Кыдзи кӧдзны да мыйӧн кӧдзны
Коді кӧдзӧ аслас му вылас кутшӧмсюрӧ кӧйдысӧн, сійӧ ни аслыс, ни обществолы бурсӧ оз вӧч. Кӧдзны колӧ машинаӧн, бура весалӧм кӧйдысӧн: мед ӧти ёгтор эз вӧв, мед кӧйдыс тусьыс вӧлі ӧткодь гырысь, сьӧкыд, да и чужысь. Гырысь туся сьӧкыд кӧйдыс бурджыка чужӧ да быдтӧ бурджык ӧзим. Сэтшӧм кӧйдыснас повтӧг позьӧ кӧдзны шочджыка. Шуам: кытчӧ кӧдзсьӧ 1 пудовня ид — сэтчӧ повтӧг позьӧ коявны 30−32 пунт, да и няньыс воас бурджык да унджык, со мый вӧсна: сэтшӧм кӧйдысыс быдтӧ бурджык ӧзим, сетӧ унджык, крепыдджык идзас. Тӧдӧмысь, кымын крепыд, ён идзас, сымын тыра ыджыд шеп лоӧ.
Мукӧд крестьяниныс миян зэв бура мусӧ старайтӧ. Куйӧдсӧ петкӧдас уна, бура гӧрас, уна пӧв пинёвтас, сідзинад сылӧн муыс веськыд гӧн перина кодь лоӧ, сэсся сэтчӧ шняпкӧбтас сэтшӧм кӧйдыс — став воддза старайтӧмсӧ тшыкӧдӧ. Бӧрыннас дивуйтчӧ: мый понда сибалӧма сійӧ му вылӧ ёг турун, вартігас этша нянь усьӧ — унджыкыс жугйӧ мунӧ.
Мукӧд кӧдзӧны машинаӧн.
Прӧста оз кутчысьны машинаад: сэсь уна пӧльза перйӧны.
Кинад кӧдзигӧн да вӧлӧн пинёвтігӧн уна кӧйдыс вошӧ. Коді вылӧ кольӧ — оз чуж; коді пыдӧ пырӧ — кӧть и чужас, да петныс выныс оз судзсьы; кодӧс вӧв тальыштӧ — пыдӧ сюйӧ чорыдінӧ; кодӧс рака-кай кокалӧ.
Машина пуктӧ ставсӧ ӧтвылнаӧ, мичаа тыртӧ небыдик муӧн, колялӧ кост — мед быдмигас ӧти-мӧдлы ӧзим кустыс оз мешайт. Сы понда машинаӧн кӧдзӧны шочджыка. Быд пудовня улӧ смелӧ позьӧ чинтыны 8−10 пунт.
Вот ӧні думыштӧй, кыдзи кӧдзны да мыйӧн кӧдзны.
Кинад кӧдзан пуд, машинаӧн да бура весалӧм кӧйдысӧн — 32 пунт, а няньыс воӧ бурджык да унджык: быд пудовня улӧ воӧ лишнӧй пуд 2−3.
Агроном Темноев.
|
This work is in the public domain in the United States but it may not be in other jurisdictions. See Copyright.
|