Рәйес әсәһенең магазиндан тәмле нәмәләр алып ҡайтыуын көтөп кенә тора. Ә бына эшкә китеүен һис яратмай. Сөнки әсәһе баҫыуҙа саҡта, уға кескәй Зөлфиәне ҡарарға тура килә. Зөлфиә ағаһы менән гел уйнап ҡына ултырмай, бер ҙә юҡтан көйһөҙләнә, илай башлай...
Рәйес бер көн:
— Әсәй, һин сөгөлдөр баҫыуына эшкә барма, ә магазинға ғына бар. Эштә һин оҙаҡ тораһың, ә магазиндан тиҙ ҙә ҡайтаһың, беҙгә кәнфиттәр ҙә һатып алаһың, — тине.
Нәфисә апай көлдө лә:
— Әй, улым, улым, кәнфит-перәниктәрҙе тәүҙә үҫтерергә кәрәк бит әле. Улар магазинға үҙҙәре килеп инмәй, — тине.
Рәйес, әсәһен тәүге тапҡыр күргәндәй, күҙҙәрен тултырып ҡараны ла:
— Кәнфит-перәникте баҫыуҙа үҫтерәләрме ни? — тип һораны.
— Эйе, баҫыуҙа үҫтерәләр шул.
Икенсе көндө Нәфисә апай үҙе эшләгән сөгөлдөр баҫыуына Рәйес менән Зөлфиәне лә алып барҙы. Ләкин ул эшләгән баҫыуҙа комбайн аҡтарып киткән һарғылт япраҡлы, оҙон тамырлы сөгөлдөрҙәрҙән башҡа бер нәмә лә юҡ ине.
— Э кәнфит-перәниктәр ҡайҙа? — тине Рәйес.
— Кәнфит! — тип ҡулын һуҙҙы кескәй Зөлфиә.
— Һеҙ бына ошонда, ыҙан буйында, уйнай тороғоҙ, ә мин хәҙер кәнфит-перәниктәрҙе әҙерләйем, — тине Нәфисә апай. Үҙе, ең һыҙғанып, тупраҡ эсендә ятҡан ҡомғандай эре сөгөлдөрҙәрҙе бысаҡ менән берәм-берәм ҡырҡып таҙарта башланы. Ул шул тиклем шәп эшләй, хатта ҡулдарына күҙ ҙә эйәрмәй ине. Күп тә үтмәне, Нәфисә апай эргәһендә ҙур-ҙур сөгөлдөр өйөмдәре барлыҡҡа килде.
Рәйес бер аҙ шунда уралып йөрөнө лә, әсәһе эшләгән ергә ҡаҙалған кескәй ҡыҙыл флагты күреп:
— Әсәй, ә ниңә ул флагты унда ҡаҙағандар? — тип һораны.
Нәфисә апай:
— Әсәйең йәй буйына тырышып эшләп, сөгөлдөрҙән мул уңыш үҫтергәне өсөн бирҙеләр уны! — тине.
Рәйескә күңелле булып китте. Тик ул кисәнән бирле күңелендә йөрөгән шикте әйтмәйенсә булдыра алманы.
— Һин бит кәнфит үҫтермәйһең, ә сөгөлдөр үҫтерәһең, әсәй. Кисә шаяртып ҡына әйттең, эйе бит? — тип һораны.
— Юҡ, шаяртманым, балам, дөрөҫө шулай, — тине Нәфисә апай, эшенән туҡтамай ғына. — Бына ошо сөгөлдөрҙәрҙән заводта шәкәр алына. Ә шәкәрҙән төрлө-төрлө кәнфиттәр эшләнә, онға ҡатыштырып, перәниктәр, печеньелар бешерелә. Тимәк, мин кәнфит эшләнә торған шәкәр сөгөлдөрө үҫтерәм! Бына йәһәт кенә бөтә сөгөлдөрҙәрҙе лә таҙартып бөтөрәйек тә, машинаға тейәп, заводҡа оҙатайыҡ. Унан беҙҙең магазинға күп итеп тәмле кәнфиттәр, перәниктәр эшләп ебәрерҙәр. Шунан беҙ уларҙы өйгә алып ҡайтып, бергәләп һыйланырбыҙ! — тине Нәфисә апай, йылмайып.
