Күк толпар. Гүзәл Ситдиҡова.

Күк толпар

Тау артында тауҙар күкһел-күкһел,

Тау артында - сихри сымылдыҡ,

Астыниһәң, тылсым донъяһына

Башкөллөләр инеп сумырлыҡ.

Алмас тояҡ атым алма сыбар

Елмерҙәккәй ташын мең уя,

Офоҡтарҙа һаман - зәңгәр монар,

Сымылдыҡмы - алыҫ, минме - яй.

Ана-бына ҡыуып етермен дә

Асылыр ҙа кеүек сихриәт.

Күкһел тауҙа күкһел ял уйната

Нуҡта теймәҫ толпар - шиғриәт.

Сымылдыҡтан сығып сырҡырай ҙа

Сығынлата сыбар атымды.

...Көмөш айға көмөш нуҡта элдем -

Эңер-шаршау юл(ы)ма тартылды.

Һуңланым...