Укмыс арес луи но, монэ атай дышетӥськыны сётӥз. Гуртамы школа ӧй вал. Дышеськыны ветлоно луи ӟуч гуртэ, кык иськеме. Кулытозям уг вунэты сокем курадӟыса дышеськемме.
Табере мон пинал ӧвӧл ни; озьы ке но, дышеськон даурме, дышеськемме малпасько ке, синмысьтым синкылие (синвуэ) вия. Азьло, Миколай эксэй дыръя вераны, ымез усьтыны уг луы вал. Я, со секыт аръёс ортчизы. Табере мон ваньмызлы вичасезлы верало: кызьы дышеськи мон ӟуч школаын, кызьы ӟуч школа сӧриз монэ.
Пичи дыръям мон адямиослэсь туж уг возьдаськиськы вал, нокинлэсь но уг но курдаськы вал. Адямиос ваньмыз ик (ӟуч но, бигер но), ваньмыз ик туж ӟечесь дыр, огзэс огзы яратыса уло дыр шуыса малпасько вал. Адямиос сыӵе ӟечесь луэм бере, марлы мон соослэсь курдалом? Озьы малпаса, номыр кайгуэз тодытэк, возь вылысь бубыли кадь, эшъёсын бызьылыса, [шудыса] улӥм.
Дышеськын куськем бере мон мукет луи. Ӟуч кыл чик уг тодӥськы вал. Дышетӥсь но удмурт кыл одӥг но уг тоды. Мон, номыре валатэк, усыкмем кадь, нуналлумбыт школаын пукыса, мӧзмыса лушкем бӧрдӥсько вал. Ӟуч пӧлын, мон удмурт ныл, огнам дышеськи, мукет удмурт эшъёсы ог но ӧй вал. Ӟуч кыл тодымтэись, номыре но валамтэись дышетӥсь монэ ӧз яраты, кырыж учке мон шоры. Кин ӟеч вала, кинлэн атаез поп, диакон — сыӵеоссэ гинэ со яратэ вал, веша соосыз. Монэ дышетӥсе чик уг веша, чик уг но лӥяты но, мынам кӧты ӝож луыса, монэ но озьы мед вешалоз вал шуыса, дышетӥсе шоры учкыса улӥсько вал. Со монэ озьы огпол вешасал ке, кыӵе мон шумпотысал, кыӵе мон сое яратысал!
Ӧжыт дышеськем берам, мыным лыдон етӥз: киосам копаказ (вечаказ) гижло потӥз. Собере дышетӥсе мон шоры уката но юрдыса (жобаса) учкыны куськиз но, мон туж возьдаськисько вал. Озьы учкытозь, эсьма, со монэ улляса мед лэзьысал. Ог но мынэме потыса уг мынӥськы вал школае. Анай мынын косэ ке, мон трос дыръя, йыры висе шуыса аналскыса кылисько вал. Озьы мон алдаськыны (эрекчаськын) но тӥни дыши. Туж кельтыса (куспатыса) ветлэмысьтым, дышетӥсе тышкаське вал монэ. Дышетӥсьлэн тышкаськемезлы [ношнаик] чидасал: уг чидаськы вал дышетӥськись ӟуч пиослэн адӟонтэм каремзылы. Соос монэ адями чотын уг адӟо вал, исало, серекъяло монэ. Нимыным мыным уг вазё: «гожмо шыр» вал мынам нимы. Котькызьы но, котькуд ласянь но йырез кур карыны турттыса, серекъяло вал соос монэ — кур каремзэс ваньзэ вераны кылыд уз тырмы. Озьы кур каремысьтызы, мон интыысьтым вырӟыны дӥсьтӥсьтэм улӥсько, куалекъяса гинэ пукисько: тани огез мыжгоз, мукетыз чапкоз, шуыса. Тушмонъёс кадь ик соос пото вал мыным.
Дышеськемысь дугдын атай (айы) ӧз лэзьы, кызьы ке но тыршы, пырпоты шуиз. Уг тодӥськы: озьы дышеськыса, мае ке но валаса вуысал мед-а, ӧй мед-а!? Ярано, мынам шудам агайёсы гожтэт тодо вал. Дорам (дӥням) бертӥсько ке, агайёсы кудзэ-кудзэ валэктыса сётозы вал. Соин гинэ, вырон-вырон сямен каллен ӟуч кыл валан куськи. Собере, валамме шӧдыса, дышетӥсе но туж кырыж уг ни учкы. Ӟуч пиос гинэ, весь дышеськыса дугдытозям адӟонтэм каризы.
Озьы но тазьы вить ар (вить пол) дышеськи но экзамен сётӥ. Калык, пинал дырзэ, дышеськон даурзэ, чаль (ӝог) ортчиз шуыса, мусо карыса жаляса вера. Мон озьы уг шуиськы. Маиз понна бен мон озьы шуом? Маиз понна, мар ӟечез понна мон озьы, дышеськон даурме мусо карыса жалялом? — Дышеськон монэ сӧриз. Удмурт школаын, удмурт сямен ке дышеськысал, мон озьы ӧй шуысал. Мон тау уг кариськы ӟуч школалы. Мон сое каргасько.
Со висись кариз мынэсьтым лулме но, мугорме но. Толалтэ, чар кезьытъёсын нуналлы быдэ кык иськеме пыдын ветлыса, мыным кезьыт пыӵаз: патерын ӟуч дорын улэме уг поты вал, соин туж кезьытэн но доре бертӥсько вал.
Ӟуч пиос монэ «отӥ» алама уллапал каремъя, ачим но мон асме туж алама дыр шуыса малпан куськи: Адями шоры учкын но уг ни дӥсьтӥськы. Ӟуч пиос серекъямысь, кылэз бышкемысь, мон удмурт сямен вераськын но возьдаськын куськи. Ӟуч нылпиос монэ ог но эш (юлтош) ӧз каре, улӥсько вал мон ас поннам, ас куеным ӝикаса кадь. Соин тӥни, та дыръя ке но, бадӟым луэм берам но, ӝикаса кадь, курдаса кадь улӥсь луи. Тӥни сыӵе кариз монэ Миколай эксэйлэн школаез. Табере мон ваньмызлы верасько… верасько кужмо куараен: «Эн турттэ ӟуч кадь луыны, яратон удмуртъёсы! Асьтэ удмурт куен ик йӧно тӥ! Лэсьтэ удмуртлы школа! Пуктэ отчы удмурт дышетӥсьёсыз! Удмурт дышетӥсь удмурт нылпиосыз яратыса дышетоз, визьмо карыны тыршоз. Удмурт дышетӥсь удмурт нылпиосыз удмурт кылын дышетоз. Соку дыръя нылпиосты школаын, номыре валатэк, онраса уз пуке; дышетӥсь мар вераз, ваньзэ валалозы; мае гинэ дышетӥз, ваньзэ дышозы, чаляк но, ӝоггем но дышозы!»