Эксэй дыръя нылкышно
Пудо лыдын улэ вал,
Шудтэм муртлы тыш боды
Лыдтэм-чоттэм сюре вал.
Чебер нимзэ саптаса:
— Нушы тон, пача нушы,
— Пудо тон, нюжтэм пудо —
Нимало вал картъёссы.
— Кышно бере нылкышно,
— Марлы ярам маке со?
— Йырситӥз кыскан сяна
— Марлы тупатод сое?
Вазен озьы возизы,
Озьы мыскыл шуккизы;
Чагыр синмаз сяласа
Пуппыез кадь тӥязы
Нылкышнолэн мугорыз
Сьӧд выжез но ӵужоз вал.
Йырситӥз кутса картэз
Урам кузя но нюж нуллӥз.
Сутэр кадь чебер синмыз
Ӧз адӟылы шулдырез,
Ньӧр кадь веськыт мугорыз
Ӧз валалля эрикез.
Ӵукна потэм гур дураз
Усыкме вал бергаса,
Ӝыт потэм кубо вылаз
Бамзэ жумтэ вал черсыса.
Табере нылкышнолы
Паськыт эрик сётэмын,
Со шудтэм куанер муртлы
Огкадь улны косэмын.
