Од пингень вий/"Тонеть уш панжса"
«ТОНЕТЬ УШ ПАНЖСА»...
Монь эринь Жабинасо кооперациянть каршо кудосонть.
Вейксэ част чавить стенасонть. Кооперациясь пекстазь.
— Мень прича потмозонзо совась? — прикащикенть сёвнан. Яла теке а сы. Монень куш а эрявияк ды пек уш мелем мольсь кискань цийнемадонть.
Промить ломантне, кооперациясь пекстазь. Телень экше вармась кежей, сон пачкат юты. Ломантне эцить кудо бокантень вармадонть. Цепсэ содозесь яла онги.
— Азёка варштык, эзь поява, — чуки Марфа Еленань.
— Азё ды вант. Уш колмоксть лиснинь кинтень, весе сельме эрьгень ванынь, варманть каршо сельветь чудить сельмстэнь. Небось прича кандсы, кода моли мелезэ кудосо аштезь.
— Тон думат сон кудосо? — каясь вал Стёпа. — Злыдарди куваяк ды сими...
Эщо мезть бути арсесь кортамо Стёпа, появась Кирил Иваныч — кооператорось.
Мон аштян вальмало. Ванат, кода чиремкшнезь шаты.
Аватне кудо бокасонть либордозь ливтясть прок нарвицька алдо ципакат.
Варштынь, кооперациясь уш пекстазь. Кона шкастонть тусь? Маряса кортыцят.
— Адя уш панжик... Кияк ведь арась... Адя...
[ 97 ]Кирил Иванычесь синдтреви, ломанесь энялды.
— Ну уш адя, тонеть панжса...
— Нуда, кувать што ли литровканть макссак.
Кенкштне панжовсть. Максызе литровканть ды седе курок лисеме.
Ансяк понгавтызе панжоманть, ключонть путызе зепезэнзэ, видемтизе рунгонзо ды туиксэль. Зепезэ прок тулявкст эцезь, эйсэст кавто пелень-пель литровкат.
— Кирил Иваныч, аштек! — ве пельде эщо пижни Арка.
— Аштек... Арась... Аркадий, а ютко. — Сонсь шашты туеме.
Арка кундызе пинжак полдонть ды ранги.
— Кирил Иваныч, уш, инескеть, панжик. Масинця ведь, — энялды Арка икелензэ.
— Тонеть уш панжса. — Киря таго совась лавкасонзо. Максызе пель литровканть ды седе курок пекстамонзо. Ансяк лись кинтень, чии Кулина.
— Кирил Иваныч, уш, инескеть, панжик. Мушкт вана туинь заготовкас. — Кулина лоткась, мушконзо путынзе кинть лангс.
— Мень шайтян те шкане кандыть мушкот? Азё кудов! — быркадсь Киря ды гурьдякадозь тусь кудов.
— Киря леляй, уш колмоцеде сан, яла а ёвкстан. Саить...
— Мерсть тенть а сайсынь! — больши эзь велявт Киря.
Мон лисинь авиненть ваксс, кевкстия.
— Эрьва чине што ли истя?
[ 98 ]— Течи вадря, куш сакшность, недлянь-недля а появакшныяк.
Обедтэ мейле таго ломанть лавка икеле, таго онги кискась, таго учить Кирянь.
Вере пе ёндо сы цёра, сонсь капши мекс бути.
— Илядо учо кооператоронть. Сон ве цёра марто лопнясь винадо ды тюрьгадсть.
— Косо истя? — кевкстизь ломантне.
— Ды эсинзэ кудосо. Сонсь тапинзе ломаненть раманзо, козяйказо порксызе цёранть прянзо.
— Те аволь васенцеде ды паряк аволь остаткадояк...
Теке марто ломантне тукшность кудова.