(Дусларча шаяру)
Хуш, Минзәлә,
синдә кунак булдым
Бик аз гына, үтеп барышлый;
Шуңар күрә нәни шаярулы
Бу җырымны сиңа багышлыйм.
Исән калсын миннән урамнарың,
Урам баскан карың, бозларың.
Бер лейтенант күрсә, акылыннан
Шаша торган иркә кызларың.
Исән калсын кызылармеец күрсә,
Күкрәгенә кысып орчыгын,
Мышык-мышык кына елый торган
Бала җанлы карчык-корчыгың.
Исән калсын шаян малайларың,
Беләм, алар «сугыш» уйныйлар.
Усалрак этне
«Бу – Гитлер» дип,
Чыбык белән тотып кыйныйлар.
Исән калсын тагын таш морҗалы,
Градуслы сыра заводың.
Гаеп итмә инде, бераз булды,
Тулгалады сыра савытым.
Нишлисең бит, көяз кыз шикелле
Басып тора завод кырыңда.
Шулай булгач, ничек язмый түзим
Ак күбекле сыраң турында.
Исән калсын киноң, театрың,
Карт артистың – данлы Шункарың,
Тик, ахрысы, хәзер театрны
Аз уйный ул, каһәр сукканың!
Исән калсын шаулы базарларың
Һәм куырган тәмле симәнкәң.
Исән калсын сусыз-парсыз мунчаң,
Баскыч-баскыч коры эләүкәң.
Исән калсын «клуб» дип аталган,
Ягылмаган «конюшняларың».
«Зиләйлүк»кә танго бии торган
Сырлы-мырлы барышняларың.
Тик әйтегез, азрак бу клубны
Җылытсыннар иде киленнәр,
Юкса, моны «котып» диеп белеп,
Ак аюлар гына килерләр.
Исән калсын эленеп-салынып торган
Почмактагы пәрәвезләрең;
Күзен-кашын буяп, кияү күзләп,
Азап чиккән зәңгәр күзләрең.
Беләм, кызлар, сезне куркытмыйдыр
Ирен өчен буяу юклыгы;
Беләм, беләм, сезне куркытадыр
Минзәләдә кияү кытлыгы!..
Чынлап әйтәм, кияү – «мөһим нәрсә».
Указ сезне мактап тормас бит!
Кияүгә дә чыкмый, бала тапмый
Йөрсәң, әйдә, түлә процент!
Ярый, дуслар, кызу көннәрдә дә
Шаяргалап шулай көлешик.
Сау булыгыз, Ватан сугышында
Җиңеп кайтып, исән күрешик!
