Пици-палакст/Обь-леенть чиресэ
ОБЬ-ЛЕЕНТЬ ЧИРЕСЭ
I
Истямо шкасто молевлить вирев ды вановлить, кода коткудавтнэ сроить эсист кудост-пизэст, кода пиже понав сукснэ каштордыть лопатнень потмова — вановлить ды кунсоловлить, кода эри-ашти виресь.
Истямо шкасто мельстэть а тукшны эрзянь велесь, косо шачить-касыть, косо ней самай моли покш робута — синтрить-тапить ташто велетнень, ташто эрямо койтнень, сроить од, колективень веле. Эрзя-мокшонь од веле.
* * *
Васолдо, пек васолдо чуди Обь-леесь. Туркестанонь степнень маласто северной ледовитой океанс — гуйкс таргавсь Сибиренть трокс.
Куроксто чуди Обь-леесь, чов марто чави берёконтень волнась, буто жалуби, мекс сон урузокс эри, мекс сонзэ кизэ колияк а прядови.
Бороздить Обь-леенть парахот, сезнить чама киськензэ вишка веншт (лоткат), черепаха лацо уить эзганзо сюрдов-сярдов плот, сон яла чуди ды чуди — кувака сонзэ кизэ, кувать, кувать нать а прядови.
Кода ванат чуди леенть ланкс — месть ансяк а ледить мелезэть, мезень арьсимат а совить пря потмозот.
[ 62 ] Вакссон, песоконть ланксо, „Якстере Тештесь“. Васень страницасонть покш буквасо сёрмадозь:
ЭРЗЯ-МОКШОНЬ ОКРУГ.
Обь-леесь яла чуди. Аволь ков, аволь ие — ламо пингеть сон уш чуди. Ламо-ведь чудесь, ламо шка ютась, ламо кизэть-телеть полавцть вейкест-вейкест...
Кузьма Алексеев. Кавто-колмо пинге ютась седе мейле, зярдо эрзя-мокшотнень кармасть панеме инязоронь ды помещикень кабалас. Превейстэ „изнясть“ эрзя-мокшотнень московонь инязортнэ „святейшей“ патриаршестванть марто. Чопуда народонть, кона кеми эрьва кодамо идолнэнь, эряви теемс православнойкс, эряви лемдямс. Пазонь лементь марто седе шождынестэ саевить кабалас.
Се шкастонть, зярдо эрзя-мокшонь народось эрясь верьсэ-сельвецэ, зярдо помещикнэ, попнэнь вийсэ, пикст понасть чопуда наротстонть, сестэ появась эрзя-мокшотнень юткс Кузьма Алексеев. Сокардыньзе сон эрзя-мокшотнень прядо пилькс — кепетець знаменитой Терюшовань бунтось.
Историк зярдояк сёрмацы, кода лепштизь те эрзя-мокшонь васень революционной востаниянть, историк сёрмацы, кода путызе прянзо эрзя-мокшонь оля-чинть кис Кузьма Алексеев, конанень буржуазиясь путнесь позорной лем — „Кузька — Мордовский Бог“.
Чуди яла ды ней уш сетьместэ Обь леесь. А токшить зярс эйсэнзэ парахотнэ ды веншне, а пувси чама киськензэ вармась; ансяк чись верде сялгиньзе срунанзо леентень, эжди веденть, кали песоконть.
— Таргамкат арасть, ялгай?
Эйзэнь мольсь сэрей ломань, варяв шляпасо, понксонзо прок осьминной мешокт.
— А тарган, максовлинь...
— Берянят ломанесь. Кона а тарги — се мень ломань.
Валтнэнь ёрты кель прястонзо прок вец галькат, эсинзэ сельтне буравсо пелить газетэнть ланкс.
— Нать, эрзяят?
— А тон думить?
— Эсинек ломань, значит.
[ 63 ] Озась ваксозон. Коли эсинек ломанесь — мекс а озамс. Саизе газетэнть. Ловны.
— Келеськак вана газетсэнть эсинек, ансяк ловномс мекс бути стака, прах сайсэ...
Аламос аштезь:
— Те вана — паро! Пек паро, ялгай! Эрзя-мокшонь автономия? Пек паро!
Ламо эрзя-мокшотнеде. Масторонь келес сравтнинзе сынст нужа-чись, масторонь келес паньсинзе сынст инязоронь правительствась.
Июль ковонь меельсь читнестэ ламо ломанень поцто лиссть покш мельс паронь валт:
— Эрзя-мокшонь автономия? Те паро! Пек паро!
II
Обь-леесь аламодо соракаць: те — азарьсь варма ковол сась косто бути, каподинзе берёк ланксто конёв панкснэнь, ёртынзе леентень, сонськак мартост — сормсизе леенть валаня чаманзо, амазылгаць леесь, мик чинтень мельсапаро теевсь — пель экшес кешсь.
— Ванан веденть ланкс, эрьва чистэ яла ванан... шачинь ведь ваксс, касынь ведь чиресэ, ней вана ветьтеме таркасо пикссэяк а кирьцамак, чи пас.
Ки те ломанесь, костонь сон, кодамо ведь ваксс шачсь — эзинь сода, но кунсолынь эйсэнзэ, кортынь мартонзо прок паро ялгам марто; киян мон ломанесь, костонян — сонгак эзь сода, но — кортась мартон прок умок содазь ломань марто, кортась месть эрявить, месть а эрявитькак. Мекс а кортамс, коли мон эрзяян, коли минь кавонек кортатано вейке шачума кельсэ.
— Эрямось, цёрабай, пек вадрякстомомо кармась. Тон вант: эрзя-мокшонь округ. Исяк куловлиньгак, течи аволинь маря истямо радостьтенть. Чи пас! Эстень секень вант а савияк тов эрямо молемс, яла теке седеем карми налкаеме, кода арьсезиван: эрзя-мокшотненьгак ули эсист округост.
— Киян мон ломанесь? Паряк тон арьсят: кодамояк бродяга!... Одижась монь бродяга ёнов яходи. Мон куть ютыя весе масторонть нучк-пачк, яла теке виде паронь бродягакс эзинь велявт... Да, зяро монь прява печксть [ 64 ]вармат-пиземеть — ломань кельсэ а ёвтавитькак. Да! Истямо тевесь...
Кодамоль те тевесь — мон эщо эзинь сода, ансяк неявсь парсте: те ломанесь астяк мастор лангонть нучк-пачк ютызе. Чаманзо ланкс ванозь те неявсь.
— Да, ули мезде кортамс; ней вана, кода минь эрятано эсь олясо, эсь паро мельсэ — ули мезэ лецтямс. Читне-ветне яла, мерить, ютыть. Стакасто ютасть монь читьне-ветне — пек стакасто!
— Тон вант: шачинь Рав чирес. Ставрополь ош маласо ули Барковка веле. А содасак? Кода истя? Тонсь — Самаронь ломанят. Те Барковка велесэнть мон касынь, эрямс тосо ансяк эзь савт тень...
— Мекс истя?
— Эх, однасум. А эряви теде кортамс. Ведьгеменце ие уш эрян масторонть ланксо. Комсь кавксово иеть седеем эйсэ кери стака тошна...
...Обь-леенть куншкава, чуди веденть мельга састыньке уйсь венш. Эйсэнзэ озадольть вете ломать. Колмо тейтерь-ават, кавто цёрат. Ломань вайгельтне кермандавсть двухрятка гармошканть марто, кона ульнесть веншсэ ащиця цёранть кецэ:
В полном разгаре страда деревенская, |
Те морось мекс бути токизе монь ялганть: сельведензэ кармасть чудеме. Ней ансяк хватинь: ялгась аламодо ирецтэ.
— Тон, однасум, илямак чумонт, — корты ялгась прок видезь, — мария моронть и — сельведень апак хватя тусть...
— Нать меньгак апарот ульнесть аватнень марто? — кевкстия ялганть.
Ялгась нардынзе сельведензэ, таргизе зепстэнзэ кисетэнзэ, илиштизе мекевланк, пурнась вишка цигаркине.
— Чияк меринь теть: комсь кавксово иеть кери эйсэнь тошна; умонь те тевесь, яла теке зярдояк а стувтови. Ульнинь сестэ комсь кавтово иесэ од цёра. Велесэ васень цёра ульнинь, тейтерьтне пек вечкилимизь. Монськак мартост кольнекшнынь. Месть а эрить од пинкстэ...
— Седеем, однасум, пачк ульнесь кевень кондямо, тейтерь-авас вестькак эзия нолтне, ансяк налксинь [ 65 ]мартост — ды налксевинь. Мейле, однасум, истя понгинь — седеемгак корёном тусь, ды монськак прянек пильгинек ваинь.
— Тевесь, однасумкай, истя лиссь. Молинь весть пойколкав лишмень тертямо. Чись ульнесь празник — ютко шка. Тертия лишменть, туинь якамо колкаванть, умарьть вешнян. Муинь, цёрабай, истямо умарь — ёжомгак майшь. Олда мерильть те умарентень. Мон абунгадынь, сон — визделгаць, аштетяно кавонек карадо-каршо, вейке-вейке ланкс а вантано. Чись истя лембестэ ды чевцтэ эждясь, виресь истя сэтьместэ аштесь, нармутне истя мазыстэ жойнесть — ютась абунгадумась ды виздимась, апак хватя кепедевсть прянок, седеяк апак хватя кутмордавинек.
— Олда ойме-седейнем! — тошкан пилезэнзэ: — мон тонть эйстэ пачк арьсинь, тон мельстэнь колияк эзить тукшно...
— Тонгак, Иван, мельсэнь аштить! — корты Олда. — Читькак арьсинь, эйстэть, ветькак бредилинь мартот. Салава, мери, тусь эйзэть седеем, кошксе лацо коськенесь тонть кисэ.
— Истя вана, однасум, понксь капканс седеем, тевтне пек парсте тукшность. Эринек, вейкенек-вейкенек вечкинек певтеме. Те вадрясь, конадо эрзятне мерить уцяска, мольсь аволь кувать.
— Шкатне сестэ стакальть. Модань аразесь повась эрзятнень. Паро модась ульнесь Орлов бояронть кецэ. Минек кодат бути ломать тонавтымизь: сокинк, мерить, бояронь моданть, мезеяк тенк а ули, ней, мерить, Росиянь келес бояртнэнь кецтэ моданть нельгить...
— Кенярцть минек атятне. Ургатецть сокамо. Ды акувать кенярдокшность. Недлянь трокс састь минек велес казакт. Истямо баня ушцть тенек — колияк а стувтовияк. Монь Олдась прянзо путызе те шкастонть...
— Кода истя?
— Истя вана: Олдань тетязо, Троша, ульнесь велень старустакс. Сон терьдизе народонть бояронь моданть сокамо. Казакнэ сех икеле сонзэ пря-кец кундасть. Пек чавизь атянть. Олда прок превстэ лиссь: капоць латалдо пелюма ды началникенть кирга-пакшонзо керизе. Азарьсь кискакс каявсть Олда ланкс казакнэ. Саизь мартост Ставрополев. Тосо, мейле уш маринек, повизь тюрьмасо.
[ 66 ] Истя вана теимизь казакнэ мода марто. Комсь ломань пансть Сибирев. Мартост — моньгак.
Ней вана грузчикан. Сыредеме уш карминь. Росияв молеме а й‘арьсянгак, аместь тосо тейнемс. Тонадынь Сибирентень. Эрзя-мокшотнеяк аламонь-аламонь кармасть эсь койсэст эрямонть тееме. Те пек паро. Тень кувалт, однасум, монь прас истят превть састь: Росиясо эрзя-мокшотнеде пек ламо, модась тосо аламо. Мон, однасум, Сибиренть нучк-пачк якия. Улить истят таркат, козонь ломань шачи, аволь сюро эли мезе. Вана не таркатнева пурнамс виев коммунат — сюронь фабрикат! Паро улевель — а ёвтавияк.
Чись мезе-бути ланкс кежиявць — кармась берякадомо: чи валгума ёндо састь валонь-вачкотень пельть, кармась валомо пиземе. Минь туинек.
— Кода акода эщо васоттяно зярдояк, — корты Иван-однасумось, — те газетэнть максык монень. Кавто сельмень лацо ванстомонзо карман...
Проштинек. Хватерэв молимань перть пря поцтон эсть тукшно Иван однасумонть валонзо:
— Сибирьсэ улить истят таркат, косо ломань шачи, аволь сюро эли мезе...
И арьсинь текень пес:
— Мекс бу минек эрзятненень а озамс эрямо не таркатненень. Мекс бу а строямс виев коммунат, конатнесэ а улить а нужа, а сельветь, а обидязь ломать.
Новосибирск-ош 1928 ие.