Ош плетонан запон

Илдушкина Мария Алексеевна

Ош плетонан запон
Шаным тäнгем, сусун анжен, вычем
вады йӹде лäкмӹк олицäш.
Запон пачеш ош плетоным кычем -
äнят, лиэш мӹлäм угӹц - цäш.

Ошын-ошын вылге каеш плетон,
изи мардеж вӹсен кеä пак.
Ӹдӹр кäпем сусуэмдä запон:
пӹлгом цӹре - шӹдӹрвлä дон чак.

Соты шӹдӹр запон вӹлнӹ йыла,
йыла вадеш, сотемдäрä со.
Малын ӹдӹр кечӹнь тӹдӹ шыла..?
Кышты тäнгжӹ? Уке, атат мо.

Кодын тäнгӹн плетон ӹнде мӹлäм*.
Курым äштäш, курым, кечӹньок...
Пурым веле шанем мӹньӹ тӹлäт-
пуры лижӹ, лижӹ курымок!

Симсӹ цӹре, запон вӹлнӹш шӹдӹр,
ире корным угӹц мӹлäм пач...
Шӧртньӹ жерä, коднем мӹньӹ ӹдӹр
яратымы, курымешет лач.

• Перви плетоным рвезӹ ӹдӹрлäнжӹ подарен.