Мәл

← Үҙемдең күңелем

Мәл (Шиғыр) автор Лилиә Һаҡмар

Күңелемдең бишеге бар →

Ижад итеү ваҡыты: 23.12.2004.. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (57-се бит) ISBN 5-295-03798-3

Мәл

Күңелемдең сеңләп илағаны,
Йөрәгемдең әрнеп типкәне:
Ҡояш иретерлек мөхәбәттең
Хыялдарҙы ташлап киткәне…
Өмөт ҡаялары ыуалғаны,
Һүҙ-боҙҙарҙан хистәр туңғаны,
Наҙ һулышын
күңел һарайымдан
Әрһеҙ елдәр шашып ҡыуғаны.

Күҙҙәремдән йәш сыҡмаған мәлем,
Ауыҙымдан зарым сыҡмаған!
Тимәк,
мин йәшәйем!
Тамырҙарым
Серемәгән әле,
ныҡ һаман!

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар