Лӧсьӧдчӧй призыв кежлӧ
Сӧветса Республикаяс Союзлӧн матысмӧ зэв ыджыд удж — Гӧрд армия вежӧм.
Таво арнас кутасны лэдзавны бессрочнӧй отпускӧ гӧрдармеечьясӧс, кодъяс чужлісны 1902ʼ воын. Найӧ местаӧ кутасны призывайтны выль йӧзӧс — 1903ʼ воын чужысьясӧс.
Призывӧдз этша нин пӧраыс коли — сиктса том йӧзлы колӧ лӧсьӧдчыны сэк кежлӧ.
Ми воддза газетъясын («Югыд туйын» и «Коми Сиктын») гижлім, кутшӧм ӧні военнӧй служба Гӧрд армияын, дыр-ӧ служитӧны; сэсся кутшӧм льготаяс кодлы призыв дырйи сетсьӧ.
Воддза призывъяс дырйи вӧліны уна неладнӧйяс. Сійӧ артмыліс со мыйла: омӧля сиктъясын йӧзыс тӧдлісны призыв йывсьыс пӧрадоксӧ, кутшӧм праваяс сетсьӧ призывайтӧм гӧрдармеечлы да сійӧ семьялы, дай мукӧдтор на. Веськыда кӧ шуны, эмӧсь на миян деревняяс, кӧні оз тӧдны, мыйӧн торъялӧ (разница) Гӧрд армияӧ босьтӧм новобранеч важся рекрутысь.
Сы вӧсна сэсся частӧ и служба вылас босьтӧмыс неправильнӧ овлывлӧ. Сійӧн вермас призывайтӧмыдлӧн кӧзяйствоыд гӧльмыны, дай кодсюрӧ прӧста кутасны лӧг синмӧнджык видзӧдны Гӧрд армия вылӧ, сӧветса военнӧй служба вылӧ. Мӧдарӧ кӧ, сэтшӧм неладнӧ вӧчӧмыс портитӧ и гӧрдармеечӧс асьсӧ, оз кут дзик сьӧлӧмсьыс велӧдчыны служба вылас.
Ставсӧ кӧ тайӧ ӧтилаӧ босьтан, зэв ёна торкӧ Сӧветса власьтлы кыпӧдчыныс: ӧти-кӧ, СССР-нымӧс врагъясысь видзӧм-уджным (оборона) чинӧ; мӧд-кӧ, деревняса овмӧсыс торксьӧ, падмӧ.
Тавося призывсӧ колӧ колльӧдны зэв нин бура, медым весиг озыръяс государствояслы шензьымӧн лои. Медым став мувывса йӧзыс тӧдласны миянлысь кыптӧмнымӧс, выннымӧс. Медым казяласны ставныс: СССР-ын непӧштӧ овмӧсыс кыптӧ, тшӧтш кыптӧ и оласног нуӧдӧмсӧ (политика) тӧдӧмыс.
Важӧн салдатад босьтігӧн вӧлі бӧрдӧны, шогсьӧны, сэсся дыр кежлӧ нулісны.
Ӧні служитны регыд, кокньыд. Гӧрд армияыд ӧні — зэв бур школа. Уна коми гӧрдармеечьяс радӧсь сэтчӧ веськалӧмысь. Унаӧн гижлісны миянлы, кыдзи найӧ ӧтик-кык тӧлысьӧн дзик пемыд йӧзсянь кутӧмаӧсь гӧгӧрвоны унджыксӧ. Гӧрд армияын велӧдӧны не толькӧ государство лёк врагъясысь видзны, сэні велӧдӧны тшӧтш, кыдзи бурджыка стрӧитны сӧветса государствосӧ. Сы вӧсна Сӧвет власьт тшӧктӧ отпускӧ лэдзалӧм йӧзсӧ (1902 воын чужысьясӧс) медвойдӧр босьтны служба вылӧ быд учрежденньӧӧ, кытысь призыв дырйи босьтасны (1903 восяӧс) Гӧрд армияӧ.
Видзӧдлӧй ещӧ местаяс вылын: гӧгӧр-ӧ лючки лӧсьӧдчӧма призыв кежлӧ?
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 98 years or less since publication. |
|