Нёнясян кагаяслӧн мыт
Медся ёна посни кагаяс кулалӧны мытысь да восӧмысь. Кымын водз пондам лечитны мыт висьӧм, сымын кокньыдджык сійӧс бырӧдны. Мытитігӧн оз позь кагаясӧс мый сюрӧ сёянӧн вердны. Некутшӧм лекарство оз отсав мый сюрӧнад вердігӧн.
Нёнясян кагаӧс оз ков вердны сюр нёньӧн, путӧм ваӧн, путӧм йӧлӧн, ырӧшӧн, рокӧн, няньӧн, кӧлачӧн, пуктасӧн. Оз ков сетны сылы нёнявны сакар, яблӧг. Нёнясян кагаӧс сӧмын мам йӧлӧн колӧ вердны, нёньӧдны быд кык час мысти. Мамлӧн кӧ йӧв этша, нёньӧдӧм коластъясын позьӧ юктавны висьысь кагаӧс неуна юммӧдыштӧм пуӧм ваӧн либӧ кизьӧриник тшайӧн. Вердӧм костъясас бӧрдӧмысь позьӧ сетны тыртӧм, пробкаӧн тупкӧм резинкӧвӧй нёнь. Быд сетӧм водзвылын колӧ сійӧс пожъявны пуӧм ваӧн.
Мӧс йӧлӧн вердан кагаӧс мытитігӧн колӧ дзикӧдз йӧлысь дугӧдлыны, юктавны сӧмын пуӧм ваӧн да кизьӧриник тшайӧн.
Кагаӧс восӧдӧ кӧ тшӧтш — кӧдзыд пуӧм ваӧн да тшайӧн унджыкысь колӧ юктавны. Ичӧтик тшайнӧй паньӧн васӧ вомас кисьтны.
Сутки ваӧн вердӧм мысти вердны висьысь кагаӧс ва сора сливкиӧн. Босьтны сливки, содтыны кык мында ва, неуна сакар, бура пузьӧдны. Йӧв доз, сюр и нёнь колӧ мыськавны быд вердӧм бӧрын мичаджыка. Гутъясысь, бусысь колӧ видзны найӧс вевттьӧмӧн.
Кага кӧ ёна горзӧ чужъясьӧмӧн, колӧ пуктыны кынӧм вылас шоныдтор: пӧсь перъян либӧ шоныд сетан компрес.
Гожӧмын оз ков дугӧдны кагаӧс мам нёньысь. Страда дырйи мамлы медбур босьтны кагаӧс аскӧдыс тшӧтш му вылӧ либӧ видз вылӧ. Гортад, омӧлик видзысь дінад, оз нин сійӧ красуйтчы.
|
This work is in the public domain in the United States but it may not be in other jurisdictions. See Copyright.
|