Моң даръяһы

← Йомашым ғалимдары

Моң даръяһы (Шиғыр) автор Лилиә Һаҡмар

Имәнем →

Ижад итеү ваҡыты: 22.09.2007. Нәшер ителгән: 2006. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (95-се бит) ISBN 5-295-03798-3

Моң даръяһы

Скрипкала бик матур уйнаған атайым
Зәйнулла Шәрифулла улы Ҡәйеповҡа

Түрҙә торған “моңдар батшаһына”
Таңғы елме килеп ҡағылды...
Сыңлап китте ҡылдар, ҡолағыма
Скрипка моңо салынды.

Ошо моңдо елдәр йырлай-йырлай
Оҙатҡандай ихлас алҡышлап,
Һаҡмарымдың бейек яр башында
“Ҡарабай”ға бейей ҡамыштар.

Һығыламы талдар Һаҡмарымда
Моңло “Таштуғай”ҙы ишетеп,
Кемуҙарҙан һайрай һандуғастар
Таныш моң-сыңдарҙы иш итеп...

Түрҙә торған “моңдар батшаһына”
Һинең ҡулдар, атай, ҡағылды:
Сайпылырға әҙер халыҡ моңо
Күңел үҙәненә ағылды...

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар