Кылӧдчысьяс
Тувсов ваыс юӧ лэччӧ,
Юыс ворсӧ, юыс ӧддзӧ,
Сьӧрсьыс кылӧдӧ став йи.
Лэчыд багыръясӧн сэтчӧ
Воим кылӧдчыны ми.
«Ноко, ёртъяс, удал пиян,
Босьтчам уджӧ вына киӧн! —
Шуис миян бригадир. —
Вывті ыджыд могным миян,
Оз позь нюжмасьны тан дыр!»
«Ёртӧй, ми ог кольччӧй бӧрӧ,
Кыдз эг кольччылӧй и вӧрын, —
Вочавидзим сылы сэн. —
Сяммам багырӧн да черӧн
Вӧдитчыны ми кӧть кӧн!»
Эз вӧв лӧжӧн тайӧ шуӧм.
Керъяс гӧгӧр уджным пуӧ
Лунысь лунӧ водз и сёр.
Вӧрыс лэччӧ гудыр юӧ,
Кылӧ сылӧн грымган гор.
Лэдзӧм керйыс кывтӧ, мунӧ.
Кужӧ сійӧс водзӧ нуны
Миян багыр, миян ки.
Тайӧ вӧрсӧ тувсов лунӧ
Запань дорӧ ваям ми.
Сэн страналысь ошкӧм кылам
Сыысь, мый быд коми пилӧн
Ыджыд зільлуныс оз быр.
А ми вочавидзам сылы:
«Тадзи уджалам ми пыр!»
1948 во.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 75 years or less since publication (if applicable). |
|