Нывлӧн нылӧмыс (Лыткин Георгий Степанович)

by Лыткин Георгий Степанович

Югыд шондіӧй
Менам ныв ыджыд нылӧмӧй!
Югыд шондіӧй
Менам нывса мичӧй!
Югыд шондіӧй
Менам ӧксы ыджыд вынӧй!
Югыд шондіӧй
Менам оз дзоридзӧн дзордзалӧмӧй!
Эг на эшты кисьмыны-сӧвмыны,
Вуж выйӧн менӧ нетшкыштісны.
Югыд шондіӧй
Менам пельпом джуджда ветлӧмӧй!
Югыд шондіӧй
Менам морӧс пасьта ветлӧмӧй!
Югыд шондіӧй
Менам таг коль кокньыд юрӧй-банӧй!
Югыд шондіӧй
Менам кольк кыш шыльыд юрӧй!
Югыд шондіӧй
Менам мича нимӧй-юӧрӧй!
Югыд шондіӧй
Менам сявкъялӧмӧй-разъялӧмӧй!
Югыд шондіӧй
Менам ветлӧмӧй, мунӧмӧй!
Югыд шондіӧй
Менам кельчи этшӧн ворсӧмӧй!
Югыд шондіӧй
Менам сиг этшӧн гыбалӧмӧй!
Югыд шондіӧй
Менам сирпи этшӧн тивкъялӧмӧй!
Югыд шондіӧй
Менам ёді этшӧн пасьта пырысь ветлӧмӧй!
Югыд шондіӧй
Менам сын этшӧн садьмӧдчӧмӧй!
Югыд шондіӧй
Менам кӧч гӧн еджыд яйӧй!
Югыд шондіӧй
Менам нямыр небыд яйӧй!
Югыд шондіӧй
Менам оз тусь югыд вирӧй!
Тӧдан тэ: менам, коньӧрлӧн,
Кӧч гӧн еджыд яйӧй
Коз кырсьӧ кутіс пӧрны;
Оз тусь югыд вирӧй
Му бусӧ кутіс пӧрны;
Намыр небыд яйӧй
Зуд сімӧ кутіс пӧрны.
Югыд шондіӧй
Менам куим сё сывъяӧй!
Шудӧй кӧ оз пет менам, коньӧрлӧн,
Куим сё сывъяӧй кӧрт кӧртӧдӧ пӧрӧ.