Октябр водзын
Ме эськӧ кӧсйи лоны... шондіӧн,
Мед тайӧ Май медводдза лунӧ
Став мусӧ дорсянь дорӧдз гӧгӧртны,
Пӧсь биа чолӧм йӧзлы нуны.
* * *
Кыдз мӧйму, сідзжӧ таво, Май дырйи
Кумачӧн мичӧдсьӧны чумъяс,
Заводъяс, сиктъяс, каръяс, запаньяс...
И челядь чужӧм вылын — нюмъяс.
Со талун, сідз жӧ, кыдз и войдӧрво,
Став розйысь мичаджыкӧсь нывъяс.
И тан, и сэні — быттьӧ ӧзйӧны
Збой, кыпыд тувсов сьыланкывъяс.
Ме эськӧ кӧсйи лоны шондіӧн.
Мед тайӧ Май медводдза лунӧ
Став мусӧ дорысь-дорӧ гӧгӧртны,
Пӧсь чолӧм рытыввылӧ нуны,
Кӧн талун сиктъяс, каръяс сотчӧны,
Кӧн енэж здук кежлӧ оз раммы,
Кӧн талун, дона шойяс корсигӧн,
Оз унмовсьывны шогсьысь мамъяс.
Кӧн челядь ветлӧ, бӧрдӧ, чуксалӧ:
— Бур мамӧй, кӧн тэ, шыась, кӧні?
А гӧгӧр сынӧд потӧ-юклалӧ...
А гӧгӧр шуштӧм — шом да пӧим...
* * *
Ми ставным коркӧ вӧлім посниӧсь,
Ми повлім лыйӧм шыысь садьтӧг.
И миян пытшкысь сійӧ воясӧ,
Зэв уна быдмылісны батьтӧг.
Дзонь сиктъяс сідзжӧ коркӧ сотчисны,
Сьӧд тшынӧн вевттьысисны войяс,
И шогсьысь мамъяс сідзжӧ корсисны
Мужиклысь, пилысь дона шойяс.
Сэк шонді асывъяснас петавліс...
Быд асыв, ӧніямоз, сідзжӧ,
Но сылысь шондібансӧ, гажлунсӧ
Ми ыджыд шог пытшкын эг аддзӧ.
Дзик сідзжӧ озыръяс сэк тшӧгисны,
А йӧзлы кольліс сӧмын мыльӧс...
Лёк олӧм миянлы эз кажитчы, —
Ми вӧчим олӧмнымӧс выльысь.
Страналы подув, ёнлун, озырлун,
Ми вӧчим асланым ён киӧн.
И тайӧ муыс, ваыс, сынӧдыс
Дзик ставыс, ставыс талун миян.
Со талун Май. А аски тракторъяс
Колхозлысь ловзьӧдасны мусӧ;
Сьӧд му пласт рӧшкалігсор бергӧдчас
Да зарни кӧйдыс муас усьӧ.
А кытчӧдз кӧдза быдмас, розъялас,
Кор ковмас ытшкыны да куртны,
Став юяс кузя пуръяс-дзодзӧгъяс
Оз дугӧдчыны гора дзуртны.
Ой, сымда пу тан кывтас юясті, —
Мый весиг Эжва кутас ойдны.
Ой, сэтшӧм шобді быдмас му вылын,
Комбайнлы тырмас бура койтны.
Дзик син оз судз, — пыр кӧдза вольсасяс,
Кыдз саридз, — виччысь няньӧн письтас!
...А сьӧкыд шепта, медбур кольтасӧ
Колхоз Москваӧ арнас ыстас.
Ой, гажа лоӧ Лузйын, Визинын...
Кыдз миян став Сӧветскӧй муын.
И ыджыд, праздничнӧй кузь пызанын
Зэв уна лоас сёян-юан.
Кузь пызан гӧгӧр гӧстьяс пуксясны
И лоас сьӧлӧм вылын тулыс.
* * *
Ме эськӧ кӧсйи лоны... шондіӧн.
Мед тайӧ, Май медводдза лунӧ
Зэв ылӧ, рытыввылӧдз волыны,
Мыйвынысь, сьӧлӧмсяньным шуны:
— Октябр, нач сійӧ косьтас синвасӧ,
Нач сійӧ тырӧн шудсӧ кояс!
Бур вокъяс, чӧжӧ Майын вынъястӧ,
Октябр мед рытыввылӧ воас!
1941 во.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 82 years or less since publication (if applicable). |
|