Од пингень вий/Кадовсь Исайка ськамонзо
КАДОВСЬ ИСАЙКА СЬКАМОНЗО
Исайканизэ ашти коник лангсо. Стакасто оймензэ таркси. Новольсть аванть рунгозо, маштсь дарманозо. Кедензэ-пильгензэ а черькавтовить, арась моцезэ.
Сельме чирькезэ прок кшнинь пинкст мендевсть коняванзо, сельмензэ полдаськадомо кармасть. Исайка чийни кудованть. Талакадсь атясь.
— Мезть тейнемс, а? Фёкла, кодамо ёжот? Кадоват живстэ эли арась, а?
Исайка таймаскадсь ве таркас. Пильге санонзо киремеме кармасть, лангсо сорныть. Ашти Фёкла велькссэ. Фёкла кашт моли, ансяк шкань-шкань веньксты ды стакасто таргасы оймензэ. Стомавтсь авась. Чоп, пиштякась, майси шачома лангсо, кодаяк а шачты.
— Туемс бабушка, велесэ содыця ломань?
Фёкла чаравтсь прясонзо, келезэ турванзо трокс новольсь. Жарось пултазь-пулты эйсэнзэ, ашолгадсь весе латк-пандт теевсть кель прянтень.
— Арась... ба-бу-шка... м-он-е-нь... а... эря-ви... — прок сэрей калмсто кургстонзо лиссть не валтнэ.
Фёкла повнясы, кода клубсо фельдшерэсь ёвтнесь авань шачтомадо. Сон ёвтнесь, кодамо берянь кандыть авантень бабушкатне. Весе не валтнэ ледсть мелезэнзэ.
[ 68 ]— Мо-о-н-е-нь бу ф-е-е-ль--ш-е-р...
Сонсь «вырчк» кедензэ каизе мештензэ трокс. Исайка ношкстась Катя бабань кис. Те ломанесь содыця ломань велесэ. Кода кияк ормалгады, эли шачтомо пурны-сэрьни, истяк Катя бабанень.
Катя баба озносы-кортасы, комавсы-палавсы — «юты» ломаненть ормазо. Весе велесь пели мельдензэ.
— Мон кедь лангс ламо пакшат шачсть, содаса шачтовтома толконть. Мень а мезть тонавтомс, фельдшерэнтькак загоню...
Фёкла яла кувси, пря чави. Куломань ки ланга превензэ чиить.
— Нука, сяткинем-дугинем, седейнем, дайка велявтан-штюпатан, седей марязь токатан... — моткоди Катя баба Фёкла велькссэ. Верентень лоподсь рудазов, пеньксев кедезэ. Фёкла седеяк чуросто таркси оймензэ, келейстэ тона чива панжовсь кизэ.
— Фельш-е-ер... ф-е-е-ль-ш-е-е-р...
Кувси Фёкла, нили сельгенть, а нилеви. Коськсь курго потмозо, кедь панкст каясь келезэ.
— Си-м-е-м-с... д-ай-те с-и-м-е-м-с...
— Кундак куш вейкешка паз лем, яла седе ули шождыне.
Катя баба покш кече амульдясь ведь ды пачтизе Фёклань турвас. Фекла жаднойстэ валызе кургозонзо, арсесь мадстемензэ жаронть. Седеяк пек Фёкла кармась сорномо.
— Исайкакай, азё эщо киньгак тердть, — пшкадсь Катя баба. Исайка раздизе човонензэ ды тусь [ 69 ]Лизань кис. Лизаяк радовась: ломанькс ловить эйсэнзэ. Шны Лиза эсь прянзо. Аволь васенцеде моли бабушкакс, аволь васенце ломань тела раздемс. Сась.
— Мень тамашат тевтне? — сонсь озны, сельмтне прасть стомиця аванть лангс. Лиза тейнинзе некетнень, мезть тейнесь Катя баба. Седе вадрят арасельть. Фёкла яла стоми. Сэставозь лекси коник лангсо. Исайка чийни кардазганть, ков кучсызь «врачтне», тов моли, мезе вешить, сень максы.
Не бабушкатне мезе. Неде башка муевсь эщо седеяк дошлой. Ламбаське велестэ мик сась. Кеветеешка километрат Жабинасто, прок ведун чине мари. Те «врачось» седеяк покш тамашат тейсь.
Кода тензэ эрявсь, истя синтризе-янгизе пешксесэ аванть, кода ульнесь мелезэ, истя менчесь-тапась. Фёклань паметесь умок уш маштсь, умок уш а мари сэредькс, ансяк стамбарнэ ды чуросто кепсевсь мештезэ. Сеедьстэ автневсь кургозо, яла теке вал эзь лиссть, ансяк ойме коштованзо содавтсь, што ломанесь энялды, веши фельшер, веши эрямо чи. Но неть колмонест, прок гуйть потить верензэ, сезнить, пиштяканть, теланзо.
— Эйкакшось ашти трокс, эряви эстенек таргамс, — кармась кортамо Ломбаскень авась.
Тень каршо молицят арасельть. Ламбаскень авась кувать эзь дума, пелемскак мездеяк эзь пель. А васень ломанень ойме саи, а васень ломань калмс пани. Бути шачомстонзо а кулы, сестэ шачомдо мейле ломанесь иешка тарка лангсо резы, [ 70 ]теде мейле яла теке туи кельме калмов. Бути а туи, сестэ пингень перть пародо сельмезэ а неи, яла пиеме карми. Мезе ульнесь виезэ кармась ускомо эйкакшонть. Фёкла лаужакс ливтизе келензэ, видемтинзе пильгензэ, венемс Фёклань рунгозо. Больше эзизе тарга оймензэ, эзизе авть корты кургонзо.
Бабась верев кедензэ эзинзэ шляяк. Теке марто вализь летьке мода потс.
Кадовсь ськамонзо Исайка.