Мон — удмурт. Мон — туж шудо!
Эрказ луи, бурдъяськи!
Сюлмам горд тылъёс будо,
Сьӧд дуннеысь мозмытски!
Октябрь нуналэ, туннэ,
Ульчае калык потоз.
Кудӥз потоз кырӟанэн,
Кудӥз горд флагез кутоз.
Нокинлэсь но возьдаськытэк,
Удмурт дӥсьме дӥсяса,
Мон но потто кышкатэк,
Горд кырӟанъёс кырӟаса.
Тани — мон но тӥ пӧлын,
Уно пӧртэм калыкъёс.
Мынам мылкыд — туж вылын,
Котырам — выль сюресъёс.
Та Октябрь ӧй ке лусал,
Пеймыт гуын мон улсал,
«Гожмо шыр» нимы лусал,
Аслэсьтым возьдаськысал.
Горд Октябрь монэ ӝутӥз —
Калыкъёс радэ пыртӥз…
Мон — тани: татын сылко,
Удмурт кылын кырӟасько!
Мон — удмурт. Мон — туж шудо!
Эрказ луи, бурдъяськи!
Сюлмам горд тылъёс будо.
Сьӧд дуннеысь мозмытски!
