Медводдза вотчӧм
Вит арӧса Гришук бӧрдӧмӧн вӧзйысьӧ чойясыскӧд оз вотны. Найӧ оз босьтны. Шуӧны: «Ылын пӧ да, мудзан ёна. Тэкӧд пӧ ноксьы сэсся». Лои мамыслы шыасьны: «Мудзас кӧ пӧ, мӧдысь оз мун дай, мед пӧ ветлас». Гришуклы нимкодь лои. Босьтіс тасьті, нянь питшӧгас сюйыштіс, чойяс борся котӧртіс. Джын туйсӧ мунӧм бӧрын Гришук жугыльмыны кутіс, мудзис, тыдалӧ. Ӧдва воис вотчанінӧ. Озтӧ мыйӧн аддзис, эськӧ мудзӧмыд Гришуклӧн вунлі. Ӧти тусь дозйӧ пуктӧ, кыкӧс вомас сюйӧ. Кык ыджыд чойлӧн дозъяс тыри, Гришукӧс чуксалӧны нянь сёйны, шойччыны. Кӧсйис эськӧ няньтӧ питшӧгсьыс кыскыны да, абу нин вӧлӧма. Локтігад, буракӧ, коньӧрлӧн туй вылад усьӧма. Чойясыслӧн жальыс петіс да, вердісны, эськӧ лои тшыгъявны. Гришуклысь дозсӧ тыртӧм мысти мӧдӧдчисны гортлань. Лои налы ӧтилаті вуджны шор вомӧн лӧпъяс вывті. Бара Гришукӧс причча суис: кокыс крукасис, ачыс кымынь сапкысис, тасьтіыд уси, став озйыс лӧп пиас киссис. Бӧрдігтырйи водзӧ мӧдіс Гришук. Ӧти шорӧд вуджигӧн пӧрччалісны кӧмкотсӧ, кокниджык пӧ мунныс. Гришуклы ёна нимкодь лои, гортыс мыйӧн тыдовтчис. Коньӧрӧс нӧшта на ӧти причча виччысьӧма. Сійӧ локтігад уськӧдӧма чувки пӧвсӧ ассьыс. Дыр эз вун Гришуклӧн медводдза вотчӧм. Дыр чойяс казьтылісны, шмонитісны сы вылын.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1925, so this work is also in the public domain in other countries and areas where the copyright term is the author's life plus 98 years or less (if applicable), or the copyright term is 97 years or less since publication for posthumous works (if applicable). |
|