Озьы угось улӥзы (Дядюков)

Озьы угось улӥзы Автор: Иван Тихонович Дядюков

Поттэмын: Гудыри : газет. — 1920. — № 41. — 2-тӥ бам. Источник: Молот : журнал. — 1935. — № 5. — 31-тӥ бам.

Пашка Педор доры Петыр Иван лыктӥз куное: — Ӟеча улӥськод Педя?

— Улӥсько али каллен, Иван Петрович.

— Мар бен пӧраса дасяд мынам лыктонам?

— Мар пӧрамме ӝӧк вылэ пуктэм берам адӟод.

— Учконо иське пуксьыса…

— Пуксьы али, пуксьы, Иван Петрович.

Сиськемысь дугдэм бераз синзэ берыктыса лек кылын Педя шоры вазиз: — Сюдӥд ке но, аслам няненым, — шуса.

— Но, мынэсьтым сиид лэся ук?

— Мон сётӥсько тыныд нянь ужамед вылэ…

— Бен со сётэм нянед понна уен-нуналэн шутэтскытэк ук ужалляй мон тыныд!

— Ужад ке, киыд-а ма кылиз?

— Киы кылиз уг шуиськы мон, асьлэсьтым сии шуэмед понна йыры кур луиз.

— Укыр туж йырдэ кур карыса улыны эн дыше али, озьы вераськемед понна, тӧдьыос вуизы ке, мон тонэ чыртытӥд ошыто.

— Мар понна ошытод?

— Укыр туж трос тодэм поннад…

— Укыр сантэм но вӧсь карса возид, соин верасько: тынэсьтыд вить пуд няньдэ курко вал угось мон, собере со понна дас пуд тырисько вал мон тыныд — кызьы, пе, нош уд вера али улэмез?.. Тушмонъёс асьмеос…

— Табере умой угось улӥськоды ини музъеммез киады басьтэм бере…

— Умой угось улӥськом ини, берпалдэ чупаны турттыса уг улӥськы ни эксэй дыръя сямен, весь тыныд гинэ ужаса улӥсько вал, нош ачид визьтэммонад аракы юиськод вал угось. Зарнидэ лыдӟыса гуртад улӥськод вал ужаны ветлытэк, укыр лек синъёстэ поттылыса эн вераськы ни тон табере, кышкась ӧвӧл ни тынэсьтыд. Коть кӧня возьма на лыктэмзэс тӧдьыослэсь — аслэсьтыд пельёстэ сямен ик уд адӟы ни тон мусоосыдлэсь вуэмзэс… Табере тушмонъёс асьмеос.