Кусæг лæг (Гæдиаты)

by Гæдиаты Секъа

КУСÆГ ЛÆГ

Кæд лæг дæ
Уæд фезмæл, лæгау,
Куыстæнма кæн
Дæ хъару æвгъау.

Изæрæй мыс
Райсомы куыст,
Райсом та-иу
Хæрзраджы сыст.

Ифтонгæй дар
Гутон дзæбæх.
Хъæлдзæгæй зар,
Ма у лæмæгъ.

Дæ галтæ дар
Хосæй æфсæст,
Уæд кæндзынæ
Цардыл æрмхæст.

Мæхъитæ би
Бæрз талатæй.
Дæхи базон
Дæ фадатæй.

Куыдзæн æппар
Æхсыд ыстæг...
Дзæгъæл ма саф
Куысты рæстæг.

Нартхор бакæн,
Мæнæу — фылдæр.
Ма дзы ныууадз
Хæмпæл, гæн дæр.

Хъуццытæ дар
Æртæ-цыппар.
Нæ дын уыдзæн
Гъеуæд ызнаг.

---