Пäртня печкӹш

Илдушкина Мария Алексеевна

Пäртня печкӹш
Шошым тольы, пäртня печкӹш,
Тек аваргыш куги укш.
Ыжар цӹрем пӧрттӱ ялштыш,
Кышкы вӹсӹш изи мӱкш.
Плетон семӹнь - шӱм ынгартыш.
Шошым мардеж вӹстäрä.
Мадын мадеш йäнгӹн мадыш,
Кыды шолеш вӹдвäкшлä.

Шергӹ тäнгӹм вады лимӹк
Вычен выча сад покшак.
Олен манеш тäнгем тӹмӹк:
"Кужын вычем шкетемок..."

Савыц ошы - цат олмавун
Пышым шäрä духи гань.
Ыдӹр цӹре, ой-й, ошнолан,
Нäрäштäжӹ вет махань!

"Шаным тäнгем, вычым йäнгем,
Тӹньӹм веле яратем!
Ядам курым лиäш тäнгем -
Тенге Йымы ямалтен."

Ыдӹр шӹмäн, йӹрен попа,
Пӹзӹргäлӹн онгжы лиш:
Коктын веле цäшӹм мона,
Кыды шергӹ ылеш пиш..."

Тäнгвлä пӹжгäт скамня вӹлнӹ,
Жерä тыртыш дон попат,
Куку мырым сусум, сӹлнӹм
Пелäш йäнгвлä тек шотлат.