) На, тані сукар да, мый да, унасӧ ог вермы вайныыс-а. Ректы кытчӧкӧ да ме ноп-мешӧксӧ бӧр лэччӧда, мӧдысь на, гашкӧ, ковмас вайны да... Туисас тані рысьтор вайышті... (Габӧ нопсӧ ӧдзӧс водзӧ пуктӧ.)

РӦДЬ. Рысь сёйысь семья кодьӧсь ми и эмӧсь ӧні. (Сералӧ.) Самӧй ыджыдвидз!..

ДАРЬЯ. Ыджыдвидз эськӧ да кысь нин тіянлы тані олігад видзавныыс. Сідз жӧ ӧд лёк салдатъяс ставсӧ жӧритасны...

ГАБӦ. Мый нин нӧ вӧчсьӧ миян, салдатъясыс оз на мунны?

ДАРЬЯ (пуксьӧ). Ой-я да ой-я, эн нин сёрнит!.. Ог нин, буракӧ, ловъя юрӧн мынлӧй наысь!.. Ӧти джынйыс ӧд мӧд луннас ли, мый ли и мунліс эськӧ да мӧд джынсӧ колисны. Гашкӧ, сё мортӧс... Видзны, вердны найӧс сюялісны миянӧ и, Носимӧ и, — быдлаӧ!.. Командирыс налӧн олӧ Ӧнись Гриша ордын... Господьӧ, мыйсӧ оз вӧчны найӧ, кузь висьӧмъяс!.. Страсьт!.. Рытгорув он нин лысьт весиг керкаысь петны...

ГАБӦ. Мый нӧ сэтшӧмыс керсьӧ?

ДАРЬЯ. Быдсяма дивӧсӧ вӧчны пондісны. Оз тай шуны: грек пӧ ыджыдвидз кузя сідзи кикимеритчыныыс. Нывъяс вылын аминь нин ёна смекайтчӧны салдатъясыд!.. Суасны войпуканінысь да чужӧмъяснысӧ налысь саӧн мавтасны, сэсся кианыс сеталасны гӧликъяс, корӧсьяс, пач лысъяс, нянь зыръяс да сідзи и новлӧдлӧны сикт кузя... Асьныс, салдатъясыс, сэки брунӧдчӧны, кутшӧмкӧ гӧгрӧс брунӧдчан эм да, нывъясӧс мырдӧн тшӧктӧны быд ногыс чиклясьны да чилзыны-горзыны.

РӦДЬ. Мый нӧ зонъясыс видзӧдӧны, оз пуркӧдны найӧс, ме кӧ эськӧ...

ДАРЬЯ. Ланьт! Зонъясыс некытчӧ нин оз лысьтны петавны... Дай этша накӧд водзсасян: ставныс пищаляӧсь, командирыслӧн сабля ӧшалӧ бокас...

ГАБӦ. Оз на нимав, кор кӧсйӧны найӧ мунны татысь?

ДАРЬЯ. Локтан тӧлӧдз на пӧ видзасны, шуӧны... Кыдзи и овны кутан, пӧгибӧ дзик воштасны йӧзсӧ, миянӧс эськӧ дзикӧдз нин джагӧдасны да... (Ставныс бура дыр чӧв олӧны. Оз сёйны.)

ГАБӦ (ышловзьӧ). Аттӧ дивӧ!..

ДАРЬЯ. Мый нӧ онӧ сёйӧ?.. Рысьтӧ сёйӧй!..

ГАБӦ. Шогӧдіс да оз и сёйсьы... Ӧнись Гришыс нӧ мый, век на розганас нӧйтӧ йӧзсӧ?..

ДАРЬЯ. Ӧні сійӧ, лёк сьӧд юрыд, дзик звер кодь!.. Йӧзыс сэсся ӧні зэв ёна полӧны сэтшӧм страститчӧм бӧрад дай... Важ нӧйтӧмсьыс на унаӧн куйлӧны... Ньӧрторъясыс яяс вӧлі уналы пыралӧма да тотшысъясӧн перъялӧмаӧсь...

ГАБӦ (сьӧлӧмсяньыс). Коркӧ ӧд волас жӧ Ӧнись Гришалы пом!..

3-ӧд петкӧдчӧм

Шуйгавывсянь (керка сайсянь) мыччысьӧны: Марка, офицер да 5–6 салдат. Пукалысьяс найӧс оз аддзыны, сёрнитӧны водзӧ.

МАРКА (гусьӧник офицерлы, чуньнас индӧ пукалысьяс вылӧ). То, то, то! Бегуны-тӧ!..

Ӧпичер салдатъяслы ньӧжйӧник висьталӧ, мед найӧ ружйӧяснысӧ кианыс босьтасны, ачыс саблясӧ кыскӧ.

РӦДЬ. Вайӧ рысьтӧ видламӧй! (Восьтӧ туис вевт, кимӧдзнас кучкалӧ вугъяс.)

Сэки друг офицер да салдатъяс уськӧдчӧны на вылӧ. Ставныс горӧдӧны, повзьӧны. Дарья чарӧстӧ да пышйӧ керка сайӧ. Марка сулалӧ бӧрынджык.

ӦПИЧЕР (лёкысь). Стой, ни с места!.. (Салдатъяслы.) Взять их! Связать! Под конвоем в Усть-Кулом. (Салдатъяс быд мортӧс кыкӧн кӧрталӧны киясӧдныс.)

ГАБӦ (аддзӧ Маркаӧс да лёк сьӧлӧмӧн шуӧ). Со тай!.. Тайӧ тэ, Марка, миянӧс индін... Юда!.. Донысь-ӧ нӧ вузалін?..

МАРКА (серамӧн). Эг зэв донысь, Габӧ, ӧні кежлӧ тай парта вина юктӧдісны-а, ог тӧд, водзӧ кутшӧм награда ещӧ сетасны...

ГАБӦ. Абу и яндзим?.. Ок тэ, Ӧнись Гришлысь кок пыдӧс нюлысь!.. (Дарья петӧ керка боксянь, босьтӧ пыридз.)

МАРКА. Ньӧти абу!.. Тіян понда мыйта йӧзӧс розгаалісны, а ті пышйинныд?.. Асьныд тшӧтш видлӧй розга кӧрсӧ!

ДАРЬЯ (пыридзӧн уськӧдчӧ Марка вылӧ, салдатъяс казялӧны да кутӧны). Пыридзнас, лешакӧс, морӧсад и сутшка!..

ӦПИЧЕР (салдатъяслы). Взять ее тоже! (Салдатъяс пыридзсӧ шыбитӧны, Дарьяӧс тойыштӧны медводзӧ, сэсся сувтӧдӧны сы бӧрӧ куимнаннысӧ. Дарья горзӧ: «Ой-я да ой-я! Сюрим ставным!.. Вузалісны миянӧс юрнаным!..»)

ӦПИЧЕР (командуйтӧ). На пле-чо!.. (Салдатъяс вӧчӧны.) Шагом марш!.. Ать, два, три... Левое плечо вперед — марш!.. Ать, два, три!.. (Мунӧны, медбӧрын вӧрзьӧдчӧ Марка.)

Занавес.

КӦКЪЯМЫСӦД ТОР

Вӧчсьӧ ывлаын (кӧні и квайтӧд торйыс), гожӧм шӧрын, лунын. Сизимӧд тор вӧчӧмсянь кольӧ вит тӧлысь. 1843 во.

1-я петкӧдчӧм

Шуйгавылын сулалӧны йӧз, водзынджык — Ӧнись Гриша да Русинов. Веськыдвылын салдатъяс, на дінын офицер. Шӧрӧдыс ветлӧдлӧ станӧвӧй. Веськыда — торйӧн сулалӧны кык радӧн: воддзаас — Габӧ, Сидӧр, Васька да Рӧдь, бӧръяас — Миш, Педӧр да Ярӧ; кияссӧ налысь мышканыс кӧрталӧмаӧсь кӧвйӧн (позьӧ чепъясӧн, эмӧсь кӧ); чужӧмъясныс налӧн мудзӧмаӧсь, нюкыртчӧмаӧсь.

Занавес воссигӧн веськыдвылын кылӧ барабан шы. Йӧз костын гӧлӧсъяс: «Эштіс, кылӧ, слабог... О, господьӧ...»

СТАНӦВӦЙ (Гришалы). Кажется, последний?

ГРИША. Так тошно, ваше благородие, пӧследней! Тикӧн был... Тепер сё...

2-ӧд петкӧдчӧм

Веськыдвывсянь петӧ Тикӧн, неуна ружтӧ. Сувтӧ бӧръя радӧ.

СТАНӦВӦЙ (йӧзлы). Ну-ко, слушайте теперь, что я скажу вам. (Перйӧ бумага.)

ГРИША (йӧзлань). Кывзӧй, мыйкӧ кӧсйӧ тіянлы висьтавны господин станӧвӧй пристав.

СТАНӦВӦЙ. Ну, вот, крестьяне, теперь вы сами видели, что противляться властям не должен никто, потому что власть-то поставлена царем и богом. Нужно повиноваться.

КОДСЮРӦ (йӧз пытшкын). Вернӧ, ми повинуйтчам... Огӧ прӧтивляйтчӧ...

ГАБӦ (сьӧлӧмсянь). Неправильный закон, обижают крестьян беззаконно!..

СТАНӦВӦЙ (Габӧлань). Молчать, бунтовщик!.. Тебе уже показали закон!.. (Йӧзлань.) Теперь слушайте дальше. (Видзӧдӧ бумага вылӧ.)

ДАРЬЯ (йӧз костын). Закон тай!.. Крестьяналысь вирсӧ пычканныд!..

СТАНӦВӦЙ. Молчать!..

ГРИША (тшӧтш). Ланьт, Дарья!.. Эн лысьт шыасьны!..

ДАРЬЯ. Законтӧ тіянлысь сӧмын закодӧ шыбитны!.. Дай шыасьны сэсся оз позь?!

СТАНӦВӦЙ. Кто тут смеет рассуждать?

ГРИША. Дарья Попова, ваше благородие, говорит, жена Габрила-то, буянка такой же!..

ГАБӦ. Эн, Дарья, пинясь накӧд, весьшӧрӧ!..

СТАНӦВӦЙ. Замолчать, вам говорят! Или розги захотелось?..

ГРИША. Розгаалам ставнытӧ!..

ДАРЬЯ. Тэ бара верман, лёк кырныш!..

ГАБӦ. Эновт, мися, Дарья...

ГРИША. Дырджык сэні бызгы!.. (Йӧз костын гӧлӧсъяс: «Ланьтыштлӧй!.. Эн, Дарья, пинясь!»)

СТАНӦВӦЙ. Что это такое? Запорю всех!.. Молчать!.. (Йӧз костын: «Некод не говорит да... Се молчат да...»)

СТАНӦВӦЙ. Ну, слушайте!.. (Видзӧдӧ бумага вылӧ.) Решением уголовного суда Вологодской палаты по делу об Усть-Куломском волнении, главные зачинщики, в числе 8 человек, а именно: податные крестьяне 2-го податного участка с. Усть-Кулома Гаврила Елисеев Попов, Родион Елисеев Попов, Михаил Семенов Попов, Феодор Матвеев Турьев, Василий Афанасьев Кипрушев, Сидор Сергеев Морохин, Тихон Семенов Попов и крестьянин дер. Носим Герасим Ефремов Сладкоштиев приговорены лишению всех прав состояния и после наказания плетьми ссылке в Сибирь на вечное поселение. Поняли?

ГРИША (йӧзлы). Гӧгӧрвоинныд пӧ? Главнӧй бунтовщикъяссӧ (индӧ судитӧмаяс вылӧ), тайӧясӧс, кӧкъямыснансӧ судитӧмаӧсь плетьӧн нӧйтны да Сибирӧ юрнаныс мӧдӧдны, нэм кежланыс. (Йӧз костын кылӧ нывбабаяслӧн лыддьӧдлӧмӧн бӧрдӧм шы; мукӧдыс ышловзьӧны гораа.)

ГАБӦ (йӧзлань). Миянӧс ті, вокъясӧй, энӧ жӧ вывті лёкӧн казьтылӧй!.. Ми кӧсйим правда корсьны и тіянлы тшӧтш... Эз тай удайтчы-а... Мый керан сэсся... Мед!.. Тӧдӧй ті, вокъяс: миянӧс Сибырӧ мӧдӧдӧны правда вӧсна... Коркӧ, ме чайта, правдаыс лолас на!..

СТАНӦВӦЙ. Молчать! Слушайте дальше! (Видзӧдлӧ бумага вылӧ да висьталӧ.) Бывшего помощника писаря Усть-Куломского общества Ивана Елисеева Попова по делу сему за нерадивое отношение к службе и перехождение на сторону чинителей беспорядков — лишить права поступать на службу и на будущее время не допускать и не определять ни к каким должностям.

ИВАН (йӧз пытшсянь). Сӧгласен...

СТАНӦВӦЙ. Кроме того, взыскать со всех граждан Усть-Куломского общества прогонные и кормовые деньги, расходы по усмирению беспорядков, всего 3288 руб. 10 коп. на ассигнации... Вот! (Сюйӧ бумагасӧ зептас.)

ГРИША (йӧзлань). Кыланныд? Кормӧвӧй пӧ да став рӧскодыс куим тысеча саяс; сійӧс перйыны тшӧктӧмаӧсь тіянлысь ставныдлысь.

КОДСЮРӦ. Мынтам нин эськӧ да... Мый нӧ керан, сё батюшко...

МАРКА. Быть ӧд мынты... Сла-бог, кокньыда ещӧ мынім да!..

ГАБӦ (Маркалы). Тэ, Марка, мынін, миянӧс парта винасьыд вузалін да... Юда!..

ГРИША (Габӧлы). Ланьт!.. Сы йылысь нинӧм сёрнитны!..

ГАБӦ. Ӧні, дерт нин, нинӧм, сёрнит кӧть эн...

СТАНӦВӦЙ. Молчать!.. Теперь, от имени начальника Вологодской губернии, за усердную службу и неослабное взыскивание податей объявляется благодарность Усть-Куломскому голове Григорию Онисимовичу Кипрушёву и писарю Димитрию Тимофеевичу Русинову. (Матыстчӧ да киасьӧ Григорийкӧд да Митрейкӧд.)

ГРИША. Вот благодару... Завсегда рад старатса!.. Теперь, ваше благородие, милости просим ӧбӧдайтны домой у меня...

СТАНӦВӦЙ. Хорошо. (Йӧзлы.) Ну, вот, теперь разойдитесь по домам с богом!.. Да вперед не чините беспорядков, а то плохо будет, — сами узнали теперь, как строго за это наказывает закон... Солдаты еще здесь будут жить до зимы, кормите и уважайте их!.. А осужденных отправим под конвоем в Усть-Сысольск. (Гришалы.) Кипрушёв! Объясни им по-зырянски.

ГРИША. Корошо! (Йӧзлы.) Господин станӧвӧй пристав тшӧктіс висьтавны тіянлы: водзӧ кежлӧ пӧ энӧ бунтуйтчӧ некор! (Йӧз костын гӧлӧсъяс: «Господь мед видзас!..» «Кутшӧм али бунт...» «Огӧ нин, буракӧ, таысь нэмӧн мынлӧ-а». Гриша водзӧ висьталӧ.) Тайӧясӧс (индӧ судитӧмаяс вылӧ) конвойӧн карӧ лэччӧдасны талун жӧ, вермасны кӧ, либӧ аски... Мукӧд салдатъясыс пӧ кольӧны на тӧлӧдз, туй сувтас да вӧлисти лэччасны вӧлӧн... (Йӧз костын гусьӧник гӧлӧсъяс лыбӧны.) Но, сэсся муналӧй гортаныд. (Станӧвӧйлы.) Сё сказал, ваше благородие.

СТАНӦВӦЙ (офицерлы). Господин поручик! Заберите осужденных, назначьте конвоиров 10 человек и — можно разойтись.

ӦПИЧЕР (командуйтӧ). Рота, равняйсь! Смирно! На плечо! (Матыстчӧ судитӧмаяс дінӧ.) Становитесь впереди роты, марш! (Найӧ ньӧжйӧник мунӧны салдатъяс пытшкӧ.)

ГАБӦ (бергӧдчылӧ йӧзлань). Прӧщайтлӧй, вокъяс, да лёкӧн энӧ казьтылӧй миянӧс!.. Коркӧ, гашкӧ, правдаыс кыптас на!..

Йӧз костысь тойласигтырйи петӧны кымынкӧ нывбаба, Дарья тшӧтш. Унаӧн синъяссӧ чышкалӧны. Нывбабаяс лыддьӧдлӧмӧн лимзалӧны да сюйсьӧны пырны судитӧмаяс бӧрся, найӧс салдатъяс оз лэдзны.

ДАРЬЯ (сьӧлӧмсянь). Менӧ тшӧтш мӧдӧдӧй!.. Ме Габӧысь ог кольччы... Лэдзӧй!.. Тшӧтш Сибырӧ муна накӧд!..

НЫВБАБАЯС (лыддьӧдлӧмӧн). Кыдзи нӧ ми олам сэсся?.. Кодлы нӧ ті миянӧс колянныд?.. Ок, югыд шондіӧй да шондібанӧй!..

ӦПИЧЕР (салдатъяслы). На-ле-во!.. Шагом марш! Ать, два, три!

Мӧдӧдчӧны, кылӧ барабан шы, мунӧны веськыдвылӧ. На бӧрся — начальство; сэсся йӧзыс шогсигтырйи разӧдчӧны.

ПӦЛИК (йӧзсьыс неуна торъялыштӧ да кияснас бокас швачкӧ.) Мый керан, быть ӧд мун, сэтшӧм законыс да.

Занавес.